Indimi‚ Ukulandilamo

Ubulondoloshi: Amaka yaibela ayapeelwe ukupitila mu mupashi wa mushilo ku basambi bamo mu cilonganino ca mu kubangilila ica bwina Kristu ayalengele bene ukushimikila nelyo mu nshila imbi ukucindika Lesa mu lulimi ulushali lwabo.

Bushe Baibolo isoso kuti bonse abengakwata umupashi wa kwa Lesa kuti “balandila mu ndimi”?

1 Kor. 12:13‚ 30: “Ku mupashi umo e ko ifwe bonse twabatishiwe ukuti twingile mu mubili umo‚ . . . Bushe bonse bali ne fya bupe fya kuundapila? Bushe bonse balelandila mu ndimi sha misango misango?” (Na kabili 1 Abena Korinti 14:26)

1 Kor. 14:5 “Awe ndefwaya imwe bonse ukulandila mu ndimi shimbi‚ lelo icacilamo ukuti museseme. Uulesesema acilapo ku ulelandila mu ndimi shimbi‚ kano ailula no kuleko lukuta lukuulwe.”

Bushe imilandile ya mu kukuntukilwa mu lulimi ulo umuntu ashabala asambilila ishininkisha ukuti alikwata umupashi wa mushilo?

Bushe amaka ya “kulandila mu ndimi” kuti yafuma ku ntulo ishili ya kwa Lesa wa cine?

1 Yoh. 4:1: “Mwe batemwikwa‚ mwitetekela mupashi [“inumbwilo yapuutwamo‚” NW] onse‚ lelo mulelinge mipashi‚ mwishibe nga yafuma kuli Lesa.” (Mona na kabili Mateo 7:21-23; 2 Abena Korinti 11:14‚ 15.)

Pa kati ka abo ‘balandila mu ndimi’ ilelo paba baPentekoste na baBaptist‚ na baRoma Katolika‚ baEpiscopalian‚ baMethodist‚ baLutheran‚ na baPresbyterian. Yesu asosele ukuti umupashi wa mushilo ‘wali no kutungulula abasambi mu cine conse.’ (Yoh. 16:13) Bushe ifilundwa fya bumo na bumo ubwa aya mabutotelo basumino kuti bambi na bo “balandila mu ndimi” na bo balitungululwa mu “cine conse”? Ni shani fintu ico cingaba‚ apantu tabasuminishanya? Mupashi nshi ulecilengo kucitika kuli bene “ukulandila mu ndimi”?

Ukulanda kwapuminkana kuli Fountain Trust na Church of England Evangelical Council kwasumine ukuti: “Na ifwe twaliba abaibukila ukuti icinjelengwe capalako kuti cacitika pe samba lya kusonga kwa manga/ifibanda.” (Gospel and Spirit‚ April 1977‚ iyasabankanishiwe pa Fountain Trust and the Church of England Evangelical Council‚ ibu. 12) Icitabo Religious Movements in Contemporary America (ukulembwa kuli Irving I. Zaretsky na Mark P. Leone‚ ukwambula L. P. Gerlach) cicita lipoti ukuti mu Haiti ‘ukulandila mu ndimi’ kwishibisha yonse amabutotelo ya baPentekoste na ya manga.—(Princeton‚ N.J.; 1974)‚ ibu. 693; mona na kabili 2 Abena Tesalonika 2:9‚ 10.

Bushe ‘ukulandila mu ndimi’ ukucitwa ilelo kumo kwine na kulya ukwacitilwe ku bena Kristu ba mu mwanda wa myaka uwa kubalilapo?

Mu mwanda wa myaka uwa kubalilapo, ifya bupe fya cipesha amano ifya mupashi, ukusanshako amaka ya “kulandila mu ndimi” fyashininkishe ukuti ukusenamina kwa kwa Lesa kwalikuushiwe ukufuma ku micitile ya ciYuda iya kupepa ukwisa ku cilonganino ca bwina Kristu icaimikwe icipya. (Heb. 2:2-4) Apantu ubo buyo bwalipwishishiwe mu mwanda wa myaka uwa kubalilapo, bushe cili icakabilwa ukushininkisha icintu cimo cine mu kubwekeshabwekeshapo mu kasuba kesu?

Mu mwanda wa myaka uwa kubalilapo, amaka ya “kulandila mu ndimi” yapeele inkosho ku mulimo wa pa kati ka nko uwa kucitilo bunte uo Yesu atumine abakonshi bakwe ukucita. (Imil. 1:8; 2:1-11; Mat. 28:19) Bushe iyo enshila abo “balandila mu ndimi” babomfya ayo maka ilelo?

Mu mwanda wa myaka uwa kubalilapo, lintu abena Kristu ‘balandile mu ndimi,’ cintu basosele cakwete ubupilibulo ku bantu abaishibe isho ndimi. (Imil. 2:4, 8) Ilelo, bushe tacili ica cine ukuti ‘ukulandila mu ndimi’ ilingi line cisanshamo ukupuulika kwa kukuntukilwa ukwa fiunda fyabulwamo ukupelulula?

Mu mwanda wa myaka uwa kubalilapo, e fintu Baibolo ilanga, ifilonganino fyali no kupelesha ‘ukulandila mu ndimi’ ku bantu babili nelyo batatu abengacite fyo pa kulongana kupeelwe; baali no kucicita ‘mu kukonkana,’ kabili nga tapaali uwa kwilula baali no kuba tondolo. (1 Kor. 14:27, 28, RS) Bushe ico e cicitwa ilelo?

Mona na kabili amabula 401, 402, pe samba lya mutwe “Umupashi.”

Bushe umupashi wa mushilo pambi kuti uletungulula abacongolo mu fibelesho ifyacila pali ifyo fisangwa mu Malembo?

2 Tim. 3:16, 17: “Amalembo yonse yantu yapuutwamo kuli Lesa, kabili ya mulimo ku kusambilisha, ku kwebaula, ku kulungika, ku kufunda kwa mu bulungami; ukuti umuntu wa kwa Lesa abe uwapwililila, uwaiteyanya ku kubombo mulimo onse usuma.” (Nga ca kuti umo atunga ukukwata ubukombe bwapuutwamo ubupusana no kusokolola kwacitwa ku mupashi wa kwa Lesa ukupitila muli Yesu na batumwa bakwe, bushe mu kucitikako kuti bwaba bwa ku ntulo imo ine?)

Gal. 1:8: “Lelo nga ni fwe bene, atemwa ni malaika wa mu mulu, onse uubila kuli imwe imbila nsuma iyalekana na iyo twabilile kuli imwe, abe uwakungwe cilai!”

Bushe inshila ya bumi iya filundwa fya mateyanyo ayalolesha mu kuba no kusenamina pa ‘kulandila mu ndimi’ ipeela ubushininkisho bwa kuti balikwata umupashi wa kwa Lesa?

Pamo nge bumba bushe balangisha mu kupulamo ifisabo fya musango yo ifya mupashi pamo ngo kutekanya no kuilama? Bushe iyi mibele ilamoneka mu kwanguka ku bantu abasangwa ku kulongana kwabo ukwa kupepa?—Gal. 5:22, 23.

Bushe mu cine cine ‘tababa ulubali lwa calo’? Pa mulandu wa ici bushe bapeela ukuipeelesha kwakumanina ku Bufumu bwa kwa Lesa nelyo bushe baliibimba mu milandu ya bupolitiki iya mu calo? Bushe balitwalilila ukuba abasanguluka ku mulandu wa mulopa mu kati ka nshita ya nkondo? Pamo nge bumba bushe bakwata ukushimikwa kusuma pa mulandu wa kusengauka imyendele ya bucisenene iya mu calo?—Yoh. 17:16; Esa. 2:4; 1 Tes. 4:3-8.

Bushe abena Kristu ba cine ilelo beshibikilwa ku maka ya “kulandila mu ndimi”?

Yoh. 13:35: “Muli ici e mo bonse bakeshibilo kuti muli basambi bandi, nga mwaba no kutemwana.”

1 Kor. 13:1, 8: “Nga nalandila mu ndimi sha bantu ne sha bamalaika, lelo ukutemwa nshitwe, naba ica safwali icilelila, napamo amalimba ya nyenjele. Ukutemwa takupwa. Lelo ukusesema, kukafubalishiwa; kabili indimi, shikaleka.”

Yesu asosele ukuti umupashi wa mushilo wali no kwisa pa bakonshi bakwe no kuti baali no kube nte shakwe ukufika ku mpela she sonde. (Imil. 1:8) Abakambishe ‘ukulenga aba nko shonse ukuba abasambi.’ (Mat. 28:19) Na kabili asobele ukuti ‘imbila nsuma iyi iya bufumu ikabilwa ku fyalo fyonse ku kubo bunte ku nko shonse.’ (Mat. 24:14) Ni bani ilelo, ponse pabili nge bumba kabili nga bantu umo umo, balebombo yu mulimo? Mu kumfwana na cintu Yesu asosele, bushe tatulingile ukufwaya ici pamo ngo bushininkisho bwa kuti ibumba lyalikwata umupashi wa mushilo?

Bushe ‘ukulandila mu ndimi’ kuli no kutwalilila ukufikila lintu ico “icafikapo” caisa?

Pali 1 Abena Korinti 13:8 ukuloshako kwalicitwa ku fya bupe ifingi ifya cipesha amano—ubusesemo, indimi, no kwishiba. Icikomo 9 na co cilosha kuli fibili ifya ifi fya bupe—ukwishiba no kusesema—ukusoso kuti: “Twaishibako fye lubali; kabili tusesemako fye lubali.” Nelyo, nga fintu RS ibelengwa: “Pantu ukwishiba kwesu kwaba ukushapwililika no kusesema kwesu kwaba ukushapwililika.” Lyene icikomo 10 cilondololo kuti: “Lelo ilyo icafikapo cikesa, ica lubali fye cikafubalishiwa.” Ishiwi “ukufikapo” lyapilibulwa ukufuma kuli teʹlei·on ya ciGreek, ilileta itontonkanyo lya kukula mu kukumanina, ukukumanina, nelyo ukupwililika. Ro, By, na NW pano yapilibula yene “ukukumanina.” Mona ukuti te ca bupe ca ndimi icasoswa ukuba “icishapwililika,” “ica lubali,” nelyo iciputulwa. Ico casoswa ku “kusesema” no “kwishiba.” Mu mashiwi yambi, nelyo fye mu kuba ne fyo fya bupe fya fisungusho, abena Kristu ba mu kubangilila bakwete fye ukumfwikisha kushapwililika nelyo ukwa lubali ukwa mifwaile ya kwa Lesa. Lelo lintu amasesemo yali no kufikilishiwa, lintu imifwaile ya kwa Lesa yali no kupwishishiwa, lyene, “icafikapo,” nelyo icakumanina, caali no kwisa. E co, ukwabulo kutwishika ici tacilelanda ubutali ubo ‘ica bupe ca ndimi’ caali no kutwalilila.

Nangu cibe fyo, Baibolo ilalangilila ubutali ‘ica bupe ca ndimi’ caali no kuba ulubali lwa cakukumanya ca bwina Kristu. Ukulingana ne calembwa, ici ca bupe ne fya bupe fimbi ifya mupashi lyonse fyalepeelwa ku bantu ku kubikwapo iminwe ya batumwa ba kwa Yesu Kristu nelyo mu kubapo kwabo. (Imil. 2:4, 14, 17; 10:44-46; 19:6; mona na kabili Imilimo 8:14-18.) Muli ifyo pa numa ya mfwa yabo kabili lintu abantu umo umo muli iyo nshila abapokelele ifya bupe bafwile, ifya bupe fya fisungusho ukufuma ku kubomba kwa mupashi wa kwa Lesa fifwile fyalishile ku mpela ya fiko. Imimwene ya musango yo ilomfwana ne mifwaile ya ifyo fya bupe nga fintu calondololwa pa AbaHebere 2:2-4.

Bushe Marko 16:17, 18 (KJ) talanga ukuti amaka ya “kulandila mu ndimi ishipya” yali no kuba cishibilo ca kwishibisha abasumina?

Cilingile ukumonwa ukuti ifi fikomo tafilosha ku ‘kulandila fye mu ndimi ishipya’ lelo na kabili ku kwikata insoka no kunwa ifya busungu bwa kulenge mfwa. Bushe bonse “abalandila mu ndimi” na kabili balakoselesha ifi fibelesho?

Ku kulandapo pa milandu iyo ifi fikomo fishabela ifyapokelelwa ku basambi ba Baibolo bonse, mona amabula 334-336, pe samba lya mutwe “Ukundapa.”

Nga Umo Asoso Kuti—

‘Bushe walisumina mu kulandila mu ndimi?’

Pambi kuti wayasuko kuti: ‘Inte sha kwa Yehova balanda indimi ishingi, lelo tatuibimba mu kulanda kwa kukuntukilwa mu “ndimi shishaishibikwa.” Lelo lekeni njipusheko, Bushe mwalisumino kuti “ukulandila mu ndimi” ukucitwa ilelo kumo kwine no kwabeleshiwe ku bena Kristu ba mu mwanda wa myaka uwa kubalilapo?’ Lyene nakalimo lundapo ukuti: ‘Pano pali ifishinka fimo ifya kulinganyako ifyo nasanga ukuba ifya kusekesha nga nshi. (Nakalimo bomfya ifyebo ukufuma pa mabula 162, 163.)’

Nelyo kuti wasoso kuti: ‘Twalisumina ukuti abena Kristu ba mu mwanda wa myaka uwa kubalilapo “balandile mu ndimi” no kuti ici caisushishe ukukabila ku numa kulya. Bushe mwalishiba uko kukabila?’ Lyene nakalimo lundapo ukuti: (1) ‘Cabombele pamo nge cishibilo ca kuti Lesa alikuushishe ukusenamina kwakwe pa micitile ya ciYuda ukwisa ku cilonganino capangilwe icipya ica bwina Kristu. (Heb. 2:2-4)’ (2) ‘Yali ni nshila ibomba iya kwananishishamo imbila nsuma pa cipimo ca pa kati ka nko mu nshita iipi. (Imil.1:8)’