Baibolo Citabo Mwingacetekela—Ulubali 2

Ifyo Baibolo Ilandapo pa Calo ca Asiria

Ici e cipande ca bubili pa fipande 7 ifikakonkana muli “Loleni!” ifilelanda pa fyalo 7 ifyakwatishe amaka ifyalembwa mu Baibolo. Ico tulelembela ifi fipande, kutulanga ukuti Baibolo citabo twingacetekela no kuti cafuma kuli Lesa kabili amashiwi yabamo yalalenga abantu ukuba ne subilo lya kuti amacushi ayo imitekele yabipa yaleta pa bantu yali no kupwa.

ABANTU baleikala mu fyalo fyabela ku kabanga ka bemba wa Mediterranean baletiina nga nshi icalo ca Asiria. Ibuuku lya kwa Yona lisosa ukuti ilyo Lesa atumine uyu kasesema ukuyabila imbila ya bupingushi mu musumba uukalamba uwa bena Asiria uwa Ninebe, abutukile ku calo cimbi! (Yona 1:1-3) Napamo icalengele abutuke ni co abena Asiria baishibikwe ukuti bali bankalwe.

Ilyashi lya Kale Ilyo Mwingacetekela

Kasesema Nahumu alondolwele umusumba wa Ninebe ukuti “mwikala inkalamo” no kuti “musumba uusumya umulopa.” Na kabili atile: “Tauleka ukupokolola ifipe! Kulya e kuli ukulila kwa cikoti no kulila kwa kukolonkonta ukwa mupeto, na bakabalwe abalepontauka ne celeta ililecilauka. Uwendela pali kabalwe, no lubingu lwa lupanga, no kubeka kwe fumo, ne cinabwingi ica bo baipaya, ne fitumbi ifingi; kabili takuli impela ku fitumbi. Balaipununa mu fitumbi fyabo.” (Nahumu 2:11; 3:1-3) Bushe ifyalemba abasambilila ilyashi lya kale pa calo ca Asiria filomfwana ne fi Baibolo yalandapo?

Icitabo citila Light From the Ancient Past citila Abena Asiria bali “bantu abashalekwatila uluse abo balesansa ica kuti abalwani babo abengi balebatiina.” Umfweni ifyo imfumu Ashurnasirpal II, iya bena Asiria yaleilumba pa fyo yalecusha abashalekonka ifyo yalefwaya:

“Naimiike icilibwe mupepi ne mpongolo ya musumba wakwe, kabili nafundile inkanda sha bakalamba babo bonse abampondokele no kushifimba ku cilibwe naimike; bambi nabo nabakakilile ku cilibwe, bambi nabapopele pa milongoti iyali pa cilibwe, . . . kabili naputwile amaboko na molu ya bacilolo, bacilolo ba mfumu abampondokele. . . . Abengi abo naikete nalibocele mu mulilo, kabili abengi nabasendele bunkole.” Ilyo abashula ifintu mu mushili bafukwile amasano ya shamfumu aya bena Asiria, basangile ifibumba ifyo balengako ifikope ifya kutiinya icine cine ukulangilila ifyo balecusha abantu abo baikete mu nkondo.

Mu mwaka wa 740 B.C.E., abena Asiria basanshile Samaria, umusumba uukalamba uwa bufumu bwa ku kakapinda ka ku kuso uwa bena Israele no kusenda abantu bunkole. Ilyo papitile imyaka 8 abena Asiria basanshile ubufumu bwa baYuda.a (2 Ishamfumu 18:13) Sankeribu, Imfumu ya bena Asiria, aebele Hisekia Imfumu ya baYuda ukuleta matalanti ya golde 30 na amatalanti ya silfere 300. Baibolo itila Hisekia alimupeele fyonse ifi. Lelo nangu cali fyo, Sankeribu apampamine fye pa kuti abekashi ba mu Yerusalemu, umusumba uukalamba uwa baYuda, bacimbe abene beka.—2 Ishamfumu 18:9-17, 28-31.

Mu Ninebe, abashula ifintu mu mushili basangile apalembelwe ifyebo fya kwa Sankeribu. Pali ici cintu ice bumba, pali amashiwi ya mfumu ya bena Asiria iyaleitakisha aya kuti: “Hisekia, umuYuda, uwakeene ukunakila kwi koli lyandi, nashingile imisumba 46 iyo acetekelemo, na malinga balefisamamo e lyo ne mishi iingi iyo nshingakumamo ukupenda, kabili nalipokele (yonse) . . . Nomba [Hisekia] ena namulengele ukuba umufungwa mu Yerusalemu, umwali isano lyakwe, kwati koni ako baisalila.” Lyena Sankeribu aletila no kuti Hisekia amutumiine “matalanti ya golde 30 na amatalanti ya silfere 800, amabwe ayauma umutengo, . . . (e lyo) ne fintu fyalekanalekana ifya mutengo sana,” kabili mukulanda kwakwe alilundileko ne mpendwa ya matalanti ya silfere ayo apokelele.

Nomba, moneni ukuti Sankeribu talandile ukuti alicimfishe Yerusalemu. Na kuba talandile icili conse pali filya Lesa aipeye abashilika bakwe bonse. Baibolo itila, malaika wa kwa Lesa aipeye abashilika abena Asiria 185,000 mu bushiku fye bumo. (2 Ishamfumu 19:35, 36) Umuntu umo uwasambilila sana, Jack Finegan atile: “Pa mulandu wa kuti ishamfumu sha bena Asiria shaleitakisha sana no kulemba ifyo shalecita, te kuti twenekele Sankeribu ukulemba ifyo abashilika bakwe bacimfiwe icabipisha.”

Ubusesemo Mwingacetekela

Ilyo kwashele nalimo imyaka 100 ukuti Ubufumu bwa Asiria bonaulwe, Esaya atile Yehova Lesa aali no kupingula balya bantu ba cilumba abalesansa abantu bakwe no kubasaalula. Atile: “Nkalubulwisha imfumu ya Asiria pa mulandu wa misuula ya mu mutima wa iko e lyo no kuitakisha kwa menso ya iko.” (Esaya 10:12) Nangu fye ni Nahumu kasesema wa kwa Lesa asobele ukuti umusumba wa Ninebe bali no ku-upokolola ifipe, impongolo sha uko shali no kwiswilwa abalwani, kabili bakalinda ba mpongolo bali no kufulumuka. (Nahumu 2:8, 9; 3:7, 13, 17, 19) Kasesema Sefania alembele ukuti umusumba wali no kushala “icibolya.”—Sefania 2:13-15.

Aya masesemo yalelanda pa konaulwa kwa musumba yafikilishiwe mu 632 B.C.E. E lyo umusumba wa Ninebe waonawilwe ku bashilika abena Babiloni na bena Madai, kabili e fyo no Bufumu bonse ubwa Asiria bwapwile. Abalemba ilyashi lya fyalecitika kale mu Babiloni balandile pa bashilika ukuti “basendele ifipe ifingi ifyali mu musumba na mwi tempele” kabili balengele umusumba wa Ninebe “ukushala icibolya.” Pali lelo, palya apali umusumba wa Ninebe, lwa ku kabanga ka Mumana wa Tigris, mupepi no musumba wa Mosul ku Iraq, pashala fye ifitantala.

Na kabili ukonaulwa kwa Asiria kwalengele ukuti ubusesemo bwaba mu Baibolo na bumbi bufikilishiwe. Pa ntanshi ya mwaka wa 740 B.C.E., abena Asiria basendele bunkole abali mu bufumu bwa mikowa 10 iya bena Israele. Mupepi ne nshita ilya ine abena Asiria bacitile ica musango yu, Esaya kasesema wa kwa Lesa asobele ukuti Yehova ali no ‘konaula umwina Asiria,’ “no kumunyantaula,” no kubwesha abena Israele ku calo cabo. Esaya atile: “Abashalapo pa bantu bakwe abakashalapo ukufuma ku Asiria . . . , [Lesa] akabalonganya.” Ifi fine e fyacitike ilyo papitile imyaka 200!—Esaya 11:11, 12; 14:25.

Ubulayo Mwingacetekela

Kale sana ilyo umusumba wa Ninebe taulaonaulwa, ilyo ishamfumu sha uko shaletiinya abalwani ba shiko, Esaya asobele ukuti kukesa kateka uukapusana sana na bakateka bambi. Alembele ati: “Umwana natufyalilwa, umwana umwaume napeelwa kuli ifwe; kabili bukateka bukaba pa kubeya kwakwe. Kabili akenikwa ati . . . Cilolo wa mutende. Ukuteka kwakwe kukaba fye konse konse na ku mutende wakwe takwakabe impela, pa cipuna ca bufumu ica kwa Davidi na pa bufumu bwakwe pa kuti akabupampamike no kubukosesha ku mulinganya na ku bulungami, ukufuma nomba mpaka umuyayaya. Ukupimpa kwa kwa Yehova wa mabumba kukacita ici.”—Esaya 9:6, 7.

Yesu Kristu “Cilolo wa Mutende,” akateka isonde lyonse. Amalumbo 72:7, 8 yatila: “Mu nshiku shakwe abalungama bakapuuka, kabili umutende ukafula ukushinta na po umweshi ukalekela ukubapo. Kabili akakwata abatekwa ukufuma kuli bemba ukufika kuli bemba no kufuma ku Mumana [wa Yufrate] ukufika ku mpela sha pano isonde.”

Ukupitila muli uyu “Cilolo wa Mutende” uwa maka, Yehova Lesa akafikilisha ubulayo bwaba pa Amalumbo 46:8, 9 apatila: “Iseni, moneni imilimo ya kwa Yehova, ifyo acita ifipesha amano pano isonde. Alelenga inkondo ukupwa ukufika ku mpela sha pano isonde; Ubuta abukontola kabili aputaula ne fumo; Aoca na maceleta mu mulilo.”

Ilyo ubu busesemo bwa mu Baibolo bushilafikilishiwa, Inte sha kwa Yehova balebombesha ukusambilisha abantu Baibolo iilenga baleishiba ifya kuba no mutende, nga filya Yesu acitile. Cine cine, te bantu abengafikilisha ubusesemo bwa mu Baibolo ubwaba pali Esaya 2:4 lelo ni Lesa e ukafikilisha. Ubu busesemo butila: “Bakafula bapanga babo ukuti babe baplao na mafumo yabo ukuti yabe ifya kutungwilako imiti. Uluko talwakemishe uluko lunankwe ulupanga, nangu ukusambilila inkondo na kabili.” Pali lelo, ifyalo fye fyonse filapoosa indalama imintapendwa ne mintapendwa ku fyanso fya nkondo cila mwaka!

Ilyashi lya kale ilya mu Baibolo pamo no busesemo, filenga ici citabo ukuba icaibela icine cine, kabili cilenga abalefwaisha ukwishiba icine ukusumina ukuti citabo ico tulingile ukucetekela. Mu cipande cikonkelepo, tukalanda pali Babiloni, umusumba uukalamba uwa calo cakwatishe amaka ica butatu mu lyashi lya kale ilya mu Baibolo.

[Futunoti]

[Mapu pe bula 28]

(Nga mulefwaya ukumona mapu, moneni muli magazini)

UBUFUMU BWA ASIRIA

MADAI

ASIRIA

Khorsabad

Ninebe

Kala

Asiria

Babiloni

Tigris

Yufrate

Bemba ya Mediterranean (Bemba Mukalamba)

Samaria

Yerusalemu

EGUPTI

[Icikope pe bula 28]

Pa mwinshi we sano lya mfumu ya Asiria pali icing’ombe ca kubumba icakwete amapindo no mutwe wa muntu

[Icikope pe bula 29]

Apa e palembwa amashiwi Sankeribu aleitakisha pa fyo asanshile icalo ca baYuda

[Icikope pe bula 28, 29]

Icilibwe apo balenga abafungwa balebafunda inkanda ninshi bacili abatuntulu

[Abatusuminishe Ukubomfya Ifikopepe bula 29]

Page 28, top, time line: Egyptian wall relief and bust of Nero: Photograph taken by courtesy of the British Museum; Persian wall relief: Musée du Louvre, Paris; bottom, winged bull and page 29, both images: Photograph taken by courtesy of the British Museum