Ol Kristin Blong Engglan We Oli Wok Strong

I no bitim 10 pesen long ol 56 milyan man long Engglan naoia oli kam Kristin we oli wok strong, olsem magasin ya The Economist i talem. Long wan Sande olsem, namba blong ol man we oli stap go long jyos i no bitim fo milyan. Aot long ol namba ya, i gat 1.1 milyan man nomo oli Anglikan. Be nating se bilif ya se yumi no save sipos i gat God i stap gru moa, Jyos blong Engglan i gohed blong stap wok olsem Skul blong kantri ya we gavman i agri long hem. Nyus magasin ya i talem se, “Engglan hem i no wan Kristin sosaeti long plante yia finis be hem i no wantem agri we kantri ya i fulap long bilif ya se yumi no save sipos i gat God i stap, from we hem i wantem gobak bakegen long taem blong bifo.” Taswe yumi no sapraes tumas se ol man blong politik naoia mo ol nyuspepa oli wantem se gavman i no moa luksave Jyos olsem Jyos blong kantri, mo se gavman i seraot long Jyos.

Walter Bagehot, wan man blong raetem magasin ya The Economist biaen long yia 1800 i soem sore taem hem i talem se “Wan wol we ol man blong hem oli stap talem se oli Kristin be oli joen wetem ol fasin blong wol, hem i nogud we i nogud olgeta.” Long faswan handred yia K.T., Jisas i talem se ol disaepol blong hem ‘oli no man blong wol ya, olsem we hem i no man blong wol ya.’ (Jon 17:16) Be, hem i sanem olgeta long wol ya blong talemaot Kingdom blong God. Sem mak tede, ol man oli savegud ol Wetnes blong Jeova long olgeta ples long wol from strong tingting blong olgeta blong prij ‘long ol haos wanwan.’​—⁠Ol Wok 20:⁠20.

Skelem wetem ol Anglikan, ol 126,173 Wetnes long Engglan oli smol nomo. Nating se i olsem, oli spenem 20 haoa long wan manis blong go long ol Kristin miting. Mo tu, long 1992 wanwan long ol Wetnes blong Jeova oli spenem 16 moa haoa long wan manis blong talemaot gud nyus blong Kingdom long ol narafala man, hemia gavman we bambae i no longtaem i stanemap wan nyufala wol we stret fasin i stap long hem. (Matyu 24:14; 2 Pita 3:⁠13) Nekis taem ol Wetnes blong Jeova oli kam long haos blong yu, ?bambae yu lesin long spesel mesej blong olgeta mo faenemaot wanem i pusum olgeta blong oli gat strong tingting blong mekem wok?