Esra

6 Long taem ya nao King Darias i givim wan oda blong oli go lukaotem mo jekemgud ol olfala buk,* long ples we oli stap putum ol sas samting blong Babilon long hem. 2 Mo oli faenem wan skrol long hedkwota long Ekbatana, long provins blong Media, mo oda we oli raetem insaed long hem, i olsem:

3 “Long faswan yia blong rul blong King Saeras, King Saeras i givim wan oda long saed blong haos blong God long Jerusalem+ se: ‘I gud oli bildim bakegen haos ya, blong oli save mekem ol sakrefaes long hem, mo i gud oli wokem ol fandesen blong hem long ples blong hem. Hae blong hem bambae i 60 kiubit,* bigfala blong hem 60 kiubit,+ 4 mo bambae i gat tri laen blong ol bigfala ston we oli rolem i go long stret ples blong hem, mo wan laen blong ol timba antap long hem.+ Mo i gud oli pem ol samting ya long mane we i kamaot long haos blong king.+ 5 Mo tu, ol samting long gol mo silva we oli stap yusum long haos blong God, we Nebukadnesa i bin tekemaot long tempol long Jerusalem mo i karem i kam long Babilon,+ i gud oli tekem i gobak, blong oli save putumbak long ples blong olgeta long tempol long Jerusalem, mo putumbak long haos blong God.’+

6 “So naoia, yu Tatenae we yu hed gavman blong rijen Narasaed Long Reva,* mo yu Setara-bosenae, wetem ol narafala we oli sapotem yufala, hemia ol haeman we oli daon moa, we oli stap long rijen Narasaed Long Reva,+ yufala i no mas go klosap long ples ya. 7 Yufala i no mas pusum nus blong yufala long wok we i stap gohed long haos ya blong God. Hed gavman blong ol man Jiu mo ol elda blong olgeta, bambae oli bildim haos ya blong God long sem ples we i bin stap long hem bifo. 8 Mo tu, mi givim wan oda long yufala long samting we yufala i mas mekem, blong givhan long ol elda ya blong ol man Jiu we oli stap bildim bakegen haos blong God. Bambae yufala i tekem mane we i stap long ples blong putumgud ol sas samting blong king,+ hemia mane blong takis blong ol man long rijen Narasaed Long Reva, mo yufala i givim long ol man ya blong oli save gohed long wok ya we i no gat wan samting i distebem olgeta.+ 9 Mo wanem samting we ol pris we oli stap long Jerusalem oli nidim blong mekem ol ofring we oli blong bon fulwan i go long God blong heven, olsem ol yang bul,+ ol man sipsip,+ mo ol smol sipsip,+ o sipos oli nidim wit,+ sol,+ waen,+ mo oel,+ yufala i mas gohed blong givim long olgeta evri dei. 10 Olsem nao bambae oli save gohed blong givim ol ofring we i mekem God blong heven i glad, mo oli prea from laef blong king mo ol boe blong hem.+ 11 Mo tu, mi mi putum wan oda se sipos wan man i brekem oda ya, bambae oli pulumaot wan timba long haos blong hem, mo oli leftemap hem mo oli fasem hem long timba ya,* mo haos blong hem bambae i kam olsem ples we pablik i save gobus* long hem. 12 Mo i gud God ya we i mekem se nem blong hem i stap long ples ya,+ i sakemaot eni king mo man we i leftemap han blong hem blong brekem oda ya mo spolem haos ya blong God, we i stap long Jerusalem. Mi Darias, mi givim oda ya. I gud ol man oli folem oda ya kwiktaem.”

13 Nao Tatenae we i hed gavman long rijen Narasaed Long Reva, wetem Setara-bosenae,+ mo olgeta we oli sapotem tufala, oli kwik blong mekem evri samting we King Darias i talemaot long olgeta. 14 Mo ol elda blong ol man Jiu oli gohed blong bildim haos ya mo wok ya i gohed gud,+ from we profet tok blong profet Hagae+ mo Sekaraea+ we i smol bubu blong Ido, i leftemap tingting blong olgeta. Nao olgeta oli finisim haos ya, folem oda blong God blong Isrel,+ mo folem oda blong Saeras,+ Darias,+ mo King Ataksekses+ blong Pesia. 15 Oli finisim haos ya long namba 3 dei blong manis Adara,* hemia long namba 6 yia blong rul blong King Darias.

16 Nao ol man Isrel, ol pris, ol Livaet,+ mo ol narafala we oli aot long Babilon oli kambak, oli mekem opening blong* haos blong God, we oli glad we oli glad. 17 Mo blong mekem opening ya blong haos blong God, oli mekem sakrefaes long 100 bul, 200 man sipsip, wetem 400 smol sipsip. Mo blong ofring blong sin blong olgeta man Isrel, olgeta oli givim 12 man nani folem namba blong ol traeb blong Isrel.+ 18 Mo oli putumap ol pris long ol grup blong olgeta, mo ol Livaet long ol grup blong olgeta, blong oli mekem wok blong God long Jerusalem.+ Oli mekem olsem, folem samting we oli raetem long buk blong Moses.+

19 Nao long namba 14 dei blong faswan manis, olgeta ya we oli aot long Babilon oli kambak, oli mekem lafet blong Pasova.+ 20 Evri pris mo Livaet oli mekem olgeta oli klin, ale olgeta evriwan oli kam klin,+ nao oli kilim ol animol blong mekem sakrefaes blong Pasova, blong olgeta we oli aot long Babilon oli kambak, blong ol pris, mo blong olgeta wan. 21 Nao ol man Isrel we oli aot long Babilon oli kambak, oli kakae ol samting ya. Olgeta wetem evriwan we oli joen wetem olgeta, hemia olgeta we oli lego ol doti fasin blong ol nesen mo oli wosipim* Jehova we i God blong Isrel.+ 22 Mo tu, blong seven dei, oli mekem Lafet Blong Bred We i No Gat Is,+ we oli glad we oli glad. Jehova nao i mekem olgeta oli glad, mo hem i mekem hat blong king blong Siria i glad long olgeta,+ nao i sapotem olgeta* long wok blong bildim haos blong tru God, hemia God blong Isrel.