Ukupeelo Kumfwikisha mu Namibia

NI MU ndimi shinga waumfwapo inumbwilo ya kuti “Nshishibe”? “Hi nokuzuva,” e fyasosele namayo wa ciHerero, mu mwingila wakwe uwa cishilano ne citambala icapala ulusengo. “Nghi udite ko,” e fyaankwileko umukashana wa ciKwanyama, mu kuba no kumwentula. “Kandi uvite ko,” e fyaaswike umwikala mushi wa ciNdonga, aletikinya amakoope. “Kapi na kuzuvha,” e fyalandilepo kacema wa mbushi uwa ciKwangali.

Aba bantu bonse umo umo balesoso kuti, “Nshishibe.” Fintu ici cilangilila bwino ukuti Inte sha kwa Yehova mu Namibia balolenkene ne mpika sha lulimi isha kutiinya lintu baleesha ukufika pa bekashi 1,370,000 muli ici cifulo ca kubombelamo icapaabuka ica ma square kilomita mupepi na 824,000!

Kabili te ca kupapa! Te bantu abaHerero na baNama beka lelo na kabili baOvambo, baKavango, abaTswana, abena Caprivi, abaHimba, Tuntele mafwesa, na baDamara aba mu Namibia balikwata indimi shabo shiine. Mu kupusanako, Inte baali abaipangasha ne fitabo fya Baibolo mu ciNgeleshi ne ciAfrikaans fyeka. Mu kulengama, pa kuti icine cumfwike ku bantu abafulilako, umulimo wa kupilibula wali uwakatama. Ici catampile mu nshila inono nga nshi imyaka iingi iyapitapo mu Windhoek, umusumba ukalamba uwa cali pali iyo nshita South-West Africa.

“Mu Windhoek, mwali ukukaanya kwaluma ku mulimo wesu uwa kucitilo bunte ukufuma kwi calici na bakapokola,” e fibukisha Dick Waldron. Capamo no mukashi wakwe, Coralie, aishile kuli ici calo mu 1953 ngo wapwisha isukulu lya Watchtower Bible School of Gilead. “Tatwalesuminishiwa ukwingila mu fifulo umo abafiita baleikala, kabili inshita shimo twalelulunkanishiwa lintu twamwenwe tulelanda ku bantu bafiita. Mu kupelako twasangile icifulo uko tatwalepumfyanishiwa—umulimba wauma uwa mumana wa Gammans! Ici cali fye ku nse ye tauni. Ukufiswa ukufuma ku kumonwa pe samba lya fimpusa fya munganunshi, twatungulwile amasambililo ya Baibolo mulya.”

Cali ni kulya na kabili e ko impapulo sha Watch Tower intanshi shapilibwilwe mu ndimi sha cikaya. Shasanshishemo amatrakiti mu ciKwanyama na katabo “Imbila Nsuma Iyi ya Bufumu” mu ciNama. Munyina Waldron ebukisha ica kukumanya ca kusekesha mu kulundana na ka katabo, ako uwa kusekelela aleafwa ukupilibula. Ishiwi lyalinganako kuli sentensi ya kuti, “Adamu aali umuntu wapwililika” talyasangilwe mu ciNama. E co uwa kusekelela asosele ukuti: “Lembeni fye ukuti Adamu apalile peach iyapya. AbaNama bakomfwa ukuti aali uwapwililika.” Ifi, lyene, e fintu ukupeela ukumfwikisha kwa Malembo kwatampile ku bengi pa kati ka bakaaya ba mu Namibia.—Linganyako Daniele 11:33.

Ukufika pa Nshita Yakatama

Inshita yakatama yalifikilwepo mu kubangilila kwa ba 1970 lintu icitabo Icine Icitungulula ku Bumi bwa Ciyayaya capilibwilwe mu ciNdonga ne ciKwanyama. Ishi e ndimi shibili ishikalamba ishilandwa na bena Namibia bapampana mu Ovamboland, mupepi na makilomita 700 ku kapinda ka ku kuso aka Windhoek. Iŋanda ya bapainiya yalimikwe pali iyo nshita mu Ondangwa, ubwikashi bwa Ovamboland. Pa kwaafwa abantu balesekelela muli iyi ncende ukunonkelamo ukufuma ku kulanshanya kwa Baibolo ukwa mulungu no mulungu ukwashimpwa pa Ulupungu lwa kwa Kalinda, bapainiya baibela abalebomba mu Ovamboland balipeelwe umulimo wa kupilibula ukusupawila kwa fipande fya kusambililamo ifya mu ciNgeleshi ukutwala mu ciNdonga ne ciKwanyama.

“Iofesi” lya kupilibwilamo lyali cifutu caputulwa ukufuma kuli garaji umo ifyebo fyapilibulwa ifya Ulupungu lwa kwa Kalinda fyalepulintwa pali mashini ya kupulintila pa mastenso iya kale. Tacali icayanguka ukutontomesha pali uyu mulimo wa kupinda, apantu imibele yali ya butuutu kabili inshita sha kukaba kwa mu lusuba kwalefika pa kati ka 38 na 44 digri Celsius. Nangu ni fyo, cali ni kuno e ko amabroshuwa yapya ne citabo Kuti Waikala Kuli Pe na pe muli Paradise Pe Sonde fyapilibwilwe.

Ilyo ifilonganino fyalepangwa mu Ovamboland no kuli konse kumbi mu Namibia, ukwankulako kwali ukukalamba nga nshi ica kuti icifulo cakulilako kabili icawaminako calekabilwa. Mu kulundapo, icifulo cacilapo ukubela pa kati calefwaikwa pa kuti ukusakamana kwingapeelwa ku kukabila mu mbali shimbi isha ici calo. Pali iyo nshita, impatila ukulwisha ukushimikila kwesu ukwa Bufumu yali naicepako. E co ulusa lwalipokelwe ku kutendeka ukukuula pa mpanga ikalamba imo iyasangwilwe kuli umo uwa Nte sha kwa Yehova mu Windhoek. Mu kwangufyanya, ukucila pali bakabomba ba kuitemenwa 40 balipeelwe umwa kwikala pa cifulo ca bukuule, kabili mu December 1990 amaofesi ya kupilibwilamo yalipwishishiwe.

Nomba, mu maofesi ayasuma ne miputule muli ici cikuulwa ca muno nshiku, umulimo wa kuleta ukumfwikisha ku bengi ulesenselela ku ntanshi. Impapulo shipya mu kutwalilila shilepilibulwa ukutwalwa mu ciHerero ne ciKwangali. Kumfwa ku ciNdonga ne ciKwanyama, ulufuma lumo cila mweshi Ulupungu lwa kwa Kalinda ulubamo ishi ndimi shibili nomba lumoneka mu kubalabata. Lubamo ifipande fya kusambilila fyonse capamo ne fyebo fimbi. Ici, mu cine cine, cintu cimo icapusanininako ukufuma fye ku ntendekelo inono mu mulimba wauma imyaka iingi iyapitapo.

“Nshishibe” yumfwika limo limo fye. Mu cifulo ca ico, ukucila pa Nte sha kwa Yehova 600 mu Namibia baliba aba kutasha apakalamba kuli Shibo wa mu mulu, kabili nomba kuti basoso kuti: “Ukulondolole fyebo fyenu kulabuutusha, kulenga abapelwa amano ukwiluka.”—Ilumbo 119:130.

[Ifikope pe bula 25]

Ukubilisha imbila nsuma pa kati ka bantu abaHerero

Ukupilibula impapulo sha Bwina Kristu ku kunonsha abantu ba mu Namibia

Amaofesi ya kupilibwilamo mu Namibia