Mulebika Amano ku fyo Mumfwa

1-2. (a) Ni nshila nshi imo iyo Yehova apeelelamo abantu bakwe ifya kulya fya ku mupashi muno nshiku? (Amalumbo 23:​1, 2, 5) (b) Finshi twalasambililapo muli cino cipande?

MUNO nshiku, Yehova alatupeela ifya kulya fya ku mupashi ifingi nga nshi. Ukwabula no kutwishika, na ifwe bene kuti twalanda nge fyo Davidi alandile ilyo aimbile ati: “Yehova e Kacema wandi. Nshakabulishe nangu cimo.”—Belengeni Amalumbo 23:​1, 2, 5.

² Inshila imo iyo Yehova atupeelelamo ifya kulya fya ku mupashi, kulongana kwa pa cilonganino. Ilingi line ifyo tusambililapo nga tulelongana, fintu twasambililapo na kale. Nangu ca kuti ‘twalikosa mu cine,’ tufwile ukulasambilila pali ifi fintu. (2 Pet. 1:12) Nomba bushe cilamukosela ukukutika nga ca kuti ifyo tulesambililapo fintu twasambililapo imiku iingi? Nga e fyo caba, ninshi ifili muli cino cipande kuti fyamwafwa. Twalasambilila pa mulandu tulingile ukulakutikishisha ilyo tulelongana. Twalasambilila na pa fyo abasambilisha mu cilonganino bafwile ukulacita pa kuti abalongene cilebangukila ukukutika. Na kabili, twalasambilila pali fimo ifyo twingalacita pa kuti tulekutikisha. Nomba natubalilepo ukwasuka icipusho ca kuti: Nani atusambilisha nga tulelongana?

MULEIBUKISHA UKUTI YEHOVA E UTUSAMBILISHA

3. Bushe Yehova alanda shani na ifwe, kabili ababomfi bakwe babomfya shani Icebo cakwe ilyo balesambilisha?

³ Yehova alanda na ifwe ukupitila mu Cebo cakwe Baibo. (2 Tim. 3:​16, 17) Yesu alishibe ukuti ifi e fyo caba. Alelondolola bwino sana ifyaba mu Cebo ca kwa Lesa ica kuti bushiku bumo abalekutika kuli ena batile: “Bushe uyu muntu uushapita na ku sukulu, aishiba shani Amalembo ifi?” (Yoh. 7:15) Abantu abali ne mitima iisuma, baletemwa nga nshi nga baumfwa Yesu alondolola bwino Icebo ca kwa Lesa. Abena Kristu ba mu nshiku sha batumwa nabo bene balelondolola bwino Icebo ca kwa Lesa ilyo balelanshanya na bantu. (Imil. 17:​2, 3; 18:​24, 28) Fwe Nte sha kwa Yehova twalishiba ukuti ifyo tusambilila mu mpapulo, mu maprogramu ya jw Broadcasting, ne fiba mu ma-atulaini na mu mavidio, fifuma mu Baibo. Abengi aba kuti e muku wa kubalilapo balonganapo na ifwe, balatemwa icine cine nga bamona ukuti tulabelenga sana Baibo ilyo tulelongana. Abalanda amalyashi ilyo tulelongana, balabomfya sana Icebo ca kwa Lesa ilyo balesambilisha. Tabapelela fye pa kubelenga Icebo ca kwa Lesa, lelo balalondolwela na balekutika ifyo bengacita pa kuti balekonka ifyo Icebo ca kwa Lesa cilanda.—Luka 24:32.

4. Bushe ilingi line Baibo nga yatila “ukumfwa” na “ukukutika,” ilosha mwi?

⁴ Ilingi line Baibo nga yalanda ukuti “ukumfwa” na “ukukutika,” ninshi ilelanda pa kumfwila umo. Kanshi nga ca kuti Yehova alanda na ifwe ukupitila mu Cebo cakwe ilyo tulelongana, kabili nga twaishiba ifyo afwaya tulecita, cilatwangukila ukumumfwila. Kuti twacetekela ukuti Yehova alatemwa nga tulekutika kuli ena ilyo tulelongana, kabili nga tulekonka ifyo atusambilisha.—Amapi. 27:11.

CINSHI TULINGILE UKULAKUTIKISHISHA ILYO TULELONGANA?

5. Finshi tucita pa mulandu wa kuti twalitemwa Yehova? (Yohane 4:​23, 24; 1 Yohane 5:3)

⁵ Tulakutikisha ilyo tulelongana pantu twalitemwa Yehova. (Mat. 22:37) Nga twaishiba ifingi pali Yehova, tulamutemenwako. Ifyo twamutemwa filenga tulekutika kuli ena, tulemumfwila kabili tulemupepa ukulingana ne fyo alanda mu Cebo cakwe.—Belengeni Yohane 4:​23, 24; 1 Yohane 5:3.

6. Finshi tusambilila pa fya kwafwa abantu ilyo tulelongana?

⁶ Tulakutikisha ilyo tulelongana pantu twalitemwa abantu. (Mat. 22:39) Ilyo tulelongana, Yehova alatusambilisha ifya kwafwa bamunyinefwe na bankashi e lyo na bantu bambi abashilamwishiba. Ku ca kumwenako, broshuwa itila Muletemwa Abantu—Mulelenga Baba Abasambi, yalilanda pa mibele iyo tufwile ukukwata pa kuti tulebila bwino imbila nsuma. Bushe cilamukosela ukutendeka ukulanshanya na bantu? Nga cilamukosela, ninshi mulebikako sana amano ilyo mulelongana ukulongana kwa Mikalile pa kuti mulemona ifyo aba bwananyina balangilila ifya kutendeka ukulanshanya na bantu.

7. Mulandu nshi tulingile ukulakutikila kuli Yehova?

⁷ Tulakutikisha ilyo tulelongana pantu twalitemwa ukuba no mweo. Nga tulekonka ifyo Yehova atweba mu Cebo cakwe, kuti twaba no mweo nga filya fine cali ku babomfi bakwe kale. (Amala. 32:​44-47) Nga tulekutikisha ilyo tulelongana, tulakoseleshiwa kabili tulasambilila ifyo tulingile ukulacita pa kuti tuleshipikisha amafya ilyo tulelolela icalo cipya. (Rom. 8:25) Ino nshita e lyo tulingile ukulakutika sana kuli Yehova pantu tuleikala mu nshiku sha kulekeleshako, kabili tufwile ukutwalilila ukuba abalola.—Mat. 24:​42-44; Ukus. 1:3.

IFYO TWINGALA-AFWA ABESA MU KULONGANA PA KUTI BALEKUTIKISHA

8. Mulandu nshi bamunyinefwe abasambilisha mu cilonganino balingile ukutwalilila ukuwamyako inshila basambilishishamo?

⁸ Bamunyinefwe abasambilisha mu cilonganino, maka maka abalanda amalyashi ya ku cintubwingi bafwile ukutwalilila ukuwamyako inshila basambilishishamo. Uulelanda ilyashi nga napekanya bwino, kuti alenga abeshile mu kulongana batemwa icine, kabili kuti alenga na ba bwananyina batwalilila ukubombela Yehova. Nga namukwata ilyashi, muleibukisha ukuti ifyo mukalanda kuti fya-afwa sana abantu ukucila na pa fyo mwingenekela. Nga namukwata ilyashi ilyo mukayalanda, moneni ifyo ifi fishinka fyakonkapo fingalenga mukasambilishe bwino. Nangu ca kuti abalingile ukukonka sana ifi fishinka ni bamunyinefwe abalanda amalyashi ya ku cintubwingi, bonse fwe balandako amalyashi mu kulongana kuti fyatwafwa nga twafikonka.—2 Tim. 4:2; Tito 1:9.

9. Kuti mwalanda shani ilyashi mu nshila ya kuti abalekutika cabangukila ukumfwa ifishinka?

⁹ Mulingile ukutantika bwino ifishinka. Mufwile ukulanda ilyashi mu nshila ya kuti abalekutika cabangukila ukumfwa bwino ifishinka. Abalekutika kuti cabakosela ukukonka bwino ilyashi nga ca kuti ifishinka fyafulisha. Nomba kuti mwacita shani pa kuti mwingalanda ilyashi mu nshila ya kuti abalekutika cabangukila ukulikonka? Fimo ifyo mwingacita ni fi: (1) Ilyo mwatampa fye ukulanda ilyashi, mulingile ukweba abalekutika ifishinka ifikalamba ifyo mwalalandapo. (2) Mulelanda icishinka cimo na cimo. Mulepemwinako ilyo mushilatendeka ukulanda pa cishinka cimbi pa kuti abalekutika ilyashi cilebangukila ukukonkamo. (3) Mufwile ukupituluka mu fishinka ifikalamba ilyo mulesondwelela ilyashi.

10. Mulandu nshi mulingile ukutemenwa ifishinka ifyo mukalandapo mu lyashi?

¹⁰ Mulingile ukutemwa ifishinka ifyo mukalandapo mu lyashi. Nga namutemwa ifishinka ifyo mukalandapo mu lyashi, mukacincimuka pa kufilanda. (Amapi. 2:​4, 5; Imil. 4:20) Nga muletontonkanya sana pa malembo na pa fyebo ifili muli autulaini, mukakwata ifishinka ifyo mukatemwa. Munyinefwe umo uwa ku United States uuli ne myaka ukucila pali 70, acili alebukisha ilyashi ilyo aumfwile ninshi ali umulumendo. Alandile ati: “Ncili ndebukisha ifyo uwalandile ilyashi atukoseleshe ukuti ilyo tulebelenga Icebo ca kwa Lesa, tufwile ukulatontonkanya sana pa fyo tulebelengapo. Ilyo alelanda ilyashi, alemoneka ukuti alishininkishe ifyo alelandapo. Alilondolwele bwino bwino ifyo twalingile ukulacita pa kuti tuletontonkanya sana pa fyo tulebelengapo. Lilya lyashi lyalengele na-aluka. Lyalilengele naishiba ifya kucita pa kuti ndeisambilisha ifingi ilyo ndebelenga Baibo, kabili lyalilengele bucibusa bwandi na Yehova bwakoselako.”

11. Mulandu nshi tulingile ukulandila ilyashi mu kulungatika? (1 Timote 4:​13-16)

¹¹ Muletontonkanya pa fingafwa abakalakutika ilyashi, kabili mulebalondolwela ifyo bengalakonka ifyo mulebasambilisha. Ilyo mulelanda ilyashi, mulelanda mu kulungatika. Mufwile ukubomfya Amalembo pa kukoselesha abalekutika, na pa kubalanga ifyo bengalakonka ifyo Baibo ilanda. Ku ca kumwenako, umutumwa Paulo alyebele Timote mu kulungatika ifyo alingile ukulacita pa kuti bucibusa bwakwe na Yehova bwingatwalilila ukuba ubwakosa ilyo alebombela mu Efese. (Belengeni 1 Timote 4:​13-16.) Kanshi na imwe bene muletontonkanya pa fingafwa abakalakutika, kabili mulebalondolwela bwino bwino ifyo balingile ukulacita pa kuti balekonka ifyo mulebasambilisha mu lyashi.

12. Busuma nshi bwaba mu kulanda ilyashi mu cifyalilwa?

¹² Mulepituluka mu lyashi mukalanda ninshi namwikatishako ne shiwi, pa kuti mukalilande mu cifyalilwa. Nga mulelanda mu cifyalilwa, mu cifulo ca kulemba ilyashi lyonse no kulalibelenga filya fine mulilembele, abakalakutika cikabangukila ukumfwa ifishinka ifyo mukalandapo mu lyashi. Broshuwa itila Mulebika Amano ku Kubelenga na ku Kusambilisha, itila: “Mulelanda mu cifyalilwa ukulingana ne fyo muleumfwa pa fyo mulelandapo ne fyo muleumfwa pa balekutika.” Nga mulelanda mu cifyalilwa, abakalakutika ilyashi, bakalakutikisha, bakatemwa ifishinka mukalandapo kabili bakafwaya no kulafikonka.

13. Mulandu nshi bamunyinefwe abasambilisha mu cilonganino bafwile ukulaebela bamunyinefwe abaishiba ukulanda bwino amalyashi ukuti babapandeko amano? (Moneni ne cikope.)

¹³ Kuti mwaeba munyinefwe uulanda bwino amalyashi ukuti amupandeko amano. Kuti mwacita shani pa kuti amupandeko amano? Kuti mwamulanga ilyashi lyenu ilyo mulembele. Lyena kuti mwakonka ifyo amupandako amano pa kuti mukalande bwino ilyashi. Na kabili kuti mwamweba ukuti akutike ilyo mulepituluka mu lyashi pa kuti engamwebako umo mulingile ukuwamyako. (Amapi. 1:5) Te lyonse twishiba umo tufwile ukuwamyako. Kanshi munyinefwe kuti atwebako umo tulingile ukuwamyako pa kuti abakalakutika bakomfwe bwino ifishinka kabili cikabangukile ukufikonka. Tufwile ukutwalilila ukuwamyako ifyo tulanda amalyashi ne fyo tusambilisha abantu icine pa kuti cilebangukila ukumfwikisha icine icaba mu Baibo na pa kuti baleumfwikisha ifyo ilanda.a

IFYO TWINGALACITA PA KUTI TULEKUTIKISHA

14. Bushe tufwile ukulamona shani ifyo Yehova atwibukishako? (Amalumbo 119:​24, 111, 167)

¹⁴ Kuti twalakutikisha ilyo tulelongana nga tuleibukisha ukuti ifyo Yehova atwibukishako fyalicindama sana. Ifyo Yehova atwibukishako kuti fyalenga twalashipikisha amafya ayo tukwata muli shino “inshita ishayafya nga nshi.” (2 Tim. 3:1) Nga ca kuti inshita shimo tulemona ukuti ifyo tulesambililapo fintu twasambililapo pa miku iingi, kuti cawama twatontonkanya sana pa fyo uwalembele Amalumbo 119 alemona ifyo Yehova atwibukishako.—Belengeni Amalumbo 119:​24, 111, 167.

15. Kuti twacita shani pa kuti twingatwalilila ukutasha pa fyo tusambilila ilyo tulongana?

¹⁵ Tulingile ukulamona ifyo tusambilila ilyo tulongana ukuti bupe ubo Yehova atupeela. Kuti twasambililako ku bena Israele lintu bali mu matololo ilyo Yehova alebapeela mana. (Ukufu. 16:​15, 31) Ukwabula no kutwishika, pa kubala abena Israele balitemenwe mana. Yehova e walebapeela mana, yaleumfwika bwino kabili yalelenga batwalilila ukuba abomi. Nomba mu kupita kwa nshita, bamo balitendelwe ukulya mana pantu baleilya cila bushiku. (Impe. 21:5) Muno nshiku, ifingi ifyo tusambililapo ilyo tulongana, fintu twasambililapo pa miku iingi. Nomba tatulingile ukulafimona ukuti tafyacindama. Lelo tufwile ukulaibukisha ukuti Yehova e utupeela ifi ifya kulya fya ku mupashi. Tulingile ukulaibukisha ukuti umusha wa cishinka alabikako sana amano pa kusala ifyo tusambilila ilyo tulongana. Tufwile ukulaibukisha no kuti ifyo tusambilila kuti fyalenga twaba na mano, kabili aya mano kuti yalenga twaisapusuka.—Amapi. 3:​13, 16-18; Yoh. 17:3.

16. Finshi aba bwananyina bamo ababombela Yehova pa myaka iingi bacita pa kuti balekutikisha ilyo balelongana? (Moneni na kabokoshi akaleti “Ifyo Mwingacita pa Kuti Mulekutikisha.”)

¹⁶ Kuti twalakutikisha ilyo tulelongana nga tulecitako ifyo aba bwananyina bamo bacita. Moneni ifyo aba bwananyina bamo ababombela Yehova pa myaka iingi bacita pa kuti balekutikisha ilyo balelongana. Ba Ashley ababombela Yehova pa myaka ukucila pali 30 balandile abati: “Nga nimpekanya ifyo tukayasambililapo, cilanyangukila ukukutikisha. Nomba nga nshipekenye, cilankosela ukwasukapo kabili ntendeka ukutontonkanya pa fintu fimbi.” Ba József ababombela Yehova pa myaka 52 batile: “Nshitendwa ukusambilila pa fintu ifyo twasambililapo pa miku iingi. Ifyo uwa bwananyina alanda ilyashi ilyo naumfwapo kale, nangu ifyo aba bwananyina ba-asuka ilyo tulesambilila pa fyo twasambililapo kale, filalenga nasambililapo na fimbi.” Balandile no kuti: “Nga ca kuti munyinefwe uulelanda ilyashi taishibisha ukulanda amalyashi, mbika sana amano ku fya mu Baibo ifyo alelandapo, ukucila ukubika amano ku nshila alelandilamo ilyashi.”

17. Finshi fimbi mwingalacita pa kuti mulekutikisha ilyo mulelongana? (Moneni ne cikope.)

¹⁷ Natulandeko na pali fimbi ifyo mwingalacita pa kuti mulekutikisha ilyo mulelongana. (1) Tamulingile ukulya ifya kulya ifingi ilyo mushilaya mu kulongana pantu kuti mwaya mu kushipula. (2) Mulefika bwangu pa kuti mwafwaya apa kwikala ilyo mushilatampa ukulongana. (3) Mwilaleka foni nelyo tabuleti ilemupumfyanya ilyo mulelongana. (4) Muletontonkanya pa fyo mule-enekela ukusambililapo. (5) Mulelolesha uulelanda ilyashi. (6) Mulelembako ifyebo nelyo mulelengako ifikope ifya kumwibukishako ifishinka ifikalamba. (7) Muletontonkanya pa malembo ayo uulelanda ilyashi alebelenga, kabili mulemona ne fyo yampene. (8) Muleyipusha amuti, ‘Kuti nabomfya shani ifi nasambilila pa kwafwako uwa bwananyina mu cilonganino, nelyo abo mbilako imbila nsuma?’ (9) Ilyo mushilaya mu kulongana kwa muputule no kwa citungu, mulepituluka muli programu. Mulemona umutwe wa kulongana kwa ubo bushiku, imitwe ya malyashi e lyo na malembo ayalipo. (10) Muleikala tondolo, mulekutika inyimbo kabili muletamba amavidio ya nyimbo pa kuti ilyo programu iletendeka ninshi namuipekanya ukuti Yehova amusambilishe.

TWALILILENI UKUKUTIKA KULI YEHOVA

18. Mulandu nshi tulingile ukulakutikishisha ilyo tulelongana?

¹⁸ Tulingile ukulakutika ilyo tulelongana. Nga tulecita ifi, ninshi tuleleka Yehova ‘aletutungulula mu nshila sha bulungami.’ (Amalu. 23:3; 31:3) Tufwile ukuleka Yehova aletutungulula pa kuti tatusensenwinwe nga filya ubwato busensenunwa no mwela. E ico “mulebika amano ku fyo mumfwa,” kabili mulekonka ifyo musambilila ilyo mulelongana. (Luka 8:18) Abakutika kuli Yehova balaba ne nsansa pali ino nshita kabili ku ntanshi, bakakwata umweo wa muyayaya.—Amalu. 119:​2, 14.