Japta 70

Jisas i Mekem Wan Blaenman i Save Lukluk

TAEM ol man Jyu oli wantem stonem Jisas, hem i haed, be hem i no goaot long Jerusalem. Biaen, long Sabat dei, hem wetem ol disaepol blong hem oli stap wokbaot insaed long taon ya Jerusalem. Nao oli luk wan man we taem hem i bon, ae blong hem i blaen. Ale ol disaepol blong Jisas oli askem long hem, se: “?Tija, man ya i blaen taem i bon, be from wanem? ?From sin blong hem, no from sin blong papa mo mama blong hem?”

Maet ol disaepol ya oli gat tingting olsem sam tija, we oli talem se man i save mekem sin taem hem i stap long bel blong mama blong hem yet. Be Jisas i ansa long olgeta, i se: “Samting ya, we man ya i blaen taem i bon, hem i no from sin blong hem, mo i no from sin blong papa mo mama blong hem tu. Samting ya i blong God i save soemaot ol bigfala wok blong hem long laef blong man ya.” Ale man ya i no blaen from wan sin blong hem no from wan sin blong papa mo mama blong hem. Fas man Adam i mekem sin. From samting ya, ol man oli sinman. Taswe taem oli bon, samtaem oli gat wan sik finis, olsem man ya we hem i blaen taem hem i bon. Sik ya blong man ya i givim jans blong Jisas blong soemaot ol bigfala wok blong God long laef blong man ya.

Nao Jisas i talem se oli no mas westem taem, oli mas hareap blong mekem wok ya blong God. Hem i se: “Taem delaet i stap yet, yumi mas mekem ol wok blong hemia we i sanem mi. Bambae tudak i kam, we man i no save wok. Taem we mi mi stap yet long wol ya, mi mi laet blong ol man long wol.” Ded blong Jisas i kolosap nao. I no longtaem bambae hem i stap long tudak long gref blong hem, we hem i no moa save wok. Taswe, taem hem i laef i stap, hem i save tijim plante samting long ol man long wol, olsem we hem i givim laet long olgeta.

Taem Jisas i talem tok ya finis, hem i spet long graon, i mekem smol sofmad long spet ya blong hem, nao i tekem sofmad ya, i putum long ae blong man ya we i blaen. Nao i talem long hem, i se: “Yu go long wora ya Saeloam, yu wasem ae blong yu blong wora ya.” Ale man ya i go mo i wasem ae blong hem. !Saye! !Hem i save luk olgeta samting! Taem hem i kambak, hem i glad we i glad. Hemia fastaem long laef blong hem we hem i save luk evri samting.

Nao ol man ples blong hem wetem ol man we oli save hem bifo oli sapraes tumas long hem. Oli stap asaskem long olgeta se: “?Olgeta, hemia man ya we bifo oltaem i stap sidaon, i stap asaskem mane long ol man, no i no hemia?” Sam man oli stap talem se: “Hemia nao, hemia sem man ya.” Be sam narafala man oli stap talem se: “!No gat! Taem yu luk, yu ting se hem, be i no hemia.” Ale, man ya i tok, i talem se: “Mi ya nao.”

Nao olgeta oli askem long hem, se: “?Be ae blong yu i kamgud olsem wanem?”

Hem i ansa, i se: “Man ya we nem blong hem Jisas, hem i mekem sam sofmad, i putum long ae blong mi, nao i talem long mi, i se ‘Yu go long Saeloam, yu wasem ae blong yu.’ Ale, mi go, nao taem mi wasem ae blong mi, mi save luk olgeta samting.”

Olgeta oli askem se: “?Hem i stap wea?”

Be man ya i talem se: “Mi no save.”

Nao olgeta ya oli tekem man ya we bifo i blaen, oli go long ol lida blong olgeta, hemia ol Farisi. Nao olgeta tu oli askem long man ya olsem wanem ae blong hem i kamgud bakegen. Man ya i talem bakegen long olgeta se: “Hem i putum sofmad long ae blong mi, nao mi go wasem ae blong mi, mo biaen, mi save luk olgeta samting.”

Ol Farisi oli mas glad blong harem nyus ya se Jisas i mekem ae blong blaenman ya i gud bakegen. Be no gat. Olgeta oli tok agens long Jisas, oli se: “Man we i mekem samting ya, hem i no kamaot long God.” ?From wanem oli talem olsem? Oli gohed se: “From we hem i no holem loa blong Sabat dei.” Be sam narawan long olgeta oli talem se: “?No, be olsem wanem man we i man blong mekem sin, i save mekem ol saen ya blong paoa blong God?” Ale, sam long olgeta i gat wan tingting, mo sam long olgeta i gat narafala tingting.

Ale ol Farisi oli askem long man ya bakegen, se: “Yu yu talem se man ya i mekem ae blong yu i kamgud. ?Be yu yu ting se hem i wanem man?”

Man ya i ansa, i se: “Hem i wan profet ya.”

Be ol Farisi oli no save bilif long samting ya. Oli ting se Jisas mo man ya tufala i mekem wan plan blong trikim ol man. Ale blong traem stretem bisnes ya, oli singaot papa mo mama blong man ya, tufala i kam, blong oli askem sam kwestin long tufala. Jon 8:59; 9:1-18.

▪ ?From wanem ae blong man ya i blaen? ?Samting ya i kamaot, i no from wanem?

▪ Taem Jisas i tokbaot tudak we man i no moa save wok, hem i minim wanem?

▪ ?Taem Jisas i mekem ae blong blaenman i kamgud bakegen, ol man ples blong hem mo ol man we oli save hem oli tingting olsem wanem?

▪ ?Sam long ol Farisi oli gat wanem tingting, taem oli luk merikel ya? ?Sam narafala long olgeta, oli gat wanem narafala tingting?