Fas Buk Blong Ol King

18 Sam taem biaen, long namba 3 yia,+ tok blong Jehova i kamtru long Elaejah se: “Yu go stanap long fored blong Ehab, mo mi bambae mi sanem ren i kamdaon long graon.”+ 2 Nao Elaejah i go blong luk Ehab, long taem ya we kakae i sot bigwan+ long Sameria.

3 Long taem ya, Ehab i singaot Obadaea, man ya we i stap lukaot long haos blong hem. (Obadaea i wan man we i gat bigfala ona* long Jehova, 4 taswe taem Jesebel+ i stap kilim i ded* ol profet blong Jehova, Obadaea i tekem 100 profet mo i go haedem olgeta long hol blong ston, 50 long wan hol blong ston mo 50 long narawan, mo hem i stap givim bred mo wota long olgeta.) 5 Nao Ehab i talem long Obadaea se: “Yu go olbaot long kantri ya, long olgeta springwota mo olgeta krik.* Maet yumi save faenem inaf gras blong mekem ol hos mo ol hafkas dongki oli laef i stap, mo blong ol animol blong yumi oli no ded.” 6 Ale oli seraot ol ples we bambae oli pas i go long hem. Biaen Ehab i go hem wan long wan rod, mo Obadaea i go hem wan long narafala rod.

7 Taem Obadaea i stap wokbaot i go, Elaejah i kam mitim hem. Nao kwiktaem nomo hem i luksave Elaejah mo i foldaon we fes blong hem i go long graon, mo i talem se: “?Masta blong mi Elaejah, yu ya?”+ 8 Nao hem i ansa se: “Yes, mi ya. Yu go talem long masta blong yu se: ‘Elaejah i stap ya.’” 9 Be Obadaea i talem se: “?Mi mi mekem wanem sin blong yu putum man blong wok blong yu long han blong Ehab blong i kilim mi mi ded? 10 Long nem blong God blong yu Jehova we i laef i stap, mi mi talem long yu se i no gat wan nesen o wan kingdom we masta blong mi i no sanem tok i go long hem blong oli lukaot yu. Mo afta we oli talem se: ‘Hem i no stap long ples ya,’ hem i mekem ol kingdom mo ol nesen ya oli talem wan strong tok blong pruvum se oli no save faenem yu.+ 11 Be naoia yu stap talem se: ‘Yu go talem long masta blong yu se: “Elaejah i stap ya.”’ 12 Taem mi gowe long yu, spirit blong Jehova bambae i karem yu yu go+ long wan ples we mi no save, nao sipos mi talem long Ehab mo hem i no save faenem yu, bambae hem i kilim mi mi ded. Be mi man blong wok blong yu, mi mi fraet long Jehova stat taem mi yangfala nomo. 13 Maet masta blong mi i no harem nius blong samting we mi mekem taem Jesebel i stap kilim ol profet blong Jehova. Mi mi haedem 100 profet blong Jehova, we 50 long wan hol blong ston mo 50 long narawan, mo mi stap givim bred mo wota long olgeta.+ 14 Be naoia yu stap talem se: ‘Yu go talem long masta blong yu se: “Elaejah i stap ya.”’ Bambae hem i kilim mi mi ded ya.” 15 Be Elaejah i talem se: “Long nem blong Jehova komanda blong ol ami, we mi mi wok blong hem mo we hem i laef i stap, mi mi talem long yu se tede bambae mi go stanap long fored blong hem.”

16 Nao Obadaea i go luk Ehab mo i talemaot long hem, ale Ehab i go blong mitim Elaejah.

17 Nao taem Ehab i luk Elaejah, hem i talem se: “!Yu ya nao! !Yu yu mekem bigfala trabol i kasem Isrel!”

18 Nao Elaejah i talem se: “Mi mi no mekem trabol i kasem Isrel, yu wetem haos blong papa blong yu, yufala nao i mekem, taem yufala i lego ol komanmen blong Jehova mo yufala i folem ol Bal.+ 19 Naoia, yu singaot olgeta man Isrel oli kam luk mi long Hil Ya Kamel,+ olgeta wetem ol 450 profet blong Bal mo 400 profet blong tabu pos,*+ we oli stap kakae long tebol blong Jesebel.” 20 Nao Ehab i sanem tok i go long olgeta man Isrel mo hem i singaot ol profet ya oli kam wanples long Hil Ya Kamel.

21 Nao Elaejah i kam klosap long ol man mo i talem se: “?Bambae yufala i jamjam long tu defren tingting gogo kasem wetaem?+ !Sipos Jehova i tru God, yufala i folem hem,+ be sipos Bal nao i tru God, yufala i folem hem!” Be ol man ya oli no talem wan tok nating. 22 Biaen Elaejah i talem se: “I gat 450 profet blong Bal, be mi wan nomo, mi profet blong Jehova we i stap yet.+ 23 I gud oli givim tu yang bul long yumi, nao bambae olgeta oli jusum wan yang bul, oli katkatem long smosmol pis mo oli putum antap long faeawud, be oli no mas putum faea long hem. Mo mi bambae mi mekemrere narafala yang bul ya, mo mi putum antap long faeawud, be bambae mi no putum faea long hem. 24 Biaen yufala i mas singaot long nem blong god blong yufala,+ mo mi bambae mi singaot long nem blong Jehova. God we i sanem faea i kam blong ansa, hem nao i tru God.”+ Nao olgeta man oli ansa se: “Samting we yu talem i gud.”

25 Nao Elaejah i talem long ol profet blong Bal se: “From we yufala i plante, yufala i jusum wan yang bul mo yufala i rerem fastaem. Biaen yufala i singaot long nem blong god blong yufala, be yufala i no mas putum faea long sakrefaes blong yufala.” 26 Nao olgeta oli tekem yang bul ya we ol narafala oli givim long olgeta, oli mekemrere, mo oli gohed blong singaot long nem blong Bal stat long moning go kasem long medel dei, oli se: “!O Bal, yu ansa long mifala!” Be i no gat wan voes mo i no gat man i ansa.+ Ale oli gohed oli jamjam raon long olta ya we oli wokem. 27 Nao samwe long medel dei, Elaejah i stat blong jikim olgeta, se: “!Yufala i singaot strong! !Hem i wan god ya!+ Ating hem i stap tingting dip, o maet hem i gobus.* !O maet hem i stap slip mo wan man i mas go wekemap hem!” 28 Ale oli stap singaot bigwan mo oli stap katkatem bodi blong olgeta long ol smol naef mo ol longfala spia folem kastom blong olgeta. Oli mekem olsem kasem we blad i ronaot olbaot long bodi blong olgeta. 29 Medel dei i pas finis be olgeta oli gohed yet,* oli mekem olsem gogo kasem sapa, long taem blong givim sid ofring. Be i no gat wan voes mo i no gat man i ansa, mo god blong olgeta i no lesin long olgeta.+

30 Biaen, Elaejah i talem long ol man se: “Yufala i kam klosap.” Nao oli kam klosap long hem. Ale hem i wokem gud bakegen olta blong Jehova we oli bin brebrekem.+ 31 Nao Elaejah i tekem 12 ston folem namba blong ol traeb blong ol boe blong Jekob ya we Jehova i bin talem long hem se: “Isrel bambae i nem blong yu.”+ 32 Hem i yusum ol ston ya blong wokem wan olta+ long nem blong Jehova. Biaen hem i digim hol i goraon long olta ya, mo ples we hem i digim i naf blong man i saksakem tu sia* blong sid long hem. 33 Biaen hem i putum ol faeawud long oda, i katkatem yang bul ya long ol smosmol pis mo i putum antap long ol faeawud.+ Nao hem i talem se: “Yufala i fulumap wota long fo bigfala jag mo yufala i kafsaedem antap long ofring ya we i blong bon fulwan mo long ol faeawud ya.” 34 Biaen hem i talem se: “Yufala i mekem bakegen.” Ale oli mekem bakegen. Mo hem i talem bakegen se: “Yufala i mekem namba 3 taem.” Nao oli mekem namba 3 taem. 35 Nao wota ya i ron i go olbaot long olta, mo hem i fulumap wota long hol ya tu we i goraon long olta.

36 Samwe long sapa, long taem blong givim sid ofring,+ profet ya Elaejah i muv i go long fored blong olta mo i talem se: “O Jehova, God blong Ebraham,+ Aesak,+ mo Isrel, yu letem oli save tede se yu nao yu God long Isrel, mo se mi mi man blong wok blong yu, mo olgeta samting ya we mi stap mekem, yu nao yu talem long mi blong mi mekem.+ 37 !O Jehova, yu ansa long mi! Yu ansa long mi blong ol man ya oli save se yu Jehova, yu nomo yu trufala God mo se yu stap tanem hat blong olgeta blong i kambak long yu.”+

38 Nao faea blong Jehova i kamdaon, i bonem ofring ya we i blong bon fulwan+ wetem ol faeawud, ol ston, mo das, mo i draemap wota we i stap long hol ya.+ 39 Taem ol man oli luk samting ya, kwiktaem nomo oli foldaon we fes blong olgeta i go long graon, mo oli talem se: “!Jehova nao i tru God! !Jehova nao i tru God!” 40 Nao Elaejah i talem long olgeta se: “!Yufala i holemtaet ol profet blong Bal! !Yufala i no letem wan long olgeta i ronwe!” Nao kwiktaem nomo oli holemtaet olgeta, mo Elaejah i tekem olgeta i godaon long smol reva* blong Kison+ mo i kilim olgeta oli ded long ples ya.+

41 Biaen Elaejah i talem long Ehab se: “Yu go antap, yu kakae mo yu dring, from we i gat noes blong bigfala ren i stap kam.”+ 42 Nao taem Ehab i go antap blong kakae mo dring, Elaejah i go antap long top blong Hil Ya Kamel, mo i nildaon long graon we fes blong hem i stap bitwin long tufala ni blong hem.+ 43 Biaen hem i talem long man we i stap givhan long hem se: “Plis, yu go antap mo yu lukluk i go long solwota.” Ale hem i go antap, i lukluk i go, mo i talem se: “I no gat wan samting.” Nao Elaejah i sanem hem seven taem bakegen blong i gobak antap. 44 Long namba 7 taem ya, man ya we i stap givhan long hem i talem se: “!Yu luk! Wan smol klaod we i olsem han blong man i stap kamaot long solwota.” Nao Elaejah i talem se: “Yu go talem long Ehab se: ‘!Yu mekemrere jariot blong yu mo yu godaon, olsem nao bambae ren i no blokem yu!’” 45 Long taem ya, skae i kam tudak from ol klaod, mo win i stap blu, mo bigfala ren i foldaon.+ Mo Ehab i gohed long rod blong hem, i stap go long Jisrehel.+ 46 Be han blong Jehova i kam long Elaejah, nao hem i mekem klos blong hem i goraon long hips blong hem mo i fasemtaet, ale i ron i go fastaem long Ehab, i go kasem Jisrehel.