Japta 71

Ol Farisi Oli No Wantem Bilif

PAPA mo mama blong man ya we bifo i blaen, tufala i fraet taem ol Farisi oli singaot tufala i kam. Tufala i save rul ya we oli putumap finis: Man we i bilif long Jisas, oli save sakemaot hem long haos prea, mo hem i no moa save kam insaed bakegen, i no moa save joen wetem ol man ples blong hem. Samting ya i strong long ol famle we oli pua finis. Taswe tufala ya i fraet.

Nao ol Farisi oli askem long tufala se: “?Olsem wanem? Man ya i pikinini blong yutufala? ?Yutufala i save talem se taem hem i bon, hem i blaen? ?Sipos i olsem, ae blong hem i kamgud olsem wanem?”

Nao papa mama i agri se hemia boe blong tufala mo fastaem hem i blaen. Ale tufala i talem se: “Mitufala i save se hem i pikinini blong mitufala. Mo mitufala i save we taem hem i bon, hem i blaen. Be mitufala i no save wanem hem i mekem we naoia hem i save luk olgeta samting. Mo mitufala i no save tu, hu man i mekem ae blong hem i kamgud.” Yumi save se man ya i mas storeyan wetem papa mama blong hem long ol samting we i bin kamaot long hem. Be papa mo mama i mas lukaot long ol tok we tufala i talem long ol Farisi, taswe tufala i talem se: “I moa gud yufala i askem long hem. Hem i bigman finis, hem i save talemaot ol tok blong hem.”

Ale ol Farisi oli singaot man ya bakegen blong i kam stanap long fes blong olgeta. Nao oli traem faenem sam rabis poen long Jisas, blong mekem man ya i fraet. Nao oli talem se: “Yu yu mas talem ol trutok ya blong yu leftemap nem blong God. Mifala ya i save we man ya i man blong mekem sin.”

Man ya we bifo i blaen, hem i no agensem tok blong olgeta be hem i talem nomo se: “Mi mi no save we man ya i man blong mekem sin, no i no olsem. Samting ya nomo mi save, we fastaem mi mi blaen, be naoia mi save luk olgeta samting.”

Be ol Farisi oli wantem faenem wan poen long store blong man ya, taswe oli askem bakegen long hem se: “?Hem i mekem olsem wanem long yu? ?Hem i mekem wanem samting blong mekem ae blong yu i kamgud?”

Man ya i taed long olgeta, i se: “Mi mi talem long yufala wan taem finis, be yufala i no save lesin long mi. ?From wanem yufala i wantem harem store ya bakegen?” Nao hem i jikim olgeta, i se: “?Yufala tu i wantem kam man blong hem?”

Tok ya i mekem ol Farisi oli kam kros tumas. Nao oli stap tok nogud long hem, oli se: “A, yu yu man blong hem, be mifala i man blong Moses. Mifala i savegud we God i toktok long Moses, be man ya, mifala i no save weples hem i aot long hem.”

Nao man ya we bifo hem i stap askem mane long ol man, hem i sapraes tumas long olgeta. Long kwaet fasin hem i talem se: “Man, hemia wan samting ya, we man ya i mekem ae blong mi i kamgud, be yufala i no save weples hem i aot long hem.” ?Man ya i minim wanem? Hem i talem stret long olgeta se: “Yumi save we God i no save lesin long man blong mekem sin. Be man we i stap ona long God, mo i stap mekem ol samting we God i wantem, hemia man we God i save lesin long hem. I stat long taem we God i mekem wol ya, i kam kasem tede, i no gat nyus nating blong man we i mekem ae blong man we i blaen taem i bon, i kamgud olsem.” Tok ya i klia nomo: “Sipos man ya i no kamaot long God, bambae hem i no save mekem wan samting nating. Be hemia i klia gud we hem i kamaot long God.”

Ol Farisi oli no save ansa from we tok ya i stret nomo. Oli no wantem bilif long trutok ya, taswe oli tok nogud long hem, se: “Man, yu yu man blong mekem sin olwe nomo, i stat taem yu bon, i kam kasem tede. ?Weswe yu stap traem tijim mifala?” Nao oli ronem hem i goaot long haos prea, we i no moa save kam insaed bakegen.

Taem Jisas i harem nyus ya we olgeta oli ronem man ya i goaot long haos prea, hem i go faenem hem, i askem long hem, i se: “?Olsem wanem? ?Yu yu bilif long Pikinini blong Man?”

Man ya we bifo i blaen i ansa i se: “?Masta, man ya hu ya? Plis yu talemaot long mi, blong mi save bilif long hem.”

Jisas i se: “Yu yu luk hem finis. Hemia mi ya we mi stap tok long yu naoia.”

Nao man ya i nildaon long Jisas, i se: “Masta, mi mi bilif long yu.”

Nao Jisas i talem long hem se: “Mi mi kam long wol ya blong mekem wok ya blong jajem man, blong ol blaenman oli save luk olgeta samting, mo ol man we oli save luk olgeta samting oli save kam blaenman.”

Samfala Farisi oli harem tok ya. Nao oli talem long hem se: “?Weswe? Yu stap talem se mifala tu i blaen?” I moa gud we olgeta oli luksave se oli blaen long tingting blong olgeta. Olsem ya nao oli save mekem eskyus from ol nogud fasin we oli mekem long Jisas taem oli agensem hem. Taswe Jisas i talem long olgeta se: “Sipos yufala i blaen, bambae i no gat rabis poen long yufala.” Be from we hat blong olgeta i strong tumas, oli stap talem se oli no blaen, mo oli no nidim man blong tijim olgeta long saed blong speret. From samting ya nao Jisas i talem long olgeta se: “Be from we yufala i talem se: ‘Mifala i save luk olgeta samting,’ hemia ol rabis poen blong yufala i stap yet.” Jon 9:19-41.

▪ ?Taem ol Farisi oli singaot long papa mama blong man ya we fastaem i blaen, blong tufala i kam, from wanem tufala i fraet? ?Tufala i ansa long ol Farisi olsem wanem?

▪ ?Olsem wanem ol Farisi oli traem mekem man ya we bifo i blaen hem i fraet?

▪ ?Man ya i talem wanem tok we i stret nomo, nao ol Farisi oli kam kros tumas from?

▪ ?From wanem ol Farisi oli no save mekem eskyus from ol nogud fasin blong olgeta taem oli agensem Jisas?