Ni Nshila Nshi Tulingile Ukupepelamo Lesa?

LINTU umusambi alombele amakambisho ukukuma ku kupepa, Yesu takeene ukumupeela. Ukulingana na Luka 11:2-4, ayaswike ukuti: “Ilyo mulepepa, muleti: We Shifwe, ishina lyobe licindikwe. Ubufumu bobe bwise. Utupeele lelo ica kulya cesu ica nshiku shonse. Utubelele uluse ku masambi yesu, ifyo tuba no luse ku bantu abatucusha. Wileka tuwile mu fibi utupusushe ku fibi.” (Douay Version ya ciKatolika) Ili pepo lyaishibikwa bwino ukuti Ipepo lya kwa Shikulu. Lyakwatamo ifyebo ifingi nga nshi.

Ica kubalilapo, ishiwi fye lya ntanshi litwebo uo amapepo yesu yalingile ukulungatikwako—kuli Shifwe. Moneni ukuti Yesu tasuminishe nangu panono ukupepa ku muntu umbi, icilubi, “umutakatifu,” nelyo fye kuli wene. Na kuba, Lesa abilishe ukuti: “Ubukata bwandi nshakabupeele kuli umbi, nangu ukutashiwa kwandi ku fimpashanya.” (Esaya 42:8, Dy) Amapepo ayalungatikwa ku cintu cimbi nelyo umuntu umbi ukucila Shifwe wa ku muulu kanshi tayomfwikwa kuli wene, te mulandu na fintu uulepepa ali uwafumaluka. Mu Baibolo, ni Yehova Lesa epela e witwa ‘Komfwa we pepo.’—Ilumbo 65:2.

Bamo kuti basoso kuti “abatakatifu” babomba fye nga ba kutulombelako kuli Lesa. Lelo Yesu umwine akambishe ukuti: “Nine nshila ne cine no mweo: takuli uwisa kuli Tata, kano aishila muli ine. Na conse ico mukalombela mwi shina lyandi, nkacicita ukuti Tata akacindikilwe mu Mwana.” (Yohane 14:6, 13) Muli fyo Yesu takoseleshepo itontonkanyo lya kuti uuli onse uwitwa umutakatifu kuti aba uwa kulombelako. Na kabili moneni cintu umutumwa Paulo asosele ukukuma kuli Kristu: “Tatufwilile fye—alishukwike ukufuma ku bafwa, kabili pa kuba ku kwa kulyo kwa kwa Lesa alatwiminina no kutupaapaatilako.” “Aba uwa mweo pe ku kulombelako bonse abesa kuli Lesa muli wene.”—Abena Roma 8:34; AbaHebere 7:25, Jerusalem Bible ya ciKatolika.

Ishina Ilifwile Ukucindikwa

Amashiwi yakonkelepo mwi pepo lya kwa Yesu yali ya kuti: “Ishina lyenu licindikwe.” Ni shani fintu umuntu engacindika, e kutila, ukushisha, nelyo ukupaatulako, ishina lya kwa Lesa ukwabula ukulishiba no kulibomfya? Ukucila pa miku 6,000 mu “Cipingo ca Kale,” Lesa aishibishiwa kwi shina lyakwe ilya Yehova.

Utumashiwi twa pe samba pa Ukufuma 6:3 muli Douay Version ya ciKatolika ukukuma kwi shina lya kwa Lesa tusosa ukuti: “Aba muno nshiku bamo bapanga fye ishina lya kuti Yehova . . . , pantu ukushimbulwa kwa cine ukwe shina [lya kwa Lesa], ilisangwa mu malembo ya ciHebere, kwaliluba pali nomba pa mulandu wa kukanalibomfya pa nshita ntali.” New Jerusalem Bible ya ciKatolika muli fyo ibomfya ishina Yahweh. Nangu cingati abasoma bamo basalapo iyo mishimbwile, “Yehova” ni nshila ya kushimbwilamo ishina lya bulesa mu Cibemba iyapokelelwa kabili iyabomfiwa pa nshita ntali. Indimi shimbi balikwata inshila shabo shine isha kushimbwilamo ishina lya bulesa. Icacindamisha ca kuti tulebomfya ilyo ishina pa kuti twingalicindika. Bushe icalici lyenu lyalimusambilisha ukubomfya ishina Yehova mwi pepo?

Ifyalinga Ukupepela

Mu kukonkapo Yesu asambilishe abasambi bakwe ukupepa ati: “Ubufumu bobe bwise.” Ilandwe lya kwa Mateo lilundako amashiwi ya kuti: “Fyonse ifyo watemwa fibe muno calo nga mu muulu.” (Mateo 6:10, Dy) Ubufumu bwa kwa Lesa buteko bwaba mu maboko ya kwa Yesu Kristu. (Esaya 9:6, 7) Ukulingana no busesemo bwa Baibolo, bwangu bwangu buli no kufumyapo amabuteko ya bantunse yonse no kuletako umutende mu cibulungwa conse. (Ilumbo 72:1-7; Daniele 2:44; Ukusokolola 21:3-5) Abena Kristu ba cine kanshi balenga ukwisa kwa ubo Bufumu ukuba icintu ca kupepela nga nshi. Bushe icalici lyenu lyalimusambilisha ukucite fyo?

Na kuba, Yesu na kabili alangishe ifyo amapepo yesu kuti pambi yasanshamo ifintu fya pa lwesu. Atile: “Utupeele lelo ica kulya cesu ica nshiku shonse. Utubelele uluse ku masambi yesu, ifyo tuba no luse ku bantu abatucusha. Wileka tuwile mu fibi.” (Luka 11:3, 4, Dy) Amashiwi ya kwa Yesu yalangilila ifyo kuti twafwaya ukuti ukufwaya kwa kwa Lesa kucitwe mu fintu fya cila bushiku, ifyo kuti twatununuka Yehova pa lwa cili conse icingatusakamika nelyo ukupumfyanya umutende wesu uwa muntontonkanya. Ukulomba Lesa lyonse muli iyi nshila kulatwaafwa ukutesekesha ukuti twashintilila pali wene. Muli fyo tulacililako kwishiba ifyo asonga ubumi bwesu. Ukulomba Lesa cila bushiku ukulekelela ifilubo fyesu na ko kulanonsha. Muli yo nshila tulacilapo kwibukila ubunake bwesu bwine—kabili abacilapo kumfwikisha amabunake ya bambi. Ukukonkomesha kwa kwa Yesu ukwa kuti tulepepela ukukanatwalwa ku kweshiwa na ko kwalilinga, ukucilisha apantu imibele ilebotelela muli ici calo. Mu kumfwana ne lyo pepo, tulaba abaibukila ukusengauka imibele ne fintu ifingatutwala ku ncitilo yalubana.

Takuli kutwishika, lyene, ukuti Ipepo lya kwa Shikulu lilatusambilisha ifingi pa lwa kupepa amapepo ayateemuna Lesa. Lelo bushe yali mifwaile ya kwa Yesu ukuti tubuule ili pepo no kulalibwekeshapo fye lyonse?

Ukufunda Kwalundwapo pa Kupepa

Yesu apeele ukufunda kwalundwapo pa kupepa. Pali Mateo 6:5, 6 tubelengapo kuti: “Ilintu mulepepa, mwiba nga ba bumbimunda: pantu batemwo kwiminina mu masunagoge na mu fifutu fya mansa, ukuti bamoneke ku bantu. . . . Lelo iwe, ilyo ulepepa, ingila mu muputule obe uwa mu kati ka ŋanda, isalako ne ciibi cobe, no kupepa kuli Wiso uuli mu bumfisolo, na Wiso uumona mu bumfisolo, akakulambula.” Aya mashiwi yaletusambilisha ukuti ipepo talilingile ukupepwa mu nshila ya kuilangisha pa kuti bambi batumone. Bushe mulapongolola ifya mu mutima wenu kuli Yehova pa mbali, nga fintu Baibolo icincisha?—Ilumbo 62:8.

Yesu asokele ati: “Mu kusalika kwenu mwisosa cisosesose nge fisosa abasenshi, pantu batila ni ku fyebo fyabo ifingi bakomfwilwa.” (Mateo 6:7, JB) Cili icaumfwika ukuti, Yesu tasuminishe ukusungila amapepo ku mutwe—pali bufi ukubelenga yene ukufuma mu citabo. Amashiwi yakwe na kabili tayasuminisha ukubomfya kolona.

Icitabo ca masali ya ciKatolika casumino kuti: “Ipepo lyesu ilyawamisha kuti lyaba ni lilya lintu tuilumbulwila amatontonkanyo yesu lintu tulemutasha nelyo tulekabilapo fimo, pa nshita ya bulanda, nelyo pa kumutatakula cila bushiku.” Amapepo ya kwa Yesu yalefuma mu mutima, tayaleba ya kusungila ku mutwe. Ku ca kumwenako, belengeni ipepo lya kwa Yesu ilyalembwa muli Yohane icipandwa 17. Lyalikakatila kwi pepo lya cilangililo, ukwebekesha ukufwaisha kwa kwa Yesu ukwa kumono kuti ishina lya kwa Yehova lyashishiwa. Ipepo lya kwa Yesu lyalilingene na kashita kabili ilya kufuma ku mutima icine cine.

Amapepo Ayo Lesa Omfwa

Nga ca kuti mwasambilishiwa ukupepa amapepo ya kusungila ku mutwe, ukupepa ku “batakatifu” nelyo ku filubi, nelyo ukubomfya utunkolonkolo twa mipepele, ukupala kolona, itontonkanyo lya kupepa mu nshila Yesu alondolwele kuti pa kubalilapo lyaba ilya kutiinya. Nalyo line, umuti waba kwishiba Lesa—ishina lyakwe, imifwaile yakwe, imibele yakwe. Kuti mwaishiba ifi fyonse ukupitila mwi sambililo lya Baibolo ilyakumanina. (Yohane 17:3) Inte sha kwa Yehova baliba abaiteyanya kabili abaitemenwa ukumwaafwa muli ci. Kale kale, balyaafwa amamilioni ukushinguluke calo ‘ukusonda no kumono kuti aliwama Yehova’! (Ilumbo 34:8) Ilyo mwacililapo kwishiba Lesa, e lyo mukacililapo kuseshiwa ku kumulumbanya mwi pepo. Kabili ilyo mwacililapo kupalamina kuli Yehova mwi pepo lyabamo kucindikisha, e lyo mukacililapo kuba cibusa wakwe.

Bakapepa ba cine aba kwa Lesa bonse balecincishiwa kanshi ‘ukupepa no kukanaleka.’ (1 Abena Tesalonika 5:17) Shininkisheni ukuti amapepo yenu mu cine cine yaleumfwana na Baibolo, ukusanshako amakambisho ya kwa Yesu Kristu. Muli iyi nshila kuti mwashininkisha ukuti amapepo yenu yali no kupokelelwa kuli Lesa.

[Icikope pe bula 7]

Ilyo tucililako kwishiba Yehova, e lyo tucililako kuseshiwa ukupepa kuli wene ukufuma ku mutima