Esikel

34 Nao tok blong Jehova i kamtru bakegen long mi, i se: 2 “Pikinini blong man, yu talemaot profet tok agensem ol man Isrel we oli man blong lukaot long sipsip. Yu talemaot profet tok mo yu talem long olgeta se: ‘Hemia samting we Hae Masta Jehova i talem: “!Sore tumas long ol man Isrel we oli man blong lukaot long sipsip,+ we oli stap fidim olgeta wan bakegen! ?Olsem wanem? ?I no ol sipsip nao we ol man ya oli sud fidim?+ 3 Yufala i stap kakae gris, mo yufala i werem ol klos we oli wokem long wul, mo yufala i stap kilim animol we i fatfat moa,+ be yufala i no stap fidim ol sipsip.+ 4 Yufala i no stap mekem olgeta we oli slak oli kam strong, o mekem olgeta we oli sik oli kam gud bakegen, o putum bandej long olgeta we oli gat kil, o tekem olgeta we oli mestem rod oli kambak, o go lukaotem olgeta we oli lus.+ Be yufala i stap rulum olgeta long fasin we i strong mo mekem i nogud long olgeta.+ 5 Nao ol sipsip ya oli go wanwan olbaot, from we i no gat man blong lukaot long olgeta.+ Olgeta oli go wanwan, nao oli kam ol kakae blong evri wael animol blong bus. 6 Ol sipsip blong mi oli mestem rod nao oli stap wokbaot olbaot long olgeta bigfala hil mo long evri hil we oli hae. Ol sipsip blong mi oli go wanwan olbaot long evri ples long wol, we i no gat man i go lukaotem olgeta o i traehad blong faenem olgeta.

7 “‘“From samting ya, yufala ol man blong lukaot long sipsip, yufala i lesin long tok blong Jehova: 8 ‘Hae Masta Jehova i talem se: “Mi mi talem long yufala long nem blong mi we mi laef i stap se, ol sipsip blong mi oli kam olsem kakae, kakae blong evri wael animol blong bus from we i no gat man blong lukaot long olgeta, mo ol man blong mi we oli man blong lukaot long sipsip, oli no go lukaotem ol sipsip blong mi, be oli gohed blong fidim olgeta wan bakegen, oli no fidim ol sipsip blong mi,”’ 9 from samting ya yufala ol man blong lukaot long sipsip, yufala i lesin long tok blong Jehova. 10 Hemia samting we Hae Masta Jehova i talem: ‘Mi mi agensem ol man blong lukaot long sipsip, mo bambae mi askembak kaon long olgeta from ol sipsip blong mi,* mo bambae mi tekemaot olgeta long wok ya blong fidim* ol sipsip blong mi,+ nao ol man blong lukaot long sipsip bambae oli no moa stap fidim olgeta wan bakegen. Bambae mi sevem ol sipsip blong mi, mi tekemaot olgeta long maot blong olgeta, nao bambae oli no moa stap olsem ol kakae blong olgeta.’”

11 “‘From we hemia samting we Hae Masta Jehova i talem: “Mi hemia, mo mi nao bambae mi go lukaotem ol sipsip blong mi, mo bambae mi lukaot gud long olgeta.+ 12 Bambae mi keagud long ol sipsip blong mi olsem wan man blong lukaot long sipsip we i faenem ol sipsip blong hem we oli bin go wanwan olbaot, mo i stap fidim olgeta.+ Long dei blong plante klaod mo bigfala dak klaod, bambae mi sevem olgeta, mi tekemaot olgeta long evri ples we oli bin go wanwan long hem.+ 13 Bambae mi tekemaot olgeta long medel blong ol man mo ol kantri, nao mi tekem olgeta oli kam wanples mo mi tekem olgeta oli go long kantri blong olgeta, mo mi fidim olgeta antap long ol bigfala hil blong Isrel,+ klosap long ol smol reva mo klosap long olgeta ples long kantri ya we man i stap long hem. 14 Bambae mi fidim olgeta long wan ples we i gat ol gudfala gras, mo ples we oli kakae gras long hem, bambae i stap long ol bigfala hil blong Isrel.+ Bambae olgeta oli ledaon long wan ples we i gat ol gudfala gras blong kakae,+ mo bambae oli kakae long ol beswan ples we i gat gras long hem antap long ol bigfala hil blong Isrel.”

15 “‘“Mi nao bambae mi fidim ol sipsip blong mi,+ mo mi nao bambae mi mekem oli ledaon,”+ hemia nao samting we Hae Masta Jehova i talem. 16 “Sipsip we i lus, bambae mi go lukaotem hem,+ mo sipsip we i lusum rod, bambae mi tekem hem i kambak, mo bambae mi putum bandej long sipsip we i kasem kil, mo sipsip we i slak bambae mi mekem hem i strong. Be bambae mi kilim i ded sipsip we i fatfat mo sipsip we i strong. Bambae mi fidim hem long ol jajmen.”

17 “‘Mo long saed blong yufala ol sipsip blong mi, hemia samting we Hae Masta Jehova i talem: “Mi mi rere blong mekem jajmen bitwin wan sipsip mo wan narafala sipsip, mo bitwin ol man sipsip mo ol man nani.+ 18 Yufala i stap kakae ol gras we oli beswan, ?be hemia i no naf yet, taswe yufala i stap purumbut long ol gras we oli stap yet? Mo afta we yufala i dring wota we i klin moa long ol narawan, ?yufala i mas purumbut long hem blong mekem i kam doti? 19 ?Olsem wanem? ?Naoia ol sipsip blong mi bambae oli kakae ol gras ya we yufala i purumbut long hem, mo dring wota ya we yufala i purumbut long hem blong mekem i kam doti?”

20 “‘Taswe hemia samting we Hae Masta Jehova i talem long olgeta: “Mi hemia, mo mi nao bambae mi mekem jajmen bitwin wan sipsip we i fatfat mo wan sipsip we i bunbun, 21 from we yufala i gohed blong yusum saed blong yufala mo solda blong yufala blong pusumaot evriwan we oli sik, mo wetem ol hon blong yufala, yufala i gohed blong pusumaot olgeta gogo oli go longwe mo oli go wanwan olbaot. 22 Taswe bambae mi sevem ol sipsip blong mi, mo bambae oli no moa stap olsem kakae blong ol narafala animol.+ Mo bambae mi mekem jajmen bitwin wan sipsip mo wan narafala sipsip. 23 Bambae mi putum wan man blong lukaot long sipsip, blong i lukaot long olgeta,+ hemia man blong wok blong mi Deved,+ mo hem bambae i fidim olgeta. Hem nao bambae i fidim olgeta mo i kam man blong lukaot long olgeta.+ 24 Mo mi Jehova, bambae mi kam God blong olgeta,+ mo man blong wok blong mi Deved, bambae i kam jif long medel blong olgeta.+ Mi Jehova, mi nao mi talemaot tok ya.

25 “‘“Mi bambae mi mekem wan kontrak blong pis wetem olgeta,+ mo bambae mi aotem ol rabis wael animol long kantri ya,+ olsem nao bambae olgeta oli save stap sef long draeples mo slip long bus.+ 26 Bambae mi mekem olgeta wetem eria raonabaot long hil blong mi, oli kam wan blesing,+ mo bambae mi mekem ren i foldaon long stret taem blong hem. Ol blesing bambae oli foldaon olsem ren.+ 27 Ol tri long open ples bambae oli karem frut blong olgeta, mo graon bambae i karem kakae blong hem,+ mo bambae olgeta oli stap sef long kantri ya. Mo bambae olgeta oli mas save se mi mi Jehova taem mi brekem ol wud blong yok blong olgeta,+ mo tekemaot olgeta long ol man we oli mekem olgeta oli kam slef. 28 Bambae olgeta oli no moa stap olsem wan samting blong ol nesen oli kakae, mo ol wael animol blong wol bambae oli no kakae olgeta, mo bambae oli stap sef we i no gat man i save mekem olgeta oli fraet.+

29 “‘“Mi bambae mi wokem wan plantesen blong olgeta we ol man bambae oli savegud, mo bambae olgeta oli no moa ded from hanggri long kantri ya,+ mo bambae ol nesen oli no moa mekem olgeta oli sem.+ 30 ‘Nao bambae olgeta oli mas save se mi Jehova we mi God blong olgeta, mi mi stap wetem olgeta, mo olgeta, hemia haos blong Isrel, oli man blong mi,’+ hemia nao samting we Hae Masta Jehova i talem.”’

31 “‘Long saed blong yufala ol sipsip blong mi,+ hemia ol sipsip we mi keagud long olgeta, yufala i man nomo, mo mi mi God blong yufala,’ hemia nao samting we Hae Masta Jehova i talem.”