‘Aba Nsansa Ni Abo Abashipikisha’

 1. Ukutula mu 1914, mibele nshi pe sonde iyafikilisha Mateo 24:3-8, kabili kutunga nshi ukwa League of Nations na United Nations ukwafilwa?

MU CITABO cakwe The Present Age, Robert Nisbet alanda ulwa “Nkondo ya Myaka Amakumi Cinelubali na Isano iyatwalilila, ukuputunkishiwa limo limo fye, ukutula mu 1914.” Ee, “ubulwi ne mpupilisho sha bulwi,” ukusanshako ne nkondo sha calo—ico e cintu Yesu Kristu asobele kuli iyi nshita ya mpela. (Mateo 24:3-8) League of Nations yaletelweko mu 1920 “ku kucilikile nkondo kuli pe na pe.” Fintu mu ca bulanda afililwe! United Nations yaliteyanishiwe mu 1945 “ku kupususha inkulo shikakonkapo ukufuma ku kupuma kwa nkondo.” Lelo icitabo ca kwa Max Harrelson ica Fires All Around the Horizon cishimiko kuti: “Takwabako ubushiku ukutula pa kupwa kwa Nkondo ya Calo iya II lintu takwaliko ukulwa ku fifulo fimo.”

 2. Cinshi cintu abantu bamo bepusha ukulosha ku mibele ya calo, lelo fipusho nshi tulingile ukulaipusha?

² Ukululunkanya no lukakala, ukubola no bupiina, imiti ikola ne fikuko—ifi fyonse filunda ku cikope ca bulanda. Abantu bamo kuti pambi baipusho kuti: ‘Ni shani fintu abantunse bengatwalilila ukushipikisha imibele ya musango yo iya kusakamika?’ Icacilapo kucindama, nangu cibe fyo, tulingile ukwipusho kuti: ‘Ni shani fintu Lesa ashipikisha ukutapwa kwa bubumbo bwakwe ubwa pe sonde? Butali bwaba shani akasuminisha abantu babifi ukonaule sonde no kutulika umuseebanya pe shina lyakwe ilyaumo mutengo?’

 3. (a) Cipusho nshi cintu kasesema Esaya aipwishe, kabili mulandu nshi? (b) Casuko nshi Yehova apeele, kabili cinshi cintu ici cilangilila ku kasuba kesu?

³ Kasesema Esaya aimishe icipusho capalako. Apeelwe umulimo wa kubilisha ku bana calo banankwe ubukombe ukufuma kuli Yehova. Lelo asokelwe calimo ukuti tabali no kupeelako kusakamana atemwa kuli wene nelyo kuli Lesa wamutumine. E co Esaya aipwishe ukuti: “Bushe ukufika ku nshita nshi, mwe [Yehova, NW]?” Ee, butali bwaba shani Esaya aali no kushimikila kuli aba bantu ba bumankonso, kabili ni pa butali bwaba shani Yehova aali no kushishimisha ukukaana kwabo ukwa musaalula ukumfwila ubukombe bwakwe? Yehova ayaswike ukuti: “Ukufika ilyo imishi yatobeka, mwabulamo umwikashi, na mayanda yabulamo umuntu, ne mpanga yashala amapopa.” (Esaya 6:8-11) Mu kupalako ilelo, Lesa ashipikisha umuseebanya wa musango yo ukufikila inshita yakwe iyasontwa ku kuputunkanya ubupingushi pa calo umo shimilandu mukalamba aba ni Kristendomu wabulo busumino.

 4. Cinshi cali ca kufumamo ca kushipikisha kwa kwa Yobo, kabili kwebekesha nshi kuntu ici citupeela ilelo?

⁴ Yehova alishipikisha pa nshita ntali umuseebanya wa kwa Satana. Imyaka imo 3,600 iyapitapo, Yobo wa busumino na o wine alishipikishe, ukusuusha ukusonsomba kwa kwa Satana ukwa kuti tali na maka ya kusunga bumpomfu pe samba lya bwesho. Fintu ici calengele umutima wa kwa Yehova ukusekelela! (Yobo 2:6-10; 27:5; Amapinda 27:11) Nga fintu munyina citika wa kwa Yesu Yakobo alondolwele pa numa ukuti: “Moneni, tuletila ba nsansa abashipikisha; mwalyumfwo kushipikisha kwa kwa Yobo, kabili mwalimwene ukupanga kwa kwa Yehova, kwa kuti Yehova wa luse ulwingi kabili wa congwe.” Mu kupalako, abo abashipikisha pamo na Yehova ilelo baliba abaebekeshiwa ulwa ca kufumamo ca nsansa.—Yakobo 5:11, NW.

 5. Ni shani fintu Yesu alangile ukuti ukushipikisha kwali no kufwaikwa ku bantu ba kwa Lesa ilelo, kabili ilintu balecita mulimo nshi bali no kukabila ukushipikisha?

⁵ Yesu alangishe mu kulengama ukuti ukushipikisha kwali no kubo kwafwaikwa ku bantu ba kwa Lesa mu kasuba kesu. Mu kusobela icishibilo ca “kusondwelela kwa micitile ya fintu,” atile: “Uwashipikisha ukufika ku mpela, wene akapusuka.” Ukushipikisha ilintu ulecita cinshi? Amashiwi yene ayakonkapo aya kwa Yesu yaasuka ukuti: “Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse.” (Mateo 24:3, 13, 14, NW) Lyeka fye e ‘lintu impela ikesa.’—Moneni na kabili Marko 13:10, 13; Luka 21:17-19.

Umulandu Yehova Ashipikishisha

 6. Mulandu nshi Yehova ali ca kumwenako capulamo ica kushipikisha, kabili mulandu nshi umo untu ashipikishishe fyo?

⁶ Umutumwa Paulo alondolola ukuti “Lesa, pa kufwayo kulango bukali no kusokolola amaka yakwe, ashipikisha no kutekanya ukwingi ku fipe fya bukali ifyapekaniwa ku kulola ku boni.” (Abena Roma 9:22) Mulandu nshi Yehova ashipikishisha ukubako kwatwalilila ukwa babifi, ifi fipe fya bukali? Umulandu umo ni uyu: ku kulangilila ukuti ukuteka kwa buntunse, ukwa bucaibela ukufuma kuli Kabumba wa muntu, kwashamina ukufilwa. (Yeremia 10:23) Mu kwangufyanya, bumulopwe bwa kwa Lesa bukebelwa ilyo ashininkisha ukuti wene eka e wingaleta umutende, ukumfwana, ne nsansa ku lupwa lwa buntunse, ukupitila mu kuteka kwa Bufumu bwa kwa Yesu.—Ilumbo 37:9-11; 45:1, 6, 7.

 7. Ni pa mulandu nshi umbi Yehova ashipikishisha, kabili kumwenamo nshi ici caleta ku mamilioni ukutula muli ba 1930?

⁷ Mu kulundako, Yehova alishipikisha “ukuti asokolole ubucindami bwa bukata bwakwe pa fipe fya luse.” (Abena Roma 9:23) Ifi fipe fya luse bali bantu basubwa abasunga bumpomfu “abalubwilwe mu bantu” ku kuteka pamo na Kristu Yesu mu Bufumu bwakwe ubwa mu mulu. Ukukakatika kwa ba 144,000 kwalitwalilila ukufuma ku nshita sha butumwa. Nomba kulepalamina ku kwisalika. (Ukusokolola 7:3; 14:1, 4) Kabili shi moneni! Ukutula muli ba 1930 ukushipikisha kwatwalilila ukwa kwa Yehova kwasuminisha ukulonganikwa kwa mamilioni ya bambi, “ibumba likalamba . . . abafuma ku luko lonse,” abasekelela mu cilolelo ca kupusunsuka ubucushi bwa kupelako ku kupyana ubumi bwa muyayaya mwi sonde lya paradise. (Ukusokolola 7:4, 9, 10, 13-17) Bushe uli umo uwa lilye bumba likalamba? Nga ni fyo, bushe tauli uwa buseko pa kuti Yehova alishipikisha ukubapo kwa fipe fya bukali ukufika nomba? Nangu cibe fyo, ufwile ukutwalilila ukushipikisha, nga fintu Yehova ashipikisha.

Ukushipikisha Kwalambulwa

 8. Mulandu nshi ifwe bonse tukabila ukushipikisha, kabili ca kumwenako nshi ica kushipikisha tulingile ukulanguluka no mukoosha?

⁸ Ifwe bonse natukwata ukukabila kwa kushipikisha nga ca kuti tuli no kupokelela amalayo. Pa numa ya kulondolola ici cine ca kutendekelako pa AbaHebere 10:36, umutumwa Paulo alondolola mu kulonsha icitetekelo cafikapo no kushipikisha ifye “kumbi lya nte” ilikalamba isha nshita sha pa kale. Lyene atukonkomesha “[ukubutuka mu kuba no kushipikisha, NW] ulubilo ulwabikilwa ifwe, ukutonta amenso kuli Yesu, kelenganya kabili kawaminisha wa citetekelo cesu, uyo, pa mulandu wa kusekelela ukwabikilwe pa ntanshi yakwe,” Yesu ashipikishe mu mulimo wa mweo onse, ukukanalufya icilolwa ca cilambu. Fintu ica kumwenako cakwe citukosha na ifwe bene ukushipikisha!—AbaHebere 12:1, 2.

 9. Cinshi cafumamo mu fya kumwenako fya kasuba ka lelo ifya kushipikisha?

⁹ Ifya kumwenako fya muno nshiku ifya kushipikisha na fyo fine fingi nga nshi. Kuti pambi waishiba, nelyo walishiba, bamunyina ne nkashi ababa abapulamo mu kushipikisha kwabo. Fintu ubusumino bwabo bwatukumbamo! Kabili umwaka umo umo, ilyo Inte sha kwa Yehova bacita lipoti imibombele yabo iya mu kusalala kwa calo ku Watch Tower Society, ubulondoloshi bwalundwako ubwa kucincimusha ubwa kushipikisha no kusunga bumpomfu bulapokelelwa. Carti ili pa mabula yane ayakonkelepo ilesupawila umulimo wawama uwapwishishiwe mu kati ka 1989 nga fintu ishi Nte ‘balundako ku citetekelo cabo ukushipikisha.’—2 Petro 1:5, 6.

Umwaka Wesu Uwawamisha

10. (a) Fyalo finga na mabumba ya fishi ifyayakene mu kushimikile mbila nsuma iya Bufumu mu 1989, kabili ni banga babuulileko lubali muli uyu mulimo? (b) Ni bapainiya banga bacitile lipoti mu mweshi wa cipimo ca pa mulu, kabili bwali bwingi bwaba shani bonse ubwa mpendwa ya maawala yabomfiwe mu mulimo wa mwi bala?

¹⁰ Nga fintu carti ibangilileko ilelangisha, ifyalo 212 na mabumba ya fishi fyayakene mu kushimikilo Bufumu bwa kwa Yehova ubuleisa. Kabelenga watemwikwa uwa Ulupungu lwa kwa Kalinda, bushe walikwete shuko lya kuba umo uwa aba 3,787,188 ababuulilemo lubali muli uyu mulimo wawama? Bushe wali umo uwa aba 808,184 abacitile lipoti nga bapainiya mu mweshi wa cipimo ca pa mulu kuli uyo mulimo? Icili conse cintu wasangwilileko ku bwingi bonse ubwa mpendwa mu cibulungwa conse ubwa 1989 ubwa maawala 835,426,538 ayabomfiwe mu mulimo wa mwi bala, naukwato mulandu wa kusekelela.—Ilumbo 104:33, 34; Abena Filipi 4:4.

11. (a) Cipendo nshi ica basangilwe ku Cibukisho pa March 22 iyapwile cili ca kulengo kusekelela, kabili mulandu nshi? (b) Ni banga babatishiwe, kabili fyalo nshi muli carti fyali ifyapulamo muli uku kuloshako?

¹¹ Sekelela, na kabili, muli bulya bwingi bonse ubwa kupapusha ubwa basangilweko 9,479,064, pa March 22 iyapwile, pa kusefya kwa mu kusalala kwa calo ukwa Cibukisho ca mfwa ya kwa Yesu! Ici cilelangilila ukwenekela kwa bakabilisha ba Bufumu balundwako 5,691,876, nga ca kuti fye aba abapale mpaanga abalesekelela bengacemwa mu kubamo kutemwa ukwingila mwi cinka lya mpaanga, ukukwata ulubali lwa lyonse mu kubombela Yehova. Bushe kuti twabaafwa muli ici? (Yohane 10:16; Ukusokolola 7:9, 15) Abengi kale kale baleyankulako, nga fintu calangililwa no bwingi bonse pamo ubwa Nte shipya 263,855 ababatishiwe mu kati ka mwaka wa mulimo uwa 1989.

12. Ni mbali nshi shimo shintu carti tailesokolola (a) ukulosha ku mafakitari ya Watch Tower Society? (b) ukulosha ku kushalika kwa bamagazini no kulembesha?

¹² Kuliko imbali shimo shintu carti tailesokolola. Icilaka ca mpapulo—amaBaibolo, ifitabo, amabroshuwa, bamagazini—cali icishingekushiwa. Pamo nge ca kufumamo, amafakitari ya Watchtower mu New York yabomfeshe amatani 25,999 aya mapepala mu kupulinta 35,811,000 amaBaibolo, ifitabo, na mabroshuwa, ukwingilishiwako kwa 101 peresenti ukucila pali 1988. Amafakitari yambi ayakalamba aya Watch Tower Society, ukucilisha mu Germany, Italy, na Japan, yabombele ifipani fyalundwako, ukwafwilisha “umusha wa cishinka kabili uwashilimuka” mu kupeela “ifya kulya mu nshita iyene” ifya ku mupashi. (Mateo 24:45) Mu kati ka April na May, ukushalika kwawamisha ukwa bamagazini no kulembesha kwalicitilwe lipoti mu fyalo ifingi, mu kuba no kukomailapo kwaibela pa kwananishiwa kwa lwafumine Ulupungu lwa kwa Kalinda ulwa pali “Babiloni Mukalamba.” (Ukusokolola 17:5) Ukwabulo kutwishika, uyu April uleisa, bapainiya ba kwafwilisha ne Nte shimbi bakamaŋanya mwi bala lya calo mu cilingile ukushininkisha ukuba ni kampeini yesu iya kucitilo bunte iyacilishapo kuwama iya mwaka wa mulimo uwa 1990.—Linganyeniko Esaya 40:31; Abena Roma 12:11, 12.

13. Fyalo nshi fitantikwe muli carti ifishatantikwe umwaka wapwile? Londolola.

¹³ Lolesha na kabili pali carti. Bushe ulemona ifyalo fimo ifishatantikwe kwi shina umwaka wapwile? Kwena, ee! . . . Hungary, Poland . . . Fimo ifya ifi fifulo fyaba fyeka uko imbuto sha cine ca Bufumu e lyo shiletampa ukulimbuka. Lelo mu Hungary na Poland, umulimo wesu naulembeshiwa mwi funde mu nshita ya nomba line. Tuli aba kutasha ku balashi muli ifi fyalo pa kuti nomba balelanga ukulangulukilako kwa musango yo ku Nte sha kwa Yehova. Muli kuno kuloshako, amapepo ya bumunyina bwapela mu kusalala kwa calo nayasukwa, “ukuti twikale ubwikashi bwa kutekanya kabili ubwa mutelelwe [mu kuipeelesha kwa, NW] bukapepa bonse no mucinshi.”—1 Timote 2:1, 2.

14. Peela ifishinka fikalamba ifya Mabungano ya Citungu aya “Kuipeelesha kwa Bukapepa” mu Poland.

¹⁴ “Ukuipeelesha kwa bukapepa”! Pantu, Amabungano ya Citungu aya “Kuipeelesha kwa Bukapepa” yali no kucitilwa nelyo fye ni mu Poland, mu fifulo fitatu, mu kati ka August! Mwandi bashininkishe ukuba bashibweni ba kusungusha bamunyinefwe ba mu Poland 91,024! (AbaHebere 13:1, 2, 16) Kwati ni ku cipesha amano, amakumi ya makana ya bamunyina—abena Czechoslovakia, abena Germany, abena Russia, na bambi—bapokele ifipepala fya kwingilila mu fyalo fimbi (visas) ukwisa na basi, ishitima, kabili nelyo fye pa makasa. Amakana yambi bapupwike ne ndeke ukufuma kuli baAmerica, Western Europe, kabili ukufika fye no kutali pamo nga ku fishi fya Pacific na Japan. Ifibansa fikalamba, ifyawamishiwe ukwabulo kushako akalitoni na bamunyinefwe, fyali fye ifikulu mu kulinga ukwingisha 65,710 pa Katowice, 40,442 pa Poznan, na 60,366 pa Warsaw—ubwingi bonse pamo ubwa basangilweko ubwa 166,518! Pa cifulo cimo cimo, ica kutamba ca lubatisho caleteleko ifilamba fya nkuntu sha buseko. Pa Poznan uwa myaka ya bukulu 9 no wa myaka ya bukulu 90 baliibishiwe, kabili ubwingi bonse ubwa 6,093 abaibishiwe pa mabungano yatatu bwasanshishemo abengi aba myaka yacile kumi, abengi aba muli aba ukufuma mu fyalo uko casoselwe ukuti ubutotelo bwali no kufwila pamo na bakote. Te ifyo ku butotelo bwa cine ubwashimpwa pa Cebo ca kwa Lesa! (Linganyeniko Ilumbo 148:12, 13; Imilimo 2:41; 4:4.) Fintu ukushipikisha kwa bamunyinefwe mu Eastern Europe kwalambulwa mu kupapusha!

Ubusumino Bwatwalilila Pe Samba lya Ca Kwesha

15. Ni shani fintu Inte mu Lebanon balangisha ukushipikisha no kushangila, kabili mu kuba na fya kufumamo nshi ifyawama?

¹⁵ Ukupala umutumwa Paulo, Inte sha kwa Yehova bepushiwa ukulangisha ukushipikisha pe samba lya mibele yalekanalekana. (2 Abena Korinti 11:24-27) Mu Lebanon inkondo ya bana calo ilalwikwa. Ni shani fintu bamunyinefwe bankulako? Mu kuba no kushangila no mupampamina. Umwaka wa 1989 wamwene ukupushe mfuti kukalamba no kuponya amabomba, lelo nelyo fye ni uko kuntu ifi fyali ifyacilishapo, bamunyina bali abapampamina ukukanatompoka. Icilonganino mu Beirut cacita lipoti ukuti: “Amabumba ya lyonse aya mulimo wa mwi bala yalitantikwe pa fyungulo fyonse ifya mulungu. Te mulandu ne mibele ya kucingilila iyaafya, bamunyina tabafuupwilwe. Twafimbile ififulo fya kubombelamo ifingi ukucila na kale lyonse. Mu April twakwete icipimo ca pa mulu mu mpendwa ya bapainiya. Amasambililo yapya aya Baibolo yalitendekwe, kabili bamagazini bafulilako ne fitabo fyalishalikwe.”

16. Ni shani fintu bamunyinefwe mu Colombia balangisha ukushipikisha pa kutwale mbila nsuma ku matauni ukushali Nte?

¹⁶ Colombia aliba mu lyashi pa mulandu wa bukwebo bwa miti ikola no lukakala. Lelo ukushipikisha kwa busumino ukwa Bena Kristu kulya na ko kwine kupange lyashi. Mu nshita ya nomba line, bapainiya baibela aba pa nshita inono batuminwe ku matauni 31 aya bekashi amakana ikumi nelyo ukucilapo ukushaliko Inte. Mwi tauni limo, lintu abantu bapya abalesekelela basangile ukuti bapainiya bali no kuba kulya pa myeshi fye inono, bapaapeete bapainiya ukwikala. Muli limbi, abantu balesekelela 18 basaine kalata ya kutasha pa kwaafwa kwa ku mupashi ukwapeelwe mu kati ka kwikala kwa myeshi itatu ukwa bapainiya no kulomba ukwaafwa kwalundwako. “Uyu mulimo wakatama,” e fyo basosele. Te ca kusosa, mu milandu yonse ibili amapekanyo yalicitilwe ku kutwalilila ukulakusha ubuseko. Ukulundulula icifulo ca kubombelamo ca musango yo icabelo kutali kufwaya ukushipikisha, lelo umulimo wa maka uwa bapainiya abacite fyo ulalambulwa mu kufumba.

17, 18. (a) Ni pe samba lya mibele nshi Inte sha kwa Yehova bashipikisha mu Italy? (b) Ni shani fintu Inte babomba te mulandu no kwananishiwa kwa bufi pa lwa bene?

¹⁷ Mu Italy, Inte sha kwa Yehova balolenkana no kukaanya kwakosa ukwa bashibutotelo, lelo mu bukose bwa kwa Yehova balishipikisha. Mu ncende shalekanalekana isha macalici, bashibutotelo baanenye utupepala twa kulambatika pa fibi fya mayanda ya bantu bekala muli ishi ncende sha macalici ukweba Inte sha kwa Yehova ukukanalishe ndibu ya pa mwinshi. Bashimapepo abengi balembele ncito bakalume bacaice ukubika utu tupepala pa fibi fyonse muli ico cifulo—nelyo fye pa mayanda ya ndupwa sha Nte! Inte, nangu cibe fyo, tabatiinishiwa mu kwanguka, kabili ilingi line babomfya utupepala twine ku kutampa ukulanshanya. Mu kulundako, amanyunshipepala na televisioni wa luko fyasabankenye umulandu mu kusalala, ukusenuka ukukanalekelela kwa butotelo ukwalangilwe no kwebekesha ukuti imicenjelo pamo nge yi mu cituntulu cishibilo ca bunake pa lubali lwe calici. Profesa umo uwa universiti aali uwabifiwa nga nshi no tupepala twa kupaasha utwa kukaanya Inte ica kuti alembeshe Ulupungu lwa kwa Kalinda na Loleni!

¹⁸ Icalici lya ciKatolika mu Italy libomfya fye na basangu ku kwananya ubufi pa lwa bantu ba kwa Yehova, lelo ici na co cine tacibomba pantu bakasabankanya 172,382 balishibikwa bwino no kucindikwa. Umwaume umo aebele Inte abaletandala ukuti alibelengele ifintu fyabipa pa lwa ifwe mu fitabo fyalembwa na bali kale Inte. E co, aali uwa kukaanya nga nshi, lintu munyina abele umo uwa Nte sha kwa Yehova. Pa numa ya nshita imo, nangu cibe fyo, amwene ukusonga kusuma kuntu ukwalula kwa kwa munyina ukwa butotelo kwakwete pali wene. Apapile ukuti: ‘Ni shani fintu cingacitika ku cintu cimo icabipe fi ukuletako ifya kufumamo fyawame fyo?’ E ico, alombele isambililo lya Baibolo ne Nte abaletandala.—Linganyeniko Abena Kolose 3:8-10.

Ukubomba No Kukanayangwako

19, 20. (a) Mibele nshi yafwaya ukushipikisha pa lubali lwa Nte mu Finland, kabili cinshi cili mu cituntulu icakatama pa lwa kufwailisha kwe calici? (b) Cakukumanya nshi cilangilila ukucindama kwa kushipikisha mu kushimikile mbila nsuma?

¹⁹ Mu fyalo uko Inte batandala libili libili, ilingi line kulabako ukukanayangwako kwaanana ku mbila nsuma. Ici e fintu caba mu cine cine mu Finland. Icalici muli cilya calo bacitile ukufwailisha no kusango kuti 70 peresenti uwa bwingi bwa bantu tabatemwa ukutandala kwa Nte pa mayanda yabo. Nangu cibe fyo, 30 peresenti tabakaana mu kukosa, kabili muli aba, 4 peresenti batile mu cine cine balitemwa Inte sha kwa Yehova. Ici cili cipendo cikalamba. Amaperesenti yane aya bwingi bwa bantu ba mu Finland yaleimininako abantu 200,000. Linganyeniko ico ne cipendo ca ino nshita ica bakasabankanya ica 17,303!

²⁰ Kasabankanya umo uwafumine mu mulimo akwete ukusakamana kwakwe ukuletwa kuli uku kufwailisha kabili aipushiwe ukuti: “Bushe tawaishiba ukuti 70 peresenti uwa ifwe tulanguluka imwe mwe bantu abashifwaikwa? Mulandu nshi mutwalilila ukwisa ku minshi yesu?” Kasabankanya ayaswike ukuti: “Ee, lelo uko kufwailisha kumo kwine kwalangile ukuti 4 peresenti uwa imwe mwalitutemwa. Tuleesha ukusanga abo bantu. Nelyo fye nga ca kuti baliko fye 1 peresenti, nalyo line kuti twaya ku ŋanda ne ŋanda ukwesha ukubasanga.” Mwine ŋanda atontonkenye pa kashita kabili atile: “Bushe ubukombe bwenu buli ubwacindama ifyo kuli bene?” Kasabankanya ayaswike pa kwipusho kuti: “Bushe kuti watemwa ukuumfwa bwene?” Mu kwangufyanya uyu mwine ŋanda alangishe ubuseko mu mbila nsuma.

Cintu Inshita ya ku Ntanshi Ikwete

21. (a) Musango nshi uwa bulwi tufwile ukulwa muli iyi micitile, kabili mulandu nshi? (b) Cinshi cintu pambi twingashipikishako, kabili ni kuli cinshi cintu ubusesemo bwa kwa Habakuki butwebekesha?

²¹ Ni shani pa lwa ifwe bonse ilelo? Bushe tuli abapampamina ukushipikisha pamo na Yehova na Kristu Yesu ukupulinkana ukufika na ku mpela? Pambi te kuti cibe ni nshita yalepesha, lelo tufwile ukushipikisha! Mu micitile ya kwa Satana, tuli no kulwile citetekelo na maka, apantu bucisenene bwa calo, ukubola, no lupato fyalitushinguluka mu mbali shonse. (Yuda 3, 20, 21) Kuti pambi twakwato kushipikisha ukupakaswa kwa musango umo nelyo unankwe. Nelyo fye ni nomba, amakana ya bamunyinefwe balecula mu fifungo, kabili bamo bapumwa mu bunkalwe. Aba baliba abatootela ku mapepo yesu. (2 Abena Tesalonika 3:1, 2) Mu kwangufyanya nga nshi, imicitile ilipo tayakabepo na kabili! Nga fintu Habakuki alondolola ukuti: “Icimonwa cicili cilelola ku nshita iyalingilwe, cilabutukisha ukulola ku mpela—tacakabepe ubufi; nga cashingashinga e lyo ucilolele, pantu ukwisa cikesa, tacakashimbe iyo.”—Habakuki 2:3.

22. Ca kufumamo nshi pambi twingenekela mu kucetekela nga ca kuti twabelesha ukutekanya kwa bakasesema no kushipikisha kwa kwa Yobo?

²² Umusambi Yakobo atweba mu kutemwa ukuti: “Mwe bamunyinane, moneni bakasesema abalandiile mwi shina lya kwa [Yehova, NW] babe kuli imwe ica kumwenako ca kucula ne ca kutekanya.” Ifwe ilelo fwebalandila mwi shina lya kwa Yehova kuti twaba bakasunga ba bumpomfu mu kati ka fya kwesha fyatapata, nge fyali Esaya, Yeremia, Daniele, na bambi. Ukupala Yobo, kuti twashipikisha. Fintu alambwilwe mu kusungusha pa kushipikisha kwakwe! Uluse lwa kwa Yehova ne cikuku cabamo kutemwa fikatuletela ifilambu fyalinganako—nga ca kuti twashipikisha ukufika ku mpela. Kabili shi amashiwi ya kwa Yakobo nayafikilishiwe ukulola kuli umo umo uwa ifwe aya kuti: “Moneni, tuletila [ba nsansa] abashipikisha.”—Yakobo 5:10, 11; Yobo 42:10-13.

Kuti Wayasuka Shani?

◻ Kukabila nshi ku kushipikisha Yesu akomailepo?

◻ Ni pa milandu nshi Yehova ashipikishisha?

◻ Fishinka nshi fimo ifikalamba ifya mulimo wawama uwapwishishiwe mu kati ka 1989?

◻ Ni shani fintu ukushipikisha kwa bamunyinefwe mu Poland kwalambulwa?

◻ Ni shani fintu Inte mu Lebanon, Colombia, na Italy balangisha ubusumino pe samba lya ca kwesha?

[Charti pe bula 20-23]

1990 SERVICE YEAR REPORT OF JOHOVA’S WINESSES WORLDWIDE

(Moneni muli magazini)