Japta 40

Smasem Hed Blong Snek

Revelesen 20:1-10

Stampa tok: Setan i kalabus long bigfala hol, Rul blong Wan Taosen Yia, laswan traem long ol man, Setan i lus blong olwe

Taem we i kamtru: I stat long en blong taem blong bigfala trabol long wol gogo Setan i lus olgeta

 1. ?Olsem wanem faswan profet tok long Baebol i kamaot tru?

?YU YU save tingbaot faswan profet tok long Baebol? Jeova God i talem profet tok ya long snek i se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem bak blong leg blong hem.” (Jenesis 3:15, NW) !Naoia yumi kasem mak we profet tok ya i kamtru fulwan! Yumi luksave olsem wanem Setan i bin faetem ogenaesesen blong Jeova long heven we i olsem woman blong hem, long ol yia we oli pas. (Revelesen 12:1, 9) Laen blong Snek long wol, wetem ol skul, ol politik mo big bisnes we oli haf blong laen ya, oli ronem mo kilim laen blong woman, hemia Jisas Kraes wetem ol 144,000 tabu man we oli folem hem long wol ya. (Jon 8:37, 44; Galesia 3:16, 29) Setan i mekem Jisas i harem nogud long bodi blong hem gogo hem i ded. Be hemia i olsem we Setan i kilim bak blong leg blong Jisas nomo, from we tri dei biaen, God i givim laef bakegen long Pikinini ya blong hem we i obei long hem.—Ol Wok 10:38-40.

 2. ?Olsem wanem God bambae i smasem Snek ya? ?Mo wanem bambae i hapen long laen blong Snek ya long wol?

² ?Olsem wanem long Snek ya wetem laen blong hem? Long 56 K.T., aposol Pol i raetem wan longfala leta long ol Kristin long Rom. Long lastok blong hem, hem i leftemap tingting blong olgeta olsem: “Bambae i no longtaem, God ya we i stampa blong pis blong yumi, hem i kilimdaon Setan olgeta, we bambae yufala i save go purumbut long hem.” (Rom 16:20) Hemia i no min se bambae i kilim hem smol nomo. !Bambae hem i smasem Setan olgeta! Long ples ya Pol i yusum wan Grik tok, syn·triʹbo, we i minim kilim hem gogo i kam olsem wora, purumbut long hem, smasem hem gogo hem i no moa stap. Long saed blong ol man we oli olsem laen blong Snek, oli mas kasem ol bigfala panis long dei blong Masta, gogo taem bigfala trabol bambae i kamtru long wol, nao bambae hem i smasem mo finisim Bigfala Babilon, mo ol politik blong wol, wetem ol big bisnesman mo ol ami blong olgeta. (Revelesen, japta 18 mo 19) Olsem nao, Jeova bambae i mekem fasin badfren blong tufala laen ya i kasem bigfala mak blong hem. !Laen blong woman blong God bambae i winim laen blong Snek long wol, mo bambae i kilimaot hem blong olwe!

Sakem Setan Long Bigfala Hol

 3. ?Jon i talem long yumi se wanem bambae i hapen long Setan?

³ ?Nao olsem wanem long Setan hem wan wetem ol rabis enjel blong hem? Jon i talem se: “Nao mi luk wan enjel we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen. Nao hem i holem bigfala algita ya, we i snek ya blong bifo, we nem blong hem ‘Setan’, no ‘Man we i stap agensem man.’ Nao i fasem hem long jen ya blong i stap wan taosen yia, nao i sakem hem i go long bigfala hol ya, mo i lokem doa blong hol. Mo i putum mak long doa ya blong bambae man i no openem, blong bambae algita ya i no moa gyaman long ol man, blong pulum olgeta oli go krangke, gogo wan taosen yia i pas. Taem we wan taosen yia ya bambae i finis, algita ya bambae i fri bakegen, be blong smol taem nomo.”—Revelesen 20:1-3.

 4. ?Hu ya enjel ya we i holem ki blong bigfala hol ya? ?Olsem wanem yumi save samting ya?

⁴ ?Hu ya enjel ya? Hem i mas gat bigbigfala paoa blong hem i naf blong sakem bigfala enemi ya blong Jeova i go long hol ya. Hem i holem ‘ki blong lokem bigfala hol ya mo wan bigfala jen.’ ?Samting ya i pulum yumi blong tingbaot wan vison bifo? !Yes, king blong ol lokis, nem blong hem se “enjel ya we i bos blong bigfala hol ya”! (Revelesen 9:11) Naoia bakegen yumi luk Nambawan Man ya blong Leftemap Nem blong Jeova, hemia Jisas Kraes we i kasem paoa blong hem finis, i mekem wan samting. Jif ya blong ol enjel i sakemaot Setan long heven finis, i jajem Bigfala Babilon finis, i kilim i ded “ol king blong wol wetem ol soldia blong olgeta” long Amageden finis. !Taswe hem i no save letem wan narafala enjel we i daon long hem i sakem Setan i go long bigfala hol ya, no gat!—Revelesen 12:7-9; 18:1, 2; 19:11-21.

 5. ?Enjel ya we i bos long bigfala hol hem i mekem wanem long Setan? ?From wanem?

⁵ Taem oli sakemaot bigfala algita we i red olsem faea, i aot long heven i kamdaon, oli kolem hem “snek ya blong bifo we nem blong hem ‘Setan’ no ‘Man we i agensem man’. Hem i gyaman long olgeta man long wol finis, i lidim olgeta oli go krangke.” (Revelesen 12:3, 9) Naoia, we oli rere blong holem hem mo sakem hem i go long bigfala hol, bakegen oli putum ful nem ya long hem se “bigfala algita ya, we i snek ya blong bifo, we nem blong hem ‘Setan’, no ‘Man we i stap agensem man.’ ” Bigfala man ya blong gyaman, man blong trikim mo spolem ol man, man blong agensem God, bambae oli fasem hem long jen mo sakem hem i go “long bigfala hol ya.” Biaen, bambae oli lokem doa blong hol, mo putum mak long doa ya blong bambae man i no save openem. Olsemia nao, Setan i “no moa gyaman long ol man, blong pulum olgeta oli go krangke.” Setan bambae i stap kalabus long hol ya gogo wan taosen yia i pas. Long taem ya hem i no moa save pulum ol man long wol, hem i olsem wan man we i kalabus long wan rum we i tudak mo i daon olgeta, we i no save pulum wan narafala man nating. Enjel ya we i bos long bigfala hol ya hem i tekemaot Setan olgeta, nao i no moa save mekem wan samting long Kingdom we i stanap long stret fasin. !Bambae olgeta man oli haremgud tumas!

 6. (a) ?Wanem i pruvum se ol rabis enjel tu bambae oli go long bigfala hol? (b) ?Afta, wanem i save stat? ?From wanem?

⁶ ?Bambae wanem i hapen long ol rabis enjel blong hem? Olgeta tu “oli stap wet long Dei” blong jajmen. (2 Pita 2:4) Baebol i kolem Setan se “Bielsebal, jif blong ol devel.” (Luk 11:15, 18; Matyu 10:25) ?From we oli wok longtaem finis wetem Setan, i stret we oli mas kasem sem jajmen wetem hem? Yes. Longtaem finis, ol rabis enjel oli fraet long bigfala hol ya. Wan taem, oli fesem Jisas, nao oli askem strong long hem se: “Plis yu no sanemaot mifala i go lus . . . long hol ya we i godaon olgeta.” (Luk 8:31) Be i klia se taem Jisas i sakem Setan i go long bigfala hol, bambae hem i sakem olgeta enjel blong hem oli go long hol ya wetem hem. (Ridim Aesea 24:21, 22.) Taem Setan wetem ol rabis enjel blong hem oli stap kalabus long hol ya, nao Rul blong Jisas Kraes blong Wan Taosen Yia i save stat.

 7. (a) ?Taem Setan wetem ol rabis enjel blong hem oli stap long bigfala hol, oli olsem wanem? ?Olsem wanem yumi save samting ya? (b) ?Hades mo bigfala hol ya tufala i sem mak? (Lukluk futnot.)

⁷ ?Olsem wanem, Setan wetem ol enjel blong hem bambae oli save mekem sam samting taem oli stap long bigfala hol ya? Traem tingbaot anamol ya we i gat seven hed blong hem mo i red we i red. “Fastaem hem i laef, be hem i no moa laef naoia. Bambae i no longtaem, hem i kamaot long bigfala hol ya we i godaon we i godaon olgeta.” (Revelesen 17:8) Taem hem i stap long bigfala hol ya, “hem i no moa laef.” Hem i no moa gat paoa, hem i fas, olsem we hem i ded nomo. Mo tu, aposol Pol i tokbaot Jisas i se: “ ‘?Hu bambae i godaon long [bigfala hol ya, NW] blong tekemaot Kraes long ol dedman, blong i kambak bakegen?’ ” (Rom 10:7) Taem Jisas i stap long bigfala hol ya, hem i ded.a Taswe yumi luksave se taem Setan wetem ol enjel blong hem oli stap long hol ya blong wan taosen yia, i olsem we oli ded, oli no save mekem wan samting nating. !Hemia i gud nyus long ol man we oli laekem stret fasin!

Bambae Oli Jajem Ol Man Gogo Wan Taosen Yia i Pas

8, 9. ?Naoia Jon i talem wanem long yumi long saed blong olgeta we oli sidaon long ol jea blong king? ?Hu ya olgeta ya?

⁸ Taem wan taosen yia i pas finis, Setan bambae i aot long hol ya, i fri blong smoltaem nomo. ?From wanem? Bifo yumi kasem ansa long kwestin ya, Jon i pulum yumi blong tingtingbak long stat blong wan taosen yia ya. Hem i se: “Nao mi luk sam bigfala jea olsem jea blong king oli stap. Mo ol man we i stap sidaon long ol jea ya, God i givim paoa long olgeta blong jajem ol man.” (Revelesen 20:4a) ?Hu olgeta ya we oli stap sidaon long ol jea blong king, mo oli stap rul long heven wetem Jisas we hem i king finis?

⁹ Hemia “ol tabu man” we Daniel i talem se oli stap rul long Kingdom wetem Hem ya we “i olsem pikinini blong man.” (Daniel 7:13, 14, 18) Hemia ol 24 elda ya we oli sidaon long ol jea blong king long heven kolosap long Jeova hem wan. (Revelesen 4:4) Insaed long grup ya i gat ol 12 aposol we Jisas i mekem promes ya long olgeta se: “Long nyufala wol ya we bambae i kam, mi, mi Pikinini blong Man, bambae mi king, mi sidaon long bigfala jea blong mi. Nao long taem ya, yufala twelef we yufala i biaen long mi, bambae yufala tu i king, yufala i save sidaon long ol bigfala jea blong yufala, we oli olsem jea blong king. Nao bambae yufala i hed long ol twelef laen blong ol man Isrel, blong rul long olgeta.” (Matyu 19:28) Insaed long grup ya tu i gat Pol, mo ol Kristin man long Korin we oli stap tru long God. (1 Korin 4:8; 6:2, 3) Mo tu, insaed long grup ya i gat ol memba blong kongregesen blong Laodisia we oli win long faet blong olgeta.—Revelesen 3:21.

10. (a) ?Jon i tokbaot ol 144,000 king olsem wanem? (b) ?From ol tok we Jon i talem finis, yumi save se hu ya sam long olgeta 144,000 king ya?

¹⁰ I gat 144,000 jea blong king we oli rere, blong ol tabu man ya we oli win long faet blong olgeta oli sidaon long olgeta. “God i pemaot olgeta finis, i tekemaot olgeta long ol narafala man, nao oli fri, oli olsem ol fas kakae blong garen, oli blong givim i go long God mo long Smol Sipsip ya.” (Revelesen 14:1, 4) Nao Jon i gohed i se: “Nao mi luk [ol sol, “NW”] blong olgeta ya tu we ol man oli katemaot hed blong olgeta bifo, from we oli stap talemaot trutok ya we Jisas i wetnes long hem se i tru, mo oli stap talemaot tok blong God. Olgeta ya oli no mekem wosip samtaem long anamol ya we i nogud, mo long pija blong hem. Mo oli no gat mak blong anamol ya long fes blong olgeta, mo long han blong olgeta.” (Revelesen 20:4b) Yes, sam long ol king ya, hemia ol tabu Kristin man we oli ded from bilif blong olgeta. Bifo finis, taem enjel i brekemaot namba faef lok, oli askem long Jeova blong i no moa wet, i givimbak panis long olgeta we oli kilim olgeta oli ded. Long taem ya, oli kasem waet klos blong olgeta, mo hem i talem long olgeta blong wet smoltaem moa. Be naoia hem i givimbak panis finis, hem i kilimdaon Bigfala Babilon, mo hem i yusum King blong ol king mo Masta blong ol masta blong spolem ol nesen, mo hem i sakem Setan i go long bigfala hol.—Revelesen 6:9-11; 17:16; 19:15, 16.

11. (a) ?Wanem mining blong tok ya “oli katemaot hed blong olgeta”? (b) ?Olsem wanem yumi save talem se olgeta evriwan long 144,000 man ya oli ded olsem wan sakrifaes?

¹¹ ?I tru se ol man “oli katemaot hed” blong ol king mo jaj ya? Ating oli katemaot hed blong sam nomo. Be i tru se tok ya i minim ol tabu Kristin we oli ded from bilif blong olgeta, long ol defren kaen fasin.b (Matyu 10:22, 28) Setan i glad blong katemaot hed blong olgeta evriwan ya, be i no olgeta tabu brata blong Jisas we ol man oli kilim olgeta oli ded from bilif blong olgeta. Sam long olgeta oli ded from sik no from oli olfala. Be olgeta tu oli insaed long grup ya we Jon i luk long vison blong hem. Taem oli ded, i olsem we oli givim laef blong olgeta olsem wan sakrifaes. (Rom 6:3-5) Mo tu, i no gat wan long olgeta we oli joen long wol. Taswe olgeta evriwan, wol i no laekem olgeta, i olsem we oli ded long ae blong ol man long wol. (Jon 15:19; 1 Korin 4:13) I no gat wan long olgeta we oli mekem wosip long wael anamol no pija blong hem. Mo taem oli ded, i no gat wan long olgeta we mak blong wael anamol i stap long olgeta. Olgeta evriwan oli win long faet blong olgeta taem oli ded.—1 Jon 5:4; Revelesen 2:7; 3:12; 12:11.

12. ?Jon i talem wanem long saed blong ol 144,000 king? ?Olgeta oli laef bakegen wetaem?

¹² !Nao olgeta man ya we oli win long faet blong olgeta oli laef bakegen! Jon i talem se: “Nao oli laef bakegen, oli joen wetem Kraes, we hem i king, nao oli rul wetem hem, gogo wan taosen yia i pas.” (Revelesen 20:4c) ?Hemia i min se olgeta jaj ya oli ded gogo ol nesen oli lus mo Setan wetem ol rabis enjel blong hem oli go long bigfala hol, nao oli laef bakegen? No gat. Bighaf blong olgeta oli laef bakegen finis, from we oli faet wetem Jisas agens long ol nesen long Amageden. (Revelesen 2:26, 27; 19:14) Yes, Pol i soemaot se sam long olgeta oli laef bakegen smoltaem biaen we Jisas i stap bakegen long 1914, mo hem i soemaot se samfala oli laef bakegen fastaem long ol narafala. (1 Korin 15:51-54; 1 Tesalonaeka 4:15-17) From samting ya, sloslou, olgeta long grup ya wanwan oli laef bakegen, taem oli kasem presen blong rul wetem Kraes long heven long laef ya we i no save finis samtaem.—2 Tesalonaeka 1:7; 2 Pita 3:11-14.

13. (a) ?Wanem tingting we yumi mas gat long saed blong wan taosen yia ya we ol 144,000 man oli rul long hem? ?From wanem? (b) ?Olsem wanem Papias blong Hierapolis i tingbaot wan taosen yia ya? (Lukluk futnot.)

¹³ Bambae oli rul wetem Kraes olsem king mo jaj gogo wan taosen yia i finis. ?Hemia i minim wan taosen prapa yia? ?No hem i wan pija nomo we i minim wan longfala taem we yumi no save hamas yia long hem? “Plante taosen” i save minim wan bigfala namba, we i no gat stret namba blong hem olsem 1 Samuel 21:11 i tokbaot. Be long Revelesen “wan taosen” hem i minim ol prapa yia, from we namba ya i kamaot tri taem long Revelesen 20:5-7 we ol vas ya oli talem “wan taosen yia.” Pol i tokbaot taem blong jajmen ya olsem wan “dei.” Hem i se: “Hem [God] i putum dei finis, we bambae hem i save jajem olgeta man long wol, mo bambae hem i mekem long fasin we i stret nomo.” (Ol Wok 17:31) Pita i talem se long tingting blong Jeova wan dei i olsem wan taosen yia, taswe i stret we Dei ya blong Jajmen i wan taosen prapa yia.c—2 Pita 3:8.

Ol Narafala Dedman

14. (a) ?Jon i talem wanem long saed blong “ol narafala dedman”? (b) ?Olsem wanem tok blong aposol Pol i halpem yumi blong kasem save long mining blong tok ya “laef bakegen”?

¹⁴ ?Be ol king ya bambae oli jajem hu, from we aposol Jon i talem se: “Ol narafala dedman, God i no mekem olgeta oli laef bakegen long ded, gogo wan taosen yia ya i pas”? (Revelesen 20:5b; 20:5a, “NW”) Bakegen, yumi mas lukluk ol vas raonabaot blong kasem stret mining blong tok ya “laef bakegen.” Tok ya i save gat plante defren mining, i dipen nomo long wanem we ol vas raonabaot long hem oli stap tokbaot. Eksampel, Pol i tokbaot ol tabu Kristin brata blong hem i se: “God i mekem yufala i laef bakegen, nating we bifo yufala i ded from ol mastik mo ol sin blong yufala.” (Efesas 2:1, NW) Yes, God i mekem ol Kristin ya we tabu speret i makemaot olgeta oli “laef bakegen” long faswan handred yia. Hem i mekem olsem taem hem i luk olgeta olsem we oli stret man from bilif blong olgeta long sakrifaes blong Jisas.—Rom 3:23, 24.

15. (a) ?Ol Wetnes blong Jeova bifo Kraes, God i tingbaot olgeta olsem wanem? (b) ?Olsem wanem ol narafala sipsip oli “laef bakegen,” mo wetaem bambae oli tekem graon ya i blong olgeta fulwan?

¹⁵ Sem mak long sam Wetnes blong Jeova bifo Kraes, God i luk olgeta olsem oli stret man finis mo oli fren blong hem. Long saed blong Ebraham, Aesak, mo Jekob, nating we trifala i ded finis, be God i luk olgeta olsem we oli “laef.” (Matyu 22:31, 32; Jemes 2:21, 23) Olgeta wetem ol narafala we oli laef bakegen, wetem bigfala kampani blong ol narafala sipsip we oli pastru long Amageden mo ol pikinini blong olgeta we oli bon long nyufala wol, olgeta evriwan ya oli mas kam stretgud olgeta. Kraes wetem ol king mo pris blong hem bambae oli mekem samting ya long wan taosen yia ya we i olsem Dei blong Jajmen. Oli save mekem olsem from ransom sakrifaes blong Jisas. Long en blong Dei ya, “ol narafala dedman” bambae oli “laef bakegen long ded” from we bambae oli kasem mak se oli stret olgeta. Bambae yumi luk we olgeta oli mas winim laswan traem. Be bambae oli stretgud olgeta taem oli fesem traem ya. Taem oli winim traem ya, God bambae i talem long olgeta se oli naf blong laef blong olwe, olsem ol man we oli stret olgeta. Promes ya bambae i kamtru fulwan long olgeta se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) !Yes, wan nambawan fyuja i stap fored long ol man we oli stap obei long God!

Laef Bakegen Fastaem

16. ?Olsem wanem Jon i tokbaot laef bakegen long olgeta we bambae oli rul wetem Kraes olsem king? ?From wanem?

¹⁶ Naoia yumi tingtingbak long olgeta we “oli laef bakegen, oli joen wetem Kraes, we hem i king, nao oli rul wetem hem.” Jon i talem se: “Hemia fas taem we God i mekem ol man blong hem oli laef bakegen long ded.” (Revelesen 20:5a; 20:5b, “NW”) ?Olsem wanem hemia fas taem? “Hemia fas taem,” from we hemia ol faswan man we oli laef bakegen, olsem “ol fas kakae blong garen, oli blong givim i go long God mo long Smol Sipsip ya.” (Revelesen 14:4) Mo tu, hem i impoten moa, taswe hem i fastaem. Olgeta we oli laef bakegen fastaem bambae oli joen wetem Jisas long Kingdom blong hem long heven blong rul wetem hem mo blong jajem ol man long wol. Mo tu, hem i fastaem from we olgeta ya oli kasem nambawan presen. Oli kasem presen we Jisas Kraes nomo i kasem. Olsem Baebol i talem, olgeta nomo bambae oli kasem laef we oli no save ded bakegen samtaem.—1 Korin 15:53; 1 Timote 6:16.

17. (a) ?Olsem wanem Jon i tokbaot blesing blong ol tabu Kristin long fyuja? (b) ?Wanem ya “seken ded”? ?Mo from wanem hem i no save “gat paoa” long ol 144,000 man we oli win finis long faet blong olgeta?

¹⁷ !Hemia nambawan presen we ol tabu man ya oli save kasem long fyuja! Olsem Jon i talem: “Olgeta ya we God i mekem olgeta oli laef bakegen long ded fastaem, oli stap harem gud. God i mekem i gud tumas long olgeta, from we seken ded i no gat paoa long olgeta.” (Revelesen 20:6a) Olsem Jisas i promes finis long ol Kristin man long Smana, olgeta man ya we oli win long faet blong olgeta nao oli laef bakegen long ded “fas taem,” “seken ded” i no save kasem olgeta. Hemia i minim ded blong olwe we man i no moa save laef bakegen. (Revelesen 2:11; 20:14) Yes, seken ded ya i “no gat paoa” long ol man ya we oli win finis, from we oli kasem wan bodi we i no save kam nogud, we i no save ded bakegen samtaem.—1 Korin 15:53.

18. ?Jon i talem wanem long saed blong ol nyufala rula blong wol? ?Bambae oli mekem wanem long ol man?

¹⁸ !Rul blong olgeta bambae i defren olgeta long rul blong ol king blong wol taem Setan i givim paoa long olgeta! Olgeta ya oli bin rul 50 no 60 yia nomo, mo bighaf blong olgeta oli rul sam yia nomo. Plante long olgeta oli mekem ol man oli harem nogud. Mo tu, ?olsem wanem ol nesen oli save kasem blesing blong olwe taem oli stap jenisim ol rula mo ol loa blong olgeta oltaem? Long saed blong ol nyufala man blong rul long wol, Jon i soemaot se oli defren, i se: “Olgeta ya bambae oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.” (Revelesen 20:6b) Bambae oli rul wetem Jisas olsem wan gavman nomo gogo wan taosen yia i pas. Bambae oli mekem wok blong ol pris tu, taem oli yusum sakrifaes blong stret man ya Jisas blong mekem ol man long wol we oli stap obei long God oli kam stret olgeta long bodi, long saed blong speret, mo long fasin blong olgeta. Wok blong olgeta olsem ol king, bambae i pulum olgeta man long wol blong oli joen tugeta blong soemaot ol stret mo tabu fasin blong Jeova God. Wok blong olgeta olsem ol jaj wetem Jisas long wan taosen yia ya, bambae i lidim ol gudfala man long fasin lav gogo oli kasem mak ya, laef blong olwe.—Jon 3:16.

Laswan Traem

19. ?Long en blong Rul blong Wan Taosen Yia, wol ya mo ol man long hem bambae oli olsem wanem? ?Nao Jisas bambae i mekem wanem?

¹⁹ Long en blong Rul blong Wan Taosen Yia, olgeta ples long wol bambae oli olsem Iden bifo. Fulwol bambae i kam olsem paradaes. Ol man bambae oli stretgud olgeta, we oli no moa nidim wan hae pris blong askem God blong fogivim ol sin blong olgeta. Ol sin we oli kasem long Adam bambae i no moa stap. Laswan enemi, hemia ded, bambae hem tu i finis. Yes, Kingdom blong Kraes i mekem stampa tingting we God i gat fastaem i kamtru fulwan, hemia blong mekem wol i stap aninit long wan gavman nomo. Long taem ya nao, Jisas “i givimbak olgeta paoa blong hem long God, Papa blong hem.”—1 Korin 15:22-26; Rom 15:12.

20. ?Jon i talem se wanem bambae i hapen taem laswan traem i kamaot?

²⁰ Naoia i taem blong laswan traem i kamaot. ?Bambae ol man long wol we oli stretgud olgeta, oli mekem olsem tufala fas man long Iden? ?No bambae oli stanap strong mo winim traem ya? Jon i talem long yumi wanem bambae i hapen: “Taem we wan taosen yia ya i pas finis, bambae oli letem Setan i kamaot long kalabus blong hem. Nao hem bambae i go long olgeta ples, blong i gyaman long ol laen blong Gog mo Magog, we hemia ol man blong olgeta kantri long wol. Bambae Setan i tekem ol man ya blong olgeta kantri oli kam wanples blong kilim ol man blong God, mo bambae ol man ya blong hem oli plante tumas, olsem sanbij kolosap long solwora. Nao bambae olgeta ya oli kamtru we oli kavremap olgeta ples long wol, nao bambae oli raon long ples ya we ol man blong God oli stap long hem, mo long bigfala taon ya we God i laekem hem tumas.”—Revelesen 20:7-9a.

21. ?Setan i mekem wanem blong traem ol man laswan? ?Mo from wanem yumi no mas sapraes we sam man bambae oli folem Setan, nating we oli haremgud long Wan Taosen Yia Rul blong Kraes finis?

²¹ ?Wanem bambae i kamaot from laswan traem ya blong Setan? Bambae hem i gyaman long “ol laen blong Gog mo Magog, we hemia ol man blong olgeta kantri long wol.” Bambae hem i pulum olgeta oli kam wanples blong “kilim ol man blong God.” ?Be olsem wanem sam man oli save tekem saed blong Setan, taem oli haremgud long gudfala rul blong God blong wan taosen yia finis? Yumi no mas fogetem se Setan hem i naf blong pulum stret man mo woman, Adam mo Iv, taem tufala i stap haremgud long gudfala laef ya long Paradaes long Iden. Mo tu, hem i naf blong pulum sam enjel long heven we oli luk finis ol nogud frut blong stronghed fasin blong tufala fas man. (2 Pita 2:4; Jud 6) Taswe yumi no mas sapraes we Setan bambae hem i naf blong pulum sam stret man oli folem hem, nating we oli haremgud long gudfala rul blong Kingdom blong God blong wan taosen yia finis.

22. (a) ?Wanem mining blong tok ya “ol man blong olgeta kantri long wol”? (b) ?From wanem Baebol i kolem ol stronghed man ya “Gog mo Magog”?

²² Baebol i talem se ol stronghed man ya oli “man blong olgeta kantri long wol.” Hemia i no min se ol man long wol bambae oli seraot long ol wanwan nesen bakegen. Hemia i soemaot nomo se bambae sam man oli seraot long ol stret, trufala man blong Jeova, mo bambae oli soemaot ol nogud fasin we ol nesen tede oli stap soemaot. Bambae oli “mekem wan nogud plan,” olsem Gog blong Magog long profet tok blong Esikel. Bambae oli wantem spolem gavman we i kamaot long God long wol. (Esikel 38:3, 10-12) Taswe, Baebol i kolem olgeta “Gog mo Magog.”

23. ?Wanem mining blong tok ya se namba blong ol stronghed man i “plante tumas, olsem sanbij kolosap long solwora”?

²³ Namba blong ol man we bambae oli joen wetem Setan blong agensem Jeova oli plante tumas, “olsem sanbij kolosap long solwora.” ?Hemia i minim hamas man? Profet tok i no talem stret namba. (Ridim Josua 11:4; Jajes 7:12.) Namba blong ol stronghed man ya bambae i dipen long ol man wanwan, sipos oli foldaon long ol gyaman trik blong Setan no no gat. Be i klia se bambae i gat plante man oli foldaon, from we “oli raon long ples ya we ol man blong God oli stap long hem, mo long bigfala taon ya we God i laekem hem tumas,” oli ting se oli naf blong winim hem.

24. (a) ?Wanem “taon ya we God i laekem hem tumas”? ?Olsem wanem ol enemi blong hem oli raonem hem? (b) ?Wanem mining blong “ples ya we ol man blong God oli stap long hem”?

²⁴ “Taon ya we God i laekem hem tumas,” hemia i mas minim taon ya we Jisas Kraes i tokbaot long ol man blong hem long Revelesen 3:12. Hem i kolem taon ya “taon blong God blong mi, . . . hemia nyufala Jerusalem ya we bambae God blong mi i sanem i aot long heven, i kam long wol.” Hemia i wan ogenaesesen long heven. ?Olsem wanem ol man long wol oli save “raon” long hem? Oli save mekem olsem taem oli raon long “ples ya we ol man blong God oli stap long hem.” Ples ya hem i afsaed long taon. Taswe “ples ya we ol man blong God oli stap long hem” i mas minim ol man blong God long wol, we oli stap afsaed long Nyufala Jerusalem long heven, mo we oli sapotem gavman blong Jeova. Taem ol stronghed man we Setan i stap lidim olgeta oli agensem ol gudfala man ya, Masta Jisas i tingbaot olgeta olsem we oli agensem hem nomo. (Matyu 25:40, 45) “Ol man ya blong olgeta kantri” bambae oli traem spolem wok blong Nyufala Jerusalem ya long heven we i mekem wol i kam wan paradaes. Taswe taem oli agensem “ples ya we ol man blong God oli stap long hem,” oli agensem “taon ya we God i laekem hem tumas.”

Bigfala Hol Ya Blong Faea Mo Salfa

25. ?Olsem wanem Jon i tokbaot risal blong wok blong ol stronghed man agens long “ples ya we ol man blong God oli stap long hem”? ?Samting ya bambae i mekem wanem long Setan?

²⁵ ?Bambae Setan i win long laswan traem blong hem? No gat. !Bambae i olsem taem blong yumi, we Gog blong Magog i no save winim ol man Isrel long saed blong speret taem hem i agensem olgeta! (Esikel 38:18-23) Jon i eksplenem klia wanem bambae i kamaot i se: “Be nao faea bambae i aot long heven, i kamdaon, i kakae ol man ya blong Setan, nao bambae oli lus. Nao Setan ya we i gyaman long olgeta, enjel bambae i sakem hem i go long bigfala hol ya blong faea, we i fulap long faea mo salfa nomo, we anamol ya we i nogud mo gyaman profet ya, tufala i stap long hem finis.” (Revelesen 20:9b-10a) Long taem ya, oli no sakem Setan long wan bigfala hol nomo. Bambae oli smasem Snek ya blong bifo, kilimaot hem olgeta, olsem we faea i kakae hem.

26. ?From wanem i no tru se “bigfala hol blong faea, we i gat salfa i stap laet long hem” hem i wan prapa ples blong man i harem nogud long bodi blong hem?

²⁶ Yumi makem finis se “bigfala hol blong faea, we i gat salfa i stap laet long hem” i no wan prapa ples we man i harem nogud long bodi blong hem long faea. (Revelesen 19:20) Sipos Setan i mas harem nogud long faea gogo i no save finis, samting ya i min se Jeova i mas letem hem i stap laef. Be laef hem i wan presen, i no wan panis. Ded hem i panis blong sin, mo Baebol i talem se ol dedman oli no save harem soa. (Rom 6:23; Eklesiastis 9:5, 10) Mo tu, biaen bambae yumi ridim se ded wetem Hades, bambae oli sakem tufala i go long sem bigfala hol blong faea mo salfa. !I klia se ded mo Hades tufala i no save harem i soa!—Revelesen 20:14.

27. ?Olsem wanem samting we i kamaot long Sodom mo Gomora i givhan long yumi blong kasem save long mining blong bigfala hol blong faea mo salfa?

²⁷ Olgeta samting ya i soemaot klia se bigfala hol blong faea mo salfa i wan pijatok nomo. Mo tu, faea mo salfa i mekem yumi tingbaot tufala taon ya blong bifo, Sodom mo Gomora. Jeova i spolem tufala taon ya from we rabis fasin i fulap tumas long tufala. Long stret taem blong hem, Jeova i “mekem salfa we i laet i aot long skae, i folfoldaon olsem ren long tufala taon ya Sodom mo Gomora.” (Jenesis 19:24) Baebol i talem se tufala taon ya i “kasem panis long faea we i no save ded samtaem.” (Jud 7) Be tufala taon ya i no stap harem nogud gogo i no save finis. No gat, tufala taon ya i lus, blong olwe, wetem ol rabis man blong olgeta. Tede tufala taon ya i no moa stap, mo i no gat man i save talem stret ples we oli stap long hem fastaem.

28. ?Wanem ya bigfala hol blong faea mo salfa? ?Olsem wanem hem i defren long ded, Hades, mo narafala hol?

²⁸ Stret long poen ya, Baebol i eksplenem mining blong bigfala hol blong faea mo salfa i se: “Bigfala hol blong faea ya, hemia seken ded ya.” (Revelesen 20:14) I klia se hem i sem mak long Gehena we Jisas i tokbaot. Hemia ples we ol man oli ded long hem blong olwe, be i no minim ples blong man i harem nogud long bodi blong hem blong olwe. (Matyu 10:28) Ol man long ples ya, oli ded blong olwe oli no save laef bakegen samtaem. Taswe Baebol i no tokbaot wan ki blong openem bigfala hol blong faea mo salfa. I gat ol ki blong ded, Hades, mo narafala hol nomo. (Revelesen 1:18; 20:1) Bigfala hol ya blong faea mo salfa, neva bambae hem i lego ol man we oli stap long hem.—Ridim Mak 9:43-47.

Harem Nogud Tumas Oltaem Long Dei Mo Long Naet

29, 30. ?Jon i talem wanem long saed blong Devel Setan wetem wael anamol mo gyaman profet? ?Wanem mining blong samting ya?

²⁹ Nao Jon i tokbaot Devel Setan wetem wael anamol mo gyaman profet i se: “Nao long ples ya, long dei mo long naet, bambae trifala i stap harem nogud tumas oltaem from faea, gogo i no save finis.” (Revelesen 20:10b) ?Hemia i minim wanem? Olsem yumi lanem finis, i no stret blong talem se ol saen no pija olsem wael anamol mo gyaman profet, wetem ded mo Hades, oli save harem nogud. Taswe i no gat risen blong bilif se Setan bambae i harem nogud gogo i no save finis. Bambae hem i ded, hem i lus blong olwe.

³⁰ Grik tok ya we i minim “harem nogud tumas,” ba·sa·niʹzo, bigfala mining blong hem se “yusum aean blong testem (narafala aean).” Seken mining blong hem se: “Kilim wan samting blong traem hem.” (The New Thayer’s Greek-English Lexicon of the New Testament) Taem yumi lukluk ol vas raonabaot, yumi luksave se Grik tok ya i min se samting we bambae i hapen long Setan, bambae i stap blong olwe olsem wan eksampel blong soemaot wanem bambae i hapen long man we i traem stanemap kwestin long saed blong stret rul blong Jeova bakegen. Kwestin long saed blong rul blong hem, Jeova bambae i stretem blong olwe. Neva bambae i gat wan man i save sakem kwestin long Jeova bakegen long saed blong rul blong hem. Neva bambae God i letem man i rul blong longtaem bakegen blong pruvum se rul blong man i no stret.—Ridim Ol Sam 92:1, 15.

31. ?Olsem wanem tufala Grik tok we oli joen wetem mining blong “harem nogud tumas” oli givhan long yumi blong kasem save long panis we bambae Devel Setan i kasem?

³¹ Grik wod ya ba·sa·ni·stesʹ, we i minim “man blong givim soa,” Baebol i yusum tu blong minim “bos blong kalabus.” (Matyu 18:34, Kingdom Interlinear) Stret long mining ya, Setan bambae i stap kalabus long bigfala hol blong faea gogo i no save finis. Neva bambae hem i kam fri. Mo tu, long Grik Baebol (Septuagint) we Jon i savegud long hem, oli yusum Grik wod ya (baʹsa·nos) taem oli tokbaot sem blong wan man we i kasem panis ya ded. (Esikel 32:24, 30) Samting ya i givhan long yumi blong luksave se panis we bambae Setan i kasem, bambae hem i sem from, bambae hem i ded blong olwe long bigfala hol blong faea mo salfa. Olgeta wok blong hem bambae oli ded wetem hem.—1 Jon 3:8.

32. ?Ol rabis enjel blong Setan bambae oli kasem wanem panis? ?Olsem wanem yumi save samting ya?

³² Bakegen, vas ya i no tokbaot ol enjel blong Setan. ?Bambae oli aot long hol tu wetem Setan long en blong wan taosen yia? ?Mo bambae oli kasem panis ya ded blong olwe wetem Setan? Ol pruf oli talem se yes. Long pijatok blong Jisas long saed blong ol sipsip mo ol nani, hem i talem se bambae ol nani oli go “long faea ya we bambae i no save ded samtaem, we oli mekem i rere finis blong Setan wetem ol enjel blong hem.” (Matyu 25:41) Tok ya “faea ya we bambae i no save ded samtaem” i mas minim bigfala hol blong faea mo salfa we bambae oli sakem Setan i go long hem. Taem oli sakemaot Setan long heven, oli sakemaot ol enjel blong hem tu. I klia se olgeta tu bambae oli go wetem hem long bigfala hol long stat blong Rul blong Wan Taosen Yia. Taswe yumi save se bambae oli mas lus tu wetem hem long bigfala hol blong faea mo salfa.—Matyu 8:29.

33. ?Wanem laswan haf long Jenesis 3:15 we bambae i kamtru? ?Tabu speret blong Jeova i pulum Jon blong tingbaot wanem naoia?

³³ Olsemia nao, laswan haf blong profet tok blong Jenesis 3:15 bambae i kamtru. Taem oli sakem Setan i go long bigfala hol blong faea, bambae hem i ded olsem snek we man i purumbut long hed blong hem. Setan wetem ol rabis enjel blong hem bambae oli lus blong olwe. Revelesen i no moa tokbaot olgeta bakegen. Profet tok i finis long saed blong olgeta, naoia tabu speret blong Jeova i pulum Jon blong tingbaot samting we ol man we bambae oli wantem laef long wol ya oli intres tumas long hem: ?Taem “King blong ol king” wetem ‘ol man blong hem, we hem i jusumaot olgeta, mo oli stap holem tok blong hem’ oli rul long heven, wanem bambae i kamaot long ol man long wol? (Revelesen 17:14) Blong ansa long kwestin ya, Jon i pulum yumi blong tingtingbak long stat blong Rul blong Wan Taosen Yia.

[Ol Futnot]

[Tok Blong Pija Long Pej 293]

Hemia Ded Si. Maet hem i ples we Sodom mo Gomora i stap long hem bifo

[Tok Blong Pija Long Pej 294]

“Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem bak blong leg blong hem”