Bakeni Kampingu Wenu

CILATIINYA ukutontonkanya pa kwenda mu ndeke iyo kompyuta wa iko abikilwemo ifyebo fya kuitungulula ifyalubana. Lelo, tontonkanyeni ifyo cingaba nga ca kuti umo alufyanya ifyebo fimo ifitungulula indeke nelyo abikilemo ifyebo fya bufi ku mufulo! Kwena mu mampalanya, e fyo umuntu umo aleesha ukucita kuli kampingu wenu. Apampamine pa konaula ica kutulanga imibele ya kukonka. Ico afwaisha ca kuti mulecita ifingalenga mwaba abalwani ba kwa Lesa!—Yobo 2:2-5; Yohane 8:44.

Bushe nani uyu wine monaushi? Mu Baibolo etwa ati “icisoka cikote iciitwa Kaseebanya kabili Satana, icilufya bonse abaikala mu calo conse.” (Ukusokolola 12:9) Alicitile ci mwi bala lya Edene, ilyo abeleleke Efa, ukumutunka ukusuula ico aishibe ukuti calilungama no kupondokela Lesa. (Ukutendeka 3:1-6, 16-19) Ukutule lyo, Satana alipanga utubungwe twa bufi utulenga abantu ukuba abalwani ba kwa Lesa. Akabungwe kakula sana pali utu mipepele ya bufi.—2 Abena Korinti 11:14, 15.

Imipepele ya Bufi Ilonaula Kampingu

Mwi buuku lya mu Baibolo ilya Ukusokolola, imipepele ya bufi imonwa nga cilende wa mampalanya uwitwa Babele Mukalamba. Ifisambilisho fyakwe fyalyonaula imibele ya cinabwingi kabili fyalenga bene ukupata no kucita fye ulukaakala ku bashasumina mu fisambilisho fyabo. Na kuba, ukulingana ne buuku lya Ukusokolola, Lesa alipeela imipepele ya bufi umulandu wa mulopa “uwa bonse abaipaiwe pe sonde,” ukusanshako na bakapepa ba kwa Lesa umwine.—Ukusokolola 17:1-6; 18:3, 24.

Yesu asokele abasambi bakwe ifyo imipepele ya bufi yali no kufulunganya ifipimo fya bamo ifya mibele isuma ilyo atile: “Ikese nshita iya kuti onse uwamwipaya akatila e kubombela Lesa.” Mwandini aba bantu balukaakala aba musango yo tabaishiba imibele isuma! Yesu atile: “Tabaishiba Tata nangu ni ne.” (Yohane 16:2, 3) Tapapitile na nshita apo Yesu alandile aya mashiwi, alipaiwe ku baebelwe na bashimapepo bamo, abo kampingu wabo asuminishe ukumwipaya. (Yohane 11:47-50) Yesu wena atile abakonshi bakwe aba cine beshibikilwa ku kutemwana. Lelo ukutemwa kwabo kwalikula ica kuti balatemwa na balwani babo.—Mateo 5:44-48; Yohane 13:35.

Inshila na imbi iyo imipepele ya bufi yonawilamo kampingu wa bengi kukoselesha abantu ukukonka imibele yaseeka nampo nga isuma nelyo ibi. Paulo alisobele kabela ifi ilyo atile: “Ikese nshita ilyo bakakaano kusambilishiwe sambilisho lituntulu, lelo bakailonganisha bakasambilisha umwabelo lunkumbwa lwabo lwine, pa kuba abapeepula amatwi.”—2 Timote 4:3.

Pali lelo, bashimapepo balipeepula amatwi ya bantu pa kusosa ukutila Lesa kuti asuminisha umuntu ukulaala no ushili mwina mwakwe. Bamo balasuminisha abaume ukubembuka na baume banabo e lyo na banakashi ukubembuka na banakashi banabo. Na kuba, bashimapepo bamo balabembuka na baume banabo. Icipande ca muli nyushipepala ya ku Britain iya The Times catile “bashimapepo 13 abaishibikwa ukuti balabembuka na baume banabo” balisalwa ukuba mu cilye ca General Synod ica mu Church of England. Nga ca kuti bashimapepo bakaana ukukonka imibele Baibolo isambilisha na macalici yabo tayacitilepo kantu, fipimo nshi abantu batungulula bengakonka? Te ca kupapa ukuti abengi balipelenganishiwa sana.

Fintu cawama ukutungululwa ne mibele pamo ne cine ca ku mupashi ifyapala ulubuuto ifisambilishiwa mu Baibolo! (Amalumbo 43:3; Yohane 17:17) Ku ca kumwenako, Baibolo isambilisha ati aba bulalelale na bacende “tabakapyane ubufumu bwa kwa Lesa.” (1 Abena Korinti 6:9, 10) Itweba ukuti abaume na banakashi abaalula “umusango wa cifyalilwa icishaba ca cifyalilwa . . . bacite fya nsoni” mu menso ya kwa Lesa. (Abena Roma 1:26, 27, 32) Ifi fisambilisho pa lwa mibele isuma tafimumungwa fye na bantu abashapwilika; fyaba fipimo fyapuutwamo ifya kwa Lesa, ifyo ashabala afumyapo. (Abena Galatia 1:8; 2 Timote 3:16) Lelo Satana alikwata inshila na shimbi isho onawilamo kampingu.

Mulesala Ifya Kusekesha

Cibi sana ukupatikisha umuntu ukucita icabipa, lelo ukumulenga ukufwaisha ukucite co kwacila na po ukubipa. Ici e co “kateka wa pano sonde,” Satana afwaisha ukucita. Pa kubika ukutontonkanya kwakwe ukwabipa mu mintontonkanya na mu mitima ya bapumbu nelyo abashashilimuka, abomfya ifintu pamo nga ifitabo, amafilimu, inyimbo, ifyangalo fya pa kompyuta, ne fye shiku batambisha pa intaneti. Abacaice e bo ashukila sana.—Yohane 14:30; Abena Efese 2:2.

Ulupapulo lwa Pediatrics lwatile, “abacaice [mu United States] balatamba amafilimu ya lukaakala mupepi na 10,000 cila mwaka, kabili amaprogramu ya baice aya pa TV, e yacila na po ku lukaakala.” Icipande na kabili catile “cila mwaka, abapungwe balatamba amafilimu mupepi na 15,000 aya bulalelale, umusaalula, ne mipulwe.” Catile, nangu fye maprogramu ayo batambisha mu cungulo ilyo abengi batemwa ukutamba TV, “yalalangishe fikope fya kulaala kwa mwaume no mwanakashi ukucila pa miku 8 mwi awala limo, uku kufushiwa imiku ine ukucila ifyo cali mu 1976.” Te ca kupapa ukutila abafwailisha basangile ukuti “umusaalula na o ulefulilako sana.” Lelo Baibolo pamo ne fitabo fya sayansi ifingi fisoka ukuti ukutamba ifya musango yo kulenga abantu ukuba ne mibele yabipisha. E co, nga cine cine mulefwaya ukuteemuna Lesa no kuinonsha, umfwileni Amapinda 4:23, ayatila: “Lindo mutima obe, pantu muli wene e mwaba amatuntuko ya mweo.”—Esaya 48:17.

Inyimbo shaseeka ishingi nasho shilonaula kampingu. Inyunshipepala ya ku Australia iya The Sunday Mail yasokele ukuti kemba wa nyimbo uo inyimbo shakwe shaseeka no kushitwa sana ku fyalo fya basungu alesha sana “ukufulunganya abantu.” Icipande catile “inyimbo shakwe shilumbanya imiti ikola ukulaalana kwa pa lupwa, no kupatikisha abanakashi ukulaala na bo,” kabili casosele no kuti “emba ati akepaya umukashi wakwe no kupoosa icitumbi muli bemba.” Amashiwi yamo yalibipisha ica kuti te kuti tuyalande pano. Lelo mu nyimbo shakwe alinonkelamo icilambu cishaikulila. Bushe kuti mwatemwa ukubyala mu muntontonkanya na mu mutima wenu ifyebo fya bonaushi nge filumbwilwe pa muulu, nangu ca kuti fimoneka kwati fisuma sana mu nyimbo? Tulesubila tamwingatemwa ukucite co, pantu abacite fyo bakowesha kampingu no kuilenga abene ukuba no “umutima wa bubifi,” no kuba abalwani ba kwa Lesa.—AbaHebere 3:12; Mateo 12:33-35.

E co cenjeleni pa fya kusekesha musala. Baibolo itukonkomesha ukuti: “Tontonkanyeni fyonse ifya cine, fyonse ifya mucinshi, fyonse ifya bulungami, fyonse ifya musangwela, fyonse ifyayemba, fyonse ifya mutembo, nga kwabe ca busuma, nga kwabe ca kutasha, tontonkanyeni ifi fintu.”—Abena Filipi 4:8.

Ukubishanya Kulakuma Kampingu Wenu

Ilyo bali abaice, Neil na Franz bakwete ifibusa ifisuma abali Bena Kristu bene bene.a Neil atila, “Lelo, mu kupita kwa nshita, natendeke ukwangala ne fibusa fyabipa.” Kuli pele pele, atendeke ulukaakala kabili alikakilwe mu cifungo, icimuletela amalangulushi pali nomba. E fyo cali na kuli Franz. Ailishenye ati, “naleti kuti naangala na baice banandi aba ku calo ukwabula ukuba nga bene. Lelo, nga fintu tubelenga pa Abena Galatia 6:7, ‘Lesa tasentekwa; pantu ico umuntu abyala, e co akalobolola.’ Ifintu fyabipa ifyancitikila fyansambilishe ukuti nalilubile kabili Yehova alilungike. Bampingula ukufwila mu cifungo pa filubo nacita.”

Abantu pamo nga Neil na Franz tabatendeke ukucita misoka mu kupumikisha fye; pa kubala balemona kwati te kuti bacite imisoka. Lelo batendeka ukucite co panono panono, ukutendekela ku kubishanya kubi. (1 Abena Korinti 15:33) Kuti pakonka ukubomfya imiti ikola no kunwesha ubwalwa. Na kuba, kampingu yalondololwa bwino ukuti “lubali lwa buntu ulonaika umuntu nga anwa ubwalwa.”Ukufuma apa tacafya ukucita imisoka nelyo bucisenene.

Mulandu nshi uwa kubishanishisha ne fibusa fyabipa? Ukucila, mulebishanya na ba mano, abatemwa Lesa icine cine. Bakamwafwa ukukosha kampingu wenu pa kuti alemutungulula bwino, ukumucingilila ku malanda ayengi. (Amapinda 13:20) Nangu ca kutila, Neil na Franz bacili mu cifungo, pali nomba batila kampingu wabo ca bupe ukufuma kuli Lesa ico bafwile ukukansha bwino no kuteesa icine cine. Na kabili, balebombesha ukulundulula bucibusa bwakosa na Lesa wabo, Yehova. Beni na mano no kusambililako ku filubo fyabo.—Amapinda 22:3.

Cingilileni Kampingu Wenu

Tulanga ukuti tulafwaya ukucingilila kampingu ilyo twalundulula ukutemwa ne citetekelo muli Lesa, pamo na katiina kalinga kuli wene. (Amapinda 8:13; 1 Yohane 5:3) Baibolo isokolola ukuti kampingu uushitungululwa ne fi fintu ilingi tashangila kumibele isuma. Ku ca kumwenako, Amalumbo 14:1 yalanda pa lwa batila mu mutima wabo ati: “Takuli Lesa!” Bushe uku kubulwe citetekelo kubalenga ukucita finshi? Ilembo lyatwalilila ukusosa ati: “Baonaika, bacite milimo iya kuselausha.”

Abashakwata icitetekelo cine cine muli Lesa tabakwata ne subilo lyakosa pa lwa nshita ya ku ntanshi iisuma. E co, bapoosa fye amano ku mikalile ya pali ino nshita, no kukonkelele fya ku mubili. Batila: “Tulye no kunwa, pantu mailo tukafwa.” (1 Abena Korinti 15:32) Lelo, abatontomesha pa cilambu ca mweo wa muyayaya tabapumbulwa ne fintu fya cino calo ifilepita. Ukupala kompyuta ubomba bwino uba mu ndeke, kampingu wabo uwakanshiwa abatungulula lyonse mu nshila yalungama, iya kumfwila Lesa muli bucishinka.—Abena Filipi 3:8.

Pa kuti kampingu wenu lyonse aleba uwakosa kabili uwalungama, afwile ukulatungululwa ne Cebo ca kwa Lesa. Baibolo itweba ati ubo butungulushi e ko bwaba lintu ilondolola bwino bwino ukuti: “Ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.” (Esaya 30:21) E co, tantikeni inshita ya kubelenga Baibolo cila bushiku. Ici cikamukosha no kumukoselesha ilyo muletukuta ukucite cawama nelyo ilyo muli na masakamika. Shininkisheni ukuti Yehova akamulanga imibele isuma no kumutungulula lwa ku mupashi nga mwamucetekela umupwilapo. Pashanyeni kemba wa malumbo uwalembele ati: “Nabika Yehova ku ntanshi yandi pe; apo aba ku kulyo kwandi nshakatelentenshiwe.”—Amalumbo 16:8; 55:22.

[Futunoti]

[Ifikope pe bula 5]

Imipepele ya bufi, iyalondololwa muli Baibolo nga “Babele Mukalamba,” yalyonaula bakampingu wa bengi

[Abatusuminishe]

Shimapepo alepaala ifita: Icikope ca ba U.S. Army

[Ifikope pe bula 6]

Ukutamba amafilimu ya lukaakala na bucisenene kuti kwaonaula kampingu wenu

[Icikope pe bula 7]

Ukutungululwa lyonse ne Cebo ca kwa Lesa kukabakilila kampingu wenu