Esra

8 Hemia olgeta we oli hed long haos blong papa blong olgeta, mo lis blong ol famle we oli aot wetem mi long Babilon, long taem we King Ataksekses i stap rul:+ 2 Long ol boe blong Finehas,+ i gat Gesom. Long ol boe blong Itamara,+ i gat Daniel. Long ol boe blong Deved, i gat Hatus. 3 Long ol boe blong Sekania we i kamaot long ol boe blong Paros, i gat Sekaraea, mo wetem hem, i gat 150 man we nem blong olgeta i stap long lis blong ol famle. 4 Long ol boe blong Pahatmoab,+ i gat Eliehoenae we i boe blong Serahia, mo wetem hem, i gat 200 man. 5 Long ol boe blong Satu,+ i gat Sekania we i boe blong Jahasiel, mo wetem hem, i gat 300 man. 6 Long ol boe blong Adin,+ i gat Ebed we i boe blong Jonatan, mo wetem hem, i gat 50 man. 7 Long ol boe blong Elam,+ i gat Jesaea we i boe blong Atalia, mo wetem hem, i gat 70 man. 8 Long ol boe blong Sefatia,+ i gat Sebadia we i boe blong Maekel, mo wetem hem, i gat 80 man. 9 Long ol boe blong Joab, i gat Obadaea we i boe blong Jehiel, mo wetem hem, i gat 218 man. 10 Long ol boe blong Bani, i gat Selomit we i boe blong Josifia, mo wetem hem, i gat 160 man. 11 Long ol boe blong Bebae,+ i gat Sekaraea we i boe blong Bebae, mo wetem hem, i gat 28 man. 12 Long ol boe blong Asgad,+ i gat Johanan we i boe blong Hakatan, mo wetem hem, i gat 110 man. 13 Long ol boe blong Adonikam,+ hemia olgeta we oli laswan, nem blong olgeta i olsem: i gat Elifelet, Jeiel, mo Semaea, mo wetem olgeta, i gat 60 man. 14 Mo long ol boe blong Bigvae,+ i gat Utae mo Sabut, mo wetem olgeta, i gat 70 man.

15 Nao mi mekem olgeta oli kam wanples long reva we i stap ron i go long Ahava,+ mo mifala i kamp long ples ya blong tri dei. Be taem mi stap luklukgud ol man mo ol pris, mi luk se i no gat eni Livaet long ples ya. 16 Nao mi sanem sam man blong oli singaot Eliesa i kam, wetem Ariel, Semaea, Elnatan, Jarib, Elnatan, Natan, Sekaraea, mo Mesulam, hemia ol lida, mo Joearib wetem Elnatan, we tufala i tija. 17 Nao mi givim oda ya long olgeta long saed blong Ido we i lida blong ples ya Kasifia. Mi talem long olgeta blong oli go talem long Ido mo ol brata blong hem, hemia ol man blong wok long tempol,* we oli stap long Kasifia, blong oli tekem sam man i kam blong oli mekem minista wok long haos blong God blong yumi. 18 Mo from we gudfala han blong God blong yumi i stap long mifala, olgeta oli tekem wan waes man i kam long mifala. Nem blong hem Serebia, mo hem i kamaot long ol boe blong Mali+ we i smol bubu blong Livae, boe blong Isrel. Oli tekem Serebia+ i kam wetem ol boe blong hem mo ol brata blong hem, olgeta 18 man. 19 Mo oli tekem Hasabia, wetem Jesaea we i wan laen blong Merari,+ mo ol brata blong hem wetem ol boe blong olgeta, olgeta 20 man. 20 Mo i gat 220 man blong wok long tempol,* we oli bin jusumaot nem blong olgeta. Olgeta evriwan ya, Deved wetem ol prins oli bin givim olgeta blong oli givhan long ol Livaet.

21 Biaen taem mifala i stap long Ahava Reva, mi mi talemaot se mifala i mas fasting, blong mifala i mekem tingting blong mifala i stap daon long fored blong God, mo askem hem blong i lidim rod blong mifala, mo i lidim mifala wetem ol pikinini blong mifala, mo olgeta samting blong mifala. 22 Mi mi sem blong askem long king blong i sanem sam soldia mo sam man blong ron long hos, blong oli protektem mifala long rod, blong ol enemi oli no spolem mifala. Mi sem from we mifala i bin talem long king se: “Gudfala han blong God blong mifala i stap wetem olgeta we oli stap lukaot hem,+ be paoa blong hem mo kros blong hem i kam agensem olgeta we oli lego hem.”+ 23 Taswe mifala i fasting mo mifala i askem long God blong i lidim mifala long rod, mo hem i lesin long samting we mifala i askem.+

24 Nao mi jusumaot 12 lida blong ol pris, hemia Serebia wetem Hasabia,+ mo ten brata blong olgeta. 25 Biaen mi skelem ol silva, ol gol, mo ol samting olsem plet mo kap, mo mi givim long olgeta. Hemia kontribusen we king wetem ol advaesa blong hem, mo ol prins blong hem, mo olgeta man Isrel we oli stap long taem ya, oli givim i go long haos blong God blong yumi.+ 26 Afta we mi skelem ol samting ya, mi putum long han blong olgeta. I gat 650 talen* blong silva, 100 samting olsem plet mo kap we oli wokem long silva, we hevi blong olgeta i 2 talen, 100 talen blong gol, 27 20 smol bol we oli wokem long gol, we praes blong hem i 1,000 darik,* wetem 2 samting olsem plet mo kap we oli wokem long gudfala kopa, we tufala i red mo i saen, mo praes blong tufala i sas olsem praes blong gol.

28 Biaen mi talem long olgeta se: “Yufala i tabu long ae blong Jehova,+ mo ol samting olsem plet mo kap tu oli tabu. Mo ol silva mo gol ya, oli wan ofring we man i glad nomo blong givim i go long Jehova we i God blong ol olfala blong yufala. 29 Yufala i mas gad gud long ol samting ya, go kasem we yufala i skelem olgeta long Jerusalem, long fored blong ol lida blong ol pris, ol Livaet, mo olgeta we oli prins long haos blong papa blong olgeta long Isrel.+ Bambae yufala i skelem ol samting ya long ol rum* long haos blong Jehova.” 30 Nao ol pris mo ol Livaet oli tekem ol silva, ol gol, mo ol samting olsem plet mo kap, we oli bin skelem mo oli givim long olgeta, mo oli tekem i go long Jerusalem, long haos blong God blong yumi.

31 Biaen, long namba 12 dei blong faswan manis,+ mifala i gowe long Ahava Reva,+ blong go long Jerusalem. Mo han blong God blong mifala i stap long mifala, mo hem i sevem mifala long han blong ol enemi mo long ol man we oli stap haed long rod blong mekem i nogud long mifala. 32 Nao mifala i kamtru long Jerusalem+ mo mifala i stap long ples ya blong tri dei. 33 Mo long namba 4 dei, mifala i skelem ol silva, ol gol, mo ol samting olsem plet mo kap, insaed long haos blong God blong mifala.+ Mo mifala i givim ol samting ya long Meremot+ we i boe blong pris ya Uraejah, mo olgeta we oli stap wetem hem, hemia Eleasara we i boe blong Finehas, wetem ol Livaet, hemia Josabad+ we i boe blong Jesua, mo Noadia we i boe blong Binui.+ 34 Oli kaontem mo skelem evri samting, mo oli raetemdaon wet blong ol samting ya. 35 Nao olgeta we oli bin holemtaet olgeta, hemia olgeta we oli bin stap long narafala kantri, oli givim ol animol blong mekem ol sakrefaes we oli bon fulwan i go long God blong Isrel. Oli givim 12 bul+ blong olgeta man Isrel, 96 man sipsip,+ 77 smol man sipsip, mo 12 man nani+ olsem ofring blong sin. Olgeta samting ya i wan ofring we i bon fulwan, blong givim i go long Jehova.+

36 Nao mifala i givim oda blong king+ long ol satrap* blong king, mo ol hed gavman long rijen Narasaed Long Reva,*+ nao olgeta oli sapotem ol man mo haos blong tru God.+