14 RAHABU
Asalilepo Yehova Ukucila Abantu Bakwe
RAHABU cilende aleikala mu ng’anda iyabelele ku mbali ya cibumba ce linga lya musumba wa Yeriko. Kanshi nga alolesha pe windo lya ng’anda yakwe iyali muli uyu “umusumba wa tuncindu,” afwile alemona incende iisuma. (Amala. 34:3) Lelo nga ale-enda mu musumba, abantu abo alekumanya balemoneka ukuti nabasakamikwa kabili bali no bulanda. Abaleikala muli uyu umusumba balishibe ukuti Yehova ali na bantu bakwe abena Israele, kabili balishibe no kuti bali no kubonaula. Kwali icalengele Yehova asalepo ukubonaula.
Abena Israele bapangile inkambi mupepi no musumba wa Yeriko. Imyaka 40 iyapita, Yehova alipuswishe abantu bakwe ilyo aonawile Farao na bashilika bakwe muli Bemba Wakashika. Ilyo abena Israele bashilapanga inkambi mupepi no musumba wa Yeriko, Yehova alilengele bacimfya imfumu shakwete sana amaka isha bena Amore, e kutila Sihone na Oge. Abena Israele baile mu kusansa umusumba wa Yeriko pantu Yehova alefwaya ukukanda abaleikala muli ulya musumba pa mulandu ne fyabipa ifyo balecita.
Rahabu alishibe ukuti abantu ba mu musumba aleikalamo balecita ifyabipa. Afwile talefwaya ukutwalilila ukuba cilende. Ifyo asambilile pali Yehova tafyalengele aumfwa umwenso, lelo fyalengele acetekela ukuti ifintu fikawama ku ntanshi. Alishibe ukuti Yehova ni Lesa uucingilila abantu bakwe kabili abamona ukuti balicindama. Nomba ifi te fyo balesa abo abena Kanaani balepepa bali. Rahabu alefwaya ukulapepa Yehova Lesa uucita ifyalungama lyonse, uwa mulinganya kabili uucingilila abantu bakwe.
Bushiku bumo mu nshita ya bushiku, abaume abo Rahabu ashaishibe baile ku ng’anda ku mwakwe, balefwaya ukwa kulaala. Tapakokwele, Rahabu alishibe ukuti balya baume bali bena Israele abaishile mu kulengula icalo! Kabili kwali na bambi abaishibe. Imfumu ya Yeriko yalitumine abaume ukuti baye ku ng’anda ya kwa Rahabu no kumweba ukuti afumye abaume abaishile mu kulengula icalo. Rahabu alingile ukusalapo ifya kucita. Bushe asalilepo ukucingilila umusumba umwali abantu abalecita ifyabipa nelyo asalilepo Yehova?
Rahabu alishipile kabili alicetekele Yehova. Afishile abaume abaishile mu kulengula icalo pa mutenge wa ng’anda yakwe, kabili aebele abo imfumu yatumine ukuti nabaya, nabafuma mu musumba. Ilyo abo imfumu yatumine baile, Rahabu aile pa mutenge wa ng’anda yakwe no kulondolwela abaume abena Israele icalengele abacingilile. Abebele ati: “Ninjishiba ukuti Yehova akamupeela cino calo.” Alicetekele Lesa wa bena Israele! Lyena alyebele balya baume amashiwi ayabakoseleshe, abebele ukuti abaume ba mu Yeriko baletiina nga nshi abena Israele. Kabili alibapaapeete ukuti bakamucingilile ilyo Yehova akalenga abena Israele bakonaule umusumba.
Cinshi calengele cilende ashipe, aleke ukucita ifyabipa kabili ashe abantu bakwe?
Rahabu alipuswishe abaume abena Israele abaile mu kulengula icalo, kabili balimwene ukuti alicetekele sana Yehova. Balya baume balisumiine ukuti bakacita ifyo Rahabu abalombele. Kanshi Lesa ali no kupususha Rahabu no lupwa lwakwe. Abaile mu kulengula icalo baebele Rahabu ukuti ekebako nangu bamo ifyo baile mu kucita. Bamwebele no kuti akakake intambo yakashika pe windo lya ng’anda yakwe iyasuntinkene ne cibumba ce linga lya musumba. Na kabili alingile ukuba mu ng’anda yakwe abena Israele nga baisa mu konaula umusumba. E ico Rahabu no lupwa lwakwe bali no kucingililwa.
Rahabu aikishishe balya baume ku ntambo pe windo lya ng’anda yakwe. Lyena alicitile fyonse ifyo bamwebele. Alikakile intambo yakashika pe windo lya ng’anda yakwe. Kabili alishipile, taebeleko nangu umo pa baume abaishile mu kulengula icalo. Ifyo acitile fyalangile ukuti alishipile, pantu abaume ba mu Yeriko abeshiba ifyo acitile nalimo nga balimwipeye. Na kabili alicitile ifyo abaume abaishile mu kulengula icalo bamwebele ukuti ena no lupwa lwakwe bekafuma mu ng’anda. Ilyo aishibe ukuti Yehova alilengele amenshi ya mu Mumana wa Yordani yaiminina pa kuti abena Israele baabuke, Rahabu afwile alyumfwile bwino filya asalilepo ukucetekela Yehova. Ilyo abashilika abena Israele bashingulwike umusumba wa Yeriko pa nshiku 7, abaleikala muli ulya musumba bafwile balyumfwile sana umwenso. Kabili pa bushiku bwalenga 7 ilyo abena Israele balishishe intandala no kuwelesha, ifibumba fya musumba wa Yeriko fyaliwile, lelo Rahabu no lupwa lwakwe bena balipuswike!
Ilyo bapwishishe ukucimfya, balya abaume abaile mu kulengula icalo balifumiishe Rahabu no lupwa lwakwe panse. Ing’anda ya kwa Rahabu yasuntinkene ne cibumba ce linga lya musumba icishawile. Nga filya fine Yoshua alandile, Rahabu no lupwa lwakwe balipuswike. Ilyo papitile inshita, Rahabu balimusuminishe ukuba mu luko lwa bena Israele. Alyupilwe ku mwaume umwina Israele kabili balikwete abana. Muli ena e mwatuntwike umwaume uwali uwashipa sana ukucila abantu bonse pe sonde, e kutila Yesu Kristu. (Mat. 1:5, 16) Yehova alipaalile sana Rahabu pa fyo amutetekeele na pa fyo ali uwashipa.
Belengeni ilyashi lya mu Baibo:
Lanshanyeni:
Bushe Rahabu alangile shani ukuti ali uwashipa?
Ishibilenipo na Fimbi
1. Londololeni ifyo imikalile ya kwa Rahabu yali mu Yeriko. (w13 11/1 ibu. 12 para. 4–ibu. 13 para. 1)
2. Twaishiba shani ukuti icalengele abaume abena Israele abaile mu kulengula icalo baye ku ng’anda ya kwa Rahabu te mukucita ubulalelale? (it “Cilende” para. 16-wcgr)
3. Cinshi batuulikile utumuti utwingi pa mutenge wa ng’anda ya kwa Rahabu, kabili bushe utu utumuti baletubomfya kuli finshi? (it “Utumuti balefundako ulushishi lwa kupangila insalu” amapara. 2-4-wcgr) A
Thanks for your interest in my photos/Moment Open via Getty Images
Icikope A: Ibala lya tumuti balefundako ulushishi lwa kupangila insalu
4. Cinshi twingalandila ukuti Rahabu talufyenye filya abepele abo imfumu yatumine ukuti abaume abena Israele nabafuma mu musumba? (w04 12/1 ibu. 9 para. 1) B
Icikope B
Tontonkanyeni pa fyo Mwingasambililako
Cinshi twingalandila ukuti Rahabu alingile ukuba uwashipa pa kuti aleke bucilende kabili atendeke ukupepa Yehova pamo na bena Israele? Finshi abalesambilila Baibo bengasambililako kuli Rahabu?
Nangu ca kutila Baibo ilanda ukuti ukubepa kwalibipa, bushe Abena Kristu kuti bapashanya shani Rahabu nga ca kuti abalwani balebapatikisha ukuti babebe ifyebo fya nkaama pa ba bwananyina? (Amapi. 11:13; Luk. Mil. 3:7; Efes. 4:25) C
Icikope C
Icikope C
Ni muli finshi fimbi mwingapashanyamo Rahabu filya ali uwashipa?
Ifyo Mufwile Ukutontonkanyapo Sana
Finshi ili lyashi lilensambilisha pali Yehova?
Bushe ili lyashi lyaikatana shani ne fyo Yehova afwaya ukucita?
Finshi ningatemwa ukwisaipusha Rahabu ilyo bakesamubuusha?
Sambililenipo na Fimbi
Bushe ilyashi lya kwa Rahabu litusambilisha ukuti tufwile ukucita finshi pa kuti tukapusuke ilyo ubushiku bwa kwa Yehova bukesa?
“Ni kwi Mulingile Ukuba Ilyo Impela Ikesa?” (w09 5/15 amabu. 6-8)
Bomfyeni ili ilyashi lya mu Baibo umuli ifikope pa kulenga abana benu bale-elenganya ukuti eko bali ilyo ifyo mulebasambilisha pali Rahabu filecitika.