Kaipuhan Mo Pa Daw na Pauswagon an Saimong Espirituwalidad?

1, 2. (a) Paano nauutob sa huring mga aldaw na ini an Isaias 60:22? (b) Ano an mga pangangaipo ngunyan sa daganon na kabtang kan organisasyon ni Jehova?

“AN DIKIT magigin sangribo asin an sadit magigin makusog na nasyon.” (Isa. 60:22, NW) Nauutob na sa huring mga aldaw na ini an makahulang mga tataramon na iyan. Sa nakaaging 2015 taon nin paglilingkod, 8,220,105 parahayag kan Kahadian an aktibong nakikikabtang sa paghuhulit sa bilog na kinaban! An huring kabtang kan hulang iyan dapat na makaapekto sa lambang Kristiyano huling an satong Ama sa langit nagsasabi: “Ako mismo, si Jehova, an maparikas kaiyan sa kapanahunan kaiyan.” Arog nin mga pasahero na nasa sarong lunadan na parikas nin parikas, namamati man niyato an marikas na pag-abante kan satong gibuhon—an paggibo nin disipulo. Ano an epekto sa sato kan pagrikas na ini? Ginigibo ta daw an satong pinakamakakaya bilang maigot na mga parahayag kan Kahadian? Dakul na tugang an nag-aaplay bilang auxiliary o regular payunir. Asin dai daw kita nauugma na mahiling na dakul an huminiro sa pangapudan na maglingkod kun sain mas dakula an pangangaipo o makikabtang sa iba pang teokratikong aktibidad?

² Pero, dakula pa man giraray an pangangaipo niyato para sa dugang pang trabahador. Kada taon, mga 2,000 na kongregasyon an nabibilog. Kun limang elder an kaipuhan sa kada bagong kongregasyon, 10,000 na ministeryal na lingkod kada taon an kaipuhan na makuwalipikar bilang elder. Nangangahulugan ini na rinibong iba pang brother an kaipuhan na umabot sa pribilehiyong magin ministeryal na lingkod. Kaya malinaw na ‘dakul [pa kitang] gigibuhon sa gibuhon kan Kagurangnan,’ asin bako sana para sa mga brother kundi pati man sa mga sister.—1 Cor. 15:58, NW.

3, 4. Ano an kaipuhan mong gibuhon tanganing umuswag sa espirituwal?

³ Basahon an 1 Timoteo 3:1.a An Griegong pandiwa na itrinadusir na “naghihinguwang maabot” nangangahulugan na mag-unat tanganing abuton an sarong bagay na tibaad harayo sa normal mong naaabot. Sa paggamit ni apostol Pablo kan tataramon na iyan, idinuduon niya na kaipuhan an paghihinguwa para umuswag sa espirituwal. Imahinaron an sarong brother na gustong makuwalipikar bilang ministeryal na lingkod. Napag-isip-isip niya na kaipuhan niyang maghinguwa para pauswagon an mga kuwalidad niya bilang Kristiyano. Dangan, kun saro na siyang ministeryal na lingkod, padagos siyang maghihinguwang marhay para makuwalipikar na magin elder. Sa kada pagkakataon na iyan, naghihinguwa siyang marhay na maabot an mga kuwalipikasyon na kaipuhan para mag-asikaso nin dagdag na responsabilidad sa kongregasyon.

⁴ Sa kaagid na paagi, tanganing maabot an saindang mga pasuhan, kaipuhan man na maghinguwang marhay an mga brother asin sister na gustong magin payunir, Bethelite, o boluntaryo sa pagtugdok nin mga Kingdom Hall. Pag-ulayan niyato kun paano kita gabos dinadagka kan Tataramon nin Diyos na padagos na umuswag sa tunay na pagsamba.

 5. Paano magagamit kan mga hoben an saindang kusog sa mga gibuhon na pang-Kahadian?

⁵ Igwa an mga hoben kan kinakaipuhan na kusog tanganing urog pang makapaglingkod ki Jehova. (Basahon an Talinhaga 20:29.) An nagkapirang hoben na brother asin sister na naglilingkod sa Bethel nagtatabang sa pag-imprenta saka pag-bind nin mga Bibliya pati mga literatura sa Bibliya. Dakul na hoben na brother asin sister an nakikikabtang sa pagtugdok asin pagmentenar nin mga Kingdom Hall. Kun magkaigwa nin mga kalamidad, may mga hoben na minaiba sa mga mas eksperyensiyadong Saksi sa pagtao nin ayuda. Asin dakul na hoben na payunir an nagtatabang na maipaabot an maugmang bareta sa mga komunidad nin mga katutubo asin mga iba an lengguwahe.

6-8. (a) Paano binago nin sarong hoben na lalaki an pagmansay niya sa paglilingkod sa Diyos, asin ano an nagin resulta? (b) Paano niyato ‘mananamitan asin mahihiling na si Jehova marahay’?

⁶ Posibleng marhay na nasasabutan mo an kahalagahan kan bilog na pusong paglilingkod sa Diyos. Pero, paano kun mamatian mo an arog kan namatian kaidto nin sarong brother na an pangaran Aaron? Dawa nagdakula siya sa pamilyang Kristiyano, inadmitir niya: “Makabublay an mga pagtiripon saka an paghuhulit.” Gusto man niyang maugmang maglingkod sa Diyos pero dai niya aram kun taano ta bako siyang maugma. Ano an ginibo niya?

⁷ Hininguwa ni Aaron na magkaigwa nin espirituwal na rutina arog kan pagbasa nin Bibliya asin pag-andam para sa mga pagtiripon saka pagkomento diyan. Nangurugna, pinunan niyang regular na mamibi. Mantang mas namumutan niya si Jehova, mas nag-uuswag man an saiyang espirituwalidad. Puon kaidto, nagin maugma na si Aaron; nagpayunir siya, nagtabang sa pagtao nin ayuda sa panahon nin kalamidad, asin naghulit sa ibang nasyon. Naglilingkod ngunyan si Aaron sa Bethel asin saro na siyang elder. Ano an masasabi niya sa pinili niyang buhay? “‘Nanamitan ko asin nahiling na marahayon si Jehova.’ Para sako, may pagkakautang ako sa saiya huli sa mga bendisyon niya, kaya dapat akong gumibo nin urog pa sa paglilingkod sa saiya, asin huli kaini, dakul pang bendisyon an inako ko.”

⁸ Nagkanta an salmista: ‘An mga naghahanap ki Jehova dai magkukulang nin ano man na marahay.’ (Basahon an Salmo 34:8-10.) Iyo, nungkang sinusudya ni Jehova an linalauman kan mga maigot na naglilingkod sa saiya. Mantang ginigibo niyato an bilog niyatong makakaya sa paglilingkod sa saiya, ‘nananamitan asin nahihiling niyato na si Jehova marahay.’ Asin kun bilog na kalag niyatong sasambahon an Diyos, daing kapantay na kaugmahan an satong mamamatian.

9, 10. Taano ta mahalaga na padagos kang ‘maghalat’?

⁹ Mantang hinihinguwa mong abuton an saimong mga pasuhan, padagos na ‘maghalat.’ (Miq. 7:7, An Marahay na Bareta Biblia) Dawa ngani tibaad itugot ni Jehova na maghalat nguna an saiyang maimbod na mga lingkod bago matawan nin mga pribilehiyo o magkaigwa nin marahay na mga pagbabago sa saindang kamugtakan, siguradong pirmi niya sindang sinusuportaran. Ipinanuga ni Jehova ki Abraham na magkakaigwa ini nin aking lalaki, pero kinaipuhan kan patriyarka na padagos na magtubod asin magin mapasensiya. (Heb. 6:12-15) Dawa ngani naghalat nin dakul na taon si Abraham bago mamundag si Isaac, dai nangluya an saiyang buot, asin dai man sinudya ni Jehova an linalauman ni Abraham.—Gen. 15:3, 4; 21:5.

¹⁰ Bakong madali an maghalat. (Tal. 13:12) Kun pagpaparaisipon ta an satong kamugtakan asin kun gurano kita kadisganado, puwede kitang pangluyahan na marhay nin buot. Imbes, sarong kadunungan kun gagamiton ta an satong oras tanganing pauswagon an satong espirituwal na mga kuwalipikasyon. Mangnuhon an tulong paagi tanganing magibo ini.

11. Anong Kristiyanong mga kuwalidad an puwede tang hinguwahon na pauswagon, asin taano ta mahalaga iyan?

¹¹ Pauswagon an Kristiyanong mga kuwalidad. Kun babasahon asin huhurop-hurupon ta an Tataramon nin Diyos, mapapauswag niyato an satong kadunungan, pakasabot, tamang paghusgar, kaaraman, kakayahan nin pag-iisip, asin pagkaigwa ta nin tultol na isip. Mahalagang marhay na igwa kan mga kuwalidad na ini an mga nanginginot sa tunay na pagsamba. (Tal. 1:1-4; Tito 1:7-9) Asin mantang binabasa niyato an satong mga publikasyon na basado sa Bibliya, nasasabutan ta an pagmansay nin Diyos sa dakul na bagay. Aroaldaw kitang napapaatubang sa pagdesisyon dapit sa paglilibang, pagbado saka pagpakarhay sa sadiri, pagkapot nin kuwarta, asin kun paano niyato tatrataron an iba. Paagi sa pag-aplikar kan mga nanunudan niyato sa Bibliya, makakagibo kita nin mga desisyon na makakapaugma ki Jehova.

12. Paano mapapatunayan kan mga miyembro kan kongregasyon na mapagtitiwalaan sinda?

¹² Patunayan niyato na mapagtitiwalaan kita. Brother man kita o sister, kaipuhan na gibuhon niyato an satong pinakamakakaya tanganing magibo an ano man na teokratikong asignasyon sa sato. Bilang gobernador, nag-asignar si Nehemias nin mga lalaki hali sa banwaan nin Diyos para iyo an mag-asikaso sa manlain-lain na responsabilidad. Sairisay an mga pinili niya? Idtong mga may takot sa Diyos, mapagtitiwalaan, asin maaasahan. (Neh. 7:2; 13:12, 13) Siring man ngunyan, “bilang mga katiwala, an inaasahan sa sainda iyo na magin maimbod sinda.” (1 Cor. 4:2, NW) Naririsa nin dakul an marahay na mga gibo.—Basahon an 1 Timoteo 5:25.

13. Paano mo maaarog an halimbawa ni Jose kun bakong makatanusan an pagtratar sa saimo kan iba?

¹³ Tugutan si Jehova na dalisayon ka. Ano an gigibuhon mo kun bakong makatanusan an pagtratar sa saimo kan iba? Tibaad puwedeng husayon mo tulos sa sainda an mga bagay-bagay. Pero kun minsan, lalong naggagrabe an problema kun padagos mong idedepensa an sadiri mo asin ipipirit na ika an tama. Dawa ngani bakong makatanusan an nagin pagtratar ki Jose kan mga tugang niyang lalaki, dai siya nagtanom nin raot nin buot sa sainda. Dangan pakalihis nin panahon, putik siyang inakusaran kan iba asin bakong makatanusan siyang ibinilanggo. Pero, tinugutan niyang giyahan siya ni Jehova sa masakit na mga panahon na iyan. Ano an nagin resulta? ‘An tataramon [ni Jehova] an duminalisay sa saiya.’ (Sal. 105:19, An Banal na Biblia) Kan matapos an mga pagbalong idto, nagin kuwalipikado si Jose para sa sarong espesyal na asignasyon. (Gen. 41:37-44; 45:4-8) Kun napapaatubang ka sa masakiton na mga problema, mamibi ka para sa kadunungan, gumawi saka magtaram na may kahuyuan, asin maglaom sa Diyos na tatawan ka niya nin kusog. Tatabangan ka ni Jehova.—Basahon an 1 Pedro 5:10.

14, 15. (a) Taano ta kaipuhan niyatong ‘danay na tawan nin atensiyon’ an satong pamamaagi nin pagtutukdo? (b) Paano ka makikibagay sa nagbabagong mga kamugtakan? (Hilingon an ritrato sa kapinunan kan artikulo asin an kahon na “Andam Ka Daw na Magpurbar nin Ibang Pamamaagi?”)

¹⁴ Sinadol ni Pablo si Timoteo: “Padagos kang magpokus sa ginigibo mong pagbasa sa atubangan nin mga tawo, sa pagsadol, asin sa pagtutukdo. Danay mong tawan nin atensiyon an saimong sadiri asin an saimong itinutukdo.” (1 Tim. 4:13, 16, NW) Eksperyensiyado nang parabalangibog kan Kahadian si Timoteo. Pero, magigin epektibo sana an saiyang ministeryo kun ‘danay niyang tatawan nin atensiyon’ an saiyang itinutukdo. Dai niya puwedeng isipon na pirming mahimati an mga tawo sa kinatudan na niyang pamamaagi nin pagtutukdo. Tanganing padagos niyang maabot an saindang puso, kaipuhan niyang ibagay sa saindang pangangaipo an saiyang pamamaagi nin pagtutukdo. Bilang mga parabalangibog kan Kahadian, iyan man an kaipuhan niyatong gibuhon.

¹⁵ Sa parati, mayo sa harong an mga tawo pag kita naghaharong-harong. Sa ibang lugar, dai kita nakakapaghulit sa nagkapirang apartment asin guwardiyadong subdibisyon. Kun arog kaini sa teritoryo nindo, puwede mo daw purbaran an ibang mga pamamaagi nin paghuhulit kan maugmang bareta?

16. Paano napatunayan an pagigin epektibo kan pagpapatotoo sa publiko?

¹⁶ An pagpapatotoo sa publiko sarong marahayon na paagi sa pagpapalakop kan maugmang bareta. Dakul na Saksi an nagin epektibong marhay asin nagin maugma sa pakikikabtang sa pamamaaging ini. Nagtatagama sinda nin panahon para dumanan an mga istasyon nin tren asin bus, saudan saka parke, asin iba pang pampublikong lugar tanganing makipag-ulay sa mga tawo. Gamit an tamang paghusgar, puwedeng punan nin sarong Saksi an pakikipag-ulay paagi sa pagsambit sa nakaagi pa sanang bareta, pagsabi nin mararahay na bagay dapit sa mga aki kan kaulay niya, o paghapot mapadapit sa trabaho kaini. Mantang nagpapadagos an pag-uulay ninda, masambit nin sarong punto hali sa Kasuratan an parahayag asin hahaputon an kaulay kun ano an masasabi kaini dapit diyan. Sa parati, gusto kan mga tawo na makaaram nin urog pa manungod sa Bibliya.

17, 18. (a) Paano ka magkakaigwa nin kumpiyansa na magpatotoo sa publiko? (b) Mantang nakikikabtang ka sa ministeryo, paano makakatabang sa saimo an pag-arog ki David na gustong-gustong pirming mag-umaw ki Jehova?

¹⁷ Kun nadidipisilan kang magpatotoo sa publiko, dai sumuko. Si Eddie, sarong payunir sa New York City, nag-aalangan na makipag-ulay sa mga tawo sa publiko. Pero, nag-abot an panahon na nagkaigwa na siya nin kumpiyansa. Ano an nakatabang sa saiya? Sinabi niya: “Sa pampamilyang pagsamba mi, nagre-research kami kan agom ko nin mga simbag sa mga pagkontra asin sa mga opinyon kan mga tawo. Naghahagad man kami nin suhestiyon sa ibang tugang.” Ngunyan, gustong-gusto na ni Eddie an pagpapatotoo sa publiko.

¹⁸ Mantang mas nadudugangan an saimong kakayahan asin kumpiyansa sa paghuhulit kan maugmang bareta, mahihiling kan iba an pag-uswag mo sa espirituwal. (Basahon an 1 Timoteo 4:15.) Dugang pa, siguradong mauumaw mo an satong Ama sa langit arog kan ginibo ni David, kan siya magkanta: ‘Uumawon ko si Jehova sa gabos na panahon; an pag-umaw sa saiya [pirming yaon] sa sakuyang nguso. [Ipaghahambog] ko si Jehova; an mga mahuyo maghihinanyog asin mag-uurugma.’ (Sal. 34:1, 2) Asin bilang resulta kan saimong ministeryo, posibleng marhay na matabangan mo an mga mahuyo na magin lingkod ni Jehova.

19. Taano ta dapat na magin maugma an sarong maimbod na lingkod ni Jehova dawa nalilimitaran na siya kan saiyang kamugtakan?

¹⁹ Nagkanta man si David: ‘Pamurawayon ka lugod O Jehova kan gabos mong linalang; asin mag-uumaw sa saimo an saimong mga [maimbod]. An kamurawayan kan saimong paghadi sasabihon ninda, asin mataram [sinda] dapit sa saimong [pagkamakakamhan], tanganing ipaisi sa mga aki nin mga tawo an saimong [makakamhan na mga gibo], asin an kamurawayan kan [kagayunan] kan saimong paghadi.’ (Sal. 145:10-12) Siyertong ipinapahiling kan mga tataramon na ini an sabuot kan gabos na maimbod na mga Saksi ni Jehova. Pero paano kun nalilimitaran na an saimong pakikikabtang sa ministeryo sa langtad huli sa hilang o paggurang? Pirming girumdumon na mantang ipinapakipag-ulay mo an maugmang bareta sa mga tawong nakapalibot sa saimo, arog kan mga doktor asin nars, napapamuraway kan saimong sagradong paglilingkod an satong marahayon na Diyos. Kun napreso ka huli sa saimong pagtubod, posibleng marhay na ipinapakipag-ulay mo pa man giraray sa iba an katotoohan kun itinutugot kan kamugtakan, asin napapaugma mo kaiyan an puso ni Jehova. (Tal. 27:11) Ikinakaugma man ni Jehova an padagos mong paggibo kan saimong espirituwal na rutina dawa solo kang Saksi sa pamilya. (1 Ped. 3:1-4) Dawa nasa masakit kang mga kamugtakan, mauumaw mo si Jehova asin mapapauswag mo an saimong espirituwalidad.

20, 21. Kun pinagkatiwalaan ka nin dugang pang gibuhon sa organisasyon ni Jehova, paano ka magigin bendisyon para sa iba?

²⁰ Siguradong bebendisyunan ka ni Jehova kun padagos mong pauuswagon an saimong espirituwalidad. Tibaad sa paggibo nin dikit sanang pagbabago sa saimong iskedyul o istilo nin pamumuhay, urog kang magkakaoportunidad na maihulit sa mga tawong nangangaipo nin paglaom an mahalagang marhay na katotoohan hali sa Diyos. Dugang pa, makikinabang na marhay an saimong mga kapagtubod sa pag-uswag mo sa espirituwal asin sa pagigin mong mapagsakripisyo. Asin huli sa mapakumbaba mong paghihinguwa sa kongregasyon, siguradong bebendisyunan ka nin pagkamuot, pagpapahalaga, asin suporta hali sa iba pang namumuot ki Jehova.

²¹ Baga man dakul na taon na o pirang bulan pa sana kitang naglilingkod ki Jehova, gabos kita puwedeng umuswag sa satong pagsamba sa saiya. Pero paano matatabangan kan maygurang na mga Kristiyano an mga baguhan na umuswag sa espirituwal? Pag-uulayan niyato ini sa masunod na artikulo.