Abacaice Ababombela Lesa

BUSHE ulacisanga icishili ca lyonse ukuti abacaice abawama kuti bapeela inshita yabo, ukwabula amalipilo ayali yonse, ukwisa ku mwinshi obe ku kulanda pa lwa kwa Lesa? Bushe cimoneka ica kusungusha, mu nkulo ya kubulwe cisumino kulekulilako, ukuti abana bailunda ku bafyashi babo mu kulanda kuli bambi pa lwa malayo ya kupapusha aya Baibolo aya nshita ya ku ntanshi iya nsansa?a

Mu fingi ifya filonganino 60,000 no kucilapo ifya Nte sha kwa Yehova ukupulinkane sonde, ukasanga abacaice abengi. Tabaya kwi sukulu lya cila mulungu ilya pa Mulungu nelyo kwi kalasi lya katikisimu. Ukucila, aba bacaice balamwenamo ukufuma mu kulongana kwa cilonganino na kabili balakanamo. Abanono kuti pambi bacito kulandapo ukwayanguka. Abali pe samba lya myaka yacile kumi balakana mwi Sukulu lya Butumikishi bwa Teokratiki. Abengi aba myaka yacile kumi balapoosa ukutuusha kwabo ukwe sukulu baleafwilisha abena mupalamano ukusambilila pa lwa kwa Lesa na malayo yakwe aya kusungusha aya nshita ya ku ntanshi.

Mu cituntulu takuli icili conse icipya pa lwa mibombele ya musango uyo iya bacaice. Baibolo ilanda pa lwa balumendo na bakashana ba busumino, pamo pene ne misepela na bana banono, abaimike ifya kumwenako fyapulamo mu kubombela Lesa.

Ibuku lya Baibolo ilya Amalumbo lyasobele “[longo lya, NW] abalumendo,” nga ba kupembesula kabili abengi “ngo mume,” mu mulimo wa bukapepa. Na kabili lyalandile pa lwa “balumendo” na “bakashana” ukutasha ishina lya kwa Lesa. (Ilumbo 110:3; 148:12, 13) Mu kupalako, abacaice bamo baali pa kati ka abo abasangilwepo lintu umupashi wa mushilo uwa kwa Lesa wapongolwelwe pa basumina pa Pentekoste 33 C.E. Pali bulya bushiku mupepi na 3,000 bapokelele Icebo kabili balibatishiwe. Umutumwa Petro asosele ukuti ici ca kuponako ca kutulumusha cali kufikilishiwa kwa busesemo bwa kwa Yoele ubutila: “Abana benu abaume na ’bana benu abanakashi bakasesema, na ’balumendo benu bakamone fimonwa, na ’bakalamba benu bakalote filoto.”—Imilimo 2:4-8, 16, 17, 41.

Ifya kumwenako fimbi ifya mu Baibolo ifya bantu ababombele Yehova Lesa mu bwaice bwabo fisanshamo Samwele, Imfumu yalungama Davidi, bakasesema baishibikwa bwino aba mu Baibolo Yeremia na Daniele, pamo pene na Timote wa busumino. Ulu lwafuma lulimo ifipande fitatu ifilebomba na fimo ifya ifi fya kumwenako fya mu Baibolo. Mulemona ukufuma ku fipande umulandu imisepela, pamo pene na bantu abali abakalambako, babuulila ukubombela Lesa mu kukatama no mulandu babomfesha inshita yakule fyo ukwaafwa abena mupalamano babo ukucita cimo cine.

[Futunoti]