Jeova—Wan God We i Laekem Fasin We i Stret Mo Stret Fasin Blong Jajem Man

WAN yangfala gel long Sarayevo i stap askem long hem wan se, from wanem ol pikinini long taon blong hem oli mas harem nogud long plante trabol. Hem i talem se: “Mifala i no mekem wan samting nogud. Mifala i no gat poen.” Samwe long 15 yia finis, ol mama long Ajentina we tingting blong olgeta i trabol, oli stap go long wan pablik ples long Buenos Aeres blong mekem demonstresin from ol pikinini blong olgeta we oli lus. Long Afrika, wan man we nem blong hem Emmanuel, oli kilim i ded mama mo trifala sista blong hem long wan faet we i kamaot bitwin ol laen blong man. Hem i talem se: “Evri man i mas kasem pei we i stret long samting we hem i mekem . . . Yumi wantem stret fasin blong jajem man.”

Stret fasin blong jajem man i wan bigfala fasin blong Jeova God. Baebol i talem se: ‘Fasin blong Jeova blong jajem man, i stret.’ Yes, Jeova i ‘laekem fasin we i stret mo stret fasin blong jajem man.’ (Dutronome 32:⁠4; Ol Sam 33:5) Blong savegud long God, yumi mas kasem save tingting blong hem long saed blong fasin blong jajem man, mo yumi mas folem eksampel blong hem.​—Hosea 2:​19, 20; Efesas 5:1.

Maet tingting we yumi gat long saed blong stret fasin blong jajem man i kamaot from tingting we ol man oli gat long fasin ya. Long samfala ples long wol, oli wokem pija blong wan woman we i fasem ae blong hem long wan kaliko mo i holem wan naef blong faet wetem wan skel. Hemia i olsem saen blong soem stret fasin blong jajem man. Oli talem se man we i jajem narafala, hem i mas mekem i sem mak long evriwan, i olsem we hem i blaen, hem i no save luk mane no paoa. Hem i mas yusum skel blong skelemgud ol samting taem hem i jajem wan man se i gat poen no i no gat poen. Naef blong faet i minim stret fasin blong jajem man, hem i protektem man we i no gat fol mo i givim panis long ol man we oli mekem i nogud.

Buk ya Right and Reason​—Ethics in Theory and Practice i talem se “Stret fasin blong jajem man i joen wetem loa, samting we man i mas mekem, raet blong man, mo ol wok, mo givim jajmen long man we i stret long samting we hem i mekem.” Be stret fasin blong Jeova blong jajem man i bitim hemia. Yumi save pruvum samting ya taem yumi luk ol wok mo ol fasin blong Jisas Kraes, we i olsem pija blong Papa blong hem long heven.​—Hibrus 1:⁠3.

Man ya blong raetem Gospel, Matyu, i talem tok blong Aesea 42:3 blong tokbaot Jisas, se: ‘Waelken we i ben finis, man ya i no save brekem, mo laet we wik blong hem i stap smok nomo, hem bambae i no save kilim i ded. Hem bambae i wok olsem gogo i mekem stret fasin blong jajem man i win.’ Jisas i talemaot wan mesej long olgeta man, we i leftemap tingting blong olgeta we oli olsem waelken we i ben finis, no we man i purumbut antap. Oli olsem laet we wik blong hem i stap smok nomo, we kolosap i ded olgeta. Jisas i no brekem waelken we i ben finis mo i no kilim laet ya we wik blong hem i stap smok nomo, olsem wan pijatok. Be hem i sore long olgeta we oli trabol. Hem i tijim olgeta mo i mekem sik blong olgeta i kamgud bakegen. Olsem nao, hem i soemaot klia long olgeta, stret fasin we Jeova God i gat blong jajem man. (Matyu 12:​10-​21) Olsem Aesea i talem, stret fasin ya blong jajem man i givim hop.

Fasin Sore Mo Fasin Blong Jeova Blong Jajem Man

Fasin sore i wan impoten haf long stret fasin blong God blong jajem man. Samting ya i kam klia taem Jisas i stap long wol. Long fasin we i stretgud olgeta, hem i soemaot klia tingting blong God long saed blong stret fasin blong jajem man mo fasin we i stret. Be, ol tija blong loa blong ol man Jyu mo ol Farisi, oli wantem kam stret gud olgeta taem oli strong long loa we oli raetemdaon. Bighaf blong ol loa ya, olgeta nomo oli putumap. Plante taem, taem oli jajem man, oli no gat sore nating. Ol rao we oli kamaot bitwin Jisas mo ol Farisi i from bigfala kwestin ya se: ?Wanem ya trufala stret fasin blong jajem man mo fasin we i stret?​—Matyu 9:​10-​13; Mak 3:​1-5; Luk 7:​36-​47.

Jisas i eksplenem olsem wanem blong mekem i gud mo i stret long ol narafala. Wan taem, wan man we i strong blong folem loa i askem Jisas se, hem i mas mekem wanem blong kasem laef we i no save finis. Blong givim ansa, Jisas i askem wan kwestin long hem. Mo afta, i presem man ya from we man ya i talem se tufala loa we i hae moa, hemia se man i mas laekem God long olgeta tingting, laef, paoa, mo maen blong hem, mo i mas laekem ol man we oli stap raonabaot long hem, i mas mekem i gud long olgeta olsem we i stap mekem i gud long hem wan. Nao, man ya i askem se: “?Be hu ol man ya we oli stap raonabaot long mi?” Jisas i talem parabol blong wan man Sameria blong givim ansa long hem.​—Luk 10:​25-​37.

Long parabol ya, yumi luk eksampel blong Jeova long saed blong stret fasin mo fasin blong jajem man wetem sore. Man Sameria i no tingbaot hem wan nomo. Hem i givhan long man ya we i kasem kil, nating se hem i no save hem. Olsem nao, hem i mekem wan samting we i stret, i gud, mo i soem sore. Jisas hem wan i soem sem tingting ya taem hem i stap long wol. Ol fasin blong hem oli gud mo oli stret. Mo tu, hem i givim laef blong hem from olgeta we oli nidim help, ol sinman, mo ol man we oli no stretgud olgeta we oli stap harem nogud, oli stap sik, mo oli stap ded. Aposol Pol i joenem ransom sakrifaes wetem stret fasin. Hem i raetem se: “Sin ya we wan man nomo i mekem, hem i mekem we God i jajem ol man se oli no stret, oli mas panis. Mo long sem fasin, stret samting ya we wan man nomo [no, “wan wok blong stret fasin,” futnot] i mekem, hem i mekem we God i talem se ol man oli save gofri, oli save laef.” (Rom 5:​18) “Wan wok blong stret fasin,” hemia rod we God i yusum blong sevem ol man we oli obei, i mekem oli fri long ol trabol we oli no stampa blong hem, be i frut blong sin blong Adam.

Stret fasin blong God blong jajem man i mekem se ol man oli fri long sin mo long sem taem, i leftemap ol stret rul. Sipos hem i bin letem man i gohed long sin, hem i no soem stret fasin mo lav. From we sipos hem i letem olsem, i minim se hem i sapotem fasin blong brekem loa. Defren nao, sipos stret fasin blong God blong jajem man i smol nomo, nao hem i jajem ol man se oli mas kasem pei no panis, bambae ol man oli no gat hop nating. Baebol i talem se: “Pei we ol man bambae oli kasem, from we oli mekem sin, hemia we bambae oli ded from” mo “i no gat wan man we i stret gud, i no gat wan man nating olsem.” (Rom 3:​10; 6:​23) Taem Jeova i givim wan sakrifaes blong pemaot sin, hem mo Pikinini blong hem we hem i laekem tumas, tufala i lego wan samting we i bigfala tumas.​—1 Jon 2:​1, 2.

Ransom sakrifaes i soem se stret fasin blong God blong jajem man i joen wetem lav we i stanap long ol stret rul (Grik, a·gaʹpe). Yes, fasin blong God blong jajem man i pruvum se Hem i stap folemgud ol stret rul blong hem​—⁠i soemaot ol hae mak blong hem long saed blong ol gudfala fasin. Olsem nao, taem God i jajem man, oltaem hem i mekem wetem lav ya a·gaʹpe. (Matyu 5:​43-​48) Taswe, sipos yumi rili kasem save long fasin blong Jeova blong jajem man, bambae yumi trastem fulwan jajmen we hem i mekem. Olsem ‘Jaj blong olgeta man long wol,’ oltaem nomo hem i stap mekem i stret.​—Jenesis 18:25; Ol Sam 119:75.

Folem Fasin Blong Jeova Blong Jajem Man

Baebol i givim advaes long yumi blong ‘folem fasin blong God.’ (Efesas 5:⁠1) Samting ya i minim se yumi mas folem fasin blong hem blong jajem man mo lav blong hem. Be, from we yumi no stretgud olgeta, ol samting we yumi mekem oli no nambawan olsem hemia we Jeova God i mekem. (Aesea 55:​8, 9; Esikel 18:⁠25) ?Taswe, olsem wanem yumi save pruvum se yumi laekem ol fasin we oli stret mo stret fasin blong jajem man? Hemia taem yumi putum “nyufala fasin blong laef we God i wokem olsem we hem i wantem. Fasin ya i kamaot long trufala stret fasin mo fasin blong obei long hem oltaem.” (Efesas 4:⁠24, NW) Olsem nao, bambae yumi laekem tumas ol samting we God i laekem mo agensem ol samting we God i no laekem nating. Man we i gat “trufala stret fasin” i tanem baksaed long fasin blong faet, nogud fasin blong seks, ol doti fasin, mo fasin blong apostasi,a from we ol fasin ya oli daonem samting we i tabu. (Ol Sam 11:5; Efesas 5:​3-5; 2 Timote 2:​16, 17) Jajmen we i kamaot long God i pusum yumi tu blong soem trufala intres long ol narafala man.​—Ol Sam 37:21; Rom 15:​1-3.

Mo tu, sipos yumi gat tangkyu long fasin blong God blong jajem man wetem sore, bambae yumi no save jajem ol brata mo sista blong yumi long saed blong speret. ?Yumi naf blong kasem save olgeta olsem we Jeova i kasem save long olgeta? Yumi no mas jajem olgeta long prapa tingting blong yumi nomo. From we Jisas i givim woning se: “Bambae yufala i no jajem narafala man. Sipos yufala i no jajem narafala man, bambae God i no save jajem yufala. From we fasin we yufala i folem blong jajem man, hemia fasin we God bambae i folem blong jajem yufala. Mo mak we yufala i putum blong givim presen long man, hemia mak we God bambae i folem blong givim presen long yufala. ?Olsem wanem yu stap lukluk pis wud ya we i smol nomo, we i stap long ae blong brata blong yu, be yu no save luk bigfala timba ya we i stap long ae blong yu? ?Weswe yu save talem long brata blong yu, se ‘E, brata, mi tekemaot smol pis wud ya we i stap long ae blong yu,’ be bigfala timba i stap yet long ae blong yu? Man, yu yu man blong gyaman. Fastaem yu mas tekemaot bigfala timba ya we i stap long ae blong yu, nao bambae yu save luklukgud blong tekemaot smol pis wud ya we i stap long ae blong brata blong yu.” (Matyu 7:​1-5) Yumi mas rere blong luksave se yumi no stret gud olgeta. Olsem nao, bambae yumi no jajem narafala long fasin we i no stret long ae blong Jeova.

Ol elda we tabu speret i putumap long kongregesen,b oli mas jajem man we i mekem bigfala sin. (1 Korin 5:​12, 13) Taem oli jajem hem, oli tingbaot se stret fasin blong God blong jajem man, i blong soem sore taem i nidim blong mekem olsem. Sipos i no gat risen blong soem sore​—⁠olsem taem wan man i no wantem tanem tingting from sin blong hem​—⁠oli no save soem sore. Be taem ol elda oli sakemaot man ya long kongregesen, hemia i no from we oli wantem givimbak long hem. Oli hop se fasin ya we oli sakemaot hem, bambae i mekem hem i tanem tingting blong hem. (Skelem wetem Esikel 18:23.) Aninit long Kraes we i olsem hed, ol elda oli wok blong mekem stret fasin i stap, mo samting ya i minim tu se oli olsem “wan ples blong haed long hem taem i gat bigfala win.” (Aesea 32:​1, 2) From samting ya, oli mas mekem i stret long evriwan mo oli no mas mekem i strong tumas long narafala.​—Dutronome 1:​16, 17.

Planem Sid Long Stret Fasin

Taem yumi stap wet long nyufala wol blong God we stret fasin nomo i stap long hem, yumi mas “lukaot stret fasin.” Olsem nao, bambae God i glad long yumi. (Sefanaea 2:⁠3; 2 Pita 3:​13) Tingting ya i kliagud long ol tok we yumi faenem long Hosea 10:​12, we i talem se: “Yufala i planem sid long stret fasin. Yufala i tekem kakae long garen wetem gladhat. Yufala i brekem graon blong planem sid, taem i gat jans yet blong lukaot Jeova, go kasem we hem i kam mo i tijim yufala wetem stret fasin.”

Long evri dei laef blong yumi, yumi gat plante jans blong ‘planem sid long stret fasin,’ olsem Jisas i eksplenem long parabol blong hem long saed blong gudfala man Sameria. Bambae Jeova i mekem sua se yumi “tekem kakae long garen wetem gladhat.” Sipos yumi stap ‘jajem man long fasin we i stret,’ bambae yumi gohed blong kasem ol tijing long stret fasin aninit long rul blong Kingdom. (Aesea 40:14) Taem ol dei oli stap pas, i klia se bambae yumi luksave moa se Jeova i God blong laekem ol fasin we oli stret mo stret fasin blong jajem man.​—Ol Sam 33:⁠4, 5.

[Ol futnot]

[Tok Blong Pija Long Pej 23]

Man Sameria i wan eksampel long saed blong stret fasin blong Jeova

[Tok Blong Pija Long Pej 23]

Jisas i sore long ol man we oli trabol, we oli olsem ol waelken we oli bendaon finis