Japta 12

Baptaes Blong Jisas

SIKIS manis finis Jon i stap prij. Long taem ya, Jisas i gat 30 yia blong hem. Nao hem i kam long Jon long Jodan Reva. ?From wanem? ?Hem i kam blong storeyan nomo wetem Jon? ?Hem i wantem faenemaot olsem wanem long wok blong Jon nomo? No gat. Jisas i kam blong askem Jon blong baptaesem hem.

Be Jon i wantem blokem hem, i talem se: “I stret nomo blong yu yu baptaesem mi. ?Olsem wanem yu kam long mi blong mi mi baptaesem yu?” Jon i save se kasen-brata ya blong hem, Jisas, hem i spesel Pikinini blong God. Traem rimemba wanem i bin hapen taem we Jon i stap yet long bel blong mama blong hem. Long taem ya, Meri i gat bel tu, Jisas i no bon yet. Ale Meri i kam blong luk mama blong Jon. Nao Jon i muvmuf insaed long bel blong mama blong hem, from we hem i glad. Yumi save se, biaen, mama blong Jon, Elisabet, hem i storeyan long Jon long samting ya. Mo tu, hem i mas storeyan long Jon long tok we enjel i bin talem long Meri, se hem i mas gat bel mo bambae hem i mas bonem Jisas. Mo hem i mas tokbaot naet we Jisas i bon, we sam enjel oli kamtru long ol man blong lukaot long sipsip, ale, oli talemaot long olgeta se Jisas i bon finis.

Taswe Jisas i no wan strenja long Jon. Mo Jon i save se baptaes we hem i stap mekem i no stret long Jisas. Jon i stap baptaesem man blong soemaot se man ya i tanem tingting blong hem from ol sin blong hem. Be Jisas i no gat sin. Nating we Jon i traem blokem hem, Jisas i ansa long hem i se: “No, be yu mas mekem hemia fastaem. Long fasin ya bambae yumi mekem olgeta samting we God i wantem i kamtru.”

?From wanem i stret we Jisas i tekem baptaes? From we baptaes blong Jisas i saen blong wan samting. Hem i no blong soemaot se Jisas i tanem tingting blong hem from sin, be hem i blong soemaot se Jisas i givim laef blong hem i go long God, blong mekem ol samting we Papa blong hem i wantem. Fastaem Jisas i kapenta. Be naoia i stret taem blong hem i statem minista wok blong hem. Jeova God i sanem hem i kam long wol blong mekem wok ya. ?Olsem wanem nao? ?Jon i ting se wan narakaen samting bambae i kamaot, taem hem i baptaesem Jisas?

Biaen Jon i talem se: “God i sanem mi blong mi mekem baptaes long wora, mo taem mi mi kam, mi no save we hemia man ya. Be God i talemaot long mi, se ‘Bambae yu save luk Tabu Speret i kamdaon, i stap long wan man. Man ya bambae i mekem baptaes long Tabu Speret.’ ” Taswe Jon i save se bambae hem i mas baptaesem wan man, we tabu speret blong God i mas kamdaon long man ya. Ating hem i no sapraes tumas taem Jisas i kamaot long wota, nao hem i luk we ‘Tabu Speret i kamdaon long hem, olsem wan sotleg we i kamdaon.’

Be i gat wan moa samting i kamaot taem Jisas i tekem baptaes. ‘Skae i open long hem.’ ?Hemia i minim wanem? I klia we taem Jisas i tekem baptaes, God i givimbak long hem ol save we hem i gat long heven bifo, taem hem i no kam long wol yet. Nao Jisas i save rimemba fulwan laef blong hem taem hem i stap long heven wetem Papa blong hem Jeova God, olsem wan speret pikinini blong hem. Hem i save rimemba olgeta samting we God i bin talem long hem long heven long taem ya.

Mo tu, taem hem i tekem baptaes, wan voes i kamaot long heven, i talem se: “Hemia pikinini blong mi, we mi laekem hem tumas. Tingting blong mi i harem gud tumas long hem.” ?Voes blong hu ya? ?Voes blong Jisas hem wan? !No gat! Hemia voes blong God nomo. From samting ya, i klia nomo se Jisas i Pikinini blong God. Hem i no God, olsem plante man oli stap talem.

Taem Jisas i kam long wol, hem i wan pikinini blong God we hem i man, olsem fas man ya Adam. Luk i tokbaot baptaes blong Jisas, nao biaen hem i talem se: “Taem Jisas i statem ol wok blong hem blong tij, hem i gat tate yia blong hem. Long tingting blong ol man, Jisas hem i pikinini blong Josef. Josef, hem i pikinini blong Heli . . . pikinini blong Deved . . . pikinini blong Ebraham . . . pikinini blong Noa . . . pikinini blong Adam. Mo Adam, hem i pikinini blong God.”

Adam i wan man nomo, be hem i “pikinini blong God.” Sem mak long Jisas. I no gat wan man long wol samtaem we i hae moa long Jisas. Taem yumi luklukgud long laef blong Jisas, samting ya i klia nomo. Be taem Jisas i tekem baptaes, hem i statem wan nyu kaen fasin fren wetem God, from we hem i kam Pikinini blong God long saed blong speret. I olsem we long taem ya, God i singaot hem blong hem i kambak antap long heven. God i stat blong lidim hem long wan rod, we long en blong hem, Jisas bambae i givim laef blong hem olsem wan sakrafaes blong olwe, blong sevem ol man. Matyu 3:13-17; Luk 3:21-38; 1:34-36, 44; 2:10-14; Jon 1:32-34; Hibrus 10:5-9.

▪ ?From wanem Jisas i no strenja long Jon?

▪ Jisas i no gat sin. ?From wanem hem i tekem baptaes?

▪ ?From ol samting we Jon i save finis long saed blong Jisas, from wanem maet hem i no sapraes, taem tabu speret blong God i kamdaon long Jisas?