Icifulo ca Masomo ica Watchtower Catuma Bamishonari

WATCHTOWER Bible School of Gilead yatungulwilwa mu fifulo fyalekanalekana. Pa kati ka 1943 na 1960, mu fikuulwa fya pa South Lansing, New York, U.S.A., amakalasi 35, ayapangilwe na basambi ukufuma mu fyalo 95 yalipokelele ukukansha kwaibela. Lyene ili sukulu lyaselele ku maofesi yakalamba aya calo conse mu Brooklyn, New York, uko lyatungulwilwe pa myaka mupepi na 28. Ukufuma mu 1988 ukufika ku kutampa kwa 1995, Isukulu lya Gileadi lyaletungulwilwa pa Wallkill, New York.

Mu kati ka iyi myaka isukulu lyalifungulwike mu mibombele ya liko. Pe samba lya butungulushi bwa liko kosi wa milungu ikumi uwa kusambilisha alipayanishiwe ku makalasi yatatu mu Mexico; amakalasi yasano aya musango yo yakumanine mu Germany; yabili mu India. Ukutula 1987 isukulu ilitungululwa na Gileadi ilyaishibikwa nga Isukulu lya Kukansha Ilya Butumikishi lyalitungululwa mu fyalo 34, ukupeela kosi wa kukansha kwaibela uwa milungu 8 ku balumendo abafikapo. Ukufunda ukwapeelwe kwi kalasi lya Gileadi ilyalenga 99, pa Cifulo ca Masomo ica Watchtower icikuulilwe nomba line pa Patterson, mu New York, nangu cibe fyo, kwali ni kosi wa milungu 20, uyo wasanshishemo ukusambilila kwashika ukwa Baibolo onse, ukulanshanya ilyashi lya muno nshiku ilya Nte sha kwa Yehova no kuteyanya, pamo pene no kufunda kwatanunuka pa mulimo wa bumishonari uwa ku nse ya calo.

Pa September 2, e po ilyo ikalasi lyalenga 99 lyapwile. Programu wa kupwishe sukulu uwa maawala yatatu aacitiilwe mu ciyanda cipya ica Cifulo ca Masomo ica Watchtower. Caliswile paa. Amabumba yalundwapo aya balekutika pa fikuulwa fya Bethel mu Patterson, Wallkill, na mu Brooklyn yasuntinkanishiwe ku filimba fya malaiti. Ubu bwali bushiku bwa kucincimusha te ku baali mwi kalasi lyalepwisha na balupwa lwabo ne fibusa fyapalamisha kweka fye lelo na kabili na ku myanda ababombeleko nga aba kuitemenwa ku kukuula ifikuulwa fye sukulu lipya ifishaiwamina.

Mu mashiwi yakwe aya kwiswila, Carey Barber uwa mwi Bumba Litungulula atontele ukusakamana kwakwe pa bupilibulo bwa calecitika. Atile: “Ici cili no kuba e cifulo ca pa kati ica mibombele yakulisha iya masomo ya bulesa iyabala aibombwa pali lino isonde.” Alondolwele ukuti tulepalamina akalume ka bulwi bwa pa kati ka bufyashi bwa mwanakashi no bufyashi bwa nsoka. (Ukutendeka 3:15) Alangilile ukuti abakapusunsuka fye ukukangana kwa kutiinya mu bucushi bukalamba ubuleisa, bakaba ni abo abakwata ukwishiba kwalungikwa ukwa Cebo ca kwa Lesa kabili abomfwila cene.

Abilishe ati: “Programu wesu uwa pali ndakai uwa masomo, apangilwa ku kuleta abantu ba kwa Yehova bonse ukuli konse mu mibele yawama iya kukosoka iyalondololwa pa Amapinda 1:1-4—imibele ya kwishiba amano no kusalapula, ukuba na maka ya kwiluko mucetekanya, ukupokelela ukusalapula uko kupeela ukushilimuka, ubulungami, ubupingushi, ukutambalala, no kucenjela.” Fintu caba bucingo ukukwata icuma ca ku mupashi ica musango yo!

Ukufunda ku Baalepwishe Sukulu

Ifyo fyebo fya kwiswila fyakonkelwepo no kukonkana kwa malyashi ayepi yasano ayalungatikwe ku baalepwishe sukulu. Harold Jackson, uyo kale aali kafundisha wa pa Gileadi nomba uuli cilundwa ca bakabomba ba pa maofesi yakalamba mu Brooklyn, acincishe abasambi ati, “Ikatisheni Ukwikushiwa Kwenu Ukwa Bukapepa.” Lloyd Barry, mishonari mukokole nomba uuli cilundwa ce Bumba Litungulula, alandile pa “Ukubombela Yehova mu Kuicefya.” Alondolwele ukuti iyi mibele ya kuicefya ili no kuba iyacindama ku bapwishishe isukulu mu kuteulukila ku mibele ipya pamo pene na mu kwampana kwabo na bamishonari banabo, mu kwampana ne filonganino umo bakalabombela, na mu kwampana na bantu bakasangako.

Karl Adams, pali ino nshita uulebomba mu ciputulwa cipekanya amasambililo ya Gileadi, apelulwile na basambi pa cipusho ca kuti “Cinshi Cintu Icitetekelo Cikamulenga Ukucita?” Abakoseleshe ukukanapala balya bena Israele abailishenye pa lwa mibele ya mu matololo kabili abafulwike ukubwelela ku Egupti lelo, mu cifulo ca ico, ukuba nga Abrahamu, uwalelolesha ku Bufumu bwa kwa Lesa mu cifulo ca kufuluka ukubwelela ku Uri wa bena Kaldi pamo nge nshila ya kupikulwilamo impika. (Ukufuma 16:2, 3; AbaHebere 11:10, 15, 16) Ulysses Glass, kalemba wa ili sukulu, afumishe ifyebo fyakwe pa ca kukumanya ca kwa Asafi icalembwa mu Ilumbo 73 ku kukonkomesha abalepwishe sukulu ukuti, “Langulukeni pa Mapaalo Yenu.” Kabili Albert Schroeder, icilundwa ca Komiti wa Kusambilisha uwe Bumba Litungulula, alandile pa mutwe wa kuti “Yehova Alapayanya.” Ica kushininkishishako ukupayanya kwa musango yo, asontele kwi Sukulu lya Gileadi line no lubali luntu lyakwata mu kupwilikisha umulimo ukalamba uwa kushimikila no kupanga abasambi.

Pa numa ibumba lyakutike mu kuba no buseko bwaswatuka lintu Milton Henschel, presidenti wa Watch Tower Society, alandile pa lwa “Ifilundwa fya Umo no Munankwe.” Abelengele no kulandapo nga nshi pa Abena Roma icipandwa 12. Fimo ifyo alandilepo fya kuti: “Tufwile ukwibukisha ukuti twalikwata ukwampana kwapalamisha nga nshi na babomfi banensu mu cilonganino.” Alundileko ukuti: “Calibe cisuma ukuti lyonse tuletontonkanya pali umo no munankwe nge cikwatwa ca kwa Yehova, kabili mu cifulo ca kuba abalengulula, ukucila ukulafwailishe filubo, natuleba lyonse aba kwaafwa. Nga twasungilila ukwikatana kwa ku mupashi ukwa cilonganino ca Bwina Kristu ninshi tuleyafwa fwe bene.” Alangilile fintu ukuba uwa kwaafwa muli iyo nshila kwingalangwa mu kupekanya ifya kulya mu mayanda ya bamishonari, ukwibukisho kuti te onse pambi uwingalya icintu cimo cine. Na kabili akoseleshe ukuba uwa kwaafwa ukucila ukulengulula lintu tulebomba umulimo wa mwi bala na Bena Kristu banensu ababusu. Nga twaba aba kwaafwa mu cine cine, kabili aba kukuulilila, aba kukoselesha kuli umo no munankwe, Munyina Henschel alondolwele ukuti, “Yehova akatutemenwapo.” We kukonkomesha kwawamisha kuli bamishonari abali no kulabombela mu fyalo ifyo fyapusaninina nga nshi kuli fyo bali no kusha!

Ukwishiba Bwino Abasambi

Abasambi 48 aba mwi kalasi lyalenga 99, bali na avareji wa mushinku wa myaka 32 kabili kale kale baali nabapeelesha imyaka ukucila pali 11 mu butumikishi bwa nshita yonse.

Ukwipusha ukwali lubali lwa programu wa kupwishe sukulu kwalengele ibumba ukuba ne shuko lya kwishibako banono aba muli bene. Nikki Liebl, ukufuma ku United States, na Simon Bolton, ukufuma ku England bashimike ifya kucitika ifyaeseshe icitetekelo cabo ica kuti Yehova kuti abapayanishisha ukukabila kwabo ukwa ku mubili. Baalikumenye ukusakamana kwa kwa Yehova ilyo babikile ubutumikishi bwa nshita yonse mu cifulo ca ntanshi.

Isabelle Kazan, uo ululimi lwakwe ulwa cifyalilwa lwaba ciFrench, atile alisambilile iciArabic pa kuti engalacitilo bunte ku bantu abalanda iciArabic mu calo cakwe cine. Lintu atendeke ukucisambilila mu 1987, akalibumba kene aka mu Paris kakwete fye bamunyina bane abalande ciArabic, ukusanshako no mwine wine na nkashi umbi abalesambilila ululimi. (Tacali icayanguka. Balepoosa amaawala 8 mu kupekanya isambililo lyabo ilya Ulupungu lwa kwa Kalinda cila mulungu pa kuba na maka ya kuyaasukapo.) Bushe uko kubombesha kwali ukwalinga cene? Kwena, ilelo kuliko Inte ishilanda iciArabic ishateyanishiwa mu miputule isano mu France onse. Umusambi umbi, Miko Puro, ashimike fintu iciFrench cintu asambilile mu sukulu camulengele ukushimikila ku mbutushi sha cina Africa mu calo ca ku mwabo ica Finland, kabili cili no kuba ica kwaafwa mu mulimo wakwe uwa bumishonari mu Benin. Bonny Bowes ashimike ifyo alwishishe ukulanda iciFrench mu kulongoloka pa kuti engabomba mu kufumamo cimo mu Quebec, Canada. Kabili Bjarki Rasmussen, ukufuma ku Denmark, ashimike fintu wene no mukashi wakwe kale kale bapitilemo mu myaka ya kubombela mu fishi fya Faeroe. Ee, aba bamishonari abapya bali batumikishi ba nshita yonse ababelesha.

Abapwishishe isukulu batuminwe ku fyalo 19—mu Africa, Central na South America, Eastern Europe, na ku Kabanga. Abapwishishe amasukulu yabangilileko kale kale balibombela mu fyalo ukucila pali 200. Ubwingi ubwa aba bapwisha amasukulu ya Gileadi bacili abapikintika mu mulimo wabo wapeelwa. Aba bamishonari abapya nomba baleilunda kuli bene mu kutanununa mu kucishanapo ubunte bwa Bufumu ukufika ku mpela sha pano nse.—Imilimo 1:8.

[Ifikope pe bula 25]

Ukumoneka kwa mwi kalasi pa Cifulo ca Masomo ica Watchtower

[Icikope pe bula 26]

Ikalasi Lyalenga 99 Ilya Bapwishishe Sukulu lya Watchtower Bible School of Gilead

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Ifikope pe bula 27]

Bacili mu mulimo wabo: (ku kuso) Charles Leathco no mukashi wakwe, Fern, mu Brazil, abapwishishe isukulu lya Gileadi aba mu makalasi ilya kubalilapo ne lyalenga 6; (pe samba) Martha Hess, mu Japan, uwapwishishe isukulu lya Gileadi mwi kalasi lyalenga 7