Ilyashi lya Bakabilisha ba Bufumu

Ukwaafwa Abali ne “Cilaka” mu Russia

“BALISHUKA abali ne nsala ne cilaka ca bulungami; pantu bene bakekuta,” e fyasosele Yesu. (Mateo 5:6) Ifya kukumanya fyakonkapo filelangilila ifyo Inte sha kwa Yehova shileafwa ukupwisha icilaka ca ku mupashi ica bantu abengi mu Russia, umo ubuntungwa bwa mipepele bwabindilwe pa myaka ukucila 70.

▪ Umwanakashi we shina lya Valentina alikwete ifipusho fya Baibolo ifyakosa ifyo ashasangiile ifyasuko pa myaka iingi. Ku ca kumwenako, aleipusha ati: ‘Ni kuli ani kuntu Yesu aalepepa?’ Apelulwile ukuti Yesu afwile apepele ku muntu uwamucila kabili aalefwaya ukwishiba ishina lya uyo Muntu.

Aile ku calici lya Orthodox mu Russia mwine. Nangu cibe fyo, muli iyi mipepele tasangilemo ifyasuko ku fipusho fyakwe. Pa kukanaikushiwa, aile kwi calici lya ciProtestanti lelo tasangile ifyasuko fyaumfwika na ko kwine. Pa kupelelwa ukwa kuya, Valentina atendeke ukubelenga Baibolo, ukwesha ukuisangila ifyasuko umwine—lelo alifililwe. Alipepeele ukwaafwiwa.

Ilyo papitilepo inshita Inte sha kwa Yehova shalishile pa mwakwe. Bamulangile ukufuma mu Baibolo ukuti ishina lya kwa Lesa ni Yehova. Asukile aishiba untu Yesu alepepako! Atendeke ukusambilila Baibolo lyonse ne Nte. Ilingi line alepooso bushiku bonse ukubelenge mpapulo shasabankanishiwa na Watch Tower Society no kubelenga amalembo yalimo. Mu kwangufyanya Valentina asondwelele ukuti aali nasange cine. Mu myeshi itatu atendeke ukubombako umulimo wa kushimikila, kabili imyeshi fye ibili pa numa ya ico, alibatishiwe. Ukusapika kwakwe icine ukwabamo ipepo kwalilambwilwe.

▪ Nte aali muli basi aleya ku kushimikila mu ncende ya ku mushi. Mu nshila alandile no mukashana umo pa lwa malayo ya mu Baibolo, lelo uyu mukashana talefwaya. Pa numa ya myeshi ibili Nte atoolele ubulendo bwalenga bubili ukuya ku cifulo cimo cine ku kupeela ilyashi lya cintubwingi. Pa numa ya lyashi atununwike umweni umo no kumwipusha ukuti: “Bushe umo alibala alandapo na imwe pa lwa mbila nsuma ya mu Baibolo?” Uyu mwaume ayaswike ukuti, “Ee, imwe bene mwalilandapo na ine.” Nte atontonkenye ukuti uyu muntu aleseka fye. Lelo umulumendo alondolwele ukuti imyeshi ibili iyafumineko alyumfwile ukulanshanya kwa kwa Nte no mukashana pa bulendo bwa muli basi. “Nalefwaya ukwishiba ifyafulilako, lelo mwalikile muli basi, e co natontonkenye ifyo nshakabalemonapo Inte sha kwa Yehova na kabili. Lyene ku ncito nakumenye umwaume uulesambilila Baibolo ne Nte. E fino mumwene!”

Uyu mwaume no mukashi wakwe batendeke ukusambilila Baibolo. Pa numa ya nshita inono, alimwene ukuti incito alebomba yaletoba ifishinte fya Baibolo. Pa kufwaya ukusungilila kampingu musuma pa ntanshi ya kwa Lesa, aingile ncito imbi. Pali nomba alebako bambi pa lwa Bufumu bwa kwa Lesa pe shuko lya mu nshita ilili lyonse. Umukashi wakwe na o alelunduluka mwi sambililo lyakwe ilya Baibolo.

Inte sha kwa Yehova muli ci cifulo ca kubombelamo icishaikulila ica Russia bali aba nsansa ukwebako abantu bafumaluka bonse ukuti: “Iseni; no uleumfwe cilaka ese, uulefwaya abuulepo ica bupe amenshi ya Mweo.”—Ukusokolola 22:17.