LEKSIYON 6

Malinaw na Pagpaliwanag kan mga Teksto

Juan 10:33-36

SUMARYO: Dai basta pagbasahon sana an teksto dangan maglipat na sa sunod na punto. Siguraduhon na magin malinaw sa mga nagdadangog kun paano an binasa mong teksto konektado sa punto na gusto mong palatawon.

KUN PAANO GIGIBUHON:

Isuway an importanteng mga tataramon. Pagkabasa nin teksto, iduon an mga tataramon na direktang konektado sa panginot na punto na gusto mong palatawon. Puwede mong utruhon an mga tataramon na iyan o magbangon nin hapot na makakatabang sa mga nagdadangog na makua an importanteng mga tataramon.

Kun magamit ka nin ibang mga tataramon tanganing sabihon giraray an punto sa tekstong binasa, siguraduhon na makukua man giraray kan mga nagdadangog kun paano an mga tataramon sa binasa mo konektado sa panginot na punto na gusto mong palatawon.
Iduon an punto. Pagkatapos na maintrodusir an teksto na nasa isip an punto na gusto mong palatawon, ipaliwanag kun paano konektado sa puntong iyan an importanteng mga tataramon sa binasang teksto.

Mantang ipinapaliwanag mo an teksto, papagdanayon na nakabuklat an Bibliya. Makakatabang iyan sa mga nagdadangog na maikonektar an saimong sinasabi sa tekstong binasa.
Gibuhon na simple an paliwanag. Likayan na magkomento sa mga detalye na dai man nagsusuportar sa punto na gusto mong palatawon. Base sa dati nang aram kan mga nagdadangog, pag-isipan kun gurano kadakul na detalye an kaipuhan tanganing magin malinaw asin masabutan an punto.