Mulandu Nshi Mulingile Ukupepela?

“MULALOMBA kabili tamupokelela, pa kuti mulomba bubi bubi . . . Palameni kuli Lesa, na o alapalama kuli imwe.” (Yakobo 4:3, 8) Aya mashiwi ya kwa Yakobo umusambi wa kwa Yesu, kuti yatucincisha ukutontonkanya pa milandu itulenga ukupepa.

Ipepo talyaba fye ni nshila ya kwebelamo Lesa ifyo tulekabila. Mu Lyashi lyakwe ilyalumbuka ilya pa Lupili, Yesu atile: “Shinwe aishibe fintu mukabila, ilyo tamulamulomba.” Lelo, Yesu na kabili atile: “Lombeni, kabili cilepeelwa kuli imwe.” (Mateo 6:8; 7:7) E co Yehova alafwaya tulemweba ifyo tumona ukuti tulafikabila. Lelo fingi fikabilwa pa kupepa.

Ifibusa fine fine tafilanshanya fye lintu filefwayapo fimo. Basekelela muli umo no munankwe, kabili bucibusa bwabo bulakulilako lintu baleyebana ifyo baleyumfwa. E fyo ne pepo lyaba, lyalikwata imifwaile ikalamba iyacila pa kulomba ifyo tukabila. Litupeela ishuko lya kukosha bucibusa bwesu na Yehova lintu tulemweba ifyo twaipeela kuli wene ukufuma pa nshi ya mutima wesu.

Cine cine, Lesa alitupeela ishuko lya kupepa pa kuti tulepalamina kuli wene. Ici kuti cacitika fye nga ca kutila tuleeba Lesa ifya mu mutima wesu ukucila ukupituluka mu mapepo ya kusungila ku mutwe. Mwandi cilaleta ubuseko ukulanda na Yehova mwi pepo! Ipinda lya mu Baibolo lilundapo ukuti: “Ipepo lya balungami lilamutemuna.”—Amapinda 15:8.

Kemba wa malumbo Asafi aimbile ati: “Lelo ine, ukupalama kuli Lesa e cawama kuli ine.” (Amalumbo 73:28) Lelo pa kupalamina kuli Lesa, tulingile ukucita ifyacila pa kupepa. Moneni ifyo ilyashi lyakonkapo lilelangilile fyo:

“Umo uwa mu basambi [ba kwa Yesu] atile kuli wene, Mwe Shikulu, tusambilisheni ukupepa.” Yesu amwaswike ati: “Ilyo mulepepa, muleti, Tata, ishina lyenu libelwe akatiina ubufumu bwenu bwise.” (Luka 11:1-3) Bushe ukupepa kwesu kuti kwabamo ubupilibulo nga ca kuti tatubalile twasambilila ishina lyakwe ne fyo lilingile ukubelwa akatiina? Na kabili bushe kuti twapepa mu kumfwana na ya mashiwi ya kwa Yesu nga ca kutila tatutesekeshe ifyo Ubufumu bwa kwa Lesa bwaba? Kuti twatesekesha ifi fyebo nga twaceeceeta Baibolo bwino. Lyene ukwishiba twingakwata ukufuma muli Baibolo kukatwafwa ukwishiba Lesa no kumfwikisha inshila shakwe. Kabili, ukwishiba Yehova Lesa kukatupalamika kuli wene no kuba abaipeelesha nga nshi kuli wene. Nga twacite fyo, cikaba icayanguka kuli ifwe ukulanda kuli wene.

Ipepo Kuti Lyapikulula Amafya

Ukukosha bucibusa bwesu na Yehova kukatwafwa ukupikulula amafya. Moneni ifyo ipepo lyapikulwile amafya mu lyashi limo na limo ilyalalandwapo. Amalyashi yalelangilila ukuti abalepepa bakoseshe bucibusa bwabo na Yehova.

Mu Brazil umwanakashi we shina lya Maria alipepele kuli Lesa ukuti amwafwe. Afwaile ukupondokela amafunde yaimikwa ayo abantu balekonka pa mulandu wa kuti alimwene ubumbimunda ku bekala mushi. Maria ashile umulume wakwe, abana, ne ng’anda. Kabili atendeke ukubomfya imiti ikola. Lelo ilyo afililwe ukusanga insansa, aebele Lesa ifyali ku mutima wakwe no kupepa ukuti amwafwe.

Bwangu bwangu, Inte sha kwa Yehova shibili shatandalile Maria no kumushila ulupapulo lwa Ulupungu lwa kwa Kalinda ulwakwete ifyebo fyalelanda pa bucindami bwaba mu kumfwila ubutungulushi bwa kwa Lesa. Magazini yalimufikile pa mutima, kabili bulya bwine bushiku atendeke ukusambilila Baibolo ne Nte. Ici calengele ukuti kuli pele pele abwelele ku lupwa lwakwe. Ilyo alesambilila pa lwa kwa Yehova, alefwaya ukulangisha ukutemwa kwakwe kuli wene. Maria atila: “Naliwemye imibele yandi. Pa kubala abalume bandi no lupwa lwandi tabalefwaya ukuti ndesambilila Baibolo. Lelo lintu bamwene imibele yandi yaaluka, batendeke ukunkoselesha.” Kuli pele pele, Maria apeele ubumi bwakwe kuli Komfwa we pepo pa kuti engalamubombela.

Nangu ca kutila José alikwete umukashi uwayemba no bukwebo ubwaletunguluka mu Bolivia, tali uwa nsansa. Ukwenda no mwanakashi umbi kwalengele umukashi wakwe ukubutuka pa ng’anda. Alenwa sana no kuimona ukuti tali kantu. José atila: “Natampile ukupepa no mutima wandi onse, ukwipusha fintu nalekabila ukucita pa kusekesha Lesa. Bwangu bwangu Inte sha kwa Yehova shatandele ku cifulo nalecitila amakwebo no kutambika amasambililo ya Baibolo aya pa fye, lelo nalibatamfishe. Ici cacitike imiku itatu. Lyonse nga napepa pa kuti ningasanga ubwafwilisho, e baleisa. Kuli pele pele, napingwilepo ukuti ilyo bakesa umuku wakonkapo nkakutika. Nalibelengele Baibolo yonse kabili nalikwete amepusho ayengi, lelo lyonse balekwata ifyasuko ifyaumfwika. Ukusambilila pa lwa kwa Yehova kwaletele imifwaile ipya mu bumi bwandi, kabili ifibusa fyandi, pali aba bene baNte, bali fya kumwenako fya kukoselesha! Nalekele ukwenda no mukashana na bacakolwa banandi. Tapakokwele, nabwelele ku mukashi wandi na bana bandi. Ku kwamba kwa mwaka wa 1999 nalibatishiwe.”

Mu Italy, Tamara ali no bwafya mu cupo cakwe, e co alipepele ukuti asange amano. Aishileba umuntu umukali pa mulandu wa kupumaulwa no kutamfiwa kuli balupwa lwakwe ilyo ali fye ne myaka 14. Tamara atila: “Nafwaile Baibolo no kwamba ukuibelenga. Bushiku bumo, mu nshita ya cungulo nabelengele ukuti ‘ukusanga amano caba ngo kusokota ifyuma fyashikama.’ Nalombele ayo mano mwi pepo. (Amapinda 2:1-6) Ubushiku bwakonkelepo ulucelo, Inte sha kwa Yehova shalishile. Natendeke ukusambilila Baibolo na bo, lelo palipitileko inshita pa kuti ntampe ukubomfya ifyo nalesambilila. Kuli pele pele, napingwilepo ukukonka imikalile ya Bwina Kristu kabili nalibatishiwe. Pali nomba, ine na balume bandi, tulafwilisha bambi ukumwenamo mu mano ya kwa Lesa.”

Beatriz ali pa bantu ba cuma mu musumba wa Caracas, mu calo ca Venezuela. Lelo, balimutamfishe ku mulume wakwe kabili atendeke ukucula. Alisakamikwe sana, kabili apoosele inshita iitali mu kupepa. Ilyo bwacele ulucelo, aumfwile ndibu pa cibi ca ng’anda ilelila. Bukali bukali, alengeele mu mulale wa ng’anda no kumona abantu babili nabasenda ifyola fya mabuku. Acitile nga uushilipo, lelo lintu aba baupana babili bashilafuma pa ng’anda, basunkilishe akapepala mwi samba lya cibi. Aka kapepala kalembelwepo ati: “Ishibeni Baibolo Wenu.” Bushe ukutandala kwabo kuti kwaba ni pa mulandu wa mapepo apepele mu nshita ya bushiku? Alibabweseshe. Bwangu bwangu atendeke ukusambilila Baibolo, kabili pa numa alibatishiwe. Kuli pele pele alikwete nsansa, kabili Beatriz nomba alasambilishako na bambi pa fyo bengasanga insansa.

Carmen alipepele pa mulandu wa bupiina bwakwe. Ali na bana 10 no mulume wakwe Rafael ali ni cakolwa. Carmen atile, “nalecapila abantu ifya kufwala pa kuti nsangeko ulupiya.” Lelo iminwene ya kwa Rafael yalicililemo. “Lintu twatampile ukusambilila Baibolo ne Nte sha kwa Yehova e lyo abalume bandi batendeke ukuteuluka. Twasambilile pa lwa bulayo bwa Bufumu ubwa kuti Yehova mu kwangufyanya ali no kufumya mu calo ubupiina no mutitikisha. Amapepo nalepepa kuli Lesa mu kupelako yalyaswikwe!” Ukusambilila pa lwa nshila sha kwa Yehova kwalengele Rafael ukuleka bucakolwa, kabili afwelo “buntu bupya.” (Abena Efese 4:24) Rafael no lupwa lwakwe bawemye imikalile yabo. Rafael atila: “Nangu tatuli bakankaala, kabili ne ng’anda ya kuikuulila tatwakwata, lelo ifikabilwa mu bumi fyena twalikwata, kabili tuli aba nsansa.”

Ilyo Amapepo Yonse Yakasukwa

Bushe ukupepa kwalyafwile aba bantu? Ukwabula no kutwishika! Kabili bushe namumona ukuti aba bonse amapepo yabo yayaswikwe lintu umo ukufuma mu cilonganino ca Bwina Kristu abafwile ukupalamina kuli Yehova Lesa ukupitila mu kusambilila Baibolo?—Imilimo 9:11.

E co, kanshi, natukwata imilandu isuma iyo tulingile ukupepela. Nomba line, ipepo lya kuti Ubufumu bwa kwa Lesa bwise no kufwaya kwakwe kucitwe pano nse likaasukwa. (Mateo 6:10) Pa numa Lesa abe nasangulula isonde lyesu ukufumyapo abashimufwaya, “icalo cikesulamo ukwishiba Yehova.” (Esaya 11:9) Lyene bonse abatemwa Yehova bakaipakisha “ukusokololwa kwa bana ba kwa Lesa”—kabili amapepo yabo icine cine yakasukwa.—Abena Roma 8:18-21.

[Icikope pe bula 7]

Bushe mwalishiba umulandu tulingile ukupepela?