Bushe Ifibindo Filakufuupula?

IFIBINDO! Mu cine cine takwaba uwafitemwa; nalyo line ifwe bonse tuli no kushipikisha kuli fyene ku cipimo cimo. Bushe inshita shimo, nangu ni fyo, ulafuupulwa pa mulandu wa kuti ubumi bobe bumoneka ukuba ubwacishamo kupelebela? Nakalimo kuti wayumfwa ukuwaminako nga wayalwile imimwene yobe. Mu cifulo ca kucushiwa pa lwa cintu ushingacita, mulandu nshi te kushukila mu kufikapo ubuntungwa ubuli bonse buntu uipakisha?

Ku ca kumwenako, abengi abo baba abapiina mu fya bunonshi balanguluka ukuti kanshi nga baali aba fyuma. Nangu cibe fyo, ilintu ubupiina bucilikila cintu twingacita muli ino micitile ya fintu, ifintu fyacindama mu bumi fyalibako kuli bonse. Abapiina pamo na ba fyuma balatemwana, ukuupana, ukufyala abana, ukuipakisha bucibusa busuma, na fimbipo. Icacilapo kucindama, abantu abapiina pamo na ba fyuma baleshiba Yehova no kulolesha ku ntanshi ku calo cipya icalaiwa. Abapiina pamo pene na ba fyuma balalunduluka mu mano ya Bwina Kristu no bwishibilo, ifyabe fyacindama ukucile fyuma. (Amapinda 2:1-9; Lukala Milandu 7:12) Bonse—aba fyuma na bapiina—kuti baipangila ishina ilisuma na Yehova. (Lukala Milandu 7:1) Mu kasuba ka kwa Paulo icilonganino ca Bwina Kristu cafulilemo abantu aba cipimo ca pa nshi—bamo aba bene abasha—ababomfeshe bwino ubuntungwa ubuli bonse ubo imibele yabo yasuminishe.—1 Abena Korinti 1:26-29.

Bumutwe bwa mu Malembo

Mu cupo ca Bwina Kristu, umukashi aba uwanakila ku mulume wakwe—ukutantika ukwapekanishiwilwa ku kunonsha ulupwa lonse. (Abena Efese 5:22-24) Bushe umukashi alingile ukuyumfwa uwacefiwa pa mulandu wa ici? Napacepa. Umulume no mukashi baba libumba. Bumutwe bwa mwaume, lintu bwabomfiwa mu musango wapala Kristu, mu kwampanako bubika ifibindo finono pa mukashi wakwe no kumushiila amashuko ayengi aya kubomfya ukulamuka kwakwe. (Abena Efese 5:25, 31) “Umukashi wa bunyinu” uwa pa Amapinda icipandwa 31 aali uwapamfiwa ne milimo iingi iya kusekesha kabili iya kusonsomba. Mu kumonekesha, ukunakila ku mulume wakwe takwali ukwa kupelenganya kuli wene.—Amapinda 31:10-29.

Mu kupalako, takwabako ukupayanya ukwa mwanakashi ukubuula ubutungulushi pa baume bafikapo mu cilonganino ca Bwina Kristu. (1 Abena Korinti 14:34; 1 Timote 2:11, 12) Bushe abanakashi ba Bwina Kristu balingile ukukalifiwa pe samba lya ico cibindo? Iyo. Icinabwingi baliba aba kutasha ukumona lulya lubali lwa mulimo wa Bwina Kristu ukusakamanwa mu nshila ya teokratiki. Baliba aba nsansa ukunonkelamo ukufuma ku kucema no kusambilisha kwa baeluda basontwa kabili baibimba mu mulimo wakatama uwa kushimikila no kupanga abasambi. (Mateo 24:14; 28:19, 20) Abanakashi ba Bwina Kristu bapwilikishe fingi muli ulu lubali, kabili ici cibaletela umucinshi mu menso ya kwa Yehova Lesa.—Ilumbo 68:11; Amapinda 3:35.

Ifibindo pa Bacaice

Abacaice na bo pa nshita shimo balailishanya ukuti ubumi bwabo bwalikwatishe fibindo, ilingi line pa mulandu wa kuti baliba pe samba lya bulashi bwa bafyashi babo. Lelo ici na co caba ca mu Malembo. (Abena Efese 6:1) Mu cifulo ca kukalifiwa ne fibindo ifyo abafyashi babo babika pali bene, Abena Kristu bacaice aba mano balolekesha pa kuipakisha ubuntungwa buntu bakwata—ukusanshako, ilingi line, ubuntungwa bwa kufuma ku fishingamo fyafina. Muli fyo kuti bashukila ubukose bwabo ubwacaice ne mibele ku kuipekanishisha ku bumi bwa bukalamba.

Uwali kale kangalila wa muputule mu Brazil alebukisha bwino kalume wa myaka ya bukulu 12 mwi bumba linono ilyaba lyeka uwali uwapeleela mu co aali na maka ya kucita. Umo uwashingemwe ne fyalembwa aali uwapamfiwa mu mulimo wa ku mubili kabili taali na maka ya kupeelako ukusakamana kukalamba kuli ili bumba, lelo atantike ukuti uyu mulumendo alemwaafwako. Alishibe ukwali amaformu yonse kabili lyonse aali uwaitemenwa ku kwaafwa. Ubuseko bwakwe bwali ubwa kukoselesha, kabili aali munankwe wa busumino mu mulimo wa mwi bala. Ulya mulumendo nomba ni eluda wasontwa.

Kwalibako imibele iingi iyo pambi ingacilikila ubuntungwa bwa muntu. Bamo bacilikilwa no kulwala. Bamo bekala mu mayanda yayakanikana kabili basanga ubuntungwa bwabo ukucilikilwa ku kupinda kwa munabo uushasumina. Ilintu abo abekala ne fibindo kuti pambi bafwaya ukuti ifintu fipusaneko, kuti nalyo line baikala ubumi bwa kwikusha. Uno magazini alikwatamo amalyashi ayengi aya bantu umo umo aba musango yo ababa aba kukoselesha apakalamba kuli bambi pa mulandu wa kuti bashintilila pali Yehova kabili babomba ne mibele yabo mu kufikapo.

Ukulanda ulwa mibele ya munsaunte mu kasuba kakwe kene, umutumwa Paulo atile: “Bushe waitilwe uli musha? Wisakamana. Lelo nga wingamona apa kusangilo buntungwa, ninshi cisuma, ube muntungwa.” (1 Abena Korinti 7:21) Mwandi mimwene yashikatala! Imibele imo ilaaluka. Abacaice balakula. Abanabo abakaanya limo balapokelele cine. Imibele ya fya bunonshi yalimonwa ukuwaminako. Abalwele kuti pambi babako bwino. Mu milandu imbi, ifintu pambi te kuti fyaluke ukufikila icalo cipya ica kwa Yehova cikese. Nangu ni fyo, cinshi cili no kunonkwa ku kukalifiwa pa mulandu wa kuti umo tali na maka ya kucita cintu bambi bengacita?

Bushe walitala autambapo ifyuni filelela mu muulu pa muulu we sonde no kukumbwa ubusuma no buntungwa bwa kusela kwa fiko? Nakalimo wafwaile ukuti wingapupuka muli ilya nshila. Kwena, te kuti upupuke kabili tawakatale auba na maka ya kucita nga fintu ifyuni fingacita! Lelo mu kupalishako tauilishanya. Ukucila, ulasekela mu maka yobe ayapeelwa na Lesa. Ulatunguluka bwino ukwenda pa muulu we sonde. Mu kupalako, icili conse icili e mibele yesu mu bumi, nga ca kuti twakosela pa cintu twingaba na maka ya kucita ukucila ukukalifiwa pa lwa cintu tushingaba na maka ya kucita, ubumi bukaba ubwa kwikusha, kabili tukasanga ubuseko mu mulimo wa kwa Yehova.—Ilumbo 126:5, 6.

[Icikope pe bula 28]

Bushe uyumfwo kuti abafyashi bobe balakupindilila?