Jisas i Mekem Plante Merikel

Jisas i kam long wol blong talemaot gud nius blong Kingdom blong God. Jehova i givim tabu spirit long Jisas blong i mekem ol merikel, blong soemaot samting we bambae hem i mekem taem hem i kam King. Long evri ples we Jisas i go long hem, ol sikman oli kam long hem, mo hem i hilim enikaen sik. Hem i mekem blaenman i lukluk, man we sora i fas i save harem samting, mo man we i no save wokbaot, i save wokbaot bakegen, mo hem i ronemaot devel long plante man. Sipos oli tajem en blong klos blong hem nomo, sik blong olgeta i save finis. Long evri ples we Jisas i go long hem, ol man oli stap folem hem. Be hem i neva ronem olgeta, nating se samtaem hem i wantem stap hem wan.

Wan taem, ol man oli karem wan man we haf bodi blong hem i ded i go long haos we Jisas i stap long hem. Be oli no save go insaed from i gat fulap man. Ale, oli tekemaot smol haf blong ruf blong haos, mo oli slakem man ya we i slip long bed blong hem, i godaon long Jisas. Nao Jisas i talem long man ya se: ‘Yu stanap, yu wokbaot.’ Taem hem i stanap, ol man oli sapraes tumas.

Wan narafala taem, Jisas i stap wokbaot i go long wan vilej, nao ten man we oli gat leprosi, oli singaot se: ‘!Jisas, yu givhan long mifala!’ Long taem ya, man we i gat leprosi i no save go klosap long ol narafala man. Ale, Jisas i talem long olgeta blong oli go long haos blong God. Hemia from we Loa i talem se, taem man we i gat leprosi i kam gud, hem i mas go long haos blong God. Ale oli wokbaot i go, nao sik blong olgeta i finis. Wan long olgeta i kambak, i talem tangkiu long Jisas, mo i presem God. Long ol ten man ya, i gat wan nomo we i kambak blong talem tangkiu long Jisas.

Wan woman we hem i sik blong 12 yia, i wantem tumas blong kam gud bakegen. Ale, hem i kam biaen long Jisas mo i tajem en blong klos blong hem. Wantaem nomo, sik blong hem i finis. Nao Jisas i askem se: “?Ei, hu i tajem mi?” Woman ya i fraet tumas, be hem i go talemaot se hem nao i tajem Jisas. Nao Jisas i toktok kaen long hem se: ‘Dota blong mi, yu go, yu no moa wari bakegen.’

Wan haeman, Jaeras, i askem strong long Jisas se: ‘!Plis, yu kam long haos blong mi! Smol gel blong mi i sik tumas.’ Be taem Jisas i stap wokbaot i go, gel ya i ded. Taem hem i kasem haos blong Jaeras, hem i talem long ol man we oli stap krae se: ‘Yufala i no krae, gel ya i stap slip nomo.’ Nao hem i holem han blong gel ya, i se: “!Smol gel! !Yu stanap!” Wantaem nomo gel ya i girap. Nao Jisas i talem long papa mo mama blong hem blong tufala i givim sam kakae long hem. !Yu traem tingbaot olsem wanem tufala i glad tumas!