Ibuuku lya Kubalilapo Ilya kwa Samwele

25 Mu kupita kwa nshita Samwele+ alifwile; kabili abena Israele bonse balilongene pa kuti bamulooshe kabili bamushiike pa ng’anda yakwe mu Rama.+ Lyena Davidi alimine aya ku matololo ya Parani.

2 Nomba mu Maone+ mwali umuntu uwalebombela ku Karmele.*+ Uyu muntu ali umukankaala nga nshi; akwete impaanga 3,000 ne mbushi 1,000, kabili pali iyi nshita alebeya impaanga shakwe ku Karmele. 3 Uyu muntu ali ni Nabali,+ no mukashi wakwe ali ni Abigaili.+ Umukashi wakwe ali uwa mano kabili uwayemba, lelo umulume wakwe umwina Kalebu+ ali umunkalwe kabili alecita ifyabipa.+ 4 Ilyo Davidi ali mu matololo, aumfwile ukuti Nabali alebeya impaanga shakwe. 5 E ico Davidi atumine abalumendo 10 kabili abebele ati: “Kabiyeni ku Karmele, kabili nga mwafika kuli Nabali, muyenjipushishako ifyo ali. 6 Lyena muyemweba amuti, ‘Ube no mutende na ba mu ng’anda yobe babe no mutende na fyonse ifyo wakwata fibe umutende. 7 Nomba ning’umfwa ukuti ulebeya impaanga. Ilyo bakacema bobe bali na ifwe, tatwabacitile icabipa nangu cimo+ kabili tabalufishe akantu nangu kamo inshiku shonse isho bali mu Karmele. 8 Wipushe abalumendo bobe, balakulondolwela. Shi pokelela bwino abalumendo bandi, pantu twaisa pa nshita iisuma.* Shi peelako ababomfi bobe no mwana obe Davidi fyonse ifyo wingatupeelako.’”+

9 E ico abalumendo abo Davidi ali nabo balile kuli Nabali kabili bailemweba fyonse ifyo Davidi alandile. Ilyo bapwishishe ukumweba, 10 Nabali aebele ababomfi ba kwa Davidi ati: “Bushe Davidi uyo wine nani, kabili mwana Yese nani? Muno nshiku ababomfi abengi balefyuka sana bashikulwibo.+ 11 Cinshi nalabulila umukate wandi na menshi yandi ne nama isho njipaile abalebeya impaanga shandi mpeele abaume abo nshishibe no ko bafumine?”

12 Abalumendo ba kwa Davidi balibwelelemo kabili bailemweba amashiwi yonse aya. 13 Ilyo line fye Davidi aebele abaume ali nabo ati: “Cila muntu akakile ulupanga lwakwe mu musana!” E ico cila muntu alikakiile ulupanga lwakwe,+ kabili Davidi na o alikakiile ulupanga lwakwe. Abaume nalimo 400 baile na Davidi, lelo abaume 200 bashele balelinda ifipe.

14 Ilyo ifi fyalecitika, umo pa babomfi aile-eba Abigaili, muka Nabali ati: “Davidi acituma abantu abacifuma mu matololo abacisa mu kuposha* shikulwifwe, lelo ena acibasaalula sana.+ 15 Ilyo twali na ba bantu mu mpanga balitusungile bwino. Tabatucitile icabipa nangu cimo, kabili tatwalufishe akantu nangu kamo inshiku shonse isho twali nabo.+ 16 Baletucingilila kwati lilinga ubushiku na kasuba, inshiku shonse isho twali nabo ilyo twalecema impaanga. 17 Nomba citenipo cimo, pantu nga tamwacitepo nangu cimo ninshi ifyalacitikila shikulwifwe na ba mu ng’anda yakwe+ bonse tafyawame. Shikulwifwe cinangwa,+ takuli uwingamweba icintu aumfwa.”

18 E ico Abigaili+ alyangufyenye ukubuula imikate 200, imitondo ya mwangashi iikalamba ibili, impaanga 5 isho bapekanishiishe limo, amagaloni* 5 aya ngano* ishasalulwa, amakeke 100 aya myangashi iyauma na makeke 200 aya makunyu, kabili fyonse ifi afibikile pa mpunda.+ 19 Lyena aebele ababomfi bakwe ati: “Tangileni. Nalamukonka pa numa.” Lelo umulume wakwe Nabali tamwebele nangu cimo.

20 Ilyo Abigaili aleya pa mpunda, ulupili lwalimucingile kabili ilyo line Davidi na baume abo ali nabo baleisa ninshi nabamulungama, kabili alikumene nabo. 21 Nomba Davidi alelanda ati: “Kanshi naicushishe fye filya nacingilile ifintu fyonse ifya uyu muntu mu matololo. Pa fintu fyakwe fyonse tapali nangu cimo icalubile,+ nomba ancita ifyabipa pa fisuma ifyo namucitiile.+ 22 Lesa nakande abalwani ba kwa Davidi, kabili abakande sana nga ca kuti mailo ulucelo pa baume* ba kwa Nabali bonse pakaba uukashala.”

23 Ilyo Abigaili amwene Davidi, bwangu bwangu alikile pa mpunda kabili awile ubukupeme pa ntanshi ya kwa Davidi. 24 Lyena afukamiine pa makasa ya kwa Davidi e lyo amweba ati: “Mwe shikulu, pali ici icilubo nine mupeelelemo umulandu; lekeni ne mubomfi wenu nande na imwe, kabili umfweni ifyo ne mubomfi wenu nalalanda. 25 Mwe shikulu mwibika amano kuli uyu Nabali+ icinangwa, pantu aba fye ngo mwalola ishina lyakwe. Ishina lyakwe ni Nabali,* kabili cipumbu. Lelo ine ne mubomfi wenu, abalumendo abo mwacituma nshacibamona mwe shikulu. 26 Nomba mwe shikulu, na pali Yehova na pali imwe bene, ni Yehova e umuleseshe+ ukusuumya umulopa+ kabili e umuleseshe ukulandula. Abalwani benu na bafwaya ukumucita ifyabipa bengaba nga Nabali. 27 Nomba mwe shikulu+ pokeni ubu bupe*+ ubo ne mubomfi wenu namuletela, mupeele abalumendo benu. 28 Shi beleleni ne mubomfi wenu uluse pa cilubo ncitile, pantu nangu cibe shani Yehova akalenga ing’anda yenu ikabe iyakosa pa nshita iitali,+ pantu mwe shikulu mulelwa inkondo sha kwa Yehova,+ kabili tamwacita nangu cimo icabipa inshiku shenu shonse.+ 29 Nga ca kuti umuntu amwimina kabili alefwaya ukumwipaya,* Yehova Lesa wenu akamucingilila* nga filya umuntu acingilila ifyuma fyakwe ifili mu mufuko. Lelo abalwani* benu akabasukusa nga filya basukusa ilibwe mu cisukushilo. 30 Kabili ilyo Yehova akamucitila ifisuma fyonse ifyo amulaya mwe shikulu, akamusonte no kuba intungulushi ya bena Israele,+ 31 tamwakaleumfwa ububi kabili tamwakalelanguluka* pantu ninshi tamwasuumishe umulopa apabula umulandu kabilii tamwalandwile.+ Ilyo Yehova akamucitila ifisuma mwe shikulu, mukanjibukishe ne mubomfi wenu.”

32 E lyo Davidi aebele Abigaili ati: “Acindikwe Yehova Lesa wa kwa Israele, uwacikutuma buno bushiku mu kunkumanya! 33 Lesa akupaale pa mano yobe! Kabili engakupaala pa kundesha ukusuumya umulopa+ na pa kundesha ukulandula buno bushiku. 34 Aukanayangufyanya ukwisankumanya,+ na pali Yehova Lesa wa kwa Israele uwacindesha ukukucita ububi,+ mailo ulucelo pa baume* ba kwa Nabali+ nga tapashele nangu umo.” 35 E lyo Davidi apokele ifyo amuleteele, kabili amwebele ati: “Kabiye umutende ku mobe. Ning’umfwa ifyo wanjeba, kabili nkakucitila ifyo walanda.”

36 Pa numa, Abigaili alibwelelemo kuli Nabali, kabili Nabali alipangile umutebeto mu ng’anda yakwe kwati mutebeto wa mfumu. Nabali alesekelela* kabili alikolelwe sana. Abigaili tamwebele nangu cimo mpaka ulucelo. 37 Ulucelo ilyo Nabali akololweke, e lyo umukashi wakwe amwebele ili ilyashi. Lyena umutima wakwe waishileba ngo mutima wa muntu uwafwa, kabili umubili wakwe waishilekosa nge libwe. 38 Pa numa ya nshiku nalimo 10, Yehova alipeye Nabali.

39 Ilyo Davidi aumfwile ukuti Nabali nafwa, atile: “Acindikwe Yehova uwanandwilako+ pa fyo Nabali+ anseebenye kabili uwalenga ne mubomfi wakwe nicita icabipa nangu cimo,+ kabili Yehova nakanda Nabali pa fyabipa ifyo alecita!” Lyena Davidi atumine aba kuyamulanshishako Abigaili pa kuti abe umukashi wakwe. 40 E ico ababomfi ba kwa Davidi baile kuli Abigaili ku Karmele kabili bamwebele abati: “Davidi natutuma ukwisamusenda pa kuti muyeba umukashi wakwe.” 41 Ilyo line alimine, afukama afisha no mutwe panshi e lyo abeba ati: “Umusha wenu, naipeelesha ukuba umubomfi wa kusamba amakasa+ ya babomfi ba kwa shikulu.” 42 Lyena Abigaili+ alimine bwangu bwangu anina na pa mpunda. Kabili ababomfi bakwe abanakashi 5 balemukonka pa numa ilyo aleya pamo na bo Davidi atumine, kabili aileba umukashi wakwe.

43 Pali iyi nshita ninshi Davidi alyupa Ahinoamu+ umwina Yesreele,+ e ico aba abanakashi bonse babili baishileba abakashi bakwe.+

44 Lelo Shauli aufishe umwana wakwe Mikali+ uwali umukashi wa kwa Davidi kuli Palti,+ umwana wa kwa Laishi, umwina Galimu.