Ilyo Lupwa Lwenu Aleka Ukupepa Yehova

BA MARK na ba Louise ni Nte sha kwa Yehova.a Cikuuku cikuuku, balifundile abana babo ifyaba mu Baibolo, filya fine Baibolo itila e fifwile ukucita abafyashi Abena Kristu. (Amapinda 22:6; 2 Timote 3:15) Icabipileko fye ca kuti abana babo bamo ilyo bakulile balilekele ukupepa Yehova. Ba Louise batile: “Mwandini cilankalipa nga natontonkanya pa bana bandi abaleka ukupepa. Te kuti mfise, cila bushiku ndomfwo bubi sana. Ilyo bambi balelanda pa bana babo, ndomfwa icikonko kabili ndafwaya no kulila.”

Ca cine, cilaleta sana ubulanda kuli balupwa aba cishinka ilyo umuntu wabo aleka ukupepa Yehova, aleka no kukonka amafunde ya mu Baibolo. Ba Irene batile: “Umukalamba wandi nalimutemwa sana. Ala mwe bantu nga kwali ico ningacita pa kuti atendeke ukupepa na kabili, te kuti njikate na ku cani!” Maria, uo umwaice wakwe umulumendo alekele ukupepa Yehova no kuipoosa mu mibele yabipa, atila: “Ala calibipa, nshaishiba ne fya kucita, pantu umwaice wandi aliba bwino sana, icabipako fye ca kuti alileka ukupepa. Ndamufuluka sana nga kuli ukwangalila pamo ukwa lupwa lonse pantu ena tasangwako.”

Mulandu Nshi Ciletela Sana Ubulanda?

Mulandu nshi Abena Kristu bomfwila sana ububi ilyo umwana wabo nangu lupwa umbi Umwina Kristu aleka ukupepa? Pantu balishiba ukuti Baibolo itila abakatwalilila aba cishinka kuli Yehova e bakaba no bumi bwa muyayaya muli paradaise pano calo. (Amalumbo 37:29; 2 Petro 3:13; Ukusokolola 21:3-5) Balafwaya sana ukwikala umuyayaya pamo na bena myabo, abana babo, abafyashi babo, bamunyinabo, na beshikulu babo. Balomfwo bubi sana ukwishiba ukuti balupwa lwabo abaleka ukupepa Yehova limbi tabakabe na mweo wa muyayaya! Nangu ni muli shino shine nshiku, Abena Kristu balishiba ukuti umuntu alamwenamo sana mu kukonka amafunde ya kwa Yehova. Kanshi Abena Kristu balomfwo bubi ukumona balupwa lwabo balecita ifintu ifikabaletelela ku ntanshi.—Esaya 48:17, 18; Abena Galatia 6:7, 8.

Nakalimo bamo abashapitapo mu fya musango yo kuti bafilwa ukwishiba bwino sana ifyo cikalipa. Umuntu alatampa ukumona kwati fyonse fibi. Ba Louise batila: “Ndacula sana ilyo tuli ku kulongana nga namona abanandi baleshimika na bana babo no kuseka. Konse uko ndi, nangu kuwame shani, ndomfwa ububi pantu ndatontonkanya pa bana bandi abaleka ukupepa.” Eluda umo Umwina Kristu ebukisha ifyalecitika pa myaka ine (4) ilyo umwana mwanakashi uo asangile mu bakashi alekele ukupepa. Atila: “Na mu nshita tufwile ukusansamuka, ifwe twaleumfwa ububi. Nga nashitila umwina myandi ica bupe nangu naya nankwe kumo ukusuma pa mpela ya mulungu, alelila nga aibukisha ukuti icilengele umwana ukupuswako mulandu wa kuti alileka ukupepa.”

Bushe Abena Kristu abomfwe fyo kuti twatila balacilamo fye ukumfwa ubulanda? Kwena te lyonse. Na kuba, ifyo bomfwa kuti fyapalana ne fyo Yehova omfwa ilyo ifintu fishiweme, pantu umuntu abumbilwe mu cipasho ca kwa Lesa. (Ukutendeka 1:26, 27) Twalosha mwi? Cisuma, bushe Yehova aumfwile shani ilyo abantu bakwe abena Israele bamupondokele? Pa Amalumbo 78:38-41, tubelengapo ukuti Yehova alyumfwile ububi sana kabili alishikitike. Na lyo line, alitekenye ukusoka abantu bakwe no kubasalapula, imiku iingi alebabelela uluse nga balapila. Ukwabula no kutwishika, Yehova alitemwa nga nshi abantu bakwe, pantu e wababumbile, kanshi nga balufyanya tabasuula apo pene. (Yobo 14:15; Yona 4:10, 11) Na bantu bene balipala Lesa, na bo balatemwana sana na balupwa lwabo. E cilenga umuntu ukumfwa ububi sana ilyo lupwa lwakwe aleka ukupepa.

Ca cine, bakapepa ba cine balomfwo bubi sana ilyo lupwa lwabo aleka ukupepa. (Imilimo 14:22) Yesu atile ukupokelela ubukombe bwakwe kukalenga balupwa bamo ukupusana. (Mateo 10:34-38) Te kutila ukukonka ifyaba mu Baibolo e cilenga paba ukupusana. Icilenga mulandu wa kuti balupwa abashasumina nelyo abaleka ukupepa balaleta amalekano pantu bena balakaana ifyo Baibolo isosa, balaleka ukukonka amafunde ya kwa Lesa kabili limo balakaanya na Bena Kristu ukupepa. Lelo tulatasha Yehova pantu alaafwa abamubombela ukushipikisha ifya kwesha ifibaponena. Nga ca kuti mulomfwa sana ubulanda pa mulandu wa kuti lupwa lwenu alileka ukupepa, fishinte nshi ifya mafunde ya mu Baibolo ifingamwafwa ukushipikisha no kumutalalika umutima?

Ifingamwafwa Ukushipikisha

“Pa kuikuula . . . ibakileni mu kutemwa kwa kwa Lesa.” (Yuda 20, 21) Limbi pali ino nshita tapali nangu cimo ico mwingacita icingafwa umuntu wenu uwaleka ukupepa Yehova. Lelo kuli cimo ico imwe mwingacita, ikuuleni mu citetekelo kabili kuuleni na bambi aba mu lupwa lwenu abacili balapepa Yehova pamo na imwe. Ba Veronica, abo abana babo abalumendo babili balekele ukupepa kabili bashele fye na umo umulumendo mu cine, batila: “Bamunyinefwe balitupandileko amano ya kuti nga twakosa mu kupepa, tukapokelela bwino abana besu ilyo bakafwaya ukubwela kuli Yehova. Bushe umwana walubile nga aile kwi bawishi ababula kumupokelela?”

Pa kuti mutwalilile ukuba abakosa, bombesheni imilimo ya Bwina Kristu. Mufwile ukuteyanya bwino inshita ya kubelenga sana Baibolo no kulasangwa ku kulongana. Fwayeniko ne nshita ya kwafwako na bambi mu cilonganino ukufika apengapela amaka yenu. Kwena, pa kubala, kuti cayafya ukucita ifi. Ba Veronica bebukisha ukuti: “Ico nalefwaya sana, kwikala neka kwati ni nama iyo balashile. Lelo abena mwandi balenkoselesha sana ukuti tulebombesha ukucita ifingatukosha ukukanaleka ukupepa. Tabalefwaya tulepuswa ku kulongana. Ilyo inshita ya kuya ku kulongana kwa citungu yafikile, nshalefwaya ukuya mu kumonana na bantu. Lelo, amalyashi yali ku kulongana yalengele twakosha bucibusa bwesu na Yehova. Umwana wesu umulumendo uwashele mu cine alikoseleshiwe sana kuli kulya kulongana kwa citungu.”

Maria ulya tulandilepo, atile ukubomba sana umulimo wa kushimikila kwalimwafwa sana kabili ino nshita asambilila Baibolo na bantu bane. Ba Laura na bo batile: “Ukulila kwena na nomba ndalila cila bushiku, lelo ndatasha Yehova pantu nangu ca kuti abana bandi bonse tababa mu cine nge fyo aba banandi baba, nomba na ine nalishiba ifyaba mu Baibolo ifileafwa indupwa ishingi ukuba ne nsansa muli shino nshiku sha kulekelesha.” Ba Ken na ba Eleanor abo abana babo abakalamba balekele ukupepa, bakukiile uko balefwaya aba kushimikila abantu ifya Bufumu abengi no kutampa umulimo wa nshita yonse. Calilengele ubulanda ukucepako, tabaikalila fye ukulila abana babo abaleka ukupepa.

Mwileka isubilo lipwe. Ukutemwa “kusuubila fyonse.” (1 Abena Korinti 13:7) Ba Ken, balya tulandilepo kale, batile: “Ilyo abana bandi balekele ukupepa, nalemona kwati nacipwa no kufwa nabafwa. Lelo ilyo nkashi yandi afwile, e lyo namwene ukuti abana bandi baliko eyefilya. Ndatasha kuli Yehova ukuti abana bandi e po bacili kabili Yehova na o kuti abapokelela nga babwelela kuli wena.” Ca cine, pantu ilingi line, ificitika fya kutila, abengi abaleka ukupepa Yehova, balabwelela kuli ena mu kuya kwa nshita.—Luka 15:11-24.

Mwilaipeela imilandu. Abafyashi e batemwa sana ukuipeela imilandu ilyo baleibukisha ifyo balecita ku bana. Lelo icishinka caba pali Esekiele 18:20 ca kuti Yehova akapingula umubembu umwine pa co asalile ukucita, takapingule abafyashi bakwe iyo. Cimbi ico mwingatemwa ukwishiba ca kuti mwi buuku lya Amapinda umo balanda sana ukuti mulimo wa bafyashi ukufundisha abana babo imibele isuma, mwaba ifyebo na fimbi ifingi sana ifya kufunda abana ukutesha ifilelanda abafyashi babo no kubomfwila. Kanshi, abana e bafwile ukukonka ifyaba mu Baibolo ifyo abafyashi babo abashapwililika babafunda. Mufwile mwalifundile sana abana benu ukufika apo amaka yenu yapelele. Nangu mwingamona kwati kwali fimo ifyo mwalelufyanya pa kubafunda, te kutila ninshi ni mwe mwalengele baleke ukupepa. Kwena, nga mwaikalila fye ukuiseka ukuti, “kanshi nga nshacitile filya na filya,” na co cine te kuti cimuletele ubusuma nangu bumo. Sambilileniko fimo ku filubo mwacitile, ishibeni ifya kucita pa kuti mwikabwekeshapo, kabili pepeni kuli Yehova ukumubelela uluse pa fyo mwalufyenye. (Amalumbo 103:8-14; Esaya 55:7) Lyena, tampeni ukutontonkanya pa fya ku ntanshi, labeniko ku fyapita.

Tekanyeni kuli bambi. Nakalimo bamo te kuti beshibe bwino sana ifya kulanda na imwe pa kumukoselesha no kumusansamusha, sana sana abashapitapo mu fya musango yo. Cimbi na co, umuntu kuti amona kwati alelanda ifya kumukoselesha no kumusansamusha, nomba limbi kuti tamutemenwe ifyo alelanda. Kanshi bamo nga balanda ifyo mushitemenwe, konkeni ukufunda kwa mutumwa Paulo pa Abena Kolose 3:13 apatila: “Twalilileni ukushipikishanya no kuitemenwa ukulekelelana nga umo ali ne ca kuilishanya ku mubiye.”

Cindikeni umusango Yehova afundilamo abalufyanya. Nga ca kuti umuntu wenu bamufunda mu cilonganino, ibukisheni ukuti Yehova e wateyenye ukuti cileba ifyo fine kabili alitemwa abantu bakwe bonse, kumo no muntu wenu wine uulubile. (AbaHebere 12:11) Kanshi mwikonkelela umutima wenu kabili mwitendeka ukulengulula baeluda abamupingwile nangu ukutila tabapingwile bwino. Mwilaba ukuti lyonse fye nga twakonka ifyo Yehova ateyanya ifintu, cilatuwamina, nomba nga twakaana ukukonka, ifintu filabipa ukucilapo.

Ilyo Lesa alubwile abena Israele mu Egupti, Mose lyonse e walepingula imilandu iyalecitika. (Ukufuma 18:13-16) Ilyo Mose alepingula imilandu, bamo bafwile balimupatile pantu nga apingula umuntu umo ukuti tali na mulandu, ninshi uuletele uyo muntu mu kulubulula ena kuti amona kwati bamufyenga. Ukulengulula ifyo Mose alepingula imilandu kufwile e kwalengele na bamo ukupondokela ubutungulushi bwakwe. Lelo Yehova abomfeshe Mose ukutungulula abantu bakwe, kabili takandile Mose iyo, abo akandile ni bacintomfwa na balupwa lwabo abalebatungilila. (Impendwa 16:31-35) Kuli ici tusambililako ifyo cacindama ukucindika no kumfwila ifilepingula abo Lesa asala ukutungulula icilonganino muno nshiku.

Pali uyu wine mulandu, ba Delores bebukisha ifyo cabafishe ukucindika ifyapingwile baeluda ilyo umwana wabo umukashana alufyenye. Batile: “Icangafwile sana, kubelenga imiku iingi mu fipande ifilanda pa fisuma ifyaba mu kukonka fyonse ifyo Yehova ateyanya mu cilonganino. Nashitile ibuuku lya kulembamo ifishinka naleumfwa mu malyashi yalelandwa na mu fipande fimo ifyali no kungafwa ukushipikisha no kutwalilila ukupepa Yehova.” Lekeni nomba tulandeko na pali cimbi icacindama icingaafwa umuntu ukushipikisha ilyo lupwa aleka ukupepa.

Ebeniko bambi ifili ku mutima. Kuti mwaumfwa bwino nga mwaebako umunenu uwa cikuuku uo mwacetekela. Nakalimo mwalikwata umunenu umo nelyo babili abo mwingashimikilako. Ebeniko abanenu abengamukoselesha ukutontonkanya pa fisuma. Na kabili, cikawama sana nga mwapepa kuli Yehova no ‘kupongolola ku cinso cakwe fyonse ifya mu mutima wenu.’b (Amalumbo 62:7, 8) Mulandu nshi? Pantu e wishibe bwino sana ifyo muleumfwa. Nalimo kuti mwatila cinshi ifya musango yu filecitikila fye ine? Cinshi ndeculila ifi kwati nine naleka ukupepa Yehova? Londolweleni Yehova fyonse ifili ku mutima, kabili pepeni ukuti amwafwe ukumona ubwafya bwenu ukutila buliko eyefilya.—Amalumbo 37:5.

Mu kuya kwa nshita, mukaya muleumfwako bwino. Lelo, mwinenuka ukucita ifya kusekesha Shinwe wa ku muulu, kabili mwilaba ukuti Lesa alemona ifyo mulebombesha. (Abena Galatia 6:9) Mwilaba no kuti nangu tuleke ukupepa Yehova, amafya yena tayakapwe. Lelo nga twatwalilila aba cishinka kuli ena, nangu tucule shani, akalatwafwa. E ico, mwilaba ukuti Yehova naishiba bwino sana ifyo ubwafya bwenu buli, kabili akatwalilila no kumupeela amaka ya kushipikisha pa nshita yalinga.—2 Abena Korinti 4:7; Abena Filipi 4:13; AbaHebere 4:16.

[Amafutunoti]

[Akabokoshi pe bula 19]

Ifyo Mwingashipikisha

◆ “Pa kuikuula . . . , ibakileni mu kutemwa kwa kwa Lesa.”—Yuda 20, 21.

◆ Mwileka isubilo lipwe.—1 Abena Korinti 13:7.

◆ Mwilaipeela imilandu.—Esekiele 18:20.

◆ Tekanyeni kuli bambi.—Abena Kolose 3:13.

◆ Cindikeni umusango Yehova afundilamo abalufyanya.—AbaHebere 12:11.

◆ Ebeniko bambi ifili ku mutima.—Amalumbo 62:7, 8.

[Akabokoshi ne Cikope pe bula 21]

Bushe Mwalileka Ukupepa Yehova?

Nga mwalileka ukupepa, te mulandu ne calenga, ninshi bucibusa bwenu na Yehova bwalipwa kabili kuti mwapanya ne shuko lya mweo wa muyayaya. Nakalimo mulefwaya ukubwelela kuli Yehova. Bushe mulecitapo fimo ifilelanga ukuti mulefwaya sana ukubwelela kuli Yehova? Nelyo bushe muleti limbi nkatampa “ku ntanshi”? Mwilaba ukuti Armagedone naipalama nga nshi. Na kabili, tamwishibe apo ubumi bwenu ubwa muli cino calo bukafika pantu bwipi sana. Tamwishibe fye ne fyo ubumi bwenu bukaba mailo. (Amalumbo 102:3; Yakobo 4:13, 14) Umuntu umo uwalwele ubulwele bumo ubushipola atile: “Ubu bulwele bwansangile ninshi ndabombela Yehova mu mulimo wa nshita yonse, takwali nangu fimo ifyabipa ifyo nalecita mu bumfisolo. Ala ukwishiba fye ico cine, kulansansamusha nga nshi.” Nomba ulya muntu nga aumfwile shani bulya bulwele abumusanga ninshi aletila “nkatampa ukupepa Yehova ku ntanshi!” Nga mwalileka ukupepa Yehova, ino ine e nshita ya kubwela mu cilonganino.

[Ifikope pe bula 18]

Ukulacita ifingamukosha mu kupepa kukamwafwa ukulatontonkanya ifisuma