Bushe Mukapusuka Lintu Lesa Abombelapo?

“Inshiku shilya ashibulaipifiwa, nga tengapusuka umuntunse nangu umo; lelo, pa mulandu wa basalwa, inshiku shilya shikepifiwa.”—MATEO 24:22.

1, 2. (a) Mulandu nshi cabela ca cifyalilwa ukufwaisha ukwishiba pa lwa nshita yesu iya ku ntanshi? (b) Ukufwaisha kwa cifyalilwa napamo kwalibimbilwemo mu fipusho nshi ifyakatama?

BUSHE mwaitemwa shani? Abengi ilelo balaitemwa ukucishamo, baba fye bakaitemwe. Nalyo line, Baibolo taisenuka ukufwaisha ukwishiba icitukumine. (Abena Efese 5:33) Ico cilesanshamo ukufwaisha ukwishiba pa lwa fya ku ntanshi. E co ca cifyalilwa fye ukufwaya ukwishiba icaba ku nshita ya ku ntanshi. Bushe mulafwaisha ukwishiba?

² Kuti twashininkisha ukuti abatumwa ba kwa Yesu e fyo bali na bo ukufwaisha ukwishiba ifya ku ntanshi. (Mateo 19:27) Napamo e mulandu umo uwalengele bane aba bene ukwipusha lintu bali na Yesu pa lupili lwa Miolife. Baipwishe abati: “Mutwebe, ni lilali ifi fintu fikabako? kabili cinshi cikabe ciishibilo ica kuti fyonse ifi fyalaswa fipwishishiwe?” (Marko 13:4) Yesu tasuulileko fye ku kufwaisha kwa cifyalilwa ukwa kwishiba ifya ku ntanshi—ukwa batumwa no kwesu. Libili libili alondolwele ifyo abakonshi bakwe bali no kwambukilwako ku fya kucitika ne cali no kucitika mu kupelako.

 3. Mulandu nshi tulundanishisha icasuko ca kwa Yesu ku nshita yesu?

³ Icasuko ca kwa Yesu calondolwele ubusesemo ubwakwata ukufikilishiwa kukalamba mu nshita yesu. Ici kuti twacimwena ku nkondo sha calo ne mbuli shimbi isha mu mwanda wesu uwa myaka, ifinkukuma ifyo fyalofya imintapendwa ya myeo, ifipowe ifyo filwalika no kwipaya, ne fikuko—ukufuma ku cikuko ca Spanish influenza ica mu 1918 ukufika kuli pumpunta wa ndakai AIDS. Nangu cibe fyo, ifyali mu casuko ca kwa Yesu ifingi na kabili fyalifikilishiwe ukutungulula ku konaulwa kwa Yerusalemu ku bena Roma mu 70 C.E. ukusanshako no bonaushi bwine. Yesu asokele abasambi bakwe ati: “Kutulukeni; pantu bakamupeela ku filye, mukafopolwa na mu masunagoge, no kwimikwa pali bakateka ne shamfumu pa mulandu wa ine, ku kushimiko bunte pali bene.”—Marko 13:9.

Cintu Yesu Asobele, ne Cacitike

 4. Kusoka nshi kumo kwasanshiwe mu casuko ca kwa Yesu?

⁴ Yesu alandile ifingi ukucila pa fintu bambi bali no kusunga abasambi bakwe. Abasokele no lwa fintu abene balingile ukuisunga. Ku ca kumwenako atile: ‘Ilyo mukamona ica muselu icipomona naciiminina uko tacifwile ukuba, uulebelenga akutuluke, e lyo aba mu Yudea bafulumukile ku mpili.’ (Marko 13:14) Ubulondoloshi bwalinganako pali Luka 21:20 butila: “Ilyo mukamona Yerusalemu naushingwa ku milalo.” Ni shani caishilebe fyo fine mu kufikilishiwa kwa kubalilapo?

 5. Cinshi cacitike pa kati ka baYuda mu Yudea mu 66 C.E.?

⁵ The International Standard Bible Encyclopedia (1982) itwebo kuti: “AbaYuda balecililako ukukanaikushiwa mu kutekwa na bena Roma kabili bakateka baleya balecilamo ulukaakala, ubunkalwe, no kubulwo bufumacumi. Kwali ukupondoka kwa pabuuta tuutu mu A.D. 66. . . . Ubulwi bwatendeke lintu baZealot bapokele Masada kabili lyene, ukutungululwa na Menahem, baingile mu Yerusalemu. Pa nshita imo ine abaYuda mu musumba wa kwa kateka uwa Kaisarea balipayawilwe, kabili imbila ya ubu bukatu yalisalangene mpanga yonse. Amakobili yapya yalifwatikwepo Umwaka 1 ukupulinkana ukufika ku Umwaka 5 uwa kupondoka.”

 6. Cinshi abena Roma bacitile lintu abaYuda bapondweke?

⁶ Umulalo wa ciRoma uwalenga 12 uwaletungululwa na Cestius Gallus walingilile ukufuma ku Suria, ukupumpunta Galili na Yudea, kabili lyene ukusansa umusumba ukalamba, ukucandila fye ne ciputulwa ca ku muulu ica “Yerusalemu umusumba wa mushilo.” (Nehemia 11:1; Mateo 4:5; 5:35; 27:53) Ukusupula ifya kucitika, icitabo ca The Roman Siege of Jerusalem citila: “Pa nshiku shisano abena Roma baeseshe ukunina icibumba, lelo cila nshita balebatamfya. Mu kuya kwa nshita ifita fyalecingilila, pa kucimfiwa ne fya kufwinta ifingi fyalinenwike. Ilyo bapangile testudo—ica kukomena inkwela shabo pa mitwe ku kuicingilila—abashilika ba ciRoma balitompwele icibumba no kwesha ukukoleka impongolo. Abalinshi ba ciYuda baiketwe umunsokwe.” Abena Kristu ba mu musumba kuti baibukisha amashiwi ya kwa Yesu no kwiluka ukuti ica muselu caliminine umwashila.a Lelo mu kuba no musumba naushingwa, ni shani fintu abo Bena Kristu bengafulumuka, nga fintu Yesu abebele?

 7. Lintu ukucimfya kwali fye mu maboko ya bena Roma mu 66 C.E., cinshi cintu bacitile?

⁷ Kalemba wa lyashi lya kale Flavius Josephus ashimiko kuti: “Cestius [Gallus], ukwabula ukwishiba ukupelelwa kwa bantu ashingile nelyo ukuyumfwa kwabo, mu kupumikisha aebele abashilika bakwe ukubwelulukako, ukusuulako fye ku kucimfya nangu ca kuti tabacimfiwe, kabili mu kupusana na cintu bonse baletontonkanya alibwelelemo ukufuma ku Musumba.” (The Jewish War, II, 540 [xix, 7]) Mulandu nshi Gallus abwelelemo? Ukwabula ukusakamana umulandu akwete, ukubwelelamo kwakwe kwasuminishe Abena Kristu ukumfwila ukukambisha kwa kwa Yesu no kufulumukila ku mpili no kucingililwa.

 8. Ukusansa kwa cibili ukwa bena Roma pali Yerusalemu kwali shani, kabili cinshi abapuswike bapitilemo?

⁸ Icumfwila cali no kubapususha. Tapapitile ne nshita imilalo ya ciRoma yalisanshile ku kulesha ukupondoka. Lulu wa kwa Mushika Titus afikile pa kalume mu kuba no kushinga Yerusalemu ukufuma mu April ukufika mu August 70 C.E. Ukubelenga ubulondoloshi bwa kwa Josephus pa lwa fintu abaYuda baculile kulalenga no mubili ukwenda. Pa mbali ya abo baipaiwe ilyo balelwisha abena Roma, abaYuda bambi baipaiwe ku balwani babo aba ciYuda, kabili insala yalengele ukulalya abantu. Ukufika pa nshita abena Roma bacimfishe, abaYuda 1,100,000 balifwile.b Pa bapuswike 97,000, bamo balipaiwe mu kwangufyanya; bambi basendelwe ubusha. Josephus asoso kuti: “Abacilile imyaka ya bukulu 17 babikilwe mu makusu ya fyela no kutumwa ku Egupti ukuyabomba umulimo wakosa, ilintu abengi Titus abapeele ku fitungu ukuyafwila mu fibansa fya fyangalo ku lupanga nelyo ukuliiwa ne nama mpanga.” Nelyo fye ni muli uku kusalulula, abafungwa 11,000 balifwile ku nsala.

 9. Mulandu nshi Abena Kristu bashapitile mu cintu abaYuda bapitilemo, lelo fipusho nshi fyashala?

⁹ Abena Kristu kuti batasha pa kuti balyumfwilile ukusoka kwa kwa Shikulu no kufulumuka mu musumba ilyo umulalo wa ciRoma ushilabweluluka. Muli fyo balipuswike ku lubali lwa cintu Yesu aitile ‘ubucushi bukalamba pali Yerusalemu ubushatala abubako ukutula pa kutendeka kwa pano isonde ukufika ilyo, nangu takwakabeko.’ (Mateo 24:21) Yesu alundileko ukuti: “Inshiku shilya ashibulaipifiwa, nga tengapusuka umuntunse nangu umo; lelo, pa mulandu wa basalwa, inshiku shilya shikepifiwa.” (Mateo 24:22) Cinshi ico capilibwile lilya, kabili cinshi cipilibula ilelo?

10. Ni shani fintu twalondolwele Mateo 24:22 ku numa uku?

¹⁰ Ku numa calelondololwa ukuti ‘abantunse aba kupusuka’ bali baYuda abapuswike ubucushi bwa pali Yerusalemu mu 70 C.E. Abena Kristu balifulumwike, e co Lesa kuti aleka abena Roma ukonaula mu kwangufyanya. Mu mashiwi yambi, pa mulandu wa kuti “abasalwa” balifumine mu cifulo ca busanso, inshiku sha bucushi kuti shaipifiwa, ukusuminisha ‘abantunse’ bamo abaYuda ukupusuka. Caletontonkanishiwe fyo abaYuda bapuswike bacitile cinshingwa abali no kupusuka ubucushi bukalamba ubuleisa mu bushiku bwesu.—Ukusokolola 7:14.

11. Mulandu nshi cilemonekele fyo ukulondolola kwa Mateo 24:22 kulingile ukulangulukwapo na kabili?

¹¹ Lelo bushe ubo bulondoloshi bwaleumfwana ne cacitike mu 70 C.E.? Yesu atile ‘abantunse’ bali no ‘kupusuka’ bulya bucushi. Bushe kuti mwabomfya ishiwi ‘ukupusuka’ kuli balya bakapusunsuka 97,000, apantu amakana yabo balifwile mu kwangufyanya ku nsala nelyo ukwipaiwa mu fibansa fya fyangalo? Pa lwa cibansa ca fyangalo cimo ica pa Kaisarea, Josephus asoso kuti: “Impendwa ya bafwile mu kushomboka ne nama mpanga nelyo ukulwa na bantu banabo nelyo ku kocewa abatuntulu yalicilile 2,500.” Nangu ca kuti tabafwilile mu kushinga, nalyo line ‘ukupusuka’ tabapuswike. Kabili bushe Yesu kuti abamona ukupalana na bakapusunsuka ba nsansa aba “bucushi bukalamba” ubuleisa?

Abantunse Bapusuka—Mu Nshila Nshi?

12. Ni bani bali “abasalwa” aba mu mwanda wa myaka uwa kubalilapo abo Lesa alefwaisha?

¹² Ilyo 70 C.E. yalefika, Lesa nomba talemona abaYuda ba cifyalilwa ukuba abantu bakwe abasalwa. Yesu alangishe fyo Lesa alikeene lulya luko kabili ali no kuleka umusumba ukalamba, itempele, ne mipepele yabo ukupwa. (Mateo 23:37–24:2) Lesa asalile uluko lupya, Israele wa ku mupashi. (Imilimo 15:14; Abena Roma 2:28, 29; Abena Galatia 6:16) Lwapangilwe na baume na banakashi abasalilwe ukufuma mu nko shonse no kusubwa no mupashi wa mushilo. (Mateo 22:14; Yohane 15:19; Imilimo 10:1, 2, 34, 35, 44, 45) Imyaka yafulilako ilyo Cestius Gallus talasansa, Petro alembeele “abasalilwa umwabelo kwishibila kabela kwa kwa Lesa Shifwe, mu kushisha kwa Mupashi.” Abasubwa no mupashi aba musango yo baali “lupwa ulwasalwa, bushimapepo bwa bufumu, uluko lwa mushilo.” (1 Petro 1:1, 2; 2:9) Lesa aali no kusenda abasalwa aba musango yo ku muulu ku kuyateka na Yesu.—Abena Kolose 1:1, 2; 3:12; Tito 1:1; Ukusokolola 17:14.

13. Bupilibulo nshi amashiwi ya kwa Yesu pali Mateo 24:22 napamo yakwete?

¹³ Uku kwishiba abasalwa cili ca kwaafwa, apantu Yesu asobele ukuti inshiku sha bucushi shali no kwipifiwa “pa mulandu wa basalwa.” Ishiwi lya ciGriki ilyapilibulwa “pa mulandu wa” na kabili kuti lyapilibulwa “pa kuti ciwamine” (NW). (Marko 2:27; Yohane 12:30; 1 Abena Korinti 8:11; 9:10, 23; 11:9; 2 Timote 2:10; Ukusokolola 2:3) E co Yesu mu nshila imbi aleti, ‘Inshiku shilya nga tashakepifiwe, takapusuke umuntunse nangu umo; lelo, pa kuti cikawamine abasalwa, inshiku shilya shikepifiwa.’c (Mateo 24:22) Bushe pali icili conse icacitike icanonseshe nelyo icacitike ‘pa kuti ciwamine’ Abena Kristu basalwa abacilikilwe mu Yerusalemu?

14. Ni mu nshila nshi ‘abantunse’ bapuswike lintu imilalo ya bena Roma mu kupumikisha yabwelelemo mu 66 C.E.?

¹⁴ Ibukisheni ukuti mu 66 C.E., abena Roma balingilile icalo, ukwikala ku ncende ya ku muulu iya Yerusalemu, no kutendeka ukutompola ilinga. Josephus atila: “Atwalilila fye ukushinga pa nshita yalepelako nga alicandile Umusumba pa muku fye umo.” Ipusheni amuti, ‘Mulandu nshi umulalo wa maka uwa bena Roma mu kupumikisha wingalekela lulu wa uko “mu kupusana na cintu bonse baletontonkanya” no kubwelelamo?’ Rupert Furneaux, incenshi mu kulondolola ifya lyashi lya kale ilya bushilika, atila: “Tapali kalemba wa lyashi lya kale uwalondolola bwino umulandu uuli onse uo Gallus acitile icintu iceni kabili icabamo ubusanso.” Lelo ukwabulo kusakamana umulandu, icafuminemo ca kuti ubucushi bwalipifiwe. Abena Roma balibwelelemo, na baYuda balibakunkunike ilyo balebwelelamo. Ni shani pa lwa Bena Kristu basubwa “basalwa” abacilikilwe? Ukusalangana kwa bena Roma kwapilibwile ukuti tabali na kwipaiwa mu kwipayaula kwali no kubako mu bucushi. Muli fyo, balya Bena Kristu abanonkelemo mu kwipifiwa kwa nshiku sha bucushi mu 66 C.E. bali e ‘bantunse’ bapuswike abalumbulwa pali Mateo 24:22.

Cinshi Cili ku Ntanshi?

15. Mulandu nshi mwingasosele fyo mu kasuba kesu tulafwaisha ukwishiba Mateo icipandwa 24?

¹⁵ Umo kuti pambi aipusha ati, ‘Mulandu nshi ningile ukufwaisha ukwishiba pa lwa uku kumfwikisha kwalondololwa bwino ukwa mashiwi ya kwa Yesu?’ Kwena, kwaliba imilandu iingi iya kusondwelela ukuti ubusesemo bwa kwa Yesu bwali no kukwata ukufikilishiwa kwakulilako, ukucila pa cacitike ukwisafika mu 70 C.E. ukusanshako na 70 C.E. wine.d (Linganyeniko Mateo 24:7; Luka 21:10, 11; Ukusokolola 6:2-8.) Pa makumi ya myaka, Inte sha kwa Yehova shalishimikila ukuti ukufikilishiwa kukalamba ukulecitika mu nshita shesu kushinine fyo kuti twaenekela “ubucushi bukalamba” ubwa cipimo cakulisha pa ntanshi fye apa. Muli ubo bucushi, ni shani fintu amashiwi ya mu busesemo aya pali Mateo 24:22 yakafikilishiwa?

16. Cishinka nshi ica kukoselesha icipayanya Ukusokolola pa lwa bucushi bukalamba ubulepalamina?

¹⁶ Mupepi ne myaka amakumi yabili pa numa ya bucushi pali Yerusalemu, umutumwa Yohane alembele ibuuku lya Ukusokolola. Lyalangishe ukuti mu cine cine ku ntanshi kuli ubucushi bukalamba. Kabili, apantu tulafwaisha ukwishiba icitwambukila pa lwesu, kuti pambi twailululwa ukwishiba ukuti ukulingana no busesemo, Ukusokolola kulaya ukuti abantunse bakapusuka ubucushi bukalamba ubuleisa. Yohane asobele “bumba likalamba . . . abafuma ku luko lonse ne mikowa ne misango ya bantu na bantu na ba ndimi.” Ni bani? Ishiwi lya mu muulu lyayasuka aliti: “Aba e bafuma mu Bucushi bukalamba.” (Ukusokolola 7:9, 14) Ee, bakaba bakapusunsuka! Ukusokolola na kabili kulatupeela ukumfwikisha ifyo ifintu fili no kutendeka mu bucushi bukalamba ubuleisa na fintu Mateo 24:22 akafikilishiwa.

17. Cinshi ico iciputulwa ca kwiswila ica bucushi bukalamba cikasanshamo?

¹⁷ Ulubali lwa kwiswila ulwa ubu bucushi lukaba kusansa cilende wa mampalanya uwitwa “Babele mukalamba.” (Ukusokolola 14:8; 17:1, 2) Emininako ubuteko bwa calo ubwa mipepele ya bufi, mu kuba na Kristendomu ngo wa mulandu sana. Ukulingana na mashiwi ya Ukusokolola 17:16-18, Lesa akabika mu mitima ya bapolitishani ukusansa uyu cilende wa mampalanya.e Tontonkanyeni fintu ici cingamoneka ku basubwa ba kwa Lesa “abasalwa” na banabo, “ibumba likalamba.” Ilyo uku kusansa kwa kubongolola imipepele kukalatwalilila, pambi cikamoneke fyo kuli no kusenda imipepele yonse iyateyanishiwa, ukusanshako abantu ba kwa Yehova.

18. Mulandu nshi cikamonekele fyo takwakabe ‘abantunse’ abakapusuka ulubali lwa kwiswila ulwa bucushi bukalamba?

¹⁸ Apa e po amashiwi ya kwa Yesu ayasangwa pali Mateo 24:22 yakafikilishiwa ukufikilishiwa kukalamba. Kwati fye fintu abasalwa mu Yerusalemu bamoneke ukuba mu busanso, ababomfi ba kwa Yehova kuti bamoneka ukuba mu busanso bwa kwipaiwa mu kusansa imipepele, kwati kulya kusansa kuli no kupyangapo ‘abantunse’ bonse ukusanshako abantu ba kwa Lesa. Lelo, lekeni tuleibukisha icacitike ku numa kulya mu 66 C.E. Ubucushi bwaletele abena Roma bwalipifiwe, ukupeela abasalwa ba kwa Lesa abasubwa ishuko likalamba ilya kufyuka no kutwalilila aba mweo. Muli fyo, kuti twacetekela ukuti kulya kusansa kwa konaula pa mipepele takwakasuminishiwe ukwipaya icilonganino ca mwi sonde lyonse ica bakapepa ba cine. Kukapita bwangu bwangu, kwati ni “mu bushiku.” Nangu ni fyo, bukepifiwa mu nshila imo, tabwakasumishiwe ukupwishishisha ubuyo bwa buko, pa kuti abantu ba kwa Lesa ‘bengapusuka.’—Ukusokolola 18:8.

19. (a) Ilyo ulubali lwa kubalilapo ulwa bucushi bukalamba bwapita, cinshi cikamonekesha? (b) Ni kuli cinshi ici cikatwala?

¹⁹ Ifiputulwa fimbi ifya kuteyanya kwa pe sonde ukwa kwa Satana Kaseebanya fili no kutwalilila ukubako pa nshita imo, ukuloosha pa kufuluka ifyo balebomba no mucende wabo uwa mipepele umukokole. (Ukusokolola 18:9-19) Pa kashita kamo, bali no kumona ukuti ababomfi ba kwa Lesa aba cine e po bacili, “abaikalo mutelelwe bonse bene, abaikala umushabe linga” kabili ukumoneka aba kutoola fye. Mwandi bakasunguka ku cikabacitikila! Pa kwankula ku kusansa kwa cine cine nelyo ukwa cintiinya fye ukwa kulwisha ababomfi bakwe, Lesa akema ku kupingula abalwani bakwe mu lubali lwa kupelelekesha ulwa bucushi bukalamba.—Esekiele 38:10-12, 14, 18-23.

20. Mulandu nshi ulubali lwa bubili ulwa bucushi bukalamba bushakasansalikile abantu ba kwa Lesa ku busanso?

²⁰ Ulu lubali lwa bubili ulwa bucushi bukalamba bukalingana ne cacitikile Yerusalemu na bekashi bakwe mu kusansa kwa bubili ukwa bena Roma mu 70 C.E. Bukaba e “bucushi bukalamba ubushatala abubako ukutula pa kutendeka kwa pano isonde ukufika kuli nomba, nangu takwakabeko.” (Mateo 24:21) Kuti twacetekela, nangu ni fyo, ukuti abasalwa ba kwa Lesa na banabo tabakabe mu cifulo ca busanso, ukuba mu busanso bwa kwipaiwa. Awe iyo, tabakabe nabafulumukila ku cifulo cimo. Abena Kristu ba mu mwanda wa myaka uwa kubalilapo aba mu Yerusalemu bafulumwike ukufuma muli ulya musumba ukuya ku fitungu fya mpili, pamo nga Pela bushilya bwa Yordani. Nangu ni fyo, ku ntanshi, Inte sha busumino isha kwa Lesa shikaba fye mpanga yonse ukushinguluke sonde, e co ukucingililwa takwakashimpwe pa kufulumuka ukuya ku cifulo cimo.

21. Ni bani bakalwa mu bulwi bwa kupelelekesha, kabili cinshi cikafumamo?

²¹ Abakonaula te mulalo wa bena Roma nelyo akabungwe ka bantunse akali konse. Lelo, ibuuku lya Ukusokolola lilondolola ukuti imilalo ya konaula ikafuma ku muulu. Ee, te mulalo wa bantunse uukonaula muli lulya lubali lwa kupelelekesha ulwa bucushi bukalamba, lelo ni “Cebo ca kwa Lesa,” Imfumu Yesu Kristu, ukwafwilishiwa ne “milalo ya mu muulu,” ukusanshako Abena Kristu basubwa ababuushiwa. “Imfumu Ya Shamfumu Kabili Shikulu Wa Bashikulu” akepaya ukwipaila umuku wa limo ukwacila nga nshi pa kwacitile abena Roma mu 70 C.E. Kukafumyapo bonse abalwisha Lesa—ishamfumu, bamushika, abantungwa na basha, abanono na bakalamba. Nelyo fye mateyanyo ya buntunse aya mu calo ca kwa Satana yakaloba.—Ukusokolola 2:26, 27; 17:14; 19:11-21; 1 Yohane 5:19.

22. Ni mu mano nshi yalundwapo umo ‘abantunse’ bakapusukila?

²² Ibukisheni ukuti ‘abantunse,’ abashalapo basubwa na be “bumba likalamba,” kale kale bakaba nabapusuka lintu Babele Mukalamba aonaulwa mu kashita nyunsu kabili umupwilapo mu lubali lwa kubalilapo ulwa bucushi. Mu musango umo wine, mu lubali lwa kupelelekesha ulwa bucushi, ‘abantunse’ abakafulumukila ku lubali lwa kwa Yehova bakapusuka. Fintu ici cikapusanako ne cacitikile abaYuda bapondweke mu 70 C.E.!

23. Ni cinshi ‘abantunse’ abakapusunsuka bengenekela?

²³ Pa kutontonkanya pa cingamucitikila ku ntanshi ne cingacitikila abatemwikwa benu, moneni icalaiwa pa Ukusokolola 7:16, 17: “Tabakomfwe nsala kabili, tabakomfwe cilaka kabili, akasuba takakaboce nakalya, nangu cikabilila conse; ico Umwana wa mpaanga uuli pa kati ka cipuna ca bufumu akabacema, no kubatungulula baye pa tumfukumfuku twa menshi ya mweo; kabili Lesa akafuute filamba fyonse ku menso yabo.” Mu kushininkisha, uko mu cine cine kukaba ‘kupusuka’ mu mano yawamisha, ukupusukilila.

[Amafutunoti]

Kuti Mwayasuka Shani?

Fiputulwa nshi fibili ifya kusansa kwa mulalo wa ciRoma pali Yerusalemu ifyaliko?

Mulandu nshi cishilemonekele fyo abaYuda bapuswike mu 70 C.E. 97,000 e bali ‘abantunse’ abalumbulwa pali Mateo 24:22?

Ni shani fintu inshiku sha bucushi bwa Yerusalemu shaipifiwe, na muli fyo ni shani fintu ‘abantunse’ bapuswike?

Mu bucushi bukalamba ubulepalamina, ni shani fintu inshiku shikepifiwa na ‘bantunse’ ukupusuka?

[Icikope pe bula 16]

Ikobili lya ciYuda ilyapangilwe pa numa ya kupondoka. Amashiwi ya ciHebere yaleti, “Umwaka wa cibili,” e mu kuti 67 C.E., umwaka wa cibili uwa kuiteka

[Abatusuminishe]

Pictorial Archive (Near Eastern History) Est.

[Icikope pe bula 17]

Ikobili lya ciRoma ilyapangilwe mu 71 C.E. Ku kuso kuli umwina Roma ne canso; ku kulyo umwanakashi umuYuda aleloosha. Amashiwi “IVDAEA CAPTA” yalola mu kuti “Yudea Nkole”

[Abatusuminishe]

Pictorial Archive (Near Eastern History) Est.