Japta 21

Dei Blong Jajem Ol Man, Mo Biaen Long Hem

 1. ?Sam man oli ting se Dei blong Jajem ol man, i olsem wanem?

?YU YU ting se Dei ya blong Jajem ol man i olsem wanem? Sam man oli ting olsem hemia nao, we olgeta man we bambae oli laef bakegen long ded, bambae oli mekem wan longfala laen, nao olgeta wanwan oli stap pas long fes blong Jaj ya we i stap sidaon long bigfala jea blong hem. Nao hem i jajem olgeta wanwan ya from ol samting we oli mekem bifo, nao i raetemdaon ol samting ya long buk blong Hem. Sipos man i bin mekem ol gudfala samting, Jaj ya i sanem i go long heven. Be sipos man i bin mekem ol nogud samting, Jaj ya i sanem i go long faea blong hel.

 2. (a) ?Hu ya i putum Dei ya blong Jajem ol man? (b) ?God i putumap hu blong i jaj?

² Be Baebol i talemaot narakaen samting long Dei ya blong Jajem ol man. Hemia i no wan dei we yumi mas fraet long hem. Baebol i tokbaot God, i se: “Hem i putum dei finis, we i blong jajem olgeta man long wol, long fasin we i stret nomo, long wan man we hem i jusumaot finis.” (Wok 17:31) Jaj ya we God i jusumaot finis, hemia nao Jisas Kraes.

 3. (a) ?Blong wanem yumi save we Kraes bambae i jajem ol man long fasin we i stret nomo? (b) ?Hem bambae i jajem ol man long wanem samting?

³ Yumi save we Kraes bambae i jajem ol man long fasin we i stret nomo. Tok blong profet long Aesea 11:​3, 4 i mekem promes finis, se bambae i mas olsem. Olsem ya nao, hem bambae i no save jajem ol man long ol sin blong olgeta we oli mekem bifo, taem oli no savegud yet wil blong God. Baebol i eksplenem gud, se taem man i ded, i fri long ol sin ya we hem i mekem bifo. I talem se: “Taem wan man i ded, hem i fri long olgeta sin blong hem.” (Rom 6:7) Hemia i min se taem wan man bambae i laef bakegen long ded, Kraes i jajem man ya long ol samting we bambae i stap mekem long Dei blong Jajem ol man. Hem i no save jajem man ya long ol samting we i mekem bifo we i ded.

 4. (a) ?Dei blong Jajem ol man, i longfala olsem wanem? (b) ?Hu ya olgeta ya we bambae oli jaj wetem Kraes?

⁴ Dei ya blong Jajem ol man, i no olsem wan prapa dei blong 24 haoa. Baebol i klia long samting ya taem i tokbaot olgeta ya we bambae oli joen wetem Jisas Kraes, long wok ya blong jajem ol man. (1 Korin 6:​1-3) Aposol Jon i talem se: “Nao mi luk ol bigfala jea olsem jea blong king oli stap. Mo olgeta ya we i stap sidaon long ol jea ya, oli kasem paoa blong jajem ol man.” Ol jaj ya oli olgeta man ya blong Kraes we “oli laef bakegen, oli king wetem Kraes, nao oli rul wetem hem blong 1,000 yia.” Olsem ya nao, Dei ya blong Jajem ol man, longfala blong hem, 1,000 yia. Long sem 1,000 yia ya, “ol nyufala heven,” (Kraes wetem olgeta 144,000 gudfala man blong hem) bambae oli rulum “nyufala wol.”​—Revelesen 20:​4-6; 2 Pita 3:13.

5, 6. (a) ?Man ya blong raetem ol Sam blong Baebol, i talem wanem long Dei ya blong Jajem ol man? (b) ?Long Dei blong Jajem ol man, wol ya bambae i wanem kaen ples blong stap long hem?

⁵ Luklukgud long ol pija long ol pej ya. Oli soemaot se Dei ya blong Jajem ol man, bambae i gud tumas long olgeta man. Man blong raetem ol Sam blong Baebol, i tokbaot Dei ya, i se: “Ol garen, mo ol samting we i stap long ol, bambae oli glad tumas. Mo long semtaem ya, olgeta tri blong bus bambae oli singsingaot, nao oli hapi tumas long fes blong Jeova. From hem i kam finis; hem i kam finis blong jajem wol. Hem bambae i jajem ol gudfala graon long fasin we i stret nomo, mo hem bambae i jajem olgeta man long ol gudfala fasin blong hem.”​—Sam 96:​12, 13.

⁶ Long Dei blong Jajem ol man, olgeta ya we bambae oli no ded long Amageden, bambae oli wok blong mekem wol i kam wan paradaes. Mo olgeta we bambae oli stap long paradaes ya, bambae oli save welkamem ol dedman, taem oli stanap oli laef bakegen. (Luk 23:43) Olgeta dedman ya bambae oli save joen bakegen wetem famle blong olgeta. !Hemia i wan samting blong glad ya! !Yes, bambae i gud tumas blong stap long pis, mo blong man i no moa save sik bakegen, mo blong faenemaot ol samting we God i wantem! Baebol i talem se: “Taem yu yu jajem wol, olgeta man we oli stap long ol gudfala graon, bambae oli lanem olgeta stret fasin.” (Aesea 26:9) Long Dei blong Jajem ol man, olgeta man bambae oli lanem ol samting long saed blong Jeova, mo bambae oli gat jans blong obei long hem, mo blong mekem ol wok blong hem.

 7. (a) ?Long Dei blong Jajem ol man, bambae olsem wanem long olgeta ya we oli wantem obei long God? (b) ?Be olsem wanem long olgeta ya we oli no wantem?

⁷ Jisas Kraes, wetem olgeta 144,000 king blong hem, bambae oli jajem olgeta man taem oli stap long paradaes olsem. Ol man we oli wantem mekem ol wok blong Jeova, bambae oli save kasem laef we i no save finis samtaem. Be bambae i gat samfala man we oli no wantem obei long Jeova, nating sipos oli stap long gudfala paradaes. Baebol i talem se: “Nating sipos yumi gud long ol rabis man, be hem bambae i no save lanem ol stret fasin. Long ples blong olgeta stret fasin hem bambae i stap mekem i no stret.” (Aesea 26:10) Olgeta rabis man bambae oli gat jans blong jenisim fasin blong olgeta, mo blong lanem olgeta fasin we oli stret nomo. Sipos oli no jenis, oli mas ded. Sam blong olgeta bambae oli mas ded bifo we Dei blong Jajem ol man i finis. (Aesea 65:20) God bambae i no save letem ol rabis man ya oli stap blong spolem paradaes long wol.

 8. ?Olsem wanem Jisas i soemaot we bambae i no isi long sam man blong folem olgeta stret fasin long Dei blong Jajem ol man?

⁸ Long sam blong olgeta man ya we bambae oli laef bakegen long ded, bambae i no isi nating blong folem olgeta stret fasin. Be blong sam narafala man bambae i moa isi. Taem Jisas Kraes i stap long wol, hem i soemaot we bambae i olsem. Kolosap olgeta man oli no bin lesin long Jisas, no long ol man blong hem. Nating sipos oli harem Jisas taem hem i stap prij, no sipos oli lukluk ol merikel blong hem, be oli no bilif se hem i Mesaea. Taem Jisas i sanem ol man blong hem blong oli go prij long olgeta taon, hem i bin tokbaot taon ya we bambae i no wantem lesin, i se: “Tru mi talem long yufala, long Dei blong Jajem ol man, bambae trabol blong Sodom mo Gomora i no bigfala olsem trabol blong taon ya.”​—Matyu 10:15.

9, 10. (a) ?Hu ya olgeta man nogud ya we bambae oli laef bakegen long ded, long Dei ya blong Jajem ol man? (b) ?Blong wanem bambae i strong tumas long samfala man nogud, be i no strong olsem long sam narafala man nogud?

⁹ Toktok ya blong Jisas i soemaot we samfala man blong Sodom mo Gomora ya blong bifo, bambae oli stap long wol long Dei blong Jajem ol man. Olgeta man ya oli man nogud bifo, be sam blong olgeta ya bambae oli laef bakegen long ded. (Jenesis 19:​1-26) From sore blong hem, taswe Jeova bambae i mekem olsem, blong ol man ya bambae oli gat jans blong faenemaot plan blong hem. Sem mak bakegen toktok blong Jisas i soemaot we sam blong ol man nogud ya long taem blong hem, bambae oli laef bakegen long Dei blong Jajem ol man. Olgeta ya tu, bambae oli gat jans bakegen blong faenemaot ol samting we God i wantem. Olgeta man ya we bambae oli laef long Dei blong Jajem ol man, bambae oli mas wantem we Kraes i king. ?Yu ting se samting ya bambae i strong moa long ol man blong Sodom? ?No bambae i strong moa long olgeta ya we bifo oli no wantem lesin long Jisas, mo long ol man blong hem?

¹⁰ Bambae i strong moa long olgeta man ya we bifo oli no wantem Jisas. Jisas i bin mekem sam merikel long taon ya, Kapaneam, nao hem i tokbaot ples ya, i se: “Sipos wan man i mekem ol merikel long Sodom bifo, olsem we [mi] mekem finis long ples blong yufala, bambae Sodom ya i no lus, i stap yet tede. Taswe mi talem long yufala, long Dei blong Jajem ol man, bambae trabol blong ples ya Sodom, i no strong olsem trabol ya we bambae i blong yufala.” (Matyu 11:​22-24) Yes, long Dei blong Jajem ol man, bambae i strong moa long olgeta ya blong Kapaneam blong talemaot we oli rong bifo, mo we oli wantem we Kraes i king, mo we bambae oli wantem mekem ol wok blong hem. Long olgeta man blong Sodom bifo, we olgeta tu bambae oli mas lanem olgeta stret fasin bambae i no strong olsem.

11. ?Blong wanem bambae i moa isi long ol “stret man” long Dei blong Jajem ol man, be i no isi olsem long olgeta ya we oli “no stret”?

¹¹ Olsem ya nao, long olgeta man ya we oli “no stret,” we bambae oli laef bakegen long ded, bambae i moa isi long sam blong olgeta ya blong kasem save long God, mo blong mekem ol wok blong hem. Be long sam narafala blong olgeta ya we oli “no stret,” ol samting ya bambae i no isi nating blong mekem. (Matyu 12:​41, 42) ?Be olsem wanem long olgeta “stret man” ya we bambae oli laef bakegen​—olsem Ebraham, Aesak, Job, Debra, Rut, Daniel mo plante narafala bakegen? Bifo we oli ded, oli wantem tumas blong Mesaea i kam. !Taem olgeta ya bambae oli stap long Dei blong Jajem ol man, nao oli kasem save long Mesaea, mo oli fanemaot we hem i stap rul finis long heven, bambae oli glad tumas! Taswe bambae i moa isi long ol “stret man” blong mekem olgeta stret fasin i bitim long olgeta ya we oli “no stret.”​—Wok 24:15.

MAN BLONG KASEM LAEF, MO MAN BLONG PAS LONG KOT

12. ?Jon 5:​28-30 i talem we hu bambae i “stanap bakegen blong kasem laef,” mo hu bambae i “stanap bakegen blong pas long kot”?

¹² Jisas i bin tokbaot samting ya we bambae i kamaot long Dei blong Jajem ol man, i se: “Olgeta ya we oli stap long beregraon, bambae oli harem voes blong hem, nao oli kamaot. Olgeta we oli mekem ol gudfala fasin, oli stanap bakegen blong kasem laef. Mo olgeta we oli mekem ol rabis fasin, oli stanap bakegen blong kot bambae i jajem olgeta. . . . mi mi stap jajem man stret long ol samting we mi harem; mo taem mi jajem man, mi mekem i stret nomo, from we mi no traem mekem olsem we mi nomo mi wantem, be mi stap mekem olsem we hem we i sanem mi, hem i wantem.” (Jon 5:​28-30) ?Wanem mining blong tufala tok ya, “stanap bakegen blong kasem laef,” mo “stanap bakegen blong kot bambae i jajem olgeta”? ?Mo tufala samting ya i blong hu?

13. ?Wanem mining blong tok ya “stanap bakegen blong kasem laef”?

¹³ Yumi lanem finis, se taem ol dedman bambae oli stanap bakegen long beregraon, kot bambae i no save jajem olgeta long ol samting we oli stap mekem bifo. Be kot bambae i jajem olgeta long ol samting we bambae oli stap mekem long Dei blong Jajem ol man. Olsem ya nao, taem Jisas i tokbaot “olgeta we oli mekem ol gudfala fasin,” mo “olgeta we oli mekem ol rabis fasin,” hem i minim ol gudfala fasin mo ol rabis fasin we bambae oli mekem long Dei blong Jajem ol man. From ol gudfala fasin ya we bambae oli mekem, plante blong olgeta ya we bambae oli laef bakegen, bambae oli kam gud moa long evri dei, gogo kasem en blong 1,000 yia ya blong Dei blong Jajem ol man, ale oli stret gud olgeta. Olgeta dedman ya we bambae oli “stanap blong kasem laef” bambae oli kasem laef we i stret gud olgeta, oli no moa gat sin.

14. ?Wanem mining blong tok ya “stanap bakegen blong kot bambae i jajem olgeta”?

¹⁴ ?Be olsem wanem long olgeta ya we bambae ‘oli stap mekem ol rabis fasin’ long Dei blong Jajem ol man? Olgeta ya bambae oli “stanap bakegen blong kot bambae i jajem olgeta.” ?Hemia i minim wanem? I min se kot bambae i jajem olgeta se oli mas ded. Ale, olgeta man ya bambae oli mas ded samwe long Dei ya blong Jajem ol man, no long en blong hem. ?Blong wanem? From we bambae oli stap mekem ol rabis fasin; oli stronghed, oli no wantem lanem mo mekem ol gudfala fasin.

TAEM DEI BLONG JAJEM OL MAN BAMBAE I STAT

15. ?Wanem samting ya we bambae i kamaot bifo we Dei blong Jajem ol man bambae i stat?

¹⁵ Aposol Jon i lukluk long wan drim ol samting we bambae i kamaot bifo we Dei blong Jajem ol man bambae i stat. Hem i raetem se: “Nao mi luk wan bigfala waet jea, we i olsem jea blong King, mo i gat wan man i stap sidaon long hem. Wol mo heven, tufala i ronwe long fes blong man ya,. . . Nao mi luk olgeta dedman, olgeta haeman mo olgeta we oli no gat nem, oli kam stanap oli fesem bigfala jea ya. . . Nao man ya i jajem ol dedman.” (Revelesen 20:​11, 12) Olsem ya nao, bifo we Dei blong Jajem ol man bambae i stat, olgeta fasin ya blong naoia, hemia nao “wol mo heven,” bambae i lus. Olgeta man we oli stap mekem ol wok blong God, bambae oli no save lus. Be olgeta man nogud, bambae oli ded long Amageden.​—1 Jon 2:17.

16. (a) ?Olgeta dedman wetem hu moa, bambae oli mas pas long kot long Dei blong Jajem ol man? (b) ?Jaj i yusum wanem blong jajem olgeta ya?

¹⁶ I no olgeta “dedman” nomo we bambae oli mas pas long kot long Dei blong Jajem ol man. Olgeta “laef” man we bambae oli no ded long Amageden, mo ol pikinini blong ol man ya, bambae oli mas pas long kot tu. (2 Timote 4:1) Long drim blong hem, Jon i luk olsem wanem kot bambae i jajem olgeta ya. Hem i raetem se: “Nao man ya i jajem ol dedman long ol samting we i stap long ol buk ya, i stret nomo long ol fasin we oli bin mekem. Mo solwora i givimbak ol dedman we oli stap long hem, mo ded wetem Hades tufala i givimbak ol dedman we oli stap long tufala, nao kot i jajem olgeta wanwan, stret long ol samting we oli bin mekem.”​—Revelesen 20:​12, 13.

17. ?Wanem ol “buk” ya we jaj bambae i yusum blong jajem olgeta “laef” man, mo olgeta “dedman”?

¹⁷ ?Wanem “ol buk” ya we kot i yusum blong jajem ol “dedman,” wetem olgeta ya we oli “laef”? Oli no Baebol, be oli sam narafala buk bakegen. Ol samting we oli stap long ol buk ya, oli kam long Jeova. Ol loa mo ol oda blong hem, oli stap long ol buk ya. Taem ol man bambae oli ridim ol buk ya, oli save faenemaot wil blong God. Ol loa mo ol oda blong “ol buk” ya, oli olsem wan skel blong skelem, no jajem olgeta man we bambae oli stap long wol. Olgeta we bambae oli obei long ol samting we i stap long ol buk ya, bambae sloslou oli kam stret gud olgeta, from sakrafaes blong Kraes we i blong pemaot olgeta man.

18. (a) ?Bambae olsem wanem long en blong Dei ya blong Jajem ol man? (b) ?Wanem mining blong tok ya se ol “dedman” bambae oli laef bakegen long en blong 1,000 yia ya?

¹⁸ Long en blong Dei ya blong Jajem ol man, we longfala blong hem i 1,000 yia stret, bambae i no moa gat man we oli mas ded from sin blong Adam. Olgeta man bambae oli kasem prapa laef ya. Hemia nao mining blong Baebol, taem i talem se: “Be olgeta narafala dedman [we oli no blong 144,000 we oli blong go long heven,] oli laef bakegen long ded, gogo wan taosen yia ya i pas finis.” (Revelesen 20:5) Tok ya se “olgeta narafala dedman,” i no min se i gat sam narafala man bakegen we bambae oli stanap long ded, long en blong 1,000 yia ya blong Dei blong Jajem ol man. Be i min se olgeta man bambae oli kasem laef we i stret gud olgeta. Bambae oli sem mak nomo long Adam mo Iv, long garen blong Iden. Long fastaem, laef blong tufala tu i stret gud olgeta. ?Oraet, bambae olsem wanem long olgeta man?

BIAEN LONG DEI BLONG JAJEM OL MAN

19. ?Kraes bambae i mekem wanem long en blong Dei blong Jajem ol man?

¹⁹ Taem Jisas Kraes bambae i finisim ol wok ya we God i bin givim long hem, hem “bambae i putum kingdom long han blong God blong hem, Papa blong hem.” Hemia nao bambae i kamaot long en blong 1,000 yia ya blong Dei blong Jajem ol man. Bambae long taem ya, olgeta enemi oli lus finis. !Laswan blong olgeta ya we oli lus, hemia nao ded we i kam from sin blong Adam! Ale, stret long taem ya, kingdom bambae i blong God Jeova. Hem nao bambae i King blong rulum Kingdom ya.​—1 Korin 15:​24-28.

20. (a) ?Olsem wanem Jeova bambae i jusumaot ol man ya we oli naf blong nem blong olgeta i save go long “buk blong laef”? (b) ?Blong wanem i stret nomo blong olgeta man bambae oli kasem wan laswan samting we i traem olgeta?

²⁰ ?Olsem wanem Jeova bambae i jusumaot ol man ya we oli naf blong nem blong olgeta i save go long “buk blong laef”? (Revelesen 20:​12, 15) Bambae hem i traem olgeta man. ?Yu yu rimemba long wanem samting Adam mo Iv tufala i foldaon long hem? ?Mo yu yu rimemba long Job, we hem i strong long saed blong God, be ol trabol we oli kasem hem oli no save spolem hem? Kolosap olgeta man we bambae oli laef long en blong 1,000 yia ya, oli no bin kasem wan samting blong traem bilif blong olgeta. Taem we oli laef bifo, oli no save long wil blong God. Oli blong rabis wol blong Setan, oli “no stret” man. Be taem we oli laef bakegen, long Paradaes, bambae i isi nomo long olgeta blong mekem ol wok blong God. ?Blong wanem? From we bambae i no gat Setan blong blokem olgeta. ?Be olgeta plante milyan milyan man ya, we bambae oli stret gud olgeta, bambae oli mekem ol wok blong Jeova yet, sipos hem i givim jans long Setan blong i traem blokem olgeta, no no gat? ?Yu ting se Setan bambae i save spolem olgeta ya, olsem i mekem bifo long Adam mo Iv?

21. (a) ?Jeova bambae i traem ol man olsem wanem? (b) ?Wanem bambae i hapen long olgeta man ya we bambae Hem i traem?

²¹ Blong faenemaot ansa long ol kwestin olsem, bambae Jeova i letem Setan, wetem ol rabis enjel blong hem, oli aot long bigfala hol ya we oli stap long hem blong 1,000 yia ya. ?Wanem risal blong samting ya? Baebol i soemaot we Setan bambae i pulum sam man oli aot long saed blong Jeova. Olgeta ya bambae oli olsem “sanbij blong solwora.” Hemia i min se, namba blong olgeta i no klia yet. Taem bambae God i traem olgeta finis, Setan wetem ol rabis enjel blong hem, mo olgeta man we oli foldaon, bambae oli lus long “lugun blong faea,” wan pijatok ya blong talemaot seken (no itenel) ded. (Revelesen 20:​7-10, 15) Be ol man ya we nem blong olgeta i stap long “buk blong laef,” hemia i min se Jeova i jajem olgeta finis, se hat, maen mo bodi blong ol man ya, i stret gud olgeta. Ale, taswe bambae hem i letem olgeta oli laef foreva long paradaes long wol.

NAOIA TU I DEI BLONG JAJEM OL MAN

22. ?Blong bambae yumi save laef long Dei blong Jajem ol man, mo long taem ya we bambae i blong traem olgeta man, yumi mas lukaot we bambae yumi no lus long wetaem?

²² Ale, yumi luk finis we Baebol i talemaot olgeta samting we bambae oli kamtru long 1,000 yia ya blong fyuja. Mo tu, i soemaot we i no gat risen blong yumi fraet long fyuja. Be bigfala kwestin, hemia nao: ?Olsem wanem long yu? ?Yu bambae yu stap long paradaes long wol, blong kasem ol gudfala samting ya we bambae oli kam long han blong God Jeova? Samting ya i dipen long hemia, we yu bambae yu no lus long wan narafala dei blong jajem ol man, wan dei ya we i stap naoia. Yes, naoia tu i “dei blong jajem ol man we oli no obei long God, wan dei blong oli lus.”​—2 Pita 3:7.

23. (a) ?Kraes i stap seraot olgeta man oli go long wanem tufala kampani? (b) ?Bambae olsem wanem long tufala kampani ya? ?Blong wanem?

²³ Yes, i stat long taem ya we Kraes i bin kambak blong sidaon long bigfala jea blong hem long heven, i kasem naoia, olgeta man oli stap long kot. Naoia tu i wan “dei blong jajem ol man,” mo hemia i fastaem long bigfala Dei ya blong Jajem ol man, we bambae i blong 1,000 yia. Tede, we i taem blong jajem ol man, Kraes i stap seraot olgeta man. Olgeta we oli olsem ol “nani,” hem i putum oli go long lef saed blong hem, be olgeta we oli olsem ol “sipsip,” hem i putum oli go long raet saed blong hem. Olgeta “nani” ya bambae oli mas lus, from we oli no givhan nating long ol tabu “brata” blong Kraes, taem oli stap mekem ol wok blong God. Ol “nani” ya, fasin blong olgeta bambae i soemaot we oli man blong sin, oli nogud, oli strong finis long olgeta rabis fasin blong olgeta. Be olgeta “sipsip,” bambae oli kasem laef aninit long Kingdom rul, from we oltaem oli stap sapotem “ol brata” blong Kraes long evri samting.​—Matyu 25:​31-46.

[Tok blong pija long pej 178]

?Long Dei blong Jajem ol man, bambae i trabol moa long hu?

Ol man we oli stap harem Jisas

Olgeta we oli lus long Sodom mo Gomora