Seken leta i go long Tesalonaeka

2 Ol brata, long saed blong taem ya we Masta blong yumi Jisas Kraes i stap*+ mo bambae yumi stap wanples wetem hem,+ mifala i askem long yufala se 2 yufala i no mas hariap blong seksek o blong harem nogud, sipos yufala i harem toktok olbaot se dei blong Jehova* i stap finis.+ Maet yufala i harem long wan man we i talem se spirit* i givim tok ya long hem,+ o long wan man we i kam talemaot long yufala, o long wan leta we oli talem se mifala i raetem.

3 Bambae yufala i no letem man i lidim yufala i go krangke* long eni rod, from we bifo we dei ya i kam, apostasi+ i mas kam fastaem mo man blong brekem loa+ bambae i kamaot long klia ples, hemia man ya we bambae i lus.+ 4 Hem i wan man blong agens, mo hem i leftemap hem i hae moa antap long eni samting we i olsem wan god, no eni samting we ol man oli stap wosipim.* From samting ya, hem i sidaon long tempol blong God mo hem i soemaot long evriwan se hem i wan god. 5 ?Olsem wanem? ?Yufala i fogetem finis ol samting ya we mi talemaot long yufala taem mi stap yet wetem yufala?

6 Naoia yufala i save wanem nao i stap blokem yet man ya blong brekem loa, nao bambae hem i kamaot long klia ples long stret taem blong hem nomo. 7 I tru se man ya i stap mekem ol rabis wok blong hem finis be long fasin haed,+ be bambae hem i gohed olsem gogo kasem we man ya we i stap blokem hem, i no moa stap. 8 Long taem ya, man ya blong brekem loa bambae i kamaot long klia ples. Masta Jisas bambae i yusum paoa we i kamaot long maot blong hem blong finisim hem.+ Mo taem bambae Masta i soemaot se hem i stap,* man ya blong brekem loa bambae i lus olgeta.+ 9 Be Setan nao i mekem se man ya blong brekem loa i stap.+ Setan nao i givim paoa long hem blong i mekem olgeta merikel mo giaman saen mo ol samting blong sapraes,+ 10 mo olgeta fasin we i no stret we i blong trikim narafala.+ Setan i givim paoa long hem from we hem i save giaman long ol man we bambae oli ded. Oli kasem panis ya from we oli no akseptem mo lavem trutok we i blong sevem olgeta. 11 Taswe God i letem tingting we i no stret i lidim olgeta oli go krangke, blong oli bilivim ol samting we oli giaman,+ 12 nao olgeta evriwan oli save kasem jajmen from we oli no bilif long trutok, be oli glad long ol samting we oli no stret.

13 Be ol brata, Jehova* i lavem yufala mo mifala i mas talem tangkiu oltaem long hem from yufala, from we long stat finis hem i jusumaot yufala+ blong sevem yufala. Hem i mekem olsem taem yufala i bilif long trutok mo taem hem i yusum spirit blong hem blong mekem yufala i tabu.+ 14 Hem i singaot yufala tru long gud nius ya we mifala i talemaot, blong yufala tu yufala i save kasem glori blong Masta blong yumi Jisas Kraes.+ 15 Taswe ol brata, yufala i mas stanap strong+ mo yufala i holemtaet ol kastom we oli tijim yufala long hem finis,+ maet yufala i harem wan man i talemaot no maet long wan leta we mifala i raetem. 16 God ya we i Papa blong yumi, hem i lavem yumi,+ mo from we hem i kaen tumas, hem i save mekem yumi harem gud blong olwe, mo hem i givim gudfala hop long yumi.+ Mifala i prea se hem mo Masta blong yumi Jisas Kraes, 17 tufala i mekem yufala i harem gud mo tufala i mekem yufala i strong, blong yufala i naf blong mekem olgeta gudfala wok mo talem ol gudfala tok.