Fas Leta i go long Timoti

5 Taem yu stretem wan olfala man, yu no mas tok strong long hem,+ be yu toktok kaen long hem olsem we hem i papa blong yu, mo yu toktok kaen long ol yangfala man olsem we oli brata blong yu, 2 mo yu toktok kaen long ol olfala woman olsem we oli mama blong yu, mo yu toktok kaen long ol yangfala woman olsem we oli sista blong yu, mo hat blong yu i mas klin taem yu mekem olsem.

3 Yu mas lukaot gud* long ol wido we oli no gat famle blong lukaot long olgeta.*+ 4 Be sipos wan wido i gat ol pikinini blong hem o ol smol bubu blong hem, fastaem olgeta ya oli mas lukaot gud long famle blong olgeta,+ blong soemaot se oli fasgud long God. Mo oli mas pembak kaon blong olgeta long ol papa, mama, mo ol bubu blong olgeta,+ from we hemia i wan samting we God i glad long hem.+ 5 Wido we i no gat famle blong lukaot long hem mo i no gat samting, hem i putum hop blong hem long God,+ mo i gohed blong prea mo i krae i go long God long dei mo long naet.+ 6 Be wido we i stap lukaot ol samting blong mekem bodi blong hem i harem gud,* hem i ded finis, nating se hem i laef yet. 7 Taswe yu mas gohed blong talem ol tok* ya long olgeta, olsem nao bambae i no gat man i save faenem poen long olgeta. 8 Be man we i no wantem givim samting we olgeta we hem i mas lukaot long olgeta, oli nidim, speseli long olgeta we oli memba blong famle blong hem, hem i soemaot we hem i no moa holem bilif, mo hem i mowas long man we i no bilif nating.+

9 Wido we yu mas putum nem blong hem long lis, hem i mas gat bitim 60 yia mo hem i gat wan hasban nomo, 10 mo ol man oli mas talem se hem i stap mekem ol gudgudfala wok+ olsem: Hem i tijim gud ol pikinini blong hem,+ hem i glad blong welkamem ol narafala,+ hem i wasem leg blong ol tabu man,+ hem i givhan long olgeta we oli trabol,+ mo tingting blong hem i strong blong mekem evri gudfala wok.

11 Be yu no mas putum nem blong ol wido we oli yangfala long lis ya, from we sipos filing blong seks i kam, nao oli wantem mared, samting ya bambae i blokem olgeta long wok blong Kraes, 12 nao bambae oli kasem jajmen from we oli lego fas promes blong olgeta. 13 Mo long semtaem, oli save lanem blong kam les, oli go olbaot long haos blong ol narafala man. Yes oli no les nomo, be oli tokbaot man tu, mo oli pusum nus long bisnes blong ol narafala man,+ mo oli tokbaot ol samting we oli no gat raet blong talem. 14 Taswe, mi wantem se ol yangfala wido oli mared,+ oli gat pikinini,+ oli lukaot gud long famle blong olgeta, mo oli no givim janis long ol man blong agens, blong oli tok nogud long yumi. 15 I gat sam wido we oli lego gudfala rod finis, nao oli folem Setan. 16 Sipos wan woman we i bilif i gat sam famle blong hem we oli wido, i gud hem i givhan long olgeta. Olsem nao, kongregesen bambae i no lukaot long olgeta, be i save givhan long ol wido ya nomo we oli no gat famle blong lukaot long olgeta.*+

17 Ol man oli mas soemaot bigfala ona+ long ol elda we oli lidim gud kongregesen,+ speseli olgeta we oli wok strong blong talemaot tok blong God mo blong tijim ol man,+ 18 from we Baebol i talem se: “Taem yufala i yusum bul blong klinim wit,+ yufala i no mas fasem maot blong hem,” mo i talem tu se: “I stret nomo we wan wokman i kasem pei blong hem.”+ 19 Bambae yu no lesin long man we i tok agens long wan olfala man,* sipos i no gat tu o tri witnes blong mekem tok blong hem i stanap.+ 20 Long fored blong evriwan, yu mas stretem+ olgeta we oli stap mekem sin,+ mo hemia bambae i olsem wan woning long olgeta evriwan.* 21 Long fes blong God, mo long fes blong Kraes Jisas, mo ol enjel we hem i jusumaot olgeta, mi mi talem strong long yu se yu mas folem gud ol tok ya blong mi. Bifo we yu mekem wan desisen, i gud yu lukluk gud long evri samting, blong yu no mekem i gud long samfala, be samfala, nogat.+

22 Yu no hariap tumas blong putum han blong yu long wan man.*+ Mo yu no joen long sin blong ol narafala man. Yu mas stap klin.

23 From we yu stap sik oltaem, yu no moa dring wota,* i gud yu dring smol waen, blong givhan long stomak blong yu.

24 Sam man, sin blong olgeta i stap long klia ples nomo, nao oli kasem panis from, be ol narafala, sin blong olgeta i stap haed fastaem, be biaen, i kamaot long klia ples.+ 25 Mo long sem fasin, ol gudfala wok we man i mekem oli stap long klia ples nomo,+ be ol gudfala wok we oli no stap long klia ples fastaem, bambae oli no save stap haed olwe, oli mas kamaot.+