Aba mu Kalasi lya Gileadi Ilyalenga 108 Bacincishiwa Ukubombo Mulimo Washila

MU BAIBOLO, ilingi line amashiwi ya kuti “umulimo washila” yapilibula ukupepa Lesa. Yafuma kwi shiwi lya ciGriki ilipilibula ukubombela Lesa. (Abena Roma 9:4 NW) Abantu 5,562 abakutike kuli programu wa kupwishe kalasi lyalenga 108 ilya Watchtower Bible School of Gilead baumfwile kuli bakalanda ukufunda kubomba ukwali no kwafwa abalepwishe kalasi ukubomba umulimo washila untu Yehova Lesa engabekelwamo.a

Theodore Jaracz, uwa mwi Bumba Litungulula ilya Nte sha kwa Yehova, e wali ceyamani. Programu yatendeke no lwimbo 52, ulutila “Ishina lya kwa Shifwe.” Icisemo ca bubili ica ulu lwimbo citila: “Mu mibele yesu yonse ishina lyenu tushishe.” Ulu lwimbo cine cine lwalangishe ukufwaisha kwa pa mutima ukwa basambi (abafumine mu fyalo 10) abapwishishe kalasi ukwa kuyabomfya ifyo basambilile nga baya uko bali no kutumwa ku fyalo 17 muli bumishonari.

Munyina Jaracz, mu mashiwi yakwe aya kwiswila alandile sana pa myeshi isano intu abasambi basomene sana Baibolo iyabalengele ukuba abaipekanya ukuyabomba umulimo mu fyalo fimbi. Ukusoma Baibolo kwabafwile ukuba ‘abalingulula fyonse,’ e kuti, ukusokota mu Cebo ca kwa Lesa fyonse ifyo basambilile, no ‘kwikatisha icawama.’ (1 Abena Tesalonika 5:21) Abakoseleshe ukutwalilila na bucishinka kuli Yehova, Icebo ca kwe, na ku mulimo wa bumishonari untu bakanshiwemo. Cinshi cikabafwa ukucita ifi fyonse?

Ukupandwa Amano pa fya Kubombo Mulimo Washila

Lon Schilling, uwa mwi bumba lya Bethel Operations Committee, alandile pa mutwe waleti “Bushe Mukacimfyo Bwesho bwa Kukanaba Abaumina kumo?” Akomaile pa bucindami bwa kukanaumina kumo, ukubelebesha amano ya bulesa. (Yakobo 3:17) Ukukanaumina kumo kusanshamo ukuba uuiteulula, uwa mulinganya, uulinga, uulangulukila, kabili uuilama. Munyina Schilling atile: “Abantu abashaumina kumo baleshiba umwa kupeleela ilyo balebomba na bambi. Tabafwayo kucilamo.” Cinshi cingafwa mishonari ukukanaba uwaumina kumo? Ukukanaimonapo cimo, ukukutika no kusambililako kuli bambi, no kumfwa kuli bambi mu kuitemenwa lelo ukwabula ukutoba ifishinte fya bulesa.—1 Abena Korinti 9:19-23.

“Mwilalaba Kulya!” lyali lyashi lya kusungusha ilyakonkelepo muli uyu programu, lyalandilwe na Samuel Herd, na o wa mwi Bumba Litungulula. Akomaile pa bucindami bwa kulya ifya kulya fisuma ifya ku mupashi pa kuba uwakosa lyonse mu kubombo mulimo washila. Munyina Herd atile: “Imibombele yenu iya ku mupashi, bwangu bwangu ikakula nga mwatendeko mulimo wenu uwa kushimikila no kusambilisha. E ico, muli no kwingilishako ifya kulya fya ku mupashi pa kutila ukukosa kwenu kube ukwalinga kabili ukushaluka.” Ukulalya lyonse ifya kulya fya ku mupashi kuti kwayafwa mishonari ukusengauka ukupopomenwa kwa ku mupashi no kufuluka ku mwabo. Kulenga umo ukwikushiwa no kupingulapo ukutwalilila ukubomba umulimo washila.—Abena Filipi 4:13.

Kafundisha umo uwa pa Gileadi, Lawrence Bowen, akoseleshe abasambi bapwishishe ikalasi “Ukubwelela ku Kutendeka.” Cinshi apilibwile? Aebele bonse abasangilweko ukukupukula pe lembo lya Amapinda 1:7, apatila: “Akatiina ka kuli Yehova e kutendeka kwa kwishiba.” Kalanda alondolwele ukuti: “Icili conse icipusana ne cishinka cakatama ica kuti Yehova e ko aba te kuti cilinge ukuba ukwishiba kwine kwine nelyo ukumfwikisha kwafikapo.” Munyina Bowen apashenye fyebo fya ba mu Cebo ca kwa Lesa, Baibolo ku tupimfya twa cikope. Utupimfya nga twabikwa apo tulingile ukuba, icikope cilapangwa. Utupimfya nga ca kuti tuli utwingi, ne cikope cilaba icikulu kabili cilamonekesha kabili umuntu kuti acimona bwino bwino. Ici kuti cayafwa bonse ukubombela Lesa umulimo washila.

Wallace Liverance, uulemba abaleingila mwi Sukulu lya Gileadi, e wasondwelele amalyashi ya kukonkana. Ilyashi alandile lyaleti: “Peeleni Ukutasha nge Lambo Kuli Lesa.” Akomaile sana pa lyashi lya kwa Yesu ilya kundapa aba fibashi 10. (Luka 17:11-19) Umo fye e wabwelele ku kulumbanya Lesa no kutasha Yesu. Munyina Liverance alandilepo ukuti, “ukwabula ukutwishika, balya bambi balisangalele pa kuba abasanguka. Balitemenwe pa kusangululwa, lelo camoneke kwati balefwaya ukuti bashimapepo basuminishe ukusangululwa kwabo.” Ukusangululwa kwa ku mupashi ukwisako pa mulandu wa kusambilile cine, no kutotela, filingile ukulengo muntu ukutasha Lesa pa busuma bwakwe. Abasambi ba mwi kalasi lyalenga 108 ilya Gileadi bakoseleshiwe ukwetetula pa mibombele ya kwa Lesa yonse no busuma bwakwe pa kuti umulimo wabo no kuipusula fingalangilila ukuti baletasha Lesa.—Amalumbo 50:14, 23; 116:12, 17.

Ifya Kukumanya no Kulanshanya kwa Kwipusha Ifyo ico Cingacitwa

Mark Noumair, kafundisha na umbi uwa pa Gileadi, atungulwile ulubali lwakonkelepo muli programu. Aipwishe abasambi ukushimikako ifya kukumanya fya mu mulimo wa mwi bala pa nshita balekanshiwa. Lintu abasambi bashilaya kwi sukulu lya Gileadi, bali na babomba umulimo wa nshita yonse pa myaka mupepi na 12 nga kwakanya pali umo umo. Lintu bali pa sukulu, batendeke amasambililo ya Baibolo ayengi ku bantu ba fikulilo fyalekanalekana, ici calangilile ukuti abasambi balishibe fintu bengaba “fyonse kuli bonse.”—1 Abena Korinti 9:22.

Pa numa abasambi bapwishishe ukushimika ifya kukumanya, Charles Molohan na William Samuelson baipwishe aba mu lupwa lwa Bethel bamo bamo na bakangalila benda abapitileko mwi sukulu lya Gileadi. Pa bo baipwishe pali na munyina Robert Pevy, uo pa numa ya kupwisha ikalasi lyalenga 51 ilya Gileadi ailebombela ku Philippines. Acinkwileko ikalasi ukuti: “Lyonse ilyo mwakwata ubwafya, onse alalandako imitubululo imo pa fya kupwisho ubo bwafya. Lyonse kufwile kwabako uwingalondolola ifintu ukumucila, uwingamwebako ificililepo ukuwama. Lelo nga mwalolesha mu Baibolo no kwesho kumona ifintu mu nshila Lesa afimwenamo, takwakabe uukacila pali Baibolo. Lyonse mu Baibolo e mo mukasanga icasuko calungama.”

Pa kusondwelela programu wa ku mupashi uushaiwamina, John Barr, uwa mwi Bumba Litungulula, alandile ilyashi lyaleti “Bombeni Umulimo Washila uo Yehova Engapokelela.” Alangilile ifyo umulimo washila wingamonekela mu butumikishi bwa mwi bala mu kwafwa aba mitima isuma ukupepa Lesa mu nshila engapokelela. Pa numa ya kubelenga amashiwi yaba pali Mateo 4:10, Munyina Barr atile, “Nga tulefwaya ukupepa Yehova e ka, tulingile ukutaluka ku kupepa utulubi mu nshila shonse ishishaishibikwa, pamo nga ulunkumbwa, ukutemwa ifyuma, no kuimona abafikapo. Mwandi cilatuletele nsansa lintu tutontonkanya pe shina lisuma ilyo ba mishonari besu bapanga mu myaka yonse ukutula fye ku kwamba kwa ba 1940! Kabili natushininkisha ukuti na imwe mwe bapwishe kalasi lyalenga 108 ilya Gileadi muli no kukonka ica kumwenako cabo icisuma. Mukabombela Yehova umulimo washila, pantu wene e ka e walinga ukuupokelela.”

Kwali kusondwelela kusuma ukwa programu wa kukuulilila. Icakonkelepo nomba kumfwe mitende yafumine kuli ba munyina mu fyalo fyapusanapusana, ukupeela ba diploma, no kubelenga kalata walembele abasambi ba mwi kalasi, uwa kutasha pa kukanshiwa kwabo. Abalepwishe kalasi bakoseleshiwe ukulangisha imibele ya kuba no mupampamina wa kutwalilila ne milimo yabo kuli Yehova. Bonse abasangilweko, ukubikako na balaalikwe ukufuma mu fyalo 25, baimbile ulwimbo no kukutika kwi pepo lya kwisalila programu.

[Futunoti]

[Akabokoshi pe bula 23]

UKULONGANIKA IFIPENDO FYA BALI MU KALASI

Bafumine mu fyalo: 10

Bakayabombela mu fyalo: 17

Ubwingi bwa basambi: 46

Imyaka ya kufyalwa nga kwabanya pali umo: 34

Imyaka ya kuba mu cine nga kwabanya pali umo: 16

Imyaka ya kuba mu mulimo wa nshita yonse nga kwabanya pali umo: 12

[Icikope pe bula 24]

Ukupwisha Ikalasi Lyalenga 108 ilya Watchtower Bible School ilya Gileadi

Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo umo.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.