Fas Buk Blong Ol King

16 Nao Jehova i givim tok blong hem long Jehu+ we i boe blong Hanani,+ blong i go talemaot panis blong Bahasa, se: 2 “Mi mi tekemaot yu long das mo mi mekem yu kam lida blong ol man blong mi, ol man Isrel,+ be yu yu gohed blong wokbaot long rod blong Jeroboam, mo yu pulum ol man blong mi blong oli mekem sin, nao oli mekem mi mi kros from ol sin blong olgeta.+ 3 From samting ya, bambae mi mi aotem Bahasa mo haos blong hem, mo bambae mi mekem haos blong hem i kam olsem haos blong Jeroboam+ we i boe blong Nebat. 4 Ol man blong Bahasa we oli ded insaed long taon, bambae ol dog oli kakae olgeta, mo ol man blong hem we oli ded long open ples, ol pijin bambae oli kakae olgeta.”

5 Ol narafala stori blong Bahasa mo ol wok blong hem, mo ol bigfala samting we hem i mekem, oli raetemdaon long buk blong histri blong ol king blong Isrel. 6 Biaen Bahasa i go spel wetem ol olfala blong hem, mo oli berem hem long Tijaha,+ mo boe blong hem Elaha i kam king long ples blong hem. 7 Jehova i yusum profet ya Jehu we i boe blong Hanani, blong i tok agensem Bahasa mo haos blong hem, from olgeta nogud samting we Bahasa i mekem long fored blong Jehova, taem hem i wokem ol samting blong mekem God i kros, olsem haos blong Jeroboam i mekem. Mo tu from we hem i kilim Nadab* i ded.+

8 Long namba 26 yia blong rul blong King Asa blong Juda, Elaha we i boe blong Bahasa i kam king long Tijaha, mo i rul long Isrel blong tu yia. 9 Nao man blong wok blong hem, Simri, we i stap lidim haf blong ol jariot blong hem, i mekem plan blong kilim hem i ded. Long taem ya Elaha i stap long Tijaha, i stap dring we i fuldrong long haos blong Ajaha we i stap lukaot long olgeta we oli stap long haos blong king. 10 Nao Simri i kam insaed, i kilim hem i ded,+ mo i kam king long ples blong hem. Hemia long namba 27 yia blong rul blong King Asa blong Juda. 11 Mo taem hem i kam king, stret long taem we hem i sidaon long jea blong hem, hem i kilim i ded evriwan long haos blong Bahasa. I no gat wan man* i laef i stap, nating se i famle blong Bahasa* no fren blong hem. 12 Long rod ya, Simri i aotem ful haos blong Bahasa, folem tok we Jehova i talem long Bahasa tru long profet ya Jehu.+ 13 Hem i mekem olsem from olgeta sin ya we Bahasa mo boe blong hem Elaha i mekem, mo from ol sin ya we oli pulum ol man Isrel blong mekem, taem oli mekem Jehova we i God blong Isrel, i kros from ol aedol blong olgeta we oli gud blong nating nomo.+ 14 Ol narafala stori blong Elaha mo ol samting we hem i mekem, oli raetemdaon long buk blong histri blong ol king blong Isrel.

15 Long namba 27 yia blong rul blong King Asa blong Juda, Simri i kam king long Tijaha blong seven dei. Long taem ya, ol ami oli mekem kamp blong olgeta blong agensem Gibeton,+ we i taon blong ol man Filistia. 16 Samtaem biaen, ol ami we oli stap long kamp oli harem nius se: “Simri i mekem plan agensem king mo i kilim hem i ded.” Ale long dei ya, taem oli stap long kamp, olgeta man Isrel oli putumap Omri+ we i lida blong ol ami, blong i kam king blong Isrel. 17 Nao Omri wetem olgeta man Isrel oli aot long Gibeton, oli go antap mo oli raonem Tijaha. 18 Taem Simri i luk we oli holemtaet taon ya, hem i go insaed long taoa blong haos* blong king mo i bonem haos ya wetem hem insaed, nao hem i ded.+ 19 Samting ya i hapen from ol sin we hem i mekem, taem hem i mekem samting we i nogud long ae blong Jehova mo i folem rod blong Jeroboam, mo from sin we hem i pulum ol man Isrel blong mekem.+ 20 Ol narafala stori blong Simri mo ol rabis plan blong hem, oli raetemdaon long buk blong histri blong ol king blong Isrel.

21 Biaen long samting ya, ol man Isrel oli seraot long tu grup. Wan grup i biaen long Tibni we i boe blong Ginat, from we oli wantem mekem hem i kam king, mo narawan i biaen long Omri. 22 Be ol man we oli biaen long Omri oli winim ol man we oli biaen long Tibni we i boe blong Ginat. Nao Tibni i ded, mo Omri i kam king.

23 Long namba 31 yia blong rul blong King Asa blong Juda, Omri i kam king blong Isrel mo i rul 12 yia. Hem i rul sikis yia long Tijaha. 24 Hem i pemaot bigfala hil blong Sameria long wan man we nem blong hem Semere. Hem i pemaot hil ya long tu talen* blong silva, mo hem i bildim wan bigfala taon antap long hil ya. Mo hem i putum nem blong taon ya se Sameria,*+ we i tekem nem blong Semere, ona* blong hil ya. 25 Nao Omri i gohed blong mekem samting we i nogud long ae blong Jehova, mo hem i mekem i mowas long olgeta we oli laef bifo long hem.+ 26 Hem i folem olgeta rod blong Jeroboam we i boe blong Nebat, mo i folem sin we Jeroboam i pulum ol man Isrel blong mekem, taem oli mekem Jehova we i God blong Isrel, i kros from ol aedol blong olgeta we oli gud blong nating nomo.+ 27 Ol narafala stori blong Omri, ol wok blong hem mo ol bigfala samting we hem i mekem, oli raetemdaon long buk blong histri blong ol king blong Isrel. 28 Biaen Omri i go spel wetem ol olfala blong hem mo oli berem hem long Sameria, mo boe blong hem Ehab+ i kam king long ples blong hem.

29 Long namba 38 yia blong rul blong King Asa blong Juda, Ehab we i boe blong Omri i kam king blong Isrel. Hem i stap long Sameria+ mo i rulum Isrel blong 22 yia. 30 Long lukluk blong Jehova, Ehab we i boe blong Omri i mowas long olgeta we oli rul bifo long hem.+ 31 Hem i folem ol sin blong Jeroboam+ we i boe blong Nebat, be olsem se hemia i no naf, hem i go tekem Jesebel+ we i gel blong Etbal we i king blong ol man Saedon,+ blong i kam waef blong hem mo i stat blong wosipim Bal+ mo i bodaon long hem. 32 Mo tu, hem i wokem wan olta blong Bal long haos* blong Bal+ we hem i wokem long Sameria. 33 Mo hem i wokem tabu pos* tu.+ Hem i mekem plante samting i bitim olgeta king blong Isrel we oli laef bifo long hem, blong mekem Jehova we i God blong Isrel i kros.

34 Long taem we Ehab i stap rul, man Betel ya Hiel i wokem gud Jeriko bakegen. Taem hem i stap wokem fandesen blong hem, Abiram we i fasbon blong hem i ded, mo taem hem i stap putum ol doa blong hem, lasbon blong hem Segub i ded. Hemia i folem tok we Jehova i bin talemaot tru long Josua we i boe blong Nun.+