Fas Buk Blong Ol King

19 Nao Ehab+ i talemaot long Jesebel+ olgeta samting we Elaejah i mekem, mo olsem wanem hem i kilim olgeta profet ya oli ded long naef blong faet.+ 2 Nao Jesebel i sanem wan mesenja i go long Elaejah, blong i talem se: “!I gud ol god oli panisimgud mi sipos tumoro long taem olsem, mi mi no mekem sem samting ya long yu, we yu mekem long wanwan long olgeta ya!”* 3 Ale Elaejah i fraet tumas, nao i girap mo i ron from laef* blong hem.+ Nao hem i kamtru long Bereseba+ long teritori blong Juda,+ mo hem i lego man ya we i stap givhan long hem long ples ya. 4 Nao hem i gohed, i wokbaot long draeples blong wan fuldei nao i go sidaon aninit long wan tri we nem blong hem brum tri, mo i askem se hem* i wantem ded. Hem i se: “!Inaf! O Jehova, yu tekemaot laef* blong mi naoia,+ from we mi mi sem mak nomo long ol olfala blong mi.”

5 Nao hem i ledaon mo i slip aninit long tri ya. Be kwiktaem nomo wan enjel i tajem hem+ mo i talem long hem se: “Yu girap mo yu kakae.”+ 6 Taem hem i openem ae blong hem, hem i luk we klosap long hed blong hem, i gat wan raon bred antap long ol hot ston mo wan jag blong wota. Nao hem i kakae mo i dring, biaen i slip bakegen. 7 Biaen enjel blong Jehova i kambak seken taem, i tajem hem mo i talem se: “Yu girap mo yu kakae, from we rod we bambae yu folem i longwe tumas.” 8 Nao hem i girap, i kakae mo i dring, mo kakae ya i givim paoa long hem nao i wokbaot 40 dei mo 40 naet i go kasem Horeb, we i bigfala hil blong tru God.+

9 Nao long ples ya, hem i go insaed long wan hol blong ston,+ i slip long ples ya long naet. !Nao luk! Tok blong Jehova i kamtru long hem, se: “?Elaejah, yu yu stap mekem wanem long ples ya?” 10 Nao hem i talem se: “Mi mi bin strong blong mekem wok blong Jehova, God ya we i komanda blong ol ami,+ from we ol man Isrel oli lego kontrak blong yu,+ oli brekemdaon ol olta blong yu, mo oli kilim ol profet blong yu long naef blong faet,+ mo mi wan nomo mi stap. Mo naoia oli stap lukaot mi blong tekemaot laef* blong mi.”+ 11 Be God i talem se: “Yu go aotsaed mo yu stanap antap long bigfala hil ya long fored blong Jehova.” !Nao luk! Jehova i pas i kam,+ mo wan bigfala win we i strong we i strong i stap spletem ol bigfala hil mo i brebrekem ol bigfala ston long fored blong Jehova,+ be Jehova i no stap long win ya. Afta long win ya, i gat etkwek,+ be Jehova i no stap long etkwek ya. 12 Afta long etkwek ya, i gat wan faea,+ be Jehova i no stap long faea ya. Afta long faea ya, i gat wan smol voes we i toktok kwaet nomo.+ 13 Stret long taem we Elaejah i harem voes ya, hem i kavremap fes blong hem long spesel klos blong hem,+ mo i go aotsaed, i go stanap long maot blong hol ya. Nao voes ya i askem long hem se: “?Elaejah, yu stap mekem wanem long ples ya?” 14 Nao hem i talem se: “Mi mi bin strong blong mekem wok blong Jehova, God ya we i komanda blong ol ami, from we ol man Isrel oli lego kontrak blong yu,+ oli brekemdaon ol olta blong yu, mo oli kilim ol profet blong yu long naef blong faet, mo mi wan nomo mi stap. Mo naoia oli stap lukaot mi blong tekemaot laef* blong mi.”+

15 Nao Jehova i talem long hem se: “Yu gobak, mo yu go long draeples long Damaskes. Taem yu kamtru long ples ya, yu makemaot Hasael+ blong i king blong Siria. 16 Mo Jehu we i smol bubu blong Nimsi, yu mas makemaot hem+ blong i king blong Isrel, mo Elisa* we i boe blong Safat, we i stap long taon ya Abelmehola, yu mas makemaot hem blong i tekem ples blong yu, i kam profet.+ 17 Man we i ronwe long naef blong faet blong Hasael,+ Jehu bambae i kilim hem i ded.+ Mo man we i ronwe long naef blong faet blong Jehu, Elisa bambae i kilim hem i ded.+ 18 Mi mi gat 7,000 man yet long Isrel,+ hemia olgeta we oli no bendaon blong wosipim Bal+ mo we maot blong olgeta i no kisim hem.”+

19 Nao Elaejah i aot mo i go faenem Elisa we i boe blong Safat. Long taem ya, Elisa i stap plao mo i gat 24 bul we oli go fastaem long hem, ol bul ya oli putum olgeta tutu. Mo Elisa i stap wetem tufala bul ya we i stap laswan. Nao Elaejah i kam luk hem mo i putum spesel klos+ blong hem long Elisa. 20 Nao Elisa i lego ol bul ya mo i ron biaen long Elaejah mo i se: “Plis, yu letem mi mi go kis long papa mo mama blong mi, nao bambae mi kam biaen long yu.” Elaejah i talem se: “Yu gobak, ?mi mi mekem wanem blong blokem yu?” 21 Nao hem i gobak, i tekem tu bul mo i yusum tufala blong mekem sakrefaes. Hem i yusum ol wud blong plao ya blong boelem mit blong ol bul ya mo i givim long ol man, nao oli kakae. Biaen hem i folem Elaejah mo i stat blong mekem minista wok blong givhan long hem.+