Tuli Abakwate Citetekelo

Ukukosha Icitetekelo Ukupitila mu Kusambilila Baibolo mu India

UKUFUMA ku lupili lwa Himalaya ulwa lulumbi, ulwafimbwa ku mfula yabuuta ku kapinda ka ku kuso ukufika ku namba shafulishako bafubefube isha ku Indian Ocean ku kapinda ka ku kulyo, India caba calo umwaba ifyalekanalekana, mu fyo impanga iine yaba e lyo na mu mipepele. Pa bekashi bonse aba mu India abacila pali bilioni umo, mupepi na bapesenti 83 baHindu, bapesenti 11 baShilamu, na bashala baba maka maka Abena Kristu ba mwi shina fye, abaSikh, abaBuddha, na baJain. Aba bonse balaipepela fye na ku matwi tondolo. The World Book Encyclopedia itila: “Imipepele yalicindama sana ku bena India.”

Ukwikala umwabela icitetekelo ca Bwina Kristu kwishibisha bwino Inte sha kwa Yehova, abafika ku mpendwa iicilile pali 21,200 mu India. Ukupala banabo ba ku mupashi mu ncende shimbi ishe sonde, Inte mu India shimona ukwafwa abantu banabo ukukwate citetekelo cakosa mu Cebo ca kwa Lesa, Baibolo wa Mushilo, nge shuko. (2 Timote 3:16, 17) Moneni ifyo ulupwa lumo mu Chennai ku kapinda ka ku kulyo mu India lwaishileishibe cine ca mu Baibolo.

Ilyo lwali talulakumana ne Nte sha kwa Yehova, ulu ulupwa lwali ulwacincila nga nshi mu kabungwe ka ciKatolika, akaleitunga ukumone fimonwa, ukulandila mu ndimi, e lyo fye no kundapa abalwele. Balishibikwe nga nshi mu calici na ku bena mupalamano, abantu baleita fye na bamo aba muli ulu ulupwa ukuti “swami,” icilepilibula “shikulu.” Bushiku bumo Nte umo atandalile ulu lupwa no kululanga mu Baibolo ukuti Yesu Mwana wa kwa Lesa, kabili te Lesa Wa maka yonse, nga fintu abengi basumina. Nte alondolwele no kuti ishina lya kwa Lesa ni Yehova, no kuti imifwaile yakwe iye sonde kuliwamya ukuba paradise wayemba.—Amalumbo 83:18; Luka 23:43; Yohane 3:16.

Pa mulandu wa kuti balicindike Icebo ca kwa Lesa kabili balitemenwe fintu baumfwile, ulu lupwa lwasumine ukusambilila Baibolo lyonse ne Nte sha kwa Yehova. Ici calengele abaishibene na bo mu calici ukutendeka ukubapumya. Nangu cibe fyo, ulu lupwa lwapampamine fye pa kutwalilila ukusambilila Baibolo. Lintu balesambilila kabili icitetekelo cabo calekoselako, balekele imipepele yabo iya bufi. Ilelo, batatu muli ulu lupwa ni Nte shabatishiwa, ishacincila, kabili banyinabo balabombako bupainiya bwa kwafwilisha inshite ili yonse ilyo imibele yasuminisha.

Icitetekelo Icaba na Maka ya Kwansha Ubulema

Umulumendo uwaleikala mu mushi wa mu Punjab uwe shina lya Sunder Lal, alekabila icitetekelo cakosa no kushipa pa kuti engashimikilako bambi imbila nsuma ya Bufumu bwa kwa Lesa. (Mateo 24:14) Ici cali ni pa mulandu wa kuti, alifumine kuntu aleikala no kuleka ifisumino fintu balupwa lwakwe basuminemo ifya kupepa balesa balekanalekana kabili atendeke ukupepa Lesa wa cine, Yehova. E lyo na kabili, Sunder Lal takwata molu.

Sunder Lal alebomba incito imo ine fye iyali kwafwa dokota kabili pamo no lupwa aibimbile mu kupepa balesa balekanalekana ukwaletungululwa na kafundisha wa fya mipepele untu baisaliile. Lyene nshita imo mu 1992, lintu aleciluke nyanji ubushiku aliponene, kabili ishitima lyalimupitilepo no kumuputula amolu yonse yabili ukufika mu matanta. Nangu cingati tafwile, ubumi tabwakwete bupilibulo kuli wene. E ico, Sunder Lal alibombomene nga nshi ica kuti atendeke ukutontonkanya pa lwa kuipaya. Balupwa lwakwe balimwafwile apakalamba, lelo nangu cibe ifyo takwete isubilo nangu panono ilya ku nshita ya ku ntanshi.

Lyene Inte ya kwa Yehova imo yatandalile Sunder Lal no kumulondolwela muli Baibolo ukuti Lesa alilaya ukwalula isonde ukuba paradise wayemba no kupeela ubumi ubusuma kuli bonse abamutemwa kabili abamutiina. Sunder Lal alisumine ukutendeka isambililo lya Baibolo, kabili mu mwaka umo alisambilile mu mukoosha. Alilaalikwe ukuyasangwa ku kulongana kwa Bwina Kristu kabili mu kupelako, umunankwe alimusendeleko pa ncinga. Nangu cingati alyumfwile ubukali ilyo baleya pa ncinga, ifya kufumamo fyali ifikalamba. Fintu asambilile mwi sambililo lya pa lwakwe ilya Baibolo fyalishininkishiwe lintu akumene na bantu abasumine icine cine amalayo ayaba mu Cebo ca kwa Lesa no kwikala umwabela ifisambilisho fya Baibolo.

Sunder Lal atendeke ukushimikila imbila nsuma ku bantu banankwe, kabili mu 1995 alibatishiwe. Pa kubala, ilyo aleya mu butumikishi aleikula fye pa nshi ku ng’anda ne ng’anda mu mushi aleikala, iyi e nshila intu aleendelamo lyonse. Lelo pali ino nshita alipokelela ica bupe ukufuma kuli bamunyina ba ku mupashi e kuti incinga ya mawilo yatatu iya kucofela ku maboko. Pali uyu mulandu alyangukililwa kabili alenda bakilomita 12 ku kuyasangwa ku kulongana. Inshita shimo alaikunkulusha ukupula mu mfula ishaikulila; kabili inshita shimbi apita ilyo kukabile ukucila pali badigiri celsius 43.

Ukulundapo pa kusangwa mu kulongana, Sunder Lal alatungulula amasambililo ayengi pa kutila afweko bambi abalekabila ukwafwiwa pa kutila na bo bene bengakwate citetekelo cakosa muli Lesa wa cine, Yehova. Na kuba, pa bantu alesambilila na bo, 7 balibatishiwa nomba, pamo na batatu bambi abo akumenye lyene no kubapeela ku Nte shimbi, ishasambilile na bene Baibolo.

Ukulingana na Baibolo, “tabali na citetekelo bonse.” (2 Abena Tesalonika 3:2) Lelo ‘abasontelwa ku kuya mu mweo wa muyayaya,’ isambililo lya lyonse ilya Cebo ca kwa Lesa kuti lyakosha icitetekelo cabo. (Imilimo 13:48) Isambililo lya musango yo na kabili lilenga umuntu ukukwata isubilo lishaiwamina ilya ku ntanshi—ili line subilo e lyo abena India abengi baletetekelamo.

[Mapu pe bula 30]

(Nga mulefwaya ukumona mapu, moneni muli magazini)

AFGANISTAN

PAKISTAN

NAPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Abatusuminishe]

Mountain High Maps® Copyright © 1997 Digital Wisdom, Inc.