Wan Traket i Soem Rod

STORE ya i hapen long 1921. Long ol hil blong Transval, long Saot Afrika, wan tim blong man i stap fiksimap ples we tren i ron long hem. Hed blong tim ya, wan waetman blong Saot Afrika we nem blong hem Christiaan Venter. Hem i luk wan pepa i fas aninit long aean we tren i ron long hem. Pepa ya i wan traket we Watch Tower Sosaete i prentem.

Christiaan i askem long ol man blong hem blong oli stop, nao hem i ridim traket ya mo i intres bigwan long hem. Ale, hem i resis i go long hasban blong gel blong hem, Abraham Celliers, mo i talem long hem se: “!Abraham, tede mi faenem trutok ya!”

Samtaem afta, tufala i raet i go long ol man we oli prentem traket ya blong kasem moa advaes bakegen. Ale, ofis blong Sosaete long Saot Afrika i sanem sam moa buk we i tokbaot Baebol long tufala. Tufala man ya i stadi long ol buk ya evri dei taem we tufala i kakae long medel dei, mo long sapa gogo long medel naet. Kwiktaem nomo, tufala i stat blong talemaot trutok long ol fren blong tufala mo long sam narafala man bakegen.

Afta, Christiaan mo Abraham tufala i givim laef blong tufala long Jeova mo tufala i kam Wetnes. Plante man blong Saot Afrika oli kasem save long trutok from hadwok blong tufala ya, we tufala i stap tru nomo long God. Antap bakegen, moa long wan handred man mo woman long laen blong tufala oli Wetnes blong Jeova we oli stap prij tede. Wan long olgeta i wok long hedkwota blong ol Wetnes blong Jeova long Bruklin, Nyu Yok, mo wan narawan bakegen long ol ofis blong Watch Tower Sosaete long Saot Afrika.

Tede, kolosap 70 yia afta, ol traket oli impoten yet long wok blong talemaot mesej blong Kingdom.