Bushe Ababifi Bali no Kubako Ukufika Lilali?

“Cinshi ico [mwe Yehova] mutalalila ku mubifi ilyo amino wamucila ku bulungami?”—HABAKUKI 1:13.

 1. Ni lilali pano isonde pakesulapo umupwilapo ukwishibo bukata bwa kwa Yehova?

BUSHE Lesa akatala onaula ababifi? Nga ni fyo, tuli no kulolela ukufika lilali? Abantu mwi sonde lyonse balepusha ifipusho fya musango yo. Ni kwi twingasange fyasuko? Kuti twafisanga mu fyebo fya kusesema ifyapuutwamo na Lesa ifya ku nshita yasontwa. Fitulaya ukuti nomba line fye Yehova akapingula ababifi bonse. Ilyo e lintu pano isonde “pakesulapo ukwishibo bukata bwa kwa Yehova, ifyo amenshi yafimba pali bemba.” Ubo bulayo bwa mu kusesema ubusangwa mu Cebo ca kwa Lesa Icashila bwaba pali Habakuki 2:14.

 2. Bupingushi nshi butatu ubwa kwa Yehova busangwa mwi buuku lya kwa Habakuki?

² Ibuuku lya kwa Habakuki ilyalembelwe napamo mu 628 B.C.E., lyabamo ubupingushi butatu ubwakonkana ubwa kwa Yehova Lesa. Bubili pali ubo bupingushi bwalibombelwapo kale. Ubwa ntanshi ni lintu Yehova apingwile uluko lwa Yuda ulwapondweke. Ni shani pa lwa bupingushi bwa cibili? Ni lintu Lesa apingwile Babele waletitikisha abantu bakwe. Kanshi, tatuletwishika nangu panono ukuti ubupingushi bwa citatu ubwa bulesa nabo bwine bukabombelwapo. Na kuba, kuti twaenekela ukuti bukafikilishiwa nomba line fye. Lesa akonaula ababifi bonse pa kuti cikawamine abalungami muli shino nshiku sha kulekelesha. Ababifi bonse fye bakepaiwa mu “bushiku bukalamba bwa kwa Lesa wa maka yonse.”—Ukusokolola 16:14, 16.

 3. Cinshi cili no kuponena ababifi mu nshita yesu?

³ Ubulwi bwa bushiku bukalamba ubwa kwa Lesa bulepalamina fye pe. Kabili uko kupingula Lesa akapingula ababifi mu nshiku shesu, nangu cibe shani kukacitika, nga fintu fye ubupingushi bwa kwa Yehova bwafikilishiwe pali Yuda na Babele. Lelo, pali ino nshita, natwelenganye ukuti tuli muli Yuda mu nshiku sha kwa Habakuki. Cinshi cilecitika muli cilya calo?

Icimfundawila mu Calo ca Yuda

 4. Ni mbila nshi iya makankamike Habakuki aumfwa?

⁴ Elenganyeni ukuti kasesema wa kwa Yehova Habakuki naikala pa mutenge wakwe uwabatama, alepuupwako akamwela ka cungulo bushiku. Apo ekele pali ne cilimba. (Habakuki 1:1; 3:19, ulwimbo) Lelo Habakuki aumfwa imbila ya makankamike. Imfumu Yehoyakimu iya kwa Yuda yaipaya kasesema Uria no kupoose citumbi cakwe mu nshishi ya bapabi. (Yeremia 26:23) Ca cine, ukuti Uria tatwalilile ukucetekela Yehova, alitiinine no kufulumukila ku Egupti. Nangu cibe fyo, Habakuki naishiba ukuti Yehoyakimu tacitile ulukaakala pa mulandu wa kufwaisha ukucindika Yehova. Kuti twashininkishe ci pa mulandu wa kuti iyi mfumu yalisuulile sana amalango ya bulesa kabili yalipatile kasesema Yeremia na bambi abalebombela Yehova.

 5. Ili shani imibele ya ku mupashi mu Yuda, kabili Habakuki aumfwa shani pa lwa yene?

⁵ Habakuki amona icushi cilefutumuka pa mitenge yapalamineko ilyo baleoca ifyanunke cisuma. Abaleoce fyanunke cisuma te bakapepa ba kwa Yehova. Ni bakapepa wa bufi abaletungililwa na Yehoyakimu Imfumu ibifi iya Yuda. We museebanya ulakula! Ifilamba fyalengalenga mu menso ya kwa Habakuki, kabili apaapaata ati: “Mwe Yehova, bushe ndekuuta ukufika ku nshita nshi, na imwe ukuumfwa iyo? Ndebilikisha kuli imwe pa lufyengo, na imwe ukupususha iyo. Cinshi ico munengelo kumona buncitatubi? Cinshi ico munengelo kulolesho kucululusha? Kabili ukupumpunta no lufyengo fili pa mulola wandi, ifikansa no lubuli fyaima. Ni pali ici amalango yalengwo kunaka, no bupingushi tabusalangana; pantu umubifi alibisho walungama, e co ubupingushi bufumino bupondeme.”—Habakuki 1:2-4.

 6. Cinshi cacitike ku malango no bupingushi mu Yuda?

⁶ Na cine, ukupumpunta no lufyengo fyalifulile. Mpanga yonse, Habakuki alemona ukucululuka, ifikansa, ulubuli. ‘Amalango yalengwo kunaka,’ yafubalishiwa. Ni shani pa lwa bupingushi? Iye, bwena “tabusalangana”! Tabucimfya. Mu cifulo ca ico, ‘ababifi balibisha abalungama,’ mu bucenjeshi ukufumyapo amafunde aya kucingilila aba kaele. Cine cine, ‘ubupingushi bufuma ubwapondama.’ Bwalipotamikwa. Mwandi mibele yabipa ilipo!

 7. Cinshi ico Habakuki apampaminepo ukucita?

⁷ Habakuki akutumana no kutontonkanya pa filecitika. Bushe ali no kutompoka? Awe iyo! Pa numa ya kumona ukupakaswa kwa babomfi ba kwa Lesa aba busumino, uyu muntu wa cishinka abukulula umupampamina wakwe uwa kutwalilila uwashangila, uwakosa pamo nga kasesema wa kwa Yehova. Habakuki ali no kutwalilila ukubilisha ubukombe bwa kwa Lesa, nangu ca kuti ico cali no kumwipaisha.

Yehova Abombo “Mulimo” Ushingatetekelwa

8, 9. “Mulimo” nshi ushingatetekelwa Yehova alebomba?

⁸ Mu cimonwa, Habakuki amona bakapepa ba bufi abasaalula Lesa. Kutikeni ku fintu Yehova abeba, ati: “Lolesheni mu nko no kumona, no kusunguka musunguke.” Cilemoneke fyo Habakuki apapa umulandu Lesa aleebela balya babifi ifya musango yu. Lyene aumfwa uko Yehova alabeba ati: “Musunguke; pantu ndecito mulimo mu nshiku shenu, uo te kuti mutetekeleko nga mwalondolwelwa.” (Habakuki 1:5) Na kuba, Yehova umwine e ulebombo yu mulimo uo bashingatetekela. Bushe mulimo nshi uyo?

⁹ Habakuki akutikisha amashiwi yakonkapo aya kwa Lesa, ayalembwa pali Habakuki 1:6-11. Ubu bukombe bwa kwa Yehova—kabili takuli lesa wa bufi nangu icilubi cishipeema icingabucilikila. Ubu bukombe butila: “Pantu, moneni, ndeimya abena Kaldi, uluko ulwakalipa kabili ulwaangufyanya, uluya mu bufumo bwa pano nse ku kukwata amekalo ayashili ya luko; bene ba kulengo musokolume kabili ba kutiinya, ubupingushi bwabo no bukankaala bwabo fifuma mu bene. Bakafwalo babo ba lubilo ukucile mbwili, kabili bakali ukucile mimbulu ya cungulo; aba pali bakafwalo babo bayo busaka. Cene, aba pali bakafwalo babo bafumo kutali; bapupuka nga kapumpe uulefookela ku kulya. Bonse bene baishilo lufyengo; ukutiinya kubatangilila ku ntanshi, kabili balonganya bankole ngo musensenga. Awe, bawele shamfumu, kabili abakankaala kusekwa kuli bene; baseka amalinga yonse, pantu batuntumikako umushili no kuyacilila. Lyene bakapita ngo mwela, no kuya, bantu ababa no mulandu, abo amaka yabo e mulungu wabo.”

10. Ni bani abo Yehova aleimya?

¹⁰ Mwandi fyebo fya kusesema ifya kusoka ukufuma ku Wapulamo! Yehova aleimya abena Kaldi, e kuti icalo ca bukatu ica Babele. Ilyo cileya mu ‘bufumo bwa pano nse,’ cili no kucimfya amekalo ayengi icine cine. We cintu ulatiinya! Uluko lwa bena Kaldi lwa kulengo “musokolume kabili [lwa] kutiinya,” kabili ulwabipisha. Lupanga amafunde ya luko ayashingatelulwa. ‘Ubupingushi bwabo bufuma muli bene.’

11. Kuti mwalondolola shani ukwisa kwa milalo ya bena Babele ku kusansa Yuda?

¹¹ Bakafwalo ba Babele balabutukisha ukucila imbwili, kabili bakalipisha ukucila imimbulu ilunga icungulo. Pa kuba abasuswa ukuya, ‘bakafwalo babo bayo busaka’ balesumpauka. Ukufuma ku Babele ukutali balungama ku Yuda. Ukupupuka nga kapumpe alefookela pa ca kulya canona, abena Kaldi nomba line bali no kufookela pa balwani babo. Bushe uku kuli no kuba fye kusansa kunono, ukwa fita fye finono? Awe iyo! ‘Bonse bene bakeshilo lufyengo,’ pamo nga cipipya mukalamba uwaishila ukonaula. Mu kupimpa, batentema pali bakafwalo ukulola ku masamba, kuli Yuda na Yerusalemu, ukusumpauka lubilo lubilo ngo mwela wa ku kabanga. Imilalo ya Babele yasenda abafungwa abengi nga nshi ica kuti ‘yalonganya bankole ngo musensenga.’

12. Mibele nshi abena Babele bakwete, kabili ni pali cinshi aba balwani ba kutiinya babela “no mulandu”?

¹² Umulalo wa bena Kaldi wawela ishamfumu no kuseka abakankaala, bonse bene abashikwete maka ya kucilima uyu mulalo. ‘Waseka amalinga yonse,’ pantu yonse yalebongoloka ilyo abena Babele ‘batuntumikako umushili’ ukupitila mu kukuulapo akapili ka mushili aka kusanshilapo. Pa nshita yasontwa iya kwa Yehova, uyu mulwani wakosa ‘akapita ngo mwela.’ Pa kusansa Yuda na Yerusalemu, abena Babele bakaba “no mulandu” wa kusansa abantu ba kwa Lesa. Pa numa ya uku kucimfya ukwa lubilo lubilo, mushika wa bena Kaldi akaitakisha ati: ‘Aya maka e mulungu wesu.’ Lelo tapali ico eshibe!

Isubilo Ilyashimpwa pe Shintililo Lisuma

13. Mulandu nshi Habakuki akwatile isubilo no kuba uwacetekela?

¹³ Isubilo lyalimbuka mu mutima wa kwa Habakuki ilyo aumfwikisha imifwaile ya kwa Yehova. Mu kuba no kucetekela kwakumanina, alumbanya Yehova. Nga fintu calembwa pali Habakuki 1:12, uyu kasesema atila: “Bushe imwe tamwabapo ukufuma ku kale, mwe Yehova, Lesa wandi, Wa mushilo wandi? [tamufwa, NW] iyo.” Cine cine, Yehova ni Lesa “ukufumo muyayaya no kuyo muyayaya.”—Amalumbo 90:1, 2.

14. Mibele nshi abasangu ba mu Yuda balesupila?

¹⁴ Pa kutontonkanya pali ci cimonwa capeelwa na Lesa no kusekelela pa kushilimuka apeelwa, uyu kasesema akonkanyapo ati: “Mwe Yehova, ku kucito bupingushi e co mwababikila; mwe Cilibwe icasansuka, ku kukanda e co mwamupampamikila.” Lesa alipingula abasangu ba mu Yuda ubupingushi bwaluma, kabili bali no kwebaulwa, ukulimunwa icibi kuli Yehova. Bena nga bacetekele Yehova nge Cilibwe cabo, icele lyabo iline line, icubo, kabili Intulo ya kupususha. (Amalumbo 62:7; 94:22; 95:1) Lelo intungulushi sha baYuda isha busangu tashipalama kuli Lesa, kabili shitwalilila ukutitikisha bakapepa ba kwa Yehova aba mutende.

15. Ni mu nshila nshi Yehova ‘abela na menso ayasanguluka, ayashingalolesha pa bubi’?

¹⁵ Iyi mibele yalenga kasesema wa kwa Yehova ukuumfwo bulanda nga nshi. E ico asosa ukuti: “Mwaba na menso ayasanguluka, tamwingalolesha pa bubi, kabili tamwingamona pa bupondamishi.” (Habakuki 1:13) Ca cine, Yehova ‘aba na menso ayasanguluka, ayashingalolesha pa bubi,’ e kuti, teti atekeleshe ububi.

16. Kuti mwasupawila shani ifyalembwa pali Habakuki 1:13-17?

¹⁶ E co kanshi Habakuki ali na mepusho ya kulangulukapo. Aipusho kuti: “Nga cinshi ico mulolesesha abafutika? Cinshi ico mutalalila ku mubifi ilyo amino wamucila ku bulungami? Mwacita abantu nga masabi ya muli bemba, nge fikulika ifishaba na kateka; bonse bene abalobela ku bulobo, abakukulwila mwi sumbu, no kubalonganikila mu mukwau wakwe, e ico asamwa no kwanga; ni pali ici epaila ku kukupawile sumbu lyakwe, no kufutumwino mukwau wakwe ifye fungo, ico muli ifyo e mo aliile fyanona, no kuliile fya mabwenge. Bushe kanshi ali no kufumya mwi sumbu lyakwe pe, no kwipayaula pe inko ukubulo kulanguluka?”—Habakuki 1:13-17.

17. (a) Pa kusansa Yuda na Yerusalemu, ni shani fintu abena Babele balecita imifwaile ya kwa Lesa? (b) Cinshi Yehova akasokolwela Habakuki?

¹⁷ Pa kusansa Yuda no musumba wakwe ukalamba Yerusalemu, abena Babele bali no kucita ico balefwaya. Tabakeshibe fyo e bo Lesa alebomfya mu kupingula abantu bakwe ababulo busumino. E mulandu wine kanshi Habakuki camukosela ukumfwikisha ico Lesa alebomfesha abena Babele ababifi ukupingula ifyo Alefwaya. Balya bena Kaldi ba bukatu te bakapepa ba kwa Yehova. Bamona abantunse nga ‘masabi fye kabili nge fikulika’ ifya kwikata fye no kuteka. Lelo ukufulunganishiwa kwa kwa Habakuki pa lwa iyi milandu kwalapwa nomba line. Nomba line fye, Yehova alaeba kasesema wakwe ukuti abena Babele takabalekepo fye pa bufunushi bwabo no kusuumyo mulopa ukwa bunama.—Habakuki 2:8.

Ukuiteyanishisha Ifyebo fya kwa Yehova na Fimbi

18. Cinshi twingasambilila ku mibele ya kwa Habakuki, nga fintu yalembwa pali Habakuki 2:1?

¹⁸ Lelo pali ino nshita, Habakuki apembelela ukumfwa ifyo Yehova alakonkanyapo ukumweba. Uyu kasesema alondolola mu mupampamina ati: “Ndeiminina apo nindila, ndeiimika pa camba no kucefya, ku kumone co akasosa kuli ine, ne co akaasuka pa kuilishanya kwandi.” (Habakuki 2:1) Habakuki alefwaisha nga nshi ukwishiba ico Lesa ali no kulandila muli wene nga kasesema wakwe. Ukutetekela Yehova ukuti ni Lesa uushitekelesha bubifi kwamulenga ukupapa umulandu ububifi bwatwalilila, lelo naitemenwa ukulungikwa. Cisuma, ni shani pa lwa ifwe? Lintu twapapa umulandu ububifi bumo butwalilila, ukucetekela ubulungami bwa kwa Yehova Lesa kulingile kwatwafwa ukuba abashikatala no kulindila wene.—Amalumbo 42:5, 11.

19. Umwabela Icebo ca kwa Lesa kuli Habakuki, cinshi cacitike ku baYuda bapondweke?

¹⁹ Umwabela ifyebo aebele Habakuki, Lesa alipingwile uluko lwa ciYuda ulwapondweke ukupitila mu kuleka abena Babele ukusansa Yuda. Mu 607 B.C.E., balyonawile Yerusalemu ne tempele lya uko, ukwipaya abakalamba na banono pamo, no kusenda bankole abengi. (2 Imilandu 36:17-20) Pa numa ya myaka iingi iya bunkole mu Babele, abashalapo ba busumino abaYuda balibwelele ku myabo na mu kupita kwa nshita bakuulile itempele cipya cipya. Nangu cibe fyo, pa numa ya ico abaYuda na kabili balilekele ukuba aba busumino kuli Yehova—maka maka lintu bakeene Yesu nga Mesia.

20. Paulo abomfeshe shani Habakuki 1:5 pa lwa kukaanwa kwa kwa Yesu?

²⁰ Ukulingana na Imilimo 13:38-41, umutumwa Paulo alondolwelele abaYuda mu Antioke icali no kufumamo nga ca kuti bakeene Yesu na muli fyo ukutandula ilambo lya cilubula. Paulo ayambwile Habakuki 1:5 mu bupilibulo bwa ciGriki ubwa Septuagint no kusosa ati: “Cenjeleni ukuti ciisapona pali imwe icasoswa muli bakasesema, aciti: Moneni, mwe ba misuula, papeni no konaika; ico ine ndebombo mulimo mu nshiku shenu, umulimo uo tamwakatetekeleko nakalya, nelyo umuntu engaushimika kuli imwe.” Umwabela ifyayambwile Paulo, ukufikilishiwa kwa cibili ukwa kwa Habakuki 1:5 kwacitike lintu imilalo ya bena Roma yaonawile Yerusalemu ne tempele lya uko mu 70 C.E.

21. AbaYuda ba mu nshiku sha kwa Habakuki balemona shani “umulimo” wa kwa Lesa uwa kubomfya abena Babele ku konaula Yerusalemu?

²¹ Ku baYuda ba mu nshiku sha kwa Habakuki, “umulimo” wa kwa Lesa uwa kulenga abena Babele ukonaula Yerusalemu cali cintu icishabamo amano pantu ulya musumba wali e cifulo ca kupepa Yehova kabili umwaikele imfumu yasubwa. (Amalumbo 132:11-18) Pali uyo mulandu, Yerusalemu tatalile onaulwapo. Itempele lya uko talyatalile alyocewapo. Ubufumu bwa mu mutande wa kwa Davidi tabatalile ababutaashapo. Calikosele ukusumino kuti Yehova kuti asuminisha ifya musango yu ukucitika. Lelo, Lesa alisokele mu mulinganya ukupitila muli kasesema Habakuki ukuti ifi fintu ifya kutenshe calo fyali no kucitika. Kabili ilyashi lya kale lilangilila ukuti fyalicitike nga fintu casobelwe.

“Umulimo” Ushingatetekelwa uwa kwa Lesa mu Nshiku Shesu

22. “Umulimo” ushingatetekelwa uwa kwa Yehova ubimbamo cinshi ilelo?

²² Bushe Yehova akabombo “mulimo” ushingatetekelwa mu nshiku shesu? Mwitwishika, e fyo akacita, nangu ca kuti abatwishika cilabakosela ukutetekela. Uno muku, umulimo ushingatetekelwa uo Yehova akabomba wa konaula Kristendomu. Ukupala Yuda wa ku kale, Kristendomu aitunga ukupepa Lesa lelo alibola ukufuma ku mutwe ukufika na ku tukondo. Yehova akashininkisha ukuti imipepele yonse fye iya mu Kristendomu yafumishiwapo, ukusanshako na “Babele mukalamba,” ubuteko bwa calo ubwa kupepa kwa bufi.—Ukusokolola 18:1-24.

23. Umupashi wa kwa Lesa walengele Habakuki ukucita cinshi?

²³ Yehova alikwete umulimo na umbi uwa kupeela Habakuki ilyo Yerusalemu ashilaonaulwa mu 607 B.C.E. Cinshi Lesa ali no kweba kasesema wakwe? Habakuki aali no kumfwa ifyali no kumulenga ukubuula icilimba cakwe no kutendeka ukwimba inyimbo sha bulanda isha mapepo kuli Yehova. Lelo intanshi, umupashi wa kwa Lesa uli no kulenga uyu kasesema ukubilisha amalanda ya kucilimusha. Cine cine kuti twafwaisha ukumfwikisha ubupilibulo bwine bwine ubwa ayo mashiwi ya kusesema aya ku nshita yasontwa. Shi natubebete na kabili ukusesema kwa kwa Habakuki.

Bushe Muleibukisha?

• Mibele nshi iyaliko mu Yuda mu nshiku sha kwa Habakuki?

• “Mulimo” nshi ushingatetekelwa uo Yehova abombele mu nshita ya kwa Habakuki?

• Ni pali cinshi isubilo lya kwa Habakuki lyashimpilwe?

• “Mulimo” nshi ushingatetekelwa Lesa akabomba mu nshiku shesu?

[Icikope pe bula 9]

Habakuki alisungwike umulandu Lesa asuminishishe ababifi ukutwalilila. Bushe na imwe mulasunguka?

[Icikope pe bula 10]

Habakuki asobele ukuti abena Babele bakaletela icalo ca Yuda akayofi

[Icikope pe bula 10]

Ifitantaala fya Yerusalemu, uwaonawilwe mu 607 B.C.E.