“Iseni Kuli Ine, . . . na Ine Nalamupeelo Kutusha”

“Cemeni Umukuni wa kwa Lesa”

“Lyonse mulakutika no kutweba amashiwi ya mu Baibolo ayatukoselesha.”—Pamela.

“Tuletasha pali conse ico mutucitila. Ico mucita calicindama kuli ifwe.”—Robert.

AYA e mashiwi Pamela na Robert balembele pa kutasha baeluda ba Bwina Kristu ababa mu filonganino fyabo. Ababomfi ba kwa Lesa na bambi mu calo conse balatasha pa fyo ‘abacema umukuni wa kwa Lesa’ babafwa lyonse no kubasakamana. (1 Petro 5:2) Cine cine, abantu ba kwa Yehova baletasha pa fintu ifingi ifyo baeluda babacitila ne nshila bacitilamo.

“Ukupikintika pe mu Mulimo”

Baeluda ba Bwina Kristu balipeelwa imilimo iingi. (Luka 12:48) Balapekanya amalyashi ya pa kulongana kwa cilonganino kabili balashimikila ne mbila nsuma iya Bufumu bwa kwa Lesa ku cintubwingi. Pa milimo yabo paba no kucita ifipempu fya bucemi ku basumina banabo. Baeluda balapoosa inshita ku kusakamana ababa no kukabila kwaibela—abakoloci na bambi abakabila ukwafwa—bacita fyonse ifi ukwabula ukulekelesha indupwa shabo lwa ku mupashi na lwa ku mubili. (Yobo 29:12-15; 1 Timote 3:4, 5; 5:8) Baeluda bamo balafwa ukukuula Amayanda ya Bufumu. Bamo balabomba na mu Makomiti ya Kumfwaninamo ne Fipatala nelyo mu Mabumba ya Kupempula Abalwele ku cipatala. Kabili abengi pali aba balabomba umulimo wa kuitemenwa pa kulongana kukalamba na pa mabungano. Cine cine, baeluda ‘balapikintika pe mu mulimo wa kwa Shikulu.’ (1 Abena Korinti 15:58) E calenga ukuti baeluda babombesha umusango yu baletashiwa sana ku bantu bapeelwa ukusakamana!—1 Abena Tesalonika 5:12, 13.

Baeluda abatandalila Abena Kristu banabo libili libili pa mayanda nelyo kumbi pa kuti babakoshe lwa ku mupashi baba ni ntulo ya kukoselesha. Thomas uwakulile ukwabula bawishi pa ng’anda atile: “Baeluda ababula kungafwa no kunkoselesha, pali ino nshita katwishi nga ndabombela Yehova umulimo wa nshita yonse.” Abaice abengi abakula ukwabula abafyashi bonse babili mu lupwa baleshiba ukuti ukusakamana baeluda babasakamene kwabalengele ukulundulula bucibusa bwabo na Lesa.

Na bakalamba bene mu cilonganino balicindamika ifipempu fya bucemi. Pa numa ya kutandalilwa na baeluda babili, bamishonari baupana abali ne myaka napamo 85 balembele ati: “Tulefwaya ukumutasha pa kutandala kusuma uko mwatutandalile. Ilyo mwabwelelemo, twashele twabelengamo na kabili amalembo mwalanshenye na ifwe. Tatwakalabe ifyo mwatukoseleshe.” Mukamfwilwa wa myaka 70 alembele kuli baeluda ati: “Nalepepa kuli Yehova ukuti angafwe, kabili atumine imwe bamunyinane babili ku mwandi. Ukutandala kwenu kwali lipaalo lyafumine kuli Yehova!” Bushe mwalimwenenemo ilyo baeluda mu cilonganino cenu bamutandalile nomba line? Ukwabula no kutwishika, bonse tulatasha pa kubombesha kwabo mu kucema umukuni bapeelwa ukusakamana!

Abacemi Bapashanya Lesa na Kristu

Yehova mucemi wa kutemwa. (Amalumbo 23:1-4; Yeremia 31:10; 1 Petro 2:25) Yesu Kristu na o Mucemi wapulamo uutusakamana lwa ku mupashi. Na kuba etwa ati “umucemi musuma,” kabili “umucemi mukalamba.” (Yohane 10:11; AbaHebere 13:20; 1 Petro 5:4) Bushe Yesu abombele shani na balya abalefwaya ukuba abasambi bakwe? Abetile mu cikuuku ati: “Iseni kuli ine, bonse mwe bacucutika kabili abafinwa, na ine nalamupeelo kutusha.”—Mateo 11:28.

Baeluda na bo ilelo balabombesha pa kuti bengaba intulo ya kutuusha kabili ubucingo ku mukuni. Abaume ba musango uyu baba “ngo mwa kufisama ku mwela, ngo mwa kubelama ku kupongoloka kwa mfula, nge mimana ya menshi apaumisha, nge cintelelwe ca cilibwe cikalamba mu calo icatembuka.” (Esaya 32:2) Bakacingilila ba musango uyu aba cikuuku balenga bambi ukutuusha, umukuni ulabapeela umucinshi, kabili balanonka ukusenamina kwa kwa Lesa.—Abena Filipi 2:29; 1 Timote 5:17.

Ukutungililwa Kusuma ku Bakashi Babo

Abantu ba kwa Lesa balatasha pa kukwata baeluda ba Bwina Kristu no kutungilila kusuma uko abakashi babo babatungilila. Aba banakashi ilingi line balaipusula fimo pa kutungilila abalume babo. Limo limo, baba pa ng’anda ilyo abalume babo balesakamana imilandu ya cilonganino nelyo ilyo bali ku fipempu fya bucemi. Inshita shimo, nga kwaima ubwafya bwa mu kampampa mu cilonganino balatelula ifyo bacipanga ukucita. Ba Michelle batila, “kwena nga namona ukuti abalume bandi nabatangalikwa no kupekanya ukulongana nelyo bali ku fipempu fya bucemi, ndebukisha ukuti balebomba umulimo wa kwa Yehova, kabili ndesha ukubatungilila apapelele amaka yandi.”

Ba Cheryl, na bo abaupwa kuli eluda, batile: “Nalishiba ukuti bamunyinefwe na bankashi mu cilonganino balakabila ukulanda na baeluda, kabili mfwaya baleyumfwa ukuti kuti baisa ku balume bandi inshita yonse iyo balebafwaya.” Abanakashi batungilila, pamo nga ba Michelle na ba Cheryl, mu kuitemenwa balaipusula fimo pa kuti abalume babo bengasakamana impaanga sha kwa Lesa. Abakashi ba baeluda balatashiwa pa kuba no mupashi wa kutungilila.

Na lyo line, eluda wapamfiwa tafwile ukusuula ukukabila kwa ku mupashi no kukabila kumbi ukwa bakashi bakwe na bana. Eluda waupa afwile ukuba ‘uushitungwa kabi, onse umulume wa mukashi umo uwaba na bana abatetekela, abashaba na kushininwa kwa kuipoosaika nangu bucintomfwa.’ (Tito 1:6) Afwile ukusakamana ulupwa lwakwe mu nshila ya bulesa ukulingana ne fyo Amalembo yalanda pa fifwaikwa kuli bakangalila ba Bwina Kristu.—1 Timote 3:1-7.

Eluda wakwata imilimo iingi alakabila sana umukashi wingamutungilila! E fyo baeluda baupa kabili abasakamana abantu bambi bayumfwa. Cimo na filya Baibolo ilanda ukuti: “Uwasango mukashi asange cisuma.” (Amapinda 18:22) Baeluda ba musango uyu balatasha abakashi babo ukufuma pa nshi ya mutima mu milandile na mu micitile. Ukulunda pe pepo lya mukoosha no kusambilila bwino capamo, aba Bena Kristu baupana balashako ne nshita ya kuipakisha ifintu pamo nga ukololako amolu mu lulamba lwa mumana, ukwenda mu mitengo, nelyo ukutandala mu parka. Cine cine, baeluda balasekelela ilyo balesakamana abakashi babo bwino.—1 Petro 3:7.

Baeluda abacema umukuni wa kwa Lesa ukwabula bukaitemwe baba ni ntulo ya kutuusha lwa ku mupashi ku bantu ba kwa Yehova. Baba “fya bupe ku bantu” icine cine kabili ipaalo ku cilonganino!—Abena Efese 4:8, 11-13.