Josua

18 Biaen ful asembli blong ol laen blong Isrel oli kam wanples long Silo,+ mo oli putumap tent blong miting* long ples ya,+ from we oli winim graon ya finis.+ 2 Be i gat seven traeb blong Isrel oli stap yet, we oli no sakem spesel ston yet blong faenemaot graon blong olgeta. 3 Ale Josua i talem long olgeta se: “?From wanem yufala i tekem longtaem tumas blong go stap long graon ya we Jehova, God blong ol olfala blong yufala i givim finis long yufala?+ 4 Yufala i jusumaot tri man long ol traeb ya wanwan blong mi sanem olgeta. Oli mas go wokbaot long graon ya, mo oli makem mo seraotem long ol traeb ya wanwan stret olsem we oli mas kasem. Biaen oli mas kambak long mi. 5 Oli mas seraotem graon ya i go long seven pis stret long namba blong ol traeb ya.+ Traeb blong Juda bambae i stap nomo long teritori blong hem long saot,+ mo olgeta we oli kamaot biaen long Josef bambae oli stap long teritori blong olgeta long not.+ 6 Be yufala i mas makem graon ya long seven pis, mo yufala i kambak long mi long ples ya, nao long fes blong Jehova God blong yumi, bambae mi sakem ol spesel ston+ blong faenemaot se weswan traeb bambae i tekem wanem graon. 7 Be ol Livaet oli no kasem graon olsem yufala,+ from we olgeta oli pris blong Jehova, mo wok ya i olsem graon blong olgeta.+ Mo traeb blong Gad, traeb blong Ruben, mo haf traeb blong Manase+ oli kasem graon blong olgeta finis long is saed blong Jodan Reva, we Moses man blong wok blong Jehova i givim long olgeta.”

8 Ol man ya oli rere blong go, ale Josua i talem long olgeta we bambae oli makem ol graon ya se: “Yufala i go, yufala i wokbaot long ol graon ya, mo yufala i makem mo yufala i kambak long mi. Mo long Silo, bambae mi sakem ol spesel ston long fored blong Jehova, blong faenemaot se weswan traeb bambae i tekem wanem graon.”+ 9 Ale ol man ya oli go, oli wokbaot long evri ples long graon ya, mo oli seraotem mo oli makem ol seven pis graon ya folem ol taon we oli stap insaed long olgeta, mo oli raetemdaon long wan buk. Biaen oli kambak long Josua long kamp blong olgeta long Silo. 10 Nao long ples ya, long fes blong Jehova, Josua i sakem ol spesel ston blong faenemaot graon blong olgeta.+ Ale Josua i seraotem ol graon ya long ol laen blong Isrel stret olsem we oli mas kasem.+

11 Nao spesel ston i foldaon long ol famle long traeb blong Benjamin, mo teritori blong olgeta i stap bitwin graon blong ol pikinini blong Juda,+ mo ol pikinini blong Josef.+ 12 Long not, boda blong olgeta i stat long Jodan Reva, mo i go antap kasem saed blong hil blong Jeriko+ long not, mo i go antap long bigfala hil long wes, mo i go kasem draeples ya Betaven.+ 13 Mo boda ya i gohed kasem saot, long saed blong ol hil long Lus we hemia Betel.+ Mo i godaon kasem Atarotada,+ we i stap antap long bigfala hil ya long saot blong Betoron Daon.+ 14 Mo boda blong olgeta i stat long bigfala hil we i fesem Betoron, i go kasem saot mo i go finis long Kiriatbal, hemia Kiriatsearim,+ wan taon blong Juda. Hemia nao mak blong graon blong olgeta long wes.

15 Long saot, boda blong olgeta i stat long en blong Kiriatsearim i gohed kasem long wes, mo i go kasem springwota blong Neftoa.+ 16 Mo i godaon i kasem stamba blong bigfala hil ya we i fesem Vali Blong Boe Blong Hinom,+ we hem i Vali* Long Refaem+ long not, mo i godaon long Vali Blong Hinom, i go kasem saed blong hil blong ol man Jebus+ long saot, mo i godaon kasem Enrogel.+ 17 Mo hem i stat long ples ya, i go antap long not, i kasem Ensemes, mo i go kasem Gelilot we i fesem rod blong go antap long Adumim,+ mo i godaon i kasem ston+ blong Bohan+ we i boe blong Ruben. 18 Mo i gohed i kasem saed blong ol hil long not we i fesem Araba, mo i godaon kasem Araba. 19 Mo boda ya i gohed i kasem saed blong hil blong Betogla+ long not, mo i go finis long bei blong Sol Si*+ long not, hemia en blong Jodan Reva long saot. Hemia nao boda blong olgeta long saot. 20 Mo long is, boda blong graon blong olgeta hem i Jodan Reva. Hemia nao graon blong ol famle long laen blong Benjamin, mo olgeta boda we oli makem graon ya.

21 Mo ol taon blong ol famle long traeb blong Benjamin i olsem: Jeriko, Betogla, Emekesis, 22 Betaraba,+ Jemaraem, Betel,+ 23 Avim, Paraha, Ofraha, 24 Kefaramoni, Ofni, mo Geba.+ I gat 12 taon evriwan wetem ol vilej raonabaot.

25 Gibeon,+ Rama, Beherot, 26 Mispe, Kefira, Mojaha, 27 Rekem, Epiel, Taralaha, 28 Jela,+ Hahelef, Jebusi we hemia Jerusalem,+ Gibea,+ mo Kiriat. I gat 14 taon evriwan wetem ol vilej raonabaot.

Hemia nao graon blong ol famle long laen blong Benjamin.