Ukukumana Kwaibela mu Moscow pa lwa Kukanabomfya Umulopa mu Kulepula Abalwele

INSHILA SHA KUSENGULWILAMO MU CIFULO CA KUBOMFYA UMULOPA MU KULEPULA e lyashi lyalelandwapo pa kukumana kwaliko mu Moscow, Russia, pa October 6, 1998 ukwa badokota ukufuma mu fyalo fyapusanapusana. Badokota ukucila pali 800 balisangilweko ku kumfwa ifyalelandwa pali uku kukumana pa Vishnevskij Institute of Surgery, ukwacitikile pamo ne cisaka caleitwa Sixth All-Russian Congress of Anaesthesiologists and Intensive Care Specialists.

Uwali kale Cilolo wa cipani ca fya Bumi uwa calo ca Soviet Union, profesa Andrey Ivanovich Vorobiev, nomba umukalamba uulolekesha ku mibombele ya fya mulopa pe sukulu lya Russian Academy of Medical Sciences, mu Moscow, asengeele badokota ku co aitile “ukukumana kwa pa kusanga inshila sha kusengulwilamo ukucilo kubika umulopa mu balwele.”

Ilyo alelondolola umulandu ukukumana kucindamine, Vorobiev apitulwike mu “masanso yabipisha ayalengwa no kubikwamo umulopa.” Atile icilenga abana abengi abalwala hemophilia (ukufuma kwa mulopa) mu fyalo pamo nga United States, Japan, na Germany ukuti balwale AIDS, mulandu wa kubikwamo umulopa. Lyene, pa numa ya kulumbula ifipendo pa fyo ubulwele bwa hepatitis (ukufimba kwa mabu) bwanene ukupitila mu kubikwamo umulopa, ailishenye ati: “Ifi fipendo filetiinya nga nshi. Mupepi na bonse fye abakwata hemophilia balyambula ubulwele bwa kufimba amabu.”

Vorobiev atila, kale badokota baishibe ukuti nga ca kuti umo “afuma lita wa mulopa umo, alekabilwa ukubikwamo lita wa mulopa umo kabili.” Lelo asoso kuti “iyi ni mpuso!” Pa kusondwelela amashiwi yakwe aya kwiswila, atile: “Twalitungilile ukubikamo umulopa, lelo nomba tuli no kubombela pamo ukwalula ifyo twasuminemo ku kale.”

Incenshi ishingi mu fya budokota ishakutike kuli ifi fyebo shafumine ku Russia, lelo kwali na bakalanda abafumine ku France, Sweden, Belgium, na United States. Ukulunda pa kulondolola ifilecitwa mu kucincintila ukufuma kwa mulopa ukubomfya inshila sha kusengulwilamo ukubikwamo mulopa, badokota balandile pa mafya yaba mu kubikamo umulopa, ukusanshako no busanso bwa konaula amaka ya mubili aya kuicingilila ku malwele.

Ukukumana Kwalangwa pa Televishoni

Umulabasa wa televishoni uwa ku Russia, uusabankanya ifyebo ku bantu ukucila pa mamilioni 235, pa numa walangishe ilyashi lishaiwamina pa lwa uku kukumana. Uwaletungulula ili lyashi pa televishoni, Elena Malysheva, alondolwele ukuti: ‘Badokota abaishibikwa bwino kabili abalumbuka mu calo conse, ababombela ku fya kulepula, ku balwele ba anesthesia, na ku fya mulopa balibungene pamo mu Moscow ku kwasuka icipusho caleti: Bushe ukulepula umulwele kuti kwacitwa ukwabulo kumubikamo mulopa?’

Elena aebele bonse abalekutika ku mulabasa wa pa televishoni pa lwa malwele yapishiwa mu mulopa kabili alondolwele ukuti: “Ico e calengele badokota ukufwaya inshila ya kusengulwilamo. Kabili iyo nshila yalisangilwe. Yainikwe ukuti ukulepula abalwele ukwabulo kubabikamo umulopa. Onse fye uulelepulwa kuti alanshanya na dokota wakwe inshila alefwaya ukulepwilwamo ukwabulo mulopa.”

Lintu Andrey Vorobiev amoneke pa televishoni, atile: ‘Umulopa ufuma ku bantu bambi ulakwata amaprotein ayashingalinga mu muntu umbi kabili kuti yaletela uyo muntu amalwele yabulo kwenekela kabili ayashingasengaukwa. Kabili, te mulandu no kwesha twingesha, umulopa wa muntu umbi kuti wayambukisha umulwele umbi utushishi utwaba mu mulopa wakwe uto tushingamona nangu twapima umulopa.’ E co asondwelele ati: ‘Tulingile ukucefyako ukubika umulopa wa bantu bambi mu balwele.’

Umbi uwamonekele pa televishoni ni Jean-François Baron, umukalamba uulolekesha ku balwala anesthesia na balya abaleshikila pa Cipatala ca Broussais, mu Paris, ku France. Alondolwele ukuti: “Mu cipatala momba twalipangile amenshi yaibela ayengasunga umwela wa oxygen. Yalikwatamo fyonse ifingafwilisha ukusunga oxygen lelo tayakwatamo insandesande sha mulopa isha kashika (red blood cells) [ishingatandanya ubulwele]. Asobele ukuti “ku ntanshi tukalayabomfya mu kundapa.”

Ici calengele uwaleangalila uyu programu ukushimika pa lwa kwa profesa wa ku Russia Felix F. Beloyartsev uyo pa myaka 20 iyapitapo, asangile umusango wa menshi ayengasunga umwela wa oxygen ukuti yalebomfiwa mu cifulo ca mulopa. Atile pali ilya nshita, badokota tabatemenwe ifyo Beloyartsev asangile e co “aliipeye umwine pa mulandu no kupakasa kwa mutatakuya balemupakasa pa fintu asangile.”

Ukukumana Kwalembwa mu Fitabo Filanda pa Miti

Inyunshipepala ya fya cipatala iya Meditsinskaya Gazeta nayo yalishimike pali uku kukumana. Yatile, “icikalamba icasondwelelwe pali uku Kukumana kuti cashimikwa muli iyi nshila: Nga cingacitwa, calikatama lyonse ukubomfya inshila sha kusengulwila mu cifulo ca kubomfya umulopa kabili dokota kuti apingulapo ukucite fyo lyeka fye lintu apimununa bwino bwino ifyo ubusanso bwingakula pali cila mulwele kabili lyeka lintu ubumi bwa mulwele bwaba mu busanso nga nshi.”

Iyi nyunshipepala yalandile na pa fyo badokota bamo bakaana ukumfwila umulwele nga talefwaya ukubikwamo umulopa. Ku ca kumwenako, Inte sha kwa Yehova, tashisumina kubikwamo umulopa pa mulandu we kambisho lya mu Baibolo ilya ‘kutaluka ku kulyo mulopa.’ (Imilimo 15:28, 29) Nangu cibe fyo, pali uyu mulandu, Michel de Guillenchmidt, profesa wa fya mafunde uwa ku France atile:

‘Tulingile ukutasha Inte sha kwa Yehova pa kwimya uyu mulandu, pantu calenga ukuti insambu shabo shishibikwe no kwafwa badokota bonse ukumfwikisha ubusanso bwaba mu kubika umulopa mu bantu. Ici calenga no kuti basayantisti baibikilisheko ukufwaya inshila shimbi ishafikapo bwino isha kukanabomfya umulopa mu kulepula abalwele.’

Icipande cimo mu nyunshipepala ya Meditsinskaya Gazeta cakwete amashiwi ya kwiswila ayaleti: “Calisoswa ukuti ukubika umulopa mu bantu kwaba nge cupo: Tapaba uwishiba ifikatumbukamo pa numa.” E co, pa numa ya kusango kuti ‘umulopa wa muntu wapale cifwati ca munwe wa muntu, icishingapalana ku ca muntu umbi, iyi nyunshipepala yaipwishe ukuti: “Bushe badokota kuti bashininkisha cine cine ukuti nga babika umulopa mu mulwele te kuti ambule amalwele yambi?” Iyi nyunshipepala yaaswike ati: ‘Nangu fye ni mu fyalo ifyalunduluka bwino nga nshi mu fya miti, takwaba inshila yashininkishiwa iya kuceeceetelamo umulopa.’

Ici cipande casondwelele ukuti e co, ‘nga twalolesha pali cinkupiti uwaiswile mu cikuulwa umwabelele uku kukumana no kumone fyo baangilweko ku milandu yalandilwepo, tulemono kuti ukutontonkanya kwa badokota pali uyu mulandu kulealuka.’

Ukwafwilishako

Pa nse ya cikuulwa cabelelemo uku kukumana, Inte sha kwa Yehova shaiswishe mu kayanda konono bamagazini ba fya cipatala abalelanda pa lwa kubomfya inshila sha kusengulwilamo isha kundapilamo ukufuma kwa mulopa no kubapeela kuli badokota. Badokota abengi balipokeleko aba bamagazini.

Cine cine, badokota abaishiba bwino pa lwa uyu mulandu baleya balecefyako ukubomfya umulopa mu kundapa.

[Icikope pe bula 26]

Inte sha kwa Yehova shapeele badokota abengi ifyebo ifisangilwe nomba line pa lwa mulopa