Ubumi Bwabo

“Inkama” Twasambilile mu Kubombela Yehova

Abashimika ili lyashi ni ba Olivier Randriamora

“Cine cine nalishiba ifya kwikala ilyo nkwete ifinono, kabili nalishiba ne fya kwikala ilyo nkwete ifingi. Muli fyonse na mu mibele yonse nalisambilila inkama ya kwikuta ne ya kuba ne nsala . . . Muli fyonse ndi na maka pantu kuli uulenkosha.” —Fil. 4:12, 13.

AYA MASHIWI ayalandile umutumwa Paulo yalitwafwa sana ine no mwina mwandi Oly. Nga filya Paulo acitile, twalisambilila “inkama” iya kushintilila pali Yehova ilyo tulemubombela muno mu Madagascar.

Ilyo Inte sha kwa Yehova batendeke ukusambilila Baibolo na bamayofyala mu 1982, ine na Oly ninshi twalikobekelana. Nalitendeke ukusambilila Baibolo kabili na Oly nao alitendeke ukusambilila. Twaupene mu 1983 e lyo twabatishiwe mu 1985 kabili ilyo twabatishiwe fye, twatampile bupainiya bwa kwafwilisha. Mu 1986 mu July, twatendeke bupainiya bwa nshita yonse.

Mu 1987 mu September, twatampile ukubomba bupainiya bwaibela. Twatendekele ukubomba bupainiya bwaibela mwi tauni ilinono ilyali ku kapinda ka kuso aka Madagascar ukushali icilonganino. Mu Madagascar mwaba imishobo iikalamba 18 e lyo ne mikowa iingi kabili imyata ne ntambi shabo shalipusanapusana. Abantu abengi balanda iciMalagasy lelo kwaliba ne ndimi shimbi ishingi. E co twatampile ukusambilila ululimi balelanda ku cifulo uko twaile mu kubombela kabili ici calilengele tuleumfwana na bantu.

Nalelanda ilyashi lya ku cintubwingi lyonse pa Mulungu e lyo pa numa Oly aletoota pantu twaleba fye babili. Twalelanda amalyashi yonse aya mwi Sukulu lya Butumikishi Ilya Bulesa e lyo Oly alelanda eka ilyashi nomba alelanda kwati pali uo alelanda nankwe. Twalitemenwe nga nshi ilyo kangalila wa muputule atwebele ukuti tulingile ukwalula ukulongana!

Apo takwaleba ukupokelela bwangu amakalata, calengele cila mweshi twilapokelela bwangu indalama bapeela bapainiya baibela. Inshita imo, tatwakwete indalama shakumanina isha kwendela pa kuya ku cifulo ukulongana kwa muputule ukwali amakilomita 130. Twaibukishe ifyo Nte munensu atwebele ati: “Mule-eba Yehova nga namukwata amafya pantu ni ncito yakwe mubomba.” E co twalipepele kabili twapingwilepo ukuti twalaya na makasa mu kulongana. Ilyo fye tushilaima, munyina umo alitutandalile ukwabula ukwenekela no kutupeela indalama iyalingile fye ukwendela ukuya mu kulongana!

UKUBOMBA MU MUPUTULE

Mu February mu 1991, nalisontelwe ukuba kangalila wa muputule. Pali iyi nshita pa cilonganino twali, pali bakasabankanya batatu ababatishiwa e lyo 6 abashabatishiwa elyo ilingi line twalelongana 50. Ilyo napwishishe ukusambilila umulimo wa muputule, batutumine mu kubombela mu muputule uwaba mu musumba uukalamba uwa Antananarivo. Mu 1993 twalifumine muli uyu muputule no kuya mu kubombela mu muputule uwali ku kabanga aka Madagascar. Imikalile muli iyi ncende yalipuseneko ne mikalile ya mu tauni.

Pa kufika ku filonganino e lyo na ku mabumba yaba Nte ababelele ukutali, twale-enda na makasa limo limo twale-enda amakilomita 145 mu mpili umwali sana imiti. Ici calelenga twilasenda ifipe ifingi. Lelo ilyashi lya kwa kangalila wa muputule nga lya kutambisha ifikope, nge fyo caleba kale, ifipe twalesenda fyalefulilako. Oly alesenda projekita e lyo ine nalesenda batiri ya motoka.

Ilingi line twale-enda amakilomita 40 ukufika pa cilonganino cimbi. Pa kuya, twaleninika impili no kutentemuka, twaleabuka imimana no kupita mu matipa. Inshita shimo twalelala fye mu mbali ya musebo lelo ilingi line twalefwaya umushi uo twingalalako. E lyo inshita shimo twalelomba abantu abo tatwaishiba ukuti tusendameko mu mwabo. Nga twasanga apa kulala, twalepekanya ifya kulya. Oly aleya mukwashima impoto no kuya ku mumana mu kutapa amenshi. E lyo ine, naleashima akasembe no kuya mukuteeba inkuni. Pa kucita fyonse ifi calepoosa inshita. Limo limo twaleshita inkonko twaipaya no kwipika twaipika.

Nga twapwisha ukulya, twaleya mu kutapa amenshi ya kusamba. Limo twalelala fye mu nsaka. Imfula nga yaloka, tatwalelala, twaleiminina fye pa kuti tatulokelwe pantu umutenge waleloka.

Lyonse twaleshimikila kubo twaleikala nabo. Nga twafika uko tuleya, ifyo bamunyinefwe baletupokelela fyaletusansamusha nga nshi. Ifyo bamunyina baletemwa nga twabatandalila fyalelenga twalabako ku fyo twalecula pa lwendo.

Ilyo twaleikala na bamunyinefwe, twaletemwa ukubafwako imilimo ya pa ng’anda ne ci calelenga ukuti balekwata inshita ya kubomba na ifwe mu butumikishi. Tatwale-enekela ukutupeela ifya kulya fya mutengo ifyo bamunyinefwe bashalekwanisha ukushita.

UKUTANDALILA AMABUMBA AYALI UKUTALI

Twalitemenwe nga nshi ukubomba na bamunyinefwe abali mu ncende ishali ukutali uko baletantika ukuti tubombe sana. Tatwalekwata inshita “iya kutusha nangu fye panono.” (Marko 6:31) Pa cifulo cimo, munyinefwe na nkashi abaupana baitile amasambililo yabo 40 ku ng’anda pa kuti tubasambilishe. Umwina mwandi na nkashi balitungulwile amasambililo 20 e lyo ine na munyinane twatungulwile amasambililo yambi 20. Nga twapwisha fye ukusambilila na umo, twaletendeka ukusambilisha umbi. Ilyo inshita ya kulongana yafikile, twalitendeke ukulongana e lyo pa numa ya kulongana, twatampile ukutungulula amasambililo na kabili. Ilingi line twaleleka ukubomba ninshi nabwila mu ma 20:00 hrs.

Ilyo twatandalile ibumba na limbi, mu ma 08:00hrs bonse twaile ku mushi uwali mupepi. Bonse twafwele fye ifisaamu. Pa numa ya kupita mu mpanga umwaba sana ifimuti, twafikile akasuba ukwa kubombela. Ilyo twafikile twafwele ifya kufwala ifisuma kabili apo pene twatendeke ukushimikila. Amayanda yali ayanono lelo bakasabankanya bali abengi sana. E co twalibombele muli ici cifulo pa mamineti fye 30 lyena twaile ku mushi wakonkelepo. Pa numa ya kushimikila, kali kabulendo pa kubwelela ku ng’anda. Pa kubalilapo fye, inyendo sha ifi shaletunasha pantu twale-enda inyendo ishitali lelo twaleshimikila fye iawala limo. Nangu cibe fyo, bamunyinefwe tabaleilishanya. Batwalilile fye abakosa.

Ibumba limbi ilya bamunyinefwe lyali ku Taviranambo iyali pa mulu wa lupili. Uku twasangileko ulupwa lwa ba Nte abaleikala mu nga’nda iyakwete fye umuputule umo. E lyo kwali na kayanda kambi umo balelonganina. Munyinefwe twafikiilepo atendeke ukwita mwi shiwi ilikalamba ati “Bamunyina!” E lyo bamunyinefwe abali pa lupili lumbi bayaswike ati, “Ee!” Munyinefwe abebele na kabili ati, “Kangalila naisa!” E lyo bayaswike ati, “Ooo!” E lyo balyebeleko na bambi abali ukutali ukuti kangalila naisa. Ilyo line fye abantu batampile ukwisa kabili ilyo twatendeke ukulongana, abasangilweko balicilile 100.

IMYENDELE YALI IYA-AFYA

Mu 1996, balitutumine ukuya mu kubombela ku musumba wali mupepi na Antananarivo. Muli uyu umuputule mwali amafya yambi. Takwali imyotoka ishaleya ku fifulo ifyali ukutali. Twali no kubombela ibumba ilyali ku Beankàna, apali amakilomita 240 ukufuma ku Antananarivo. Pa numa ya kupapata namutekanya pa kuti atusendeko, twalininine motoka. Muli iyi motoka mwali abantu na bambi 30 kabili bambi bali pa mutenge wa motoka e lyo bambi bakonene fye ku numa ya motoka.

Nge fyo ciba ilingi line, motoka yalifwile kabili twatendeke ukwenda pa nshi. Pa numa yakwenda ama awala ayengi uku ninshi tuleikula fye, kwaishile ci motoka icikalamba nomba na co cine mwali abantu abengi ne fipe lelo namutekanya aliminine. Yaliswile ica kuti tapali na pa kwikala ica kuti twaiminine fye. Ilyo twafikile pa mumana twasangile balewamya ubulalo ubwaonaike. Na kabili twatendeke ukwenda na makasa kabili twafikile pa kamushi apaleikala ba painiya baibela. Nangu ca kuti tatwali no kubatandalila, twalibombele nabo ukulalolela mpaka bakawamye ubulalo nangu tukasange imyendele imbi.

Palipitile umulungu umo pa kuti motoka imbi ipite kabili twalikonkenyepo ubulendo. Umusebo wali uwaimbauka sana. Ilingi line twalesunka fye motoka mu menshi ayalefika mu makufi kabili ilingi line pa kusunka twalewa mu menshi. Ku macaca twalifikile pa kamushi. Ilyo twafumine mu musebo ukalamba, twatendeke ukupita mu mabala ya mupunga umwali amenshi ya matipa ayalefika mu musana.

Apo e wali umuku wa kubalilapo ukuya kuli ilya ncende, twatontonkenye ukuti tushimikileko bamo pa balebomba mwi bala lya mupunga, e lyo tubepushe uko twingasanga baNte. Twalitemenwe nga nshi ilyo twaishileishiba ukuti aba ababomfi twalelanda nabo bali ne bamunyinefwe!

UKUKOSELESHA BAMBI UKUBOMBAKO UMULIMO WA NSHITA YONSE

Twalitemwa sana pa fyo twayafwa abengi ukutendeka umulimo wa nshita yonse. Ilyo twatandalile icilonganino icakwete bapainiya ba nshita yonse 9, twabakoseleshe ukwafwa bambi ukuba bapainiya ba nshita yonse. Ilyo twabatandalile pa numa ya myeshi 6 twasangile ukuti bapainiya balifika kuli 22. Bankashi bapainiya babili balikoselesha bashibo abali baeluda ukuba bapainiya ba nshita yonse. Aba bamunyinefwe nabo balikoseleshe eluda munabo ukuba painiya. Pa numa fye ya nshita inono, uyu eluda alisontelwe ukuba painiya waibela. Tapapitile ne nshita, uyu eluda no mwina mwakwe batendeke ukubomba mu muputule. Mulimo nshi balya baeluda babili babomba? Umo ni kangalila wa muputule e lyo umbi abomba mu bukuule bwa Mayanda ya Bufumu.

Cila bushiku tulatasha Yehova pa fyo atwafwa pantu twalishiba ukuti te kuti tucite icili conse ku maka yesu kabili e ulenga ukuti umulimo wakwe uleya pa ntanshi. Twaliba ne nsansa pantu na ifwe bene twalibombako e lyo ino nshita tulebomba bupainiya bwaibela. Ca cine, twalisambilila “inkama” iya kushintilila pali Yehova ‘utukoselesha.’

[Amashiwi pe bula 6]

Twalisambilila “inkama” iya kushintilila pali Yehova

[Mapu/Ifikope pe bula 4]

Madagascar e cishi calenga 4 pa fishi ifikalamba mu calo conse kabili baciita ukuti ni Big Red Island. Iloba lya mu Madagascar lyalikashika kabili mwaliba inama ne fimenwa ifingi

[Icikope pe bula 5]

Imyendele, e bwafya ubukalamba twakwete

[Ifikope pe bula 5]

Tulatemwa sana ukusambilisha abantu Baibolo