“Ipaalo lya kwa Yehova Lyene Lilacindamika”

BONSE fye tulafwaya ukupaalwa. Dikishonari wa The American Heritage College Dictionary alondolola ukuti amapaalo yalenga umuntu ukuba ne “nsansa, ukuumfwa bwino, nelyo ukuipakisha ulubanda.” Apo Yehova e Kapeela wa “ca kupeelwa conse icisuma ne ca bupe conse icafikapo,” ipaalo lya cine cine, ilibelelela lifuma kuli Kalenga wesu uwa kutemwa. (Yakobo 1:17) Afumfumwina amapaalo pa bantu bonse, na pa bashamwishiba. Yesu alandile pali Wishi ati: “Alenga akasuba kakwe ukutulila ababifi na basuma, no kuleke mfula ilokele abalungama na bashalungama.” (Mateo 5:45) Lelo, Yehova asenamina fye abamutemwa.—Amalango 28:1-14; Yobo 1:1; 42:12.

Kemba wa malumbo alembele ati: “Yehova alapeela; tatana cisuma ku benda muli bumpomfu.” (Amalumbo 84:11) Ca cine, ababombela Yehova balacindama. Balishiba ukuti “ipaalo lya kwa Yehova lyene lilacindamika, kabili talundako ukulungulula.” Baibolo na kabili itila: “Abapaalwa kuli [Yehova] bakapyaninine calo.” (Amapinda 10:22; Amalumbo 37:22, 29) Cine cine ilyo likaba lipaalo!

Kuti twakwata shani ipaalo lya kwa Yehova? Ku ca kumwenako, tukabila ukulundulula imibele iimutemuna. (Amalango 30:16, 19, 20; Mika 6:8) Uko twishibila ici ni ku ca kumwenako ca babomfi batatu aba kwa Yehova aba ku kale.

Yehova Alapaala Ababomfi Bakwe

Noa ali mubomfi wapulamo uwa kwa Lesa. Pa Ukutendeka 6:8, tubelengapo ati: “Noa asango kusenaminwa ku menso ya kwa Yehova.” Mulandu nshi? Pantu Noa ali ne cumfwila. Ubulondoloshi butila: “Noa aleenda na Lesa.” Noa akonkele ifishinte fyalungama ifya kwa Yehova no kumfwila amafunde yakwe. Pa nshita lintu icalo cabipishe ku lukaakala no bupulumushi, Noa ena acitile “umwabelele conse ico Lesa amwebele, e fyo acitile.” (Ukutendeka 6:9, 22) Ici calengele ukuti Yehova amutungulule ku kukuula “icibwato ku kupusukilamo aba mu ng’anda [ya kwa Noa].” (AbaHebere 11:7) Muli iyi nshila, Noa no lupwa lwakwe—kabili ukupitila muli bene abantunse—tabalofiwe ilyo ilya nkulo yalobele. Na Noa afwile ne subilo lya kwisabuushiwa muli paradise wa pe sonde ukwikala ubumi bwa pe. Ala yali mapaalo yene yene apokelele!

Abrahamu na o akwete imibele yateemwine Yehova. Iyapulilemo pali iyi yali citetekelo. (AbaHebere 11:8-10) Abrahamu ashile imikalile isuma mu Uri na pa numa iya mu Harani pantu acetekele ubulayo bwa kwa Yehova ukuti ubufyashi bwakwe bukafula no kuba ipaalo ku nko shonse. (Ukutendeka 12:2, 3) Te mulandu ne myaka iingi iya kweshiwa, alilambwilwe pa mulandu wa citetekelo cakwe ilyo Isaki umwana wakwe umwaume afyelwe. Ukupitila muli wene, Abrahamu aali cikolwe ca luko lwasalwa ulwa kwa Lesa, Israele, kabili kuli pele pele icikolwe ca kwa Mesia. (Abena Roma 4:19-21) Kabili, e “shibo wa bonse abatetekela,” kabili aitilwe “Cibusa wa kwa Lesa.” (Abena Roma 4:11; Yakobo 2:23; Abena Galatia 3:7, 29) Mwandini alikele bwino nga nshi, kabili alicindamikwe umulandu we paalo!

Tontonkanyeni na kabili pa muntu wa busumino Mose. Pa mibele akwete iyapulilemo yali kutemwa atemenwe ifya ku mupashi. Mose akeene ifyuma fyonse ifya mu Egupti kabili “akoselele ngo umone Mfumu iishimoneka.” (AbaHebere 11:27) Pa numa ya myaka 40 mu Midiani, abwelulukile ku Egupti ninshi alikota no kuyaiminina kuli Farao, uwakwatishe amaka pali ilya nshita, ukumweba ati alekeko aba bwananyina banankwe. (Ukufuma 7:1-7) Alimweneko ifinkunka 10, ifyo Bemba Wakashika apaatwilwe, ne fyo imilalo ya kwa Farao yafwile. Yehova alimubomfeshe ukupeela abena Israele Amalango kabili aetetwile pa cipangano ca kwa Yehova capamo no luko lwapangilwe fye. Pa myaka 40, Mose atungulwile uluko lwa bena Israele mu matololo. Ubumi bwakwe bwali ubwalondoloka, kabili aipakishe nga nshi amapaalo ayengi aya mulimo.

Amapaalo ya Muno Nshiku

Aya malyashi yalangilila ukuti imikalile ya babombela Lesa yalilondoloka icine cine. Ilyo abantu ba kwa Yehova balundulula imibele pamo nge cumfwila, icitetekelo, no kutemwa ifya ku mupashi, balapaalwa sana.

Bushe twapaalwa shani? Kwena, ilyo abantu abengi nga nshi ababa mu Kristendomu baba ne cipowe ca ku mupashi, ‘tusaminwo busuma bwa kwa Yehova.’ (Yeremia 31:12) Ukupitila muli Yesu Kristu na mu “musha wa cishinka kabili uwashilimuka,” Yehova alatupeela ifya kulya fya ku mupashi ifingi nga nshi ifitwafwa ukutwalilila ukuba mu “nshila iitwala ku mweo.” (Mateo 7:13, 14; 24:45; Yohane 17:3) Ukubishanya pamo na bamunyinefwe ba Bwina Kristu lipaalo na limbi. Pa kulongana na pa nshita shimbi, ukuba pamo na bakapepa banensu abalanga ukutemwa kabili abesha ukufuma pa nshi ya mitima yabo ukufwalo “buntu bupya” cintu cimo icitulenga ukuba ne nsansa icine cine. (Abena Kolose 3:8-10; Amalumbo 133:1) Lelo, ipaalo lyakulisha ilyo twakwata lishuko twateesa ilya kuba na bucibusa bwa pa mutima na Yehova Lesa no kukonka mu nkasa sha Mwana wakwe, Kristu Yesu.—Abena Roma 5:1, 8; Abena Filipi 3:8.

Ilyo tuleetetula pa mapaalo ya musango yo, twiluka ukuti walicindama umulimo tubombela Lesa. Napamo tutontonkanya pa mulumbe wa kwa Yesu uwa muntu wa makwebo uwaile mu kufwaya bamargariti basuma. Yesu alandile pali uyu muntu ati: “Kabili pa kusanga margariti umo uwaumo mutengo, ailepoosa fyonse ifyo akwete no kumushita.” (Mateo 13:46) Ifyo fine fye e fyo tuyumfwa pali bucibusa bwesu na Lesa, ishuko twateesa ilya kumubombela, ukubishanya kwesu ukwa Bwina Kristu, isubilo lyesu ilya Bwina Kristu, na pa mapaalo yambi ayakuma icitetekelo cesu. Takwaba icacindama ukucila pali fi mu bumi bwesu.

Bwesesheni Yehova

Apo twalishiba ukuti Yehova e Kapeela wa ca bupe conse icisuma, imitima yesu ilacincimunwa ukuti tutashe pa mapaalo tupokelela. Nga kuti twatasha shani? Inshila imo ni pa kwafwako bambi ukuipakisha aya yene mapaalo. (Mateo 28:19) Mu fyalo ukucila pali 230, Inte sha kwa Yehova bali abaswangana ukutandalila abena mupalamano ukubafwa ukuipakisha aya yene mapaalo. Ilyo balecite fi, balabomfya inshita yonse iyo bakwata, amaka, ne fikwatwa fyabo ku kwafwa bambi “ukufika ku kwishibe Cine.”—1 Timote 2:4.

Tontonkanyeni na pali bapainiya abekala mu Glendale, California, ku U.S.A. Cila lucelo pa Cibelushi, benda mupepi na bakilomita 100 ukuya no kubwela ku kutandalila icifungo. Nangu ca kuti pa kutandala kumo kumo bapoosapo fye amaawala ayanono na bafungwa, tabafuupulwa. Umo pali aba atila: “Tulomfwa bwino ukubombela muli ci cifulo caibela. Ilyo tulebombelamo tulaba ne nsansa ishingi. Twalikwata abengi nga nshi abafwaisha ukusambilila ica kuti cilafya ukukumanisha bonse. Pali ino nshita, tulesambilila na bantu basano, kabili bambi na bo bane balilomba ukuti tulesambilila na bo Baibolo.”

Abatumikishi ba Bwina Kristu abapimpa baliba ne nsansa ukubomba uyu mulimo upususha ubumi apabula amalipilo. Balanga imibele ya kwa Yesu, uwatile: “Mwapokele ubupe, peeleni ubupe.” (Mateo 10:8) Abantu ukufika mu mamilioni balebombako uyu wine umulimo wa kupeela, ne ci cilengele, abantu abengi ababa ne mitima iifumacumi ukwankulako no kuba abasambi. Mu myaka fye isano iyapita, abantu mupepi na mamilioni 1.7 baliipeela kuli Yehova. Pa kusakamana aba abalefulilako fye pakabila amaBaibolo na yambi ne mpapulo shashimpwa pali Baibolo e lyo no kukuulilapo Amayanda ya Bufumu ne fikuulwa fimbi ifya kulonganinamo. Bushe indalama sha kucitilamo fyonse fi shifuma kwi? Shonse shine shifuma fye mu misangulo ya kuitemenwa.

Pa mulandu wa bupiina mu ncende shimo isha calo, abengi balatulukusha pa kufwaila fye ndupwa shabo ifyo shikabila. Ukulingana na magazini wa New Scientist, abantu ukufika kuli bilioni umo bapoosa indalama ishingi ku kushita ifya kulya pali shilya babomfya pa ng’anda. E fyo caba na kuli bamunyinefwe abengi ne nkashi shesu isha Bwina Kristu. Ukwabula ukwafwa ukufuma kuli bakapepa banabo, te kuti bakumanishe ukukwata ifya musango yo pamo nga impapulo sha Bwina Kristu nelyo Amayanda ya Bufumu ayasuma.

Kwena, ici tacilolele mu kuti aba musango yu basosa abati cili fye bwino bambi ukutusendela icisendo. Lelo kwena balakabila ubwafwilisho. Mose, ilyo alekoselesha abena Israele ukusangula ifyo bakwete nge nshila ya kutashishamo Yehova pa fyo bapaalilwe, atile: “Umuntu onse akapeele ica bupe umwabele cili mu minwe yakwe, umwabele paalo lya kwa Yehova Lesa wenu ilyo amupeela.” (Amalango 16:17) E co, ilyo Yesu amwene mukamfwilwa ukusangula “utunyampuku tubili twa ndalama” mwi tempele, alimutashishe ku basambi bakwe. Pantu acitile apapelele amaka yakwe. (Luka 21:2, 3) Ukupala ulya, Abena Kristu abapiina balacita apapela amaka yabo. Kabili nga paba ukubulisha, Abena Kristu banabo ababako eyefilya balakumanisha pali kulya kubulisha.—2 Abena Korinti 8:13-15.

Ilyo twabwesesha Lesa mu nshila sha musango yo, calicindama ukuba no mutima usuma. (2 Abena Korinti 8:12) Paulo atile: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Ilyo twapeela ukufuma pa mutima, tutungilila ukulunduluka kwa kuteyanya kwa kwa Lesa ukuliko pali ino nshita kabili tulalundako ne nsansa shesu shine.—Imilimo 20:35.

Ukubombako umulimo wa kushimikila no kuitemenwa ukusangula e nshila shibili twingapeela Yehova pa mapaalo atupeela. Kabili tulakoseleshiwa icine cine ukwishiba ukuti Yehova afwaya ukupeela amapaalo yakwe abantu abafumacumi abengi nga nshi, napamo abashamwishiba pali ino nshita! (2 Petro 3:9) Shi kanshi, natutwalilile ukubomfya ifikwatwa fyesu mu mulimo wa kwa Lesa pa kuti tusange aba mitima iifumacumi no kubafwa ukulundulula imibele pamo nga, icumfwila, icitetekelo, no kutemwa ifyashila. Nga twacite fyo, tukaba ne nsansa shaba mu kubafwa ‘ukusonda no kumono kuti aliwama Yehova.’—Amalumbo 34:8.

[Akabokoshi pe bula 28, 29]

Ifyo Bamo

BASANGWILAKO KU MULIMO WA MWI SONDE LYONSE

bengi balapaatulako, nelyo ukupekanya indalama isho babika mu tubokoshi twa misangulo utwalembwapo ati: “Imisangulo ya Mulimo wa mwi Sonde Lyonse—Mateo 24:14.”

Cila mweshi ifilonganino filatuma ishi ndalama ku maofeshi yakalamba aya calo conse ku Brooklyn, New York, nelyo ku maofeshi yabela mupepi. Imisangulo ya kuitemenwa iya ndalama na yo kuti yatumwa mu kulungatika ku Treasurer’s Office, Watch Tower Bible and Tract Society of Pennsylvania, Akabokoshi 33459, Lusaka 10101. Ifibeekobeeko nelyo ifikwatwa fimbi ifya mutengo na fyo fiine kuti fyasangulwa. Kalata umwipi uulelondololo kuti ubu bupe bwa kulungatika, alingile ukutuminwa pamo ne yi misangulo.

UMUSANGULO WA CIPANGANO

Indalama kuti shapeelwa ukupitila mu kutantika kwaibela ukwa kuti, uulepeela nga akabila ukushibomfya kuti bamubwesesha. Nga mulefwaya ukwishibilapo na fimbi, kuti mwalembela ku Treasurer’s Office, Watch Tower Bible and Tract Society of Pennsylvania, Box 33459, Lusaka 10101.

UKUPEKANISHISHA UKUPEELA

Ukusansha pa kupeele ndalama ukwa kulungatika ne misangulo ya cipangano iya ndalama, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Pali isho nshila paba:

Inshuwalansi: Watch Tower Society kuti yalumbulwa ukuti e ikapoka indalama sha cipangano ca inshuwalansi nelyo ica kuleke ncito nangu ukupoka penshoni.

Amaakaunti ya ku Banki: Amaakaunti ya ku Banki, amasetifiketi ya ndalama shili ku Banki, nelyo indalama sha kulekelapo incito, kuti fyaseekeshiwa nelyo ukulipilwa ilyo umwine afwa ku Watch Tower Society, ukulingana ne fyo ibanki abikishako indalama lifwaya.

AmaStock na maBond: Amastock na mabond kuti fyasangulwa ku Watch Tower Society ngo bupe bwa kulungatika.

Impanga ne Fikuulwa: Impanga ne fikuulwa ifingashitishiwa kuti fyasangulwa ku Watch Tower Society ngo bupe bwa kulungatika nelyo ukwikatila fye ilya mpanga ukufikila umwine afwa. Ipusheni ku maofeshi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo Sosaite impanga ne fikuulwa.

Ubupe bwa pa Caka: Ubupe bwa pa caka ni nshila umo umuntu apeelelamo indalama nelyo ifikwatwa ku Watchtower Society. Ukukonkapo, uwapeela, nelyo uo uupeele alumbwile, alapokeleka icipendo ca ndalama cila mwaka ukufikila afwa. Uupeele alaputwilwako umusonko mu mwaka wine icipangano ca bupe bwa pa caka catendeka ukubomba.

Ifya Cishale no Kuseekesha: Ifipe nelyo indalama ifya cishale kuti fyapeelwa ku Watch Tower Society ukupitila mu fipepala fya cishale ifya mwi funde, nelyo Watch Tower Society kuti yalembwa mu cipangano ca kuseekesha ifipe nelyo indalama. Inshita shimo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Ishiwi lya kuti “ukupekanishisha ukupeela” lilangilila ukuti uulesangula ukubomfya ishi nshila alekabila ukupekanisha kabela. Nga mulefwaya ukupeela ukupitila mu nshila ya kupekanisha ukupeela mulingile ukwipusha iofeshi lya Nte sha kwa Yehova, ukupitila mu kulemba nelyo ukutuma lamya ukubomfya akeyala kali pe samba.

TREASURER’S OFFICE

Watch Tower Bible and Tract Society of Pennsylvania

Box 33459, Lusaka 10101

Telefoni: 272062