Bushe Kuti Twacindamika Shani Inshiku Shesu Kuli Yehova?

Lydia H. Sigourney, kalemba umwina Amerika (1791-1865) atile: “Mailo pa kutula no kuwa kwa kasuba, amaawala yabili ayashaiwamina yalyonaike, iawala limo lyali na maminiti 60 ayacindama. Te kuti yabweshiwe pantu nayonaikilila!”

INSHIKU sha bumi bwesu shimoneka ishinono kabili ishipita bwangu bwangu. Davidi, kemba wa malumbo aetetwile pa fyo ubumi bwaipipa kabili ici camulengele ukupepa ati: “Mwe Yehova, nengeni ukwishibe mpela yandi, no mulingo wa nshiku shandi, ifyo waba; muleke njishibe ifyo ndi uwapelela. Moneni, mwacite nshiku shandi kwati masasa ya ndupi, no bwikashi bwandi kwati tapali pa mulola wenu.” Ico Davidi ayangilweko kwikala imikalile itemuna Lesa, mu milandile yakwe na mu micitile. Ilyo alelanda pa fyo ashintilile pali Lesa, atile: “Icicetekelo candi cili kuli imwe.” (Amalumbo 39:4, 5, 7) Yehova alikutike. Cine cine alilingile imilimo ya kwa Davidi no kumulambula umwabelele imilimo yakwe.

Calyanguka ukuba uwapamfiwa akasuba konse no kobelwa sana ne mikalile ya kubilingana iyafulamo ifya kucita. Ici kuti calenga twasakamikwa sana, maka maka ifi kwaba ifingi ifya kucita ne fitucitikila kabili inshita ya kuficita yalicepa. Bushe na ifwe twalyangwako ku kwikala ubumi butemuna Lesa nga Davidi? Ukulanda fye icishinka, Yehova alamona kabili alatubebeta umo na umo. Imyaka 3,600 iyapita, Yobo, umwaume waletiina Lesa alisumine ukuti Yehova alimwene inshila shakwe no kuceeceeta imilimo yakwe. Yobo aipwishe ati: “Ilyo akalubulwisha kuti nayasuka shani?” (Yobo 31:4-6, 14) Kuti twapenda inshiku shesu kuli Lesa nga ca kuti tuleangwa ifya ku mupashi, tuleumfwila amafunde yakwe, no kubomfya inshita yesu bwino. Natubebete iyi milandu.

Natwangwe Sana Ifya ku Mupashi

Amalembo yapuutwamo yatucincisha bwino ukuti twangwe sana ifya ku mupashi ilyo yasosa ati: “Musuminishe ifyacilamo.” Finshi ifi fyacilamo? Icasuko cilimo “ukushininkisha no kwishiba konse.” (Abena Filipi 1:9, 10) Pa kwishiba ubufwayo bwa kwa Yehova tufwile ukubomfya bwino inshita yesu. Lelo, nga twayangwa sana ifya ku mupashi tukakwata ubumi busuma kabili ubwa nsansa.

Umutumwa Paulo atucinkulako ukuti “muleshininkisha ifiteemuna Shikulu,” (NW) Ukushininkisha kwesu kufwile kwabamo no kubebeta amapange yesu ne fyo umutima wesu ufwaya. Umutumwa Paulo atwalilila ati: ‘Mube abeluka icabo kufwaya kwa kwa Shikulu.’ (Abena Efese 5:10, 17) E ico, cinshi citemuna Yehova? Ipinda lya mu Baibolo lyayasuka ati: “Ukutendeka kwa mano—nonka amano; kabili muli conse ico wanonka nonko mucetekanya; uyatuntumike, na yo yakakusansabika.” (Amapinda 4:7, 8) Yehova alacankwa nga ca kuti umuntu anonka no kubomfya amano ya bulesa. (Amapinda 23:15) Ubusuma bwa ayo mano bwa kuti te kuti yapokwe nelyo ukonaulwa. Na kuba yalabakilila no kucingilila ‘ku mibele ibi na ku fyebo fya kupuulula kwa bantu.’—Amapinda 2:10-15.

Kanshi, caliwama ukukaana itunko lyonse ilya kukanayangwa ifya ku mupashi! Tufwile ukuba no mutima wa kutasha ifyo Yehova atweba no kuba na katiina kasuma kuli wene. (Amapinda 23:17, 18) Nangu line kuti twalundulula iyi mibele inshita iili yonse iya bumi bwesu, icawamisha kulundulula iyi mibele isuma no kulenga ubuntu bwesu ukumumungwa ne ifishinte fya mu Baibolo ukutula ku bwaice. Imfumu ya mano Solomone yatila: “Ibukisha Kalenga obe mu nshiku sha bulumendo bobe.”—Lukala Milandu 12:1.

Inshila yaishibikwa sana iyo mwingalundulwilamo ukutasha kuli Yehova kupepa kuli wene cila bushiku. Davidi alishibe ifyo ukulanda na Yehova kwacindama, pantu apaapeete ati: “Umfweni ipepo lyandi, mwe Yehova, ne nkuuta yandi kutikeniko, ku filamba fyandi mwilatalala.” (Amalumbo 39:12) Bushe limo tulapalama sana kuli Yehova ica kuti twalukusha ne filamba ilyo tulemweba ifili ku mutima? Cine cine, nga tulelanda sana na Yehova pa fili ku mutima no kwetetula pa Cebo cakwe, akapalama sana kuli ifwe.—Yakobo 4:8.

Sambilileni Icumfwila

Mose na o ali muntu wa busumino uwaishibe ukuti afwile ukushintilila pali Lesa. Nga Davidi, Mose na o alimwene ukuti ubumi bwaisulamo amafya. E co, alombele Lesa ukumulenga ‘ukwishibo kupende nshiku shakwe, no kuleka amone umutima wa mano.’ (Amalumbo 90:10-12) Kuti twakwata umutima wa mano nga tulesambilila no kwikala umwabela amafunde ne fishinte fya kwa Yehova. Mose alishibe ili ifunde kabili na o alyeseshe na maka ukusambilisha uluko lwa bena Israele cilya icine cacindama pa kulabeba libili libili amafunde ne fipope fya kwa Lesa ilyo bashilapyana Icalo Calaiwe. Imfumu ya buntunse yonse iyo Yehova ali no kusala ukuteka Israele ku ntanshi yali no kuilembela ibuuku lya Malango no kubelengamo inshiku shonse isha bumi bwa iko. Mulandu nshi? Pa kuti isambilile ukutiina Lesa. Ici cali no kwesha icumfwila ca mfumu. Cali no kucingilila yene ku kuituumika pali bamunyina kabili cali no kutantalishako inshiku sha bufumu bwa iko. (Amalango 17:18-20) Ubu bulayo bwalibwekeshiwepo ilyo Yehova aebele Solomone mwana Davidi ati: “Nga wakulaenda mu mibele yandi, ku kubake fipope fyandi na mafunde yandi, nga filya Davidi wiso aendele, lyene nkatantalishe nshiku shobe.”—1 Ishamfumu 3:10-14.

Icumfwila mulandu wakakala kuli Lesa. Nga twalamona fimo mu fyo Yehova afwaya na mu mafunde yakwe kwati tafyacindama, Yehova akeshibe co ukwabula no kutwishika. (Amapinda 15:3) Ukwishibe ci kufwile ukutucincisha ukutwalilila ukukatamika fyonse ifyo Yehova atweba ukucita, nangu line limo tacanguka ukucite co. Satana aleesha na maka ‘ukutulesha’ ilyo tulebombesha ukukonka amafunde ne fipope fya kwa Lesa.—1 Abena Tesalonika 2:18.

Calicindama maka maka ukuumfwila ukufunda kwa mu Malembo ukwa kulongana pamo ku kupepa no kubishanya. (Amalango 31:12, 13; AbaHebere 10:24, 25) E co tufwile ukuipusha atuti: ‘Bushe naliba no mupampamina no mukoosha ifikabilwa pa kucita ifyacindama icine cine?’ Ukusuula ukubishanya no kufunda kuba pa kulongana kwa Bwina Kristu pa mulandu fye wa kufwaya ukukwata indalama ishingi kuti kwanasha bucibusa bwesu na Yehova. Umutumwa Paulo alembele ati: “Imibele yenu ibe iishatemwa ndalama; muteke imitima ku fintu ifyo mukwete, pantu Umwine [Yehova] atile, Nshakakupoose nakalya, nangu kukusha nakalya.” (AbaHebere 13:5) Ukuitemenwa ukunakila amafunde ya kwa Yehova kulanga ukuti twalicetekela umupwilapo ukuti akatusakamana.

Yesu asambilile icumfwila kabili alimwenenemo. Na ifwe kuti twamwenamo. (AbaHebere 5:8) Nga twalundulula sana icumfwila, e lyo cikanguka ukumunakila na mu tuntu utunono. Ca cine, pa mulandu wa bumpomfu bwesu, napamo kuti twashipikisha amafya no kucushiwa kuli bambi. Ifi e fyo ilingi line ciba, maka maka ku ncito, ku sukulu nelyo mu ng’anda umo aba mu lupwa bashasumina fimo fine. Na lyo line tulasansamushiwa kuli filya abena Israele babebele ati nga ‘batemenwe Yehova Lesa wabo, ku kuumfwa kwi shiwi lyakwe, no kulambatila kuli wene; ali no kuba umweo wabo no kutantalila kwa nshiku shabo.’ (Amalango 30:20) Na ifwe batulaya cimo cine.

Bomfyeni Bwino Inshita

Ukubomfya bwino inshita kukatwafwa ukucindamika inshiku shesu kuli Yehova. Inshita yalipusana ne ndalama, pantu yene takwaba kusunga, nga tamuibomfeshe, ilonaika. Inshita yonse iyapita ninshi calala capwa yaya. Apo lyonse kulabe fingi ifya kucita ifyo tushingakumamo, bushe tulebomfya inshita yesu mu nshila ingatwafwa ukufika pa mabuyo yesu mu bumi? Icacindamisha ku Bena Kristu bonse cifwile caba kushimikila pa lwa Bufumu lyonse no kupanga abasambi.—Mateo 24:14; 28:19, 20.

Nga twaishiba ifyo inshita yesu yacindama e lyo twingaibomfya bwino. Pa Abena Efese 5:16 twacincishiwa bwino “[ukuilubwile, NW] nshita,” kabili ico calola mu kuti “tushite” yene, pa kukanacita ifishacindama sana. Cipilibula ukucefyako ifingatuliila inshita. Ukutamba sana television nelyo ukufwailisha pa Intaneti, ukubelenga impapulo sha ku calo ishishinonsha, nelyo ukucishamo ukukonkelela ukwangala no musamwe kuti fyalenga twafunshika. Cimbi na co, ukulonganika sana ifyuma kuti kwatusendele nshita ikabilwa pa kulundulula umutima wa mano.

Abakoselesha ukubomfya bwino inshita batila: “Te kuti ubomfye bwino inshita nga tautantike bwino ifyo ulefwaya ukucita.” Bapeela ifipimo fisano ifyo mwingakonka pa kwimika amabuyo, batila: yafwile ukuba aya kulungatika, ayo mwingapima, ayo mwingakumanisha, ayalinga, ayaimikilwa inshita.

Ubuyo bumo ubwacindama bwaba kuwamyako imibelengele yesu iya Baibolo. Ica ntanshi tufwile ukwimika ubuyo bwa kulungatika—ukubelenga Baibolo yonse. Ica bubili kupima ubuyo bwesu. Pa kucite ci, kuti twabebeta no kulemba ukulunduluka kwesu. Amabuyo yalingile ukutulenga ukubombesha no kulunduluka. Yafwile ukuba ayo twingakumanisha kabili ayalinga. Tufwile ukubebeta amaka, ukulamuka kwesu ne nshita tukwete. Bambi kuti bakabila inshita ikalamba pa kufishapo ubuyo bwabo. Ica kulekelesha, tufwile ukupimina ubuyo bwesu inshita. Ukwimika inshita ya kupwilapo icintu cimo kuti kwatucincisha sana ukucicita.

Bonse ababa mu lupwa lwa Bethel mwi sonde lyonse, ababombela pa maofeshi ya Nte sha kwa Yehova, ayakalamba na yanono balikwata ubuyo bwa kulungatika ubwa kubelenga Baibolo mu mwaka wabo uwa kubalilapo pa Bethel. Balakutuluka ukuti ukubelenga kusuma ukwa Baibolo kubalenga ukukula lwa ku mupashi no kupalama kuli Yehova, uubasambilisha ukumwenamo. (Esaya 48:17) Bushe na ifwe te kuti twimike ubuyo bwa kubelenga Baibolo lyonse?

Ubusuma Bwaba mu Kucindamika Inshiku Shesu

Ukwangwa sana ifya ku mupashi kulaleta amapaalo yashaifulila. Ipaalo limo lya kuti tulaipakisha ifyo tupwishishisha kabili tulaba ne nsansa mu bumi. Ukulanda lyonse na Yehova mwi pepo lya pa mutima kulatupalamika kuli wene. Ukupepa kwine fye kulanga ukuti twalimucetekela. Ukubelenga Baibolo cila bushiku ne mpapulo shilanda pali Baibolo isho “umusha wa cishinka kabili uwashilimuka” atupekanishisha kulanga ukuti tulaitemenwa ukukutika kuli Lesa ilyo alelanda na ifwe. (Mateo 24:45-47) Ici cilatwafwa ukukwata umutima wa mano pa kuti tulepingulapo no kusala ifyalungama mu bumi.—Amalumbo 1:1-3.

Tulacankwa ukukonka amafunde ya kwa Yehova, pantu tacayafya ukucite ci. (1 Yohane 5:3) Ilyo tulecindamika ubushiku bumo na bumo kuli Yehova, tulakosha bucibusa bwesu na wene. Kabili tulafwa sana Abena Kristu banensu lwa ku mupashi. Ukucite fyo kulatemuna Yehova Lesa. (Amapinda 27:11) Kabili takwaba cilambu icakulisha ukucila ukuipakisha ububile bwa kwa Yehova nomba na ku ciyayaya!

[Icikope pe bula 21]

Abena Kristu balangwa sana ifya ku mupashi

[Ifikope pe bula 22]

Bushe mulebomfya bwino inshita yenu?

[Icikope pe bula 23]

Tulakosha bucibusa bwesu na Yehova ilyo tulecindamika ubushiku bumo na bumo kuli wene