Japta 92

Ten Man We Oli Gat Leprosi Oli Gud Bakegen

OL memba blong Kaonsel ya we oli kolem Sanhedrin, oli agri se oli mas kilim Jisas i ded. Be Jisas i blokem plan blong olgeta, from we hem i aot long Jerusalem, i go long wan taon, nem blong hem Efrem. Taon ya i stap samwe long 24 kilomita long not-is blong Jerusalem. Nao hem i stap long ples ya wetem ol man blong hem, longwe long ol enemi blong hem.

Hem i kolosap taem blong Lafet blong Pasova long 33 K.T. Ale i no longtaem Jisas i aot long ples we hem i stap long hem. Hem i pastru long Sameria, i stap folem rod we i go long Galili. Hemia lastaem blong hem blong visitim ples ya. Nao plante man oli aot long evri ples, oli stap wokbaot i go long Jerusalem blong mekem Lafet blong Pasova. Ating Jisas wetem ol disaepol blong hem oli wokbaot wetem olgeta tu. Oli folem rod we i pastru long ples ya nem blong hem Perea, long is-saed blong Jodan Reva.

Nao taem Jisas i stap wokbaot i go, hem i kam kolosap long wan velej. Maet velej ya i stap long graon blong ol man Sameria no long graon blong ol man Galili. Nao ten man we oli gat leprosi oli kam blong mitim hem. Leprosi i wan rabis sik. Sloslou, sik ya i stap kakae evri haf long bodi blong man: Ol fingga blong hem, leg blong hem, sora blong hem, nus blong hem, mo maot blong hem. God i givim wan loa blong blokem sik ya, blong i no save kasem olgeta man. Man we i kasem sik ya i mas mekem olsem: “Hem i mas kavremap mustas blong hem, mo hem i mas singaot, i se ‘!Doti, doti!’ Long olgeta dei we sik ya i stap long hem, hem i no klin. . . . Hem i mas stap hem wan, longwe long ol man.”

Ten man ya we oli gat leprosi oli obei long loa ya blong God, nao oli stap longwe long Jisas. Be oli singaot bigwan long hem, oli se: “Jisas, Masta, plis yu sore long mifala.”

Jisas i luk olgeta, oli stap longwe long hem, nao hem i talem long olgeta, i se: “Yufala i go pas long pris blong i luk bodi blong yufala.” Jisas i talem olsem from we Loa blong God i givim raet long ol pris blong talem long ol man we oli kasem leprosi wetaem bodi blong olgeta i klin bakegen. Long taem ya nao, oli save joen bakegen wetem ol narafala man.

Ten man ya we oli gat leprosi oli bilif se Jisas i gat paoa we i save mekem sik blong olgeta i gud bakegen. Ale, oli hareap blong go pas long pris, nating we sik ya i stap long bodi blong olgeta yet. Nao taem olgeta oli stap wokbaot i go long rod, oli kasem presen from bilif blong olgeta. Oli luk we bodi blong olgeta i kam klin. Oli harem gud tumas from we oli no moa sik.

Nao taem olgeta oli luk we bodi blong olgeta i gud finis, naen long olgeta oli stap wokbaot oli go nomo. Be wan long olgeta, hem i wan man Sameria, hem i kam bakegen long Jisas. ?From wanem? From we hem i glad tumas long samting we i kamaot long hem. Hem i stap singaot bigwan blong presem God. Taem hem i faenem Jisas, hem i kam, i nildaon long graon long leg blong Jisas, i talem tangkyu long hem.

Nao Jisas i talem se: “?Olsem wanem? Mi mi ting se i gat ten man we bodi blong olgeta oli kam klin. ?Wehem ol narafala naen man ya? Man ya i wan strenja ya. ?From wanem hem nomo i save kambak blong leftemap nem blong God, be ol narafala naen ya oli no save kambak?”

Nao Jisas i talem long man Sameria ya, i se: “Ale, yu stanap, yu wokbaot, yu gohom. Bilif blong yu i mekem yu yu gud finis.”

Taem yumi ridim store ya, yumi mas tingtinggud long kwestin ya blong Jisas: “?Wehem ol narafala naen man ya?” Ol naen man ya oli gat wan bigfala poen: Oli no soemaot fasin tangkyu. ?Olsem wanem long yumi? ?Yumi olsem man Sameria ya, we hem i kambak long Jisas blong talem tangkyu long hem mo presem God? ?Yumi soemaot tangkyu long God from ol samting we hem i stap givim long yumi? ?Yumi stap talem tangkyu long hem from promes we hem i givim long yumi se yumi save kasem laef we i no save finis long nyufala wol we stret fasin nomo bambae i stap long hem? Jon 11:54, 55; Luk 17: 11-19; Levitikas 13:16, 17, 45, 46; Revelesen 21:3, 4.

▪ ?Olsem wanem Jisas i blokem plan blong ol man long Kaonsel ya, Sanhedrin, blong oli no save kilim hem i ded?

▪ ?Jisas i aot long Jerusalem i go wea fastaem? ?Biaen, hem i wokbaot i go wea?

▪ ?From wanem ten man ya we oli gat leprosi oli stap longwe long Jisas? ?From wanem Jisas i talem long olgeta se oli mas go pas long pris?

▪ ?Store ya i tijim yumi long wanem?