‘Bacitile Ifyo Fine Fye’

“Uku e kutemwa Lesa, ukuti tunakile amafunde yakwe.”—1 YOHANE 5:3.

 1. Cinshi cingasoswa pa lwa bukulu bwa kutemwa kwa kwa Lesa?

“LESA KUTEMWA.” Bonse abeshiba Lesa no kubaka amafunde yakwe balesa mu kutesekesha ifyo uko kutemwa kwashika. “E muli ukutemwa, te mu kuti ifwe twatemenwe Lesa, lelo mu kuti wene atemenwe ifwe, no kutuma Mwane icikonsolwelo ca pa membu shesu.” Ilyo tulebelesha icitetekelo mwi lambo lya cilubula ilya kwa Yesu ilyaumo mutengo, ‘twikalilila mu kutemwa kwa kwa Lesa.’ (1 Yohane 4:8-10, 16) Muli fyo kuti twaipakisha amapaalo ya ku mupashi ayengi nomba na mu micitile ya fintu iileisa, umweo wa muyayaya.—Yohane 17:3; 1 Yohane 2:15, 17.

 2. Ni shani fintu ukubaka amafunde ya kwa Lesa kwanonsha ababomfi bakwe?

² Mu fyalembwa mu Baibolo mwaisula ifya kumwenapo fya baabaka amafunde ya kwa Lesa kabili pa mulandu wa ico abapaalwa nga nshi. Aba basanshamo inte sha pa ntanshi ya buKristu, bamo aba bene abo umutumwa Paulo alembelepo ukuti: “Aba bonse bafwilile mu kutetekela, ukwabulo kupokelele fyalailwe; lelo bafimwenene ukutali no kufisekelela, kabili bailumbwile ukuti beni kabili balebeshi pano nse.” (AbaHebere 11:13) Mu myaka yakonkelepo, ababomfi ba kwa Lesa abaipeelesha Abena Kristu balinonkelemo mu “kusenamina ne cine, [ifyaishiile] muli Yesu Kristu.” (Yohane 1:17) Ukupulinkana imyaka yonse 6,000 ukutula apo umuntu abelapo, Yehova alilambula inte shakwe isha busumino abaumfwila amafunde yakwe, ayo na cine ‘ayashayafisha.’—1 Yohane 5:2, 3.

Mu Nshiku sha kwa Noa

 3. Ni mu nshila nshi Noa acitiile ‘ifyo fine fye’?

³ Baibolo ilondololo kuti: “Ni ku citetekelo e ko Noa, ilyo asokelwe kuli Lesa pa fintu ifyali ifishilamoneka, pa kuba na ’katiina ka kuli Lesa, apekaniishe icibwato ku kupusukilamo aba mu ŋanda yakwe; e mo asekeele aba pano isonde, no kube mpyani ya bulungami ubwishila mu citetekelo.” Pamo nga “kabila wa bulungami,” Noa alyumfwilile Yehova ukwabulo kushako, ukusoka icalo ca pa ntanshi ya Lyeshi pa lwa bupingushi bwa bulesa ubwasungamine. (AbaHebere 11:7; 2 Petro 2:5) Pa kukuula icibwato, alikonkelele amaplani yapayanishiwe na Lesa mu kusakamanishisha. Lyene aingishemo inama shasalilwe ne fya kulya. “Noa alicitile; umwabelele conse ico Lesa amwebele, [acitile ifyo fine fye, NW].”—Ukutendeka 6:22.

4, 5. (a) Ni shani fintu ukusonga kwa bubifi kwayambukila abantunse ukufika na kuli buno bushiku? (b) Mulandu nshi tulingile ukucitila ‘ifyo fine fye’ pa kumfwila amakambisho ya bulesa?

⁴ Noa no lupwa lwakwe baali no kushomboka no kusonga kwa bubifi ubwa bamalaika bacintomfwa. Aba bana baume ba kwa Lesa baafwele imibili ya buntu no kwisaikala na banakashi, ukufyala abana amapaka, imikeulu abo balulunkenye abantunse. “Ku menso ya kwa Lesa pano isonde palyonaike, kabili pano isonde paiswilepo ulufyengo.” Yehova atumine Mulamba ukwisakukulula ilya nkulo iibifi. (Ukutendeka 6:4, 11-17; 7:1) Ukutula mu nshiku sha kwa Noa bamalaika ba buciwa tabaasuminishiwa ukufwala imibili ya buntunse. Nangu ni fyo, ‘pano isonde ponse patwalilila ukulaala mu maka ya Mubifi,’ Satana Kaseebanya. (1 Yohane 5:19; Ukusokolola 12:9) Ukulingana no busesemo, Yesu alingenye ilya nkulo ya bucipondoka iya mu nshiku sha kwa Noa ku nkulo ya bantunse iyo yamukaana ukutula apo icishibilo ca “kubapo” (NW) kwakwe catendekele ukumoneka mu 1914.—Mateo 24:3, 34, 37-39; Luka 17:26, 27.

⁵ Nga fintu acitile mu nshiku sha kwa Noa, ilelo nalyo, Satana aleesha ukonaula abantunse na planeti wesu. (Ukusokolola 11:15-18) Cili icapamfya kanshi ukuti tumfwile ikambisho lyapuutwamo ilya kuti: “Fwaleni ifya bulwi fya kwa Lesa, ukuti mube abakosa ku kushangilile [micenjelo ya, NW] kwa Kaseebanya.” (Abena Efese 6:11, utulembo twa pe samba) Tulakoshiwa muli ici, ukupitila mu kusambilila Icebo ca kwa Lesa no kucibomfya mu bumi bwesu. Mu kulundapo, twalikwata ukuteyanya kwa kwa Yehova ukusakamana, kabili no “musha [wa kuko] uwa cishinka kabili uwashilimuka” na baeluda ba kuko abakutemwa, abakutukumba mu kutekanya pa kuti tuye mu nshila iyo tufwile ukwendamo. Twalikwata umulimo wa kushimikila mu cibulungwa conse ucili taulapwishishiwa. (Mateo 24:14, 45-47) Ukupala Noa, uwaumfwilile amakambisho ya bulesa mu kusakamanishisha, shi na ifwe bene lyonse ‘tulecita ifyo fine fye.’

Mose Aali E Muntu Wafuukisha

6, 7. (a) Kusalapo nshi ukwa kulambula uko Mose asalilepo? (b) Cipasho nshi icabamo ukushipa ico Mose atushiilile?

⁶ Tontonkanya pa lwa kwa Mose, umuntu wa busumino na umbi. Afwaya nga aliipakishe ubumi bwa kuiposaika pa kati ka fya maliila fya mu Egupti. Lelo asalile “ukucitwo bubi pamo na ’bantu ba kwa Lesa ukucilo kukwate nshita ya bwanalale iya lubembu.” Pamo ngo mubomfi watumwa uwa kwa Yehova, “atontomeshe amenso ku cilambu. . . . [Kabili] akoselele ngo umone Mfumu iishimoneka.”—AbaHebere 11:23-28.

⁷ Pa Impendwa 12:3, tubelengapo ukuti: “Uyo muntu Mose ali uwafuukisha ukucilamo mu bantu bonse aba pano isonde.” Mu kucilana, Farao wa ku Egupti ena alecita kwati e muntu uwakwatishe cilumba mu bantu bonse. Lintu Yehova akambishe Mose na Aarone ukubilisha ubupingushi bwakwe pali Farao, bayankwileko shani? Twaebwa ukuti: “Mose na Aarone bacitile ifi; ifyo Yehova abebele, [bacitile ifyo fine fye, NW].” (Ukufuma 7:4-7) Mwandi cipasho cabamo ubukose kuli ifwe fwe babilisha amapingushi ya kwa Lesa ilelo!

 8. Ni mu nshila nshi umo abena Israele balefwaikwa ukucita ‘ifyo fine fye,’ kabili ni shani fintu ukusekelela uko kwafuminemo kwingalinganishiwa no ko ukupalamine?

⁸ Bushe abena Israele muli bucishinka balitungilile Mose? Ukukonka pa cinkunka calenga 9 pa finkunka 10 ifyo Yehova apamine na fyo Egupti, apeele abena Israele amakambisho ya kulonsha pa lwa kusefya Ica kucilila. “Na bo bantu balikonteme no kushinshimuna. Kabili abana ba kwa Israele baile no kucita; nge fyo Yehova aebele Mose na Aarone, [bacitile ifyo fine fye, NW].” (Ukufuma 12:27, 28) Ilyo bulya bushiku bwakatama bwafikile pa kati ka bushiku, Nisani 14, 1513 B.C.E., malaika wa kwa Lesa aipeye amabeli ya mu Egupti yonse lelo acilile amayanda ya bena Israele. Mulandu nshi amabeli ya bena Israele yatengeelwe? Pantu yali nayacingililwa ku mulopa wa mwana wa mpaanga uwa Ca kucilila, uwakaninwe pa miinshi yabo. Bacitile fintu fye Yehova aali nakambisha Mose na Aarone. Ee, ‘bacitile ifyo fine fye.’ (Ukufuma 12:50, 51) Pali Bemba Wakashika, Yehova acitile icipesha amano na cimbi pa kupususha abantu bakwe aba cumfwila ilintu aonawile Farao ne fita fyakwe ifya maka ifyateyanishiwe bwino. Fintu abena Israele baangile! Mu musango umo wine ilelo, abengi abomfwila amafunde ya kwa Yehova bakaanga pa kuba bansangwapo ba kwebelwa kwakwe pa Armagedone.—Ukufuma 15:1, 2; Ukusokolola 15:3, 4.

 9. Mashuko nshi aya muno nshiku ayacitilwako icinshingwa kuli filya abena Israele bacitile ‘ifyo fine fye’ mu kukuula ica kwikalamo?

⁹ Lintu Yehova akambishe Israele ukusangula imisangulo ya kukuulila ica kwikalamo mu matololo, abantu muli bukapekape balitungilile ilyo ikambisho. Lyene, Mose na bakabomba banankwe aba kuitemenwa bakonkele mu maplani yapayanishiwe na Yehova, ukuyakonka ukufika fye na ku twacepesha. “E fyo kwapwishishiwe umulimo onse wa Ca kwikalamo ce hema lya Kulaishanya; kabili abana ba kwa Israele bacitile umwabelele conse ico Yehova aebele Mose. [Bacitile ifyo fine fye, NW].” Mu kupalako, pa kukupawila kwa bushimapepo, “Mose acitile . . . ifyo cali conse ico Yehova amwebele, e fyo acitile.” (Ukufuma 39:32; 40:16) Muno nshiku, twalikwate shuko lya kuipeela ku mitima yesu yonse ku kwafwilisha umulimo wa kushimikila ne mitantikile ya kutanununa Ubufumu. Cili lishuko lyesu ukwikatana muli yo nshila mu ‘kucite fyo fine fye.’

Yoshua Uwakosa Kabili Uwatalila Apakalamba

10, 11. (a) Cinshi capangeshe Yoshua pa kuti engatunguluka? (b) Ni shani fintu twingakoshiwa pa kuti twingabomba ne fya kwesha fya muno nshiku?

¹⁰ Lintu Mose alaashike Yoshua ukutungulula Israele ukwingila mu calo calaiwe, cilemoneka kwati Icebo ca kwa Yehova icapuutwamo icalembwa cali fye mu mabuuku ya kwa Mose yasano, kwaliko ne lumbo limo nelyo yabili, ne buuku lya kwa Yobo. Mose aali nakambisha Yoshua ukuti lintu bakafika mu Calo Calaiwe akalonganike abantu no ‘kubilikishisha amalango aya pa menso ya kwa Israele onse mu matwi yabo.’ (Amalango 31:10-12) Mu kulundapo, Yehova umwine akambishe Yoshua ukuti: “Ibuuku ili lya malango wileka lifume mu kanwa kobe pe, lelo uletontonkanyamo akasuba no bushiku, ukuti wangwe ukucita umwabela conse icalembwamo: pantu e lyo kuti walenge mibele yobe ukutunguluka, kabili kuti washuka.”—Yoshua 1:8.

¹¹ Ukubelenga “ibuuku” lya kwa Yehova cila bushiku kwapangeshe Yoshua ukubomba ne fya kwesha fyali ku ntanshi, kwati fye fintu ukubelenga Icebo ca kwa Yehova, Baibolo, cila bushiku, kukosha Inte Shakwe isha muno nshiku ukwishiba ifya kubomba ne fya kwesha fya shino “nshiku sha kulekelesha.” (2 Timote 3:1) Apantu twashingulukwa ne calo ca lukaakala, shi na ifwe natumfwile ukukonkomesha uko Lesa akonkomeshe Yoshua ukwa kuti: “Kosa kabili talila; witutuma kabili witentuka: pantu Yehova Lesa obe ali nobe konse uko uleya.” (Yoshua 1:9) Pa numa ya kucimfya Kanaani, imikowa ya Israele yalilambwilwe apakalamba ilyo yalepeelwe calo ku kube cikwatwa ca iko. “Ifyo Yehova aebele Mose, e fyo abana ba kwa Israele bacitile.” (Yoshua 14:5) Icilambu capalako e cilepembelela ifwe bonse ilelo fwe babelenga Icebo ca kwa Lesa no kucibomfya mu bumi bwesu, nga tulecita ‘ifyo fine fye’ mu cumfwila.

Ishamfumu—Isha Busumino ne sha Bucintomfwa

12. (a) Likambisho nshi ilyapeelwe ku shamfumu sha mu Israele? (b) Cinshi calecitika nge mfumu shafilwa ukumfwila?

¹² Ni shani pa lwa shamfumu sha mu Israele? Yehova alefwaya ishamfumu ukumfwila ici cifwaikwa: “Nomba ilyo ikekala pa cipuna ca bufumu bwa iko, ikailembele aya bubili aya malango pe buuku, ukuyaambula muli ilyo ilili ku cinso ca bashimapepo abena Lebi; kabili likabe kuli yene, na yo ikalebelengamo inshiku shonse sha mweo wa iko, ku kuleka isambilile ukutiina Yehova Lesa wa iko, ku kubake fyebo fyonse fya malango aya ne fipope ifi, ku kuficita.” (Amalango 17:18, 19) Bushe ishamfumu sha mu Israele shalyumfwilile ilyo ikambisho? Ilingi line, shalefilwe cabipisha, ica kuti ne fitiipu fyasobelwe pa Amalango 28:15-68 fyaleshiponena. Mu kupelako, Israele alipashilwe “ukufuma ku mpela ya pano isonde no kufika ku mpela ya pano isonde.”

13. Ni shani fintu ukutemwa Icebo ca kwa Yehova kwingatunonsha, nga fintu kwanonseshe Davidi?

¹³ Nangu cibe fyo, imfumu ya buntunse iya kubalilapo ukuba iya busumino mu Israele, Davidi, alangishe ukuipeelesha kuli Yehova ukwaibela. Aali ‘cituputupu ca nkalamo ya mu Yuda,’ ukube cinshingwa ca kwa Kristu Yesu, ‘inkalamo iicimfya iya mukowa wa kwa Yuda, Umushila wa kwa Dabidi.’ (Ukutendeka 49:8, 9; Ukusokolola 5:5) Ni mwi mwasokeme ubukose bwa kwa Davidi? Aletesekesha mu kushika Icebo calembwa ica kwa Yehova kabili aleikala ukulingana na cene. Mu Ilumbo 19, “ulwa malumbo lwa kwa Davidi,” tubelengo kuti: “Amalango ya kwa Yehova yafikapo.” Pa numa ya kulanda pa fya kushimika, ifya kulangulula, ifunde, ne fya bupingushi fya kwa Yehova, Davidi atwalilila ukulondolola ukuti: “Fyatemwikwo kucila golde, ukucila golde uwalopolwa uwingi, kabili fyalowa ukucilo buci, ukucilo luto lwa mpuma. Kabili umubomfi wenu e mo asokelwa; mu kufibaka e mukonke cilambu icikalamba.” (Ilumbo 19:7-11) Nga ca kuti ukubelenga Icebo ca kwa Yehova cila bushiku no kwetetula pali cene kwaletele cilambu imyaka 3,000 iyapitapo, fintu ico cili icacilapo ukube fyo ilelo!—Ilumbo 1:1-3; 13:6; 119:72, 97, 111.

14. Ni shani fintu inshila ya kwa Solomone ilangilile fyo tacakumanina ukukwata fye ukwishiba?

¹⁴ Nalyo line, tacakumanina ukunonka fye ukwishiba. Caliba na kabili icakabilwa ku babomfi ba kwa Lesa ukubombela pali uko kwishiba, ukukubomfya mu kumfwana no kufwaya kwa bulesa—ee, ukucita ‘ifyo fine fye.’ Ici kuti calangililwa ku cacitike kuli Solomone mwana Davidi, untu Yehova asalile “ku kwikala pa cipuna ca bufumu bwa kwa Yehova pali Israele.” Solomone apeelwe umulimo wa kukuula itempele, ukubomfya amaplani ya mikuulile ayo Davidi apokelele “ukupitila mu kupuutwamo.” (NW) (1 Imilandu 28:5, 11-13) Ni shani fintu Solomone engapwilikisha uyu mulimo ushaikulila? Mu kwasuke pepo, Yehova apeele Solomone amano no bwishibilo. Pa kukwate fi, no kupitila mu kukakatila ku maplani yapayanishiwe na Lesa, Solomone aali na maka ya kukuula ilya ŋanda ya lulumbi, iyo ubukata bwa kwa Yehova bwaishileisulamo. (2 Imilandu 7:2, 3) Nangula ni fyo, mu myaka ya pa numa, Solomone alitenene. Muli cinshi? Ifunde lya kwa Yehova lyalilondolwele ukukuma ku shamfumu sha mu Israele ukuti: “Iikaifushisha abakashi, ukuti wikapuuluka umutima wa iko.” (Amalango 17:17) Lelo Solomone “ali na ’bakashi imyanda cinelubali [700] abana ba mfumu, na bakanakashi imyanda itatu [300]: . . . kabili abakashi bakwe bayalwilile umutima wakwe ku kukonke milungu imbi.” Mu myaka yakonkelepo, Solomone alilekele ukucita ‘ifyo fine fye.’—1 Ishamfumu 11:3, 4; Nehemia 13:26.

15. Ni shani fintu Yoshia acitile ‘ifyo fine fye’?

¹⁵ Mu Yuda mwaliko ishamfumu shimo shimo ishali isha cumfwila, uwa kulekelesha pali abo aali ni Yoshia. Mu mwaka wa 648 B.C.E., atendeke ukusangulula icalo ukufumyamo ukupepo tulubi no kuwamya itempele lya kwa Yehova. Cali ni mwi tempele e muntu shimapepo mukalamba asangile “ibuuku lya malango ya kwa Yehova ilyapeele Mose.” Cinshi Yoshia acitilepo? “E lyo imfumu yaninine yaile ku ŋanda ya kwa Yehova, na baume bonse ba bena Yuda na bekashi ba mu Yerusalemu, na bashimapepo, na bena Lebi, na bantu bonse abakalamba na banono. E lyo yabelengele mu matwi yabo ifyebo fyonse fye buuku lya cipingo ilyasangilwe mu ŋanda ya kwa Yehova. Imfumu yaiminine apa kwiminina pa iko, no kupinge cipingo ku cinso ca kwa Yehova, ku kukonka Yehova, no kubaka amafunde yakwe ne fishimiko fyakwe ne fipope fyakwe, umutima wa iko onse kabili umweo wa iko onse, ku kucite fyebo fya cipingo ifyalembwa mwi buuku ili.” (2 Imilandu 34:14, 30, 31) Ee, Yoshia ‘acitile ifyo fine fye.’ Pa mulandu wa nshila yakwe iya busumino, ubupingushi bwa kwa Yehova pali Yuda wabulwo busumino bwalilindikwe ukufikila mu nshiku sha bana bakwe aboolungani.

Ukwikala Ukulingana ne Cebo ca kwa Lesa

16, 17. (a) Ni muli finshi umo tulingile ukukonka mu nkasa sha kwa Yesu? (b) Babomfi nshi aba busumino bambi aba kwa Lesa abatupayanishisha ifya kumwenapo fyesu?

¹⁶ Pa bantunse bonse abatala ababako aba mweo, ica kumwenapo cawamisha ica kwetetula pa Cebo ca kwa Lesa no kwikala ukulingana na cene caba ca kwa Shikulu Yesu Kristu. Icebo ca kwa Lesa cali nge ca kulya kuli wene. (Yohane 4:34) Aebele bakakutika bakwe ati: “Umwana te kuti acite kantu eka, kano ico amona Wishi acita; pantu ifyo wene acita, e fyo no Mwana acita ifyo fine.” (Yohane 5:19, 30; 7:28; 8:28, 42) Yesu ‘acitile ifyo fine fye,’ ukubilisha ukuti: “Naika mu muulu, te ku kucito kufwaya kwandi, kano ukufwaya kwa wantumine.” (Yohane 6:38) Ifwe fwe Nte sha kwa Yehova ishaipeela cifwaikwa ukuti ‘tulecita ifyo fine fye’ ukupitila mu kukonka mu nkasa sha kwa Yesu.—Luka 9:23; 14:27; 1 Petro 2:21.

¹⁷ Ukucita ukufwaya kwa kwa Lesa lyonse cali e cintu ca kubalilapo mu muntontonkanya wa kwa Yesu. Aali uwabeleshanya bwino bwino ne Cebo ca kwa Lesa na muli fyo aali uwaipangasha ukupeela ifyasuko fyashimpwa pa Malembo. (Mateo 4:1-11; 12:24-31) Ukupitila mu kusakamana lyonse ku Cebo ca kwa Lesa, na ifwe bene kuti twaba ‘abapwililila, abaiteyanya ku kubombo mulimo onse usuma.’ (2 Timote 3:16, 17) Natukonke ica kumwenapo ca babomfi ba kwa Yehova aba busumino aba ku nshiku sha ku kale sana ne shakonkelepo no kucishapo ica kumwenapo ca kwa Shikulwifwe, Yesu Kristu, uwatile: “Ifyo Tata anjeba, e fyo ncita, ukuti aba pano isonde beshibe ukuti natemwa Tata.” (Yohane 14:31) Shi na ifwe twingatwalilila ukulangisha ifyo twatemwa Lesa ukupitila mu kutwalilila ukucita ‘ifyo fine fye.’—Marko 12:29-31.

18. Cinshi cilingile ukutucincimusha ukuba “bakacita wa cebo,” kabili cinshi cili no kulandwapo mu kukonkapo?

¹⁸ Ilyo tuleetetula pa nshila sha cumfwila isha babomfi ba kwa Lesa aba mu Baibolo, bushe tatukoseleshiwa ukubomba umulimo wa busumino mu nshiku sha kwisalila isha micitile ibifi iya kwa Satana? (Abena Roma 15:4-6) Mu cine cine tulingile ukucincimushiwa ukuba “bakacita wa cebo” mu kukumanina, nga fintu icipande cikonkelepo cili no kulandapo.—Yakobo 1:22.

Bushe Uleibukisha?

◻ Cinshi cintu ‘ukutemwa Lesa’ kulingile ukupilibula kuli ifwe?

◻ Cinshi tusambililako ku fya kumwenapo fya kwa Noa, Mose, na Yoshua?

◻ Kufika ku cipimo nshi imfumu sha mu Israele shaumfwilile “icebo” ca kwa Lesa?

◻ Ni shani fintu Yesu aba ica kumwenapo cesu mu kucita ‘ifyo fine fye’?

[Ifikope pe bula 15]

Noa, Mose, na Yoshua ‘bacitile ifyo fine fye’