Wan Sas Samting Blong Serem

OLSEM GLORIA MALASPINA I TALEM

Taem mifala i no moa luk so blong Sisili, mi mo hasban blong mi, mitufala i stat blong tingbaot ples we mitufala i stap go long hem, hemia Molta, wan aelan blong Mediterenia. !Jans ya i mekem mitufala i haremgud tumas! Taem sip i stap krosem solwora, mitufala i tingbaot ekspiryens blong aposol Pol long Molta, long faswan handred yia.​—⁠Ol Wok 28:​1-10.

HEMIA long yia 1953, mo long taem ya, loa long Molta i no akseptem wok blong prij blong ol Wetnes blong Jeova. Long yia bifo, mitufala i kamaot long Wajtaoa Baebol Skul blong Gilead mo oli sanem mitufala long Itali. Afta long sot taem we mitufala i stap stadi long lanwis blong Itali, mitufala i wantem tumas blong luk se samting we i stap wet long mitufala long Molta.

?Olsem wanem mi, wan yangfala woman, i kam wan misinari long narafala kantri? I gud mi mi eksplenem.

Eksampel Blong Mama We i Pulum Mi

Long 1926, taem famle blong mifala i stap long Fot Fransis, Ontario, Kanada, mama blong mi i akseptem buklet ya Millions Now Living Will Never Die long wan Baebol Studen (nem blong ol Wetnes blong Jeova long taem ya). Hem i ridim buk ya wetem bigfala intres, mo long sem wik ya, hem i go long wan grup we i yusum Wajtaoa magasin blong stadi Baebol. Mama i wan woman we i wantem tumas blong ridim Baebol, mo i akseptem mesej long saed blong Kingdom olsem sas samting ya we hem i bin stap lukaot. (Matyu 6:33; 13:44) Nating se Papa i agensem hem tumas, mo se hem i mas lukaot long tri smol gel, Mama i stanap strong long samting we hem i stap lanem.

Strong bilif blong Mama long ol 20 yia we oli kam biaen i mekem se mi mo tufala fasbon sista blong mi, Thelma mo Viola, mitrifala i kasem savegud long nambawan hop long saed blong laef we i no save finis, long wan nyufala wol we i gat stret fasin nomo long hem. (2 Pita 3:13) Hem i fesem plante hadtaem, be neva tingting blong mifala i hafhaf long stret rod we hem i jusum.

Long 1931, taem mi gat ten yia nomo, mifala i muf i go long wan plantesin long not blong Minesota. Naoia, mifala i no moa joen oltaem wetem ol Wetnes blong Jeova, be oltaem mama i tijing mifala long Baebol. Fasin blong hem blong wok strong olsem wan kolpota, fultaem Kristin minista, i pusum mi blong wantem joen wetem hem long wok ya. Long 1938, mi mo tufala sista blong mi, mifala i soem se mifala i givim laef blong mifala long Jeova taem mifala i tekem baptaes long wan asembli long Dulut, Minesota.

Afta we mi kamaot long hae skul long 1938, Mama i leftemap tingting blong mi blong tekem wan kos long saed blong bisnes, blong mi save lukaot long mi wan olsem wan paenia (nyufala nem blong talem kolpota). Hemia i wan gudfala advaes, from we Papa i mekem disisen blong lego mifala, ale mifala nomo i mas lukaot long mifala.

Wok Fultaem Blong Serem Sas Samting Blong Mifala

Biaen, mi muf i go long Kalifonia, mo long 1947, mi stat blong mekem wok blong paenia long San Fransisko. Taem mi joen long wok blong mekemrere from “All Nations Expansion” (Ol Nesen i Kam Bigfala Moa) Distrik Asembli long Los Anjeles, mi mitim Francis Malaspina. Mak blong mitufala long saed blong misinari wok i mekem se mitufala i statem wan fasin fren wetem lav. Mitufala i mared long 1949.

Long Septemba 1951, oli askem mi mo Francis blong go long namba 18 klas blong Gilead. Long Febuwari 10, 1952, afta long faef manis we mifala i mekem plante trening, dei ya mifala i kasem stefeket blong mifala. Mo presiden blong skul, Nathan H. Knorr i ridimaot folem oda blong alfabet, ol kantri ya we bambae oli sanem mifala long hem. !Taem hem i talem se, “Itali, Brata mo Sista Malaspina,” tingting blong mitufala i stap mekem trep i go finis!

Sam wik biaen, mitufala i klaem long wan sip long Nyu Yok blong mekem wan trep we i tekem ten dei, blong go long Genoa, Itali. Giovanni DeCecca mo Max Larson we tufala i stap wok long hedkwota long Bruklin, tufala i stanap long wof blong talem tata long mitufala. Long Genoa, ol misinari we oli savegud olsem wanem blong stretem ol pepa blong kam insaed long kantri ya, oli kam mitim mitufala.

Mitufala i sapraes long evri samting raon long mitufala, mitufala i klaem long wan tren blong go long Bologna. Taem mitufala i kasem longwe, mitufala i luk we taon ya i nogud yet from ol bom blong Namba Tu Bigfala Faet Blong Wol. Be i gat plante gudfala samting tu, olsem win blong moning we i fulap long smel blong kofe we oli stap rusum, mo ol gudfala smel blong sos we oli mekemrere blong kakae wetem plante defren kaen pastaa.

Mifala i Kasem Wan Mak

Mitufala i statem minista wok blong mitufala wetem wan tok we mitufala i save talem baehat, mo mitufala i talem tok ya kasem we man blong haos i akseptem mesej no i satem doa. From we mitufala i wantem toktok wetem ol man, samting ya i pusum mitufala blong lanemgud lanwis. Afta long fo manis, oli sanem mitufala i go long wan nyufala haos blong misinari long Naples.

Bigfala taon ya i nambawan from ol naesfala ples blong lukluk we hem i gat. Mitufala i haremgud long wok blong mitufala long ples ya. Be afta long fo manis bakegen, oli askem hasban blong mi blong wok olsem seket elda, blong visitim ol kongregesen stat long Rom, go kasem Sisili. Biaen, mitufala i visitim Molta tu, mo Libia long Not Afrika.

Long ol yia ya, i wan traem long saed blong bodi, taem man i tekem tren long Naples blong go long Sisili. Mitufala i mas klaem long wan tren we i fulap finis mo stanap bitwin long ol jea we i fasfas long ol man, we samtaem mitufala i mas stanap sikis kasem eit haoa. Be, samting ya i givim wan nambawan jans long mitufala blong luklukgud long fasin blong ol man we oli stap raon long mitufala. Plante taem, man i sidaon long bigfala botel waen we hem i wokem, mo wanwan taem long longfala trep ya, hem i dring waen we i stap insaed long botel ya, blong blokem tosta blong hem. Plante taem, ol pasenja we oli gat fasin frengud oli serem bred mo sosej blong olgeta wetem mitufala. Mo mitufala i laekem tumas gudfala fasin we oli mekem long mitufala mo kaen fasin blong olgeta we i tajem hat.

Long Sisili, ol brata oli kam mitim mitufala blong karem ol bokis blong mitufala i go long wan kongregesen antap long top blong wan hil we mifala i mas klaem tri haoa haf, we mifala i no spel. Gudfala welkam blong ol brata sista i mekem se mitufala i fogetem olsem wanem mitufala i taed. Samtaem mitufala i wokbaot long dongki we oli strong, be neva mitufala i lukluk i go long ol ples we i godaon we i godaon we sipos dongki ya i mestem smol, bambae mitufala i foldaon i go long ples ya. Fasin blong ol brata sista blong mitufala blong stanap strong long saed blong trutok, nating se i gat hadtaem, i mekem tingting blong mitufala i strong. Mo lav we oli soemaot long mitufala i mekem se mitufala i gat bigfala fasin tangkyu blong stap wetem olgeta.

Molta mo Libia

Ol brata sista oli mekem plante samting we mitufala i no save fogetem, nao mitufala i klaem long sip mo ron i go long Molta. Aposol Pol i faenem ol man we oli kaengud long ples ya, mo mitufala tu i faenem ol man olsem. Wan strong win long Bei blong Sen Pol i mekem se mitufala i kasem save denja we ol smol sip long faswan handred yia oli fesem. (Ol Wok 27:​39–28:10) Be Libia i stap yet blong mitufala i visitim. ?Bambae mitufala i mekem olsem wanem long kantri ya blong Afrika we oli putum tabu long wok blong yumi?

Bakegen, mitufala i fesem wan kastom we i defren olgeta. Taem mitufala i stap wokbaot i go long rod blong Tripoli, ol samting we mitufala i luk mo ol saon we mitufala i harem, oli pulum tingting blong mi. Ol man oli yusum ol kaliko we oli wokem long hea blong kamel, blong protektem olgeta long hot blong Drae Ples blong Sahara we i hot tumas mo long kolkol blong naet. Mitufala i lanem blong kasem save mo blong gat respek long fasin we ol man oli mekem, folem weta long ples we oli stap long hem.

Ol brata sista oli lukaotgud taem oli wok strong. Samting ya i tijim mitufala bigwan blong dipen fulwan long Jeova mo blong folem ol advaes blong olgeta we oli gat moa save long fasin blong prij long ol taem olsem. Ol Kristin brata sista blong mitufala oli kamaot long plante defren kantri; be oli joengud tugeta long wok we oli stap mekem long Jeova.

Wan Nyufala Ples Blong Prij

From we ol man oli agensem wok blong mifala blong prij, mitufala i mas aot long Itali, be long 1957, mitufala i glad blong akseptem wan nyufala ples blong prij long Brasil. Mi mo Francis, mitufala i mas lan long fasin blong laef mo ol kastom, mo afta long eit manis, oli askem Francis blong mekem wok blong seket elda. Mitufala i wokbaot long bas, long plen, mo long leg. Taem mitufala i stap mekem trep long bigfala kantri ya we i naes tumas, i olsem we mitufala i stap mekem wan lesen long saed blong jiografi.

Long faswan seket we mitufala i wok long hem i gat ten kongregesen long bigfala taon blong Sao Polo, mo tu, ten smol taon we oli stap insaed long kantri ya mo ol eria kolosap long solwora, long saot blong stet blong Sao Polo. Long taem ya, i no gat kongregesen long ol smol taon ya. Mitufala i mas lukaot long wan ples blong stap, mo afta we mitufala i faenem wan haos blong stap, mitufala i karem mesej blong Kingdom i go long ol haos wanwan. Mitufala i askem ol man tu blong kam luk wan long ol sinema blong Watch Tower Society we i tijim man.

I no wan isi wok blong klaem long bas wetem ol film, projekta, transfoma, ol faelb, ol buk, ol kad blong singaot ol man oli kam, mo ol samting blong makem ples we bambae mitufala i soem film long hem long kad ya. Taem mifala i skelem ol samting ya wetem bokis blong mitufala blong putum klos, bokis ya i smol samting nomo. Mitufala i mas putum projekta antap long leg blong mitufala, blong mekem se bambae hem i no brok taem mifala i ron long ol rod we oli nogud.

Afta we mitufala i faenem wan ples blong soem film ya, mitufala i go long ol doa blong ol man blong livim ol kad blong singaot olgeta blong kam luk. Samtaem ol letem mitufala i soem sinema ya long wan restoron no wan hotel. Long sam narafala taem, mitufala i fasem wan pis kaliko bitwin long tufala pos mo afsaed. Ol man we oli laekem, we plante long olgeta, neva oli luk wan sinema we i pulum filing, oli stanap mo oli lesingud taem Francis i ridim store. Biaen, mitufala i givimaot ol buk we oli tokbaot Baebol.

Blong kasem ol velej, mitufala i ron long bas. Sam long ol reva, i no gat wan brij we i go krosem, ale oli mas putum bas i go antap long wan bigfala samting we i stap flot mo samting ya i karem bas i go narasaed reva. Oli talem long mifala blong kamaot long bas. Mo sipos mifala i luk se bas ya i stap glis blong draon long reva, mifala i go long narasaed blong samting ya we mifala i stap long hem, blong mekem se bas i no pulum mifala i go draon wetem. !Mi glad tumas se, neva mifala i mestem wan bas i draon long reva​—⁠wan gudfala samting, from we ol man oli makemgud reva ya from ol piranha fis we oli stap kakae mit!

Afta we mitufala i go long intenasnal asembli long Nyu Yok long 1958, mitufala i gobak long Brasil, mo smoltaem biaen mitufala i mekem wok blong visitim ol kongregesen bakegen. Distrik we mitufala i stap wok long hem i go kasem bodac blong Urugwae long saot, Paragwae long wes, Panambuko long not, mo Solwora blong Atlantik long is-saed blong Brasil.

Ples Blong Ol Man We Oli Gat Leprosi

Long 1965, oli askem mitufala blong soem wan long ol sinema blong Sosaeti long wan ples blong ol man we oli gat leprosi. Mo mitufala i akseptem. Mi mas talem se mi mi fraet lelebet long sam rod. Mitufala i gat smol save nomo long saed blong leprosi, jes hemia we mitufala i ridim long Baebol. Taem mitufala i kasem haos blong olgeta we oli pentem long waet pen, oli lidim mitufala i go long wan bigfala rum. I gat wan haf we oli pulum wan rop long medel, blong seraotem ples we mitufala i mas stap mo putum ol tul blong mitufala long hem.

Man blong lektrik we i stap halpem mitufala, hem i wan man we i stap 40 yia long ples ya. Hem i lusum tufala han blong hem kasem ples ya we oli putum hanwaj mo sam haf blong bodi blong hem, we i spolemgud bodi blong hem. Fastaem, mi mi seksek, be from we hem i kaengud mo hem i gat gudhan blong wok, samting ya i mekem mi haremgud. I no longtaem, mitufala i stap storeyan long plante samting taem mitufala i mekemrere olgeta samting we mifala i nidim. Long ol wan taosen sikman we oli stap long haos ya, bitim tu handred oli kam joen. Taem oli wokbaot sloslou i kam insaed, mitufala i makem plante defren kaen samting long sik we oli stap safa long ol. !Hemia wan ekspiryens we i pulum filing blong mitufala bigwan!

Mitufala i tingbaot tok we Jisas i talem long wan man we i gat leprosi, we i askem strong long hem se, “Plis, Masta, sipos yu yu wantem, yu save mekem mi mi gud bakegen.” Jisas i tajem man ya mo i talem long hem se, “Mi mi wantem. Bodi blong yu i klin.” (Matyu 8:​2, 3) Afta we program i finis, plante long olgeta we oli kam kolosap long mitufala blong talem tangkyu from we mitufala i kam, bodi blong olgeta we i nogud, i soemaot klia bigfala fasin safa blong ol man. Biaen, ol Wetnes long ples ya oli stadi Baebol wetem olgeta we oli wantem tumas blong lanem moa.

Long 1967, mitufala i gobak long Yunaeted Stet from sam bigfala problem long saed blong helt. Taem mitufala i stap traem blong winim ol problem ya, bakegen, mitufala i gat jans blong mekem wok blong visitim ol kongregesen. Long 20 yia, we oli kam biaen, mi joen wetem Francis long wok blong visitim ol kongregesen long Yunaeted Stet. Long taem ya, hem i tijim Kingdom Ministri Skul tu.

!I leftemap tingting blong mi bigwan blong gat wan hasban we i gat lav mo wan trufala fren we i mekem eni wok we oli givim long hem blong mekem! Mitufala i gat jans blong serem ol sas samting long trutok blong Baebol wetem ol man long plante ples blong fo bigfala haf blong wol.

Sas Samting Ya i Holem Mitufala

Long 1950, Mama i mared long David Easter, wan brata we i stap tru long God, we i baptaes long 1924. Tufala i wok wanples blong plante yia long fultaem Kristin minista wok. Be, long laswan haf blong laef blong Mama, hem i kasem sik ya we tingting blong hem i no moa wokgud. Hem i nidim moa fasin kea taem sik ya i stap kam moa strong. Ol sista blong mi we oli gat fasin kea mo David, olgeta oli karem hevi responsabiliti ya blong kea long hem, from we olgeta oli no wantem se mitufala i livim jans ya blong mekem fultaem wok. Nambawan eksampel blong Mama, kasem taem we hem i ded long 1987, i givhan bigwan blong mekem ol plan long laef blong mifala, mo hop we hem i gat blong kasem pei long heven i leftemap tingting blong mifala.

Long 1989, mi save talem se Francis i no moa gat bigfala paoa olsem hem i gat bifo. Mitufala i no save se fiva blong snel, wan sik we ol man long plante ples long wol oli savegud, i mekem trabol long hem. Long 1990, nogud sik ya i winim hem, mo mi lusum fren blong mi we mi laekem hem tumas we mi bin joen wetem hem blong bitim 40 yia long wok blong Jeova.

Blong jenisim sam samting i wan haf blong laef. Sam oli isi, mo sam oli no isi. Be Jeova, Man we i Givim ol sas samting long ol trutok blong Baebol, i yusum ogenaesesen blong hem mo lav mo fasin blong famle blong mi blong leftemap tingting, mo blong givhan long mi. Mi stap haremgud yet taem mi stap lukluk i go long taem ya we olgeta promes blong Jeova we oli no save mestem, bambae oli kamtru.

[Ol futnot]

[Tok blong pija long pej 23]

Taem mi mo hasban blong mi, mitufala i stap mekem wok blong misinari long Itali