Wok Blong Talemaot Gud Nius i Karem Frut Long São Tomé Mo Príncipe

ATING plante man oli neva harem nem blong tufala aelan ya, São Tomé mo Príncipe. Ol buk we ol turis oli ridim blong faenemaot ol gudfala ples blong go spel, oli no tokbaot tufala aelan ya. Sipos yu lukluk wan map blong wol, bambae yu luk tu smosmol mak long Gulf blong Gini, klosap long wes kos blong Afrika. Hemia nao tufala aelan ya. São Tomé i stap klosap nomo long ekweta, mo Príncipe i stap long saed i go long not-is. Tufala ples ya i hot mo i gat plante ren, mekem se dak bus i kavremap ol hil we oli hae bitim 2,000 meta.

Solwota long ples ya i blu we i blu, mo kokonas i gru fulap long ol sanbij. Ol manples oli kaen, oli soem fasin fren long ol narafala. I gat plante defdefren kalja oli meks long tufala aelan ya, from we ol man oli kamaot long Afrika mo Yurop tugeta. Wok blong ol 170,000 man long ples ya i blong planem kakao mo sanem i go long narafala kantri, oli wokem garen tu, mo oli pulum fis. Naoia, laef i had, taswe i hadwok blong oli kasem kakae we i naf blong evri dei.

Be long ol yia 1990 kasem 2000, i gat wan samting i hapen we i jenisim laef blong fulap man long tufala aelan ya. Long Jun 1993, gavman blong São Tomé mo Príncipe i rejistarem ol Witnes blong Jeova olsem wan skul, nao hadtaem we ol Witnes blong Jeova oli bin fesem blong plante yia, i finis.

Planem Sid Long Hadtaem Ya

I luk olsem we, jes afta 1950, faswan Witnes i kam long kantri ya. Long taem ya, gavman blong Potugal we i rul long sam ples long Afrika, i sanem sam presina oli kam blong wok kalabus long tufala aelan ya. Faswan Witnes ya, hem i blong Afrika. Hem i wan paenia no wan man we i prij fultaem. Hem i stap talemaot gud nius blong Kingdom blong God long Mosambik, nao oli sakemaot hem, oli sanem hem i kam long ples ya. Nating se hem wan nomo i Witnes long ples ya, be hem i stap bisi long wok blong God. Bifo we sikis manis i pas, i gat 13 man we oli joen wetem hem blong talemaot gud nius. Biaen, oli sakemaot sam narafala Witnes long Angola, oli sanem olgeta tu oli kam stap long tufala aelan ya. Oli stap kalabus, be oli tekem evri janis blong talemaot gud nius long ol manples.

Long 1966, i no moa gat ol brata blong Afrika we oli stap kalabus long São Tomé, olgeta evriwan oli gobak finis. Be, smol grup blong ol man blong talemaot Kingdom we oli stap, oli no fraet, oli gohed strong. Ol man oli mekem i nogud long olgeta, oli wipim olgeta, mo oli sakem olgeta oli go long kalabus, from we oli joen wanples blong stadi Baebol. Mo i no gat wan man we i save kam luk olgeta blong leftemap tingting blong olgeta. Long 1975, kantri ya i kasem independens, nao sloslo, sid blong Kingdom i karem frut.

Wok i Kam Antap, Oli Bildim Ol Haos Kingdom

Long 1993, long manis we gavman i rejistarem ol Witnes, i gat wan niufala namba blong 100 pablisa blong Kingdom. Long semfala yia ya, sam spesel paenia oli aot long Potugal, oli kam. Oli hadwok blong lanem lanwis ya Kreol blong Potugal, mo from we oli traehad olsem, ol manples oli laekem olgeta tumas. Oli traem blong faenem graon we oli save bildim wan Haos Kingdom long hem. Wan sista we nem blong hem Maria, hem i harem tok ya se oli nidim graon, ale, haf graon we i stap klosap long smol haos blong hem, hem i givim long olgeta. Graon ya i naf blong bildim wan bigfala Haos Kingdom long hem. Maria i no save se ol bisnesman oli stap wantem graon ya. Oli save se Maria i no gat wan pikinini we bambae hem i givim graon ya long hem. Ale, wan dei, wan bigfala bisnesman i kam luk Maria.

Hem i tok strong long Maria se: “!Mi mi harem wan nogud tok long saed blong yu! Mi harem oli talem se yu yu givim graon ya long jos. !Yu yu krangke ya! Graon ya i stap long medel blong taon. Yu yu save kasem bigfala mane blong graon ya.”

Maria i askem long hem se: “?Sipos mi talem long yu se yu save pem graon ya, bambae yu givim hamas long mi?” Man ya i no ansa, ale Maria i gohed se: “Nating se yu givim olgeta mane blong wol long mi, bambae i no naf yet, from we mi mi no save yusum mane ya blong pem laef.”

Man ya i askem se: “?Ating yu yu no gat pikinini, a?”

Blong finisim storian ya, Maria i talem se: “Graon ya i blong Jeova. Hem i givim graon ya long mi plante yia finis blong mi yusum, mo naoia mi mi givimbak long hem. Mi mi wet nomo long taem ya we bambae mi save laef olwe.” Nao Maria i askem long man ya se: “?Yu yu save givim laef blong olwe long mi?” Man ya i no moa toktok, hem i tanraon, i gowe.

Ale, sam Kristin brata blong Potugal we oli save long wok ya blong bildim haos, oli givhan blong wokem wan nambawan haos we i gat tu stori blong hem. Long haos ya, i gat wan rum daon aninit long graon, wetem wan bigfala Haos Kingdom, mo wan rum blong man i slip long hem. I gat sam klasrum long hem tu, blong ol elda, ol man blong givhan, mo ol paenia, oli save mekem ol kos blong olgeta long hem. Naoia, tu kongregesen i mekem miting long Haos Kingdom ya. Hem i stamba ples blong tijim ol man long saed blong trufala wosip, long bigfala taon blong aelan ya.

Long Mé-Zochi, i gat wan kongregesen blong 60 pablisa we oli stap wok strong. Fastaem, oli mekem ol miting long wan raf Haos Kingdom nomo, we i stap long plantesen blong ol banana. Be oli luksave se oli nidim wan Haos Kingdom we i moa gud. Ale, oli go luk ol bigman blong munisipol, oli talemaot samting ya long olgeta, nao long kaen fasin, ol man ya oli givim wan gudfala graon long big rod, we ol brata oli save wokem wan Haos Kingdom long hem. Bakegen, sam Kristin brata blong Potugal oli givhan blong wokem Haos Kingdom ya. Oli wokem long fasin we i kwik, nao long tu manis nomo oli stanemap wan gudfala haos. Ol manples oli sapraes tumas. Wan enjinia blong Swiden we i stap wok long wan narafala haos long taon ya, i luk we ol brata mo sista oli wokem haos ya kwiktaem, nao hem i sek. Hem i se: “?Wanem ya? ?Ol Witnes blong Jeova long ples ya, Mé-Zochi, oli stap yusum fasin blong bildim haos kwiktaem? !Man, sipos mifala i gat hed, bambae mifala i yusum rod ya tu!” Long Jun 12, 1999, i gat 232 man oli joen wanples blong dediketem Haos Kingdom ya. Taem ol turis oli stap kam long Mé-Zochi, ol manples oli neva mestem blong soem Haos Kingdom ya long olgeta.

Asembli We Oli No Save Fogetem

Wan samting we ol Witnes blong Jeova long São Tomé mo Príncipe oli no save fogetem, hemia Distrik Asembli blong tri dei long Jenuware 1994, nem blong hem “Tijing Blong God.” Hemia faswan Distrik Asembli long tufala aelan ya. Oli yusum beswan bigfala haos blong kantri ya blong mekem asembli ya long hem, mo i gat ekondisen long hem tu. !Tingbaot glad blong ol 116 man blong talemaot Kingdom, taem oli luk 405 man long asembli ya! Mo tu, hemia faswan taem we oli lukluk wan drama blong Baebol, mo faswan taem we oli kasem ol niufala buk. Long solwota klosap long wan naesfala sanbij, oli baptaesem 20 man we oli givim laef blong olgeta i go long Jeova.

Wan niufala samting we ol manples oli neva luk bifo, hemia ol baj we ol man oli werem long asembli ya. Mo tu, i gat 25 Witnes blong Potugal mo Angola we oli kam, mekem se asembli ya i lelebet olsem wan intenasnal asembli. Kwiktaem nomo, ol Kristin ya oli lavlavem olgeta. Long en blong asembli, taem oli mas talem tata, wota blong ae blong olgeta i ron we i ron.​—Jon 13:35.

Ol man blong ridim nius long Nasnal Radio, oli kam toktok wetem brata we i lukaot long asembli ya. Mo tu, oli putum sam haf blong ol tok blong asembli ya long radio. Tru ya, oli no save fogetem asembli ya. Ol gudfala Witnes long tufala aelan ya oli bin stap olgeta nomo blong longtaem, be afta long asembli ya, oli harem se oli stap klosap moa long ogenaesesen blong Jeova long wol ya.

Karem Frut We i Givim Ona Long Jeova

Taem tok blong Kingdom i karem frut long laef blong wan man, man ya i wokem ol gudfala fasin, nao samting ya i presem Jeova mo i givim ona long hem. (Taetas 2:​10) Wan yangfala gel i stap stadi Baebol evri wik, mo hem i laekem tumas ol samting we hem i stap lanem. Be, papa blong hem i blokem hem blong i no save go joen long ol miting blong kongregesen. Wetem respek, gel ya i eksplenem long papa blong hem se ol Kristin miting oli impoten tumas, mo se hem i wantem tumas blong go joen long olgeta. Wantaem nomo, papa blong hem i sakemaot hem long haos. Hem i ting se gel ya bambae i mekem olsem ol narafala yangfala​—bambae hem i go stap wetem wan man we i save pem ol samting we hem i nidim. Taem papa blong hem i harem nius se gel ya i stap folem nambawan Kristin fasin mo i holem klin fasin long laef blong hem, hem i talem long gel ya blong kambak long haos, mo hem i letem hem i mekem wok blong Jeova fulwan.

I gat wan narafala gudfala stori long saed blong lida blong wan grup blong plei miusik. Hem i stap folem ol rabis fasin long laef blong hem gogo hem i harem nogud. Hem i traem blong lukaot rod blong haremgud long laef, nao wan dei, ol Witnes oli faenem hem. Ale, hem i stat jenisim ol fasin blong hem blong mekem se oli laenap wetem ol gudfala fasin we Baebol i talem. Olgeta man long taon oli sapraes long hem. I no longtaem, hem i luksave se hem i mas lego ol rabis fren blong hem. (1 Korin 15:33) Biaen, hem i mekem bigfala disisen blong tekem baptaes, blong soemaot se hem i givim laef blong hem i go long Jeova.

I gat sam narafala yangfala bakegen we oli stap lukaot trufala skul. Oli storian wetem pasta blong plante ivanjelikal jos, be tingting blong olgeta i fasfas moa, mo oli harem nogud. Ale oli kam stronghed, oli stap kilim ol man, mo oli laf nomo long ol man blong ol jos.

Wan dei, wan misinari blong ol Witnes blong Jeova i stap wokbaot i go blong mekem wan Baebol stadi, nao hem i pas long ples we ol yangfala ya oli stap long hem. Oli wantem askem sam kwestin long misinari ya, ale oli tekem hem i go long yad blong wan haos, mo oli givim wan smol stul long hem blong i sidaon long hem. Nao oli askem fulap kwestin long saed blong sol, helfaea, laef long heven, mo en blong wol. Witnes ya i tekem Baebol we i blong lida blong grup ya, nao hem i ansa long ol kwestin blong olgeta. Wan aoa i pas nao lida ya we nem blong hem Law, i talem long misinari ya se: “Taem mifala i tekem yu yu kam long ples ya blong ansa long ol kwestin blong mifala, mifala i gat tingting blong jikim yu nomo, olsem we mifala i stap mekem long ol man blong ol narafala skul. Mifala i ting se i no gat wan man we i save ansa long ol kwestin ya. Be yu yu ansa long olgeta evriwan, mo yu yusum Baebol blong givim ol ansa ya. Plis talem long mi: ?Olsem wanem mi mi save lanem moa long saed blong Baebol?” Witnes ya i statem wan Baebol stadi wetem Law, mo smoltaem biaen, hem i stat kam long ol miting. Smoltaem bakegen, hem i lego stronghed grup ya we hem i lida blong hem, mo i sakemaot ol raf fasin we hem i bin mekem bifo. Wan yia i no pas yet, be hem i givim laef blong hem i go long Jeova mo hem i tekem baptaes. Naoia, hem i mekem wok blong wan man blong givhan long kongregesen.

Wan kastom blong tufala aelan ya we i strong blong jenisim, hemia se ol man mo woman oli stap tugeta nomo, oli no mared. Plante long olgeta oli bin stap tugeta blong plante yia, mo oli gat pikinini finis. Olgeta ya oli faenem i had blong folem tingting blong God long bisnes ya. Be i gud tumas blong luk olsem wanem Tok blong God i givhan long wan man blong stretem trabol ya.​—2 Korin 10:​4-6; Hibrus 4:​12.

Antonio i kasem save se tufala i mas go saen blong rejistarem mared blong tufala. Hem i mekem plan se, bambae hem i planem kon, nao taem hem i kasem mane blong kon ya, bambae tufala i mekem lafet blong mared. Be taem kon ya i rere, wan stilman i kam long naet, i karemaot olgeta kon. Nao Antonio i wet kasem nekis yia blong kon i karem frut bakegen. Be sem samting i hapen, stilman i kam karem olgeta kon ya. Antonio i traehad bakegen blong kasem mane blong mekem lafet blong mared, be bakegen plan blong hem i foldaon. Nao hem i luksave hu ya i stap blokem hem. Hem i se: “Naoia, Setan bambae i no moa pleplei wetem mi. !Long wan manis haf, bambae mitufala i mared, nomata se i gat lafet no i nogat!” Mo i tru, tufala i mared, mo tufala i sapraes taem ol fren blong tufala oli karem ol faol i kam, wetem ol dakdak mo wan nani, blong oli mekem lafet blong mared. Afta we Antonio mo woman blong hem i mared gud, tufala wetem sikis pikinini blong tufala oli tekem baptaes blong soem se oli givim laef blong olgeta i go long Jeova.

Oli Go Long Aelan Blong Príncipe

Long ol yia we oli pas, wanwan taem, seket elda mo ol paenia blong São Tomé, oli go long aelan blong Príncipe. Ol 6,000 man long aelan ya oli soem kaengud fasin long ol Witnes, mo oli glad blong lesin long tok we oli stap talemaot. Wan Witnes i givim wan smol pepa long wan man, nao long nekis dei, man ya i lukaot ol paenia from we hem i wantem givhan long olgeta blong givimaot ol pepa ya long ol narafala man. Ol paenia oli eksplenem long hem se i oraet, olgeta oli save mekem wok ya, be man ya i strong se hem i mas go wetem olgeta long evri haos, blong talem long ol man se oli mas lesin long olgeta. Afta we ol paenia oli toktok plante long hem, hem i livim olgeta. Be fastaem, hem i talem ol gudfala toktok long olgeta from impoten wok we oli stap mekem.

Long 1998, tu paenia blong São Tomé i muv i kam long Príncipe. Smoltaem biaen, tufala i stap mekem 17 Baebol stadi long haos blong ol man. Wok i gohed gud, nao kwiktaem nomo, i gat 16 man oli stap kam long Buk Stadi blong kongregesen, mo bitim 30 man oli stap kam long pablik tok. Oli go luk ol bigman blong munisipol, oli talem long olgeta se oli nidim wan Haos Kingdom. Ale ol man ya oli givim wan graon long olgeta, blong oli save bildim wan haos long hem. Ol brata blong São Tomé oli kam wok fri blong bildim wan smol Haos Kingdom, wetem wan haos blong tufala spesel paenia.

Tru ya, wok blong talemaot gud nius i stap karem plante frut mo i stap kam antap long ol aelan ya we oli farawe long ol narafala ples. (Kolosi 1:​5, 6) Long Jenuware 1990, i gat 46 pablisa long São Tomé mo Príncipe. !Long sevis yia blong 2002, namba blong ol man blong talemaot Kingdom i go antap kasem 388! Bitim 20 pesen blong ol pablisa oli stap prij fultaem, mo oli stap mekem samwe long 1,400 Baebol stadi long haos blong ol man. Long yia 2001, i gat 1,907 man oli kam long Memoriol, hemia wan namba we oli neva kasem bifo. Yes, long ol naesfala aelan ya, tok blong Jeova i stap goaot kwik long evri ples, blong ol man oli save ona long Hem.​—2 Tesalonaeka 3:1.

[Bokis/Foto blong pija long pej 12]

Ol Program Long Radio We Ol Man Oli Laekem Tumas

Wan buk we ol man long tufala aelan ya oli laekem tumas, hemia buk ya Questions Young People Ask​—Answers That Work.a Wan taem evri tu wik, Nasnal Radio i gat wan program blong 15 menet, we i karem nem blong buk ya. I gud tumas blong harem man blong radio i talem se: “Ol yangfala. ?Yufala i save sipos yufala i rili lavem gelfren no boefren blong yufala, no sipos hemia wan giaman lav nomo?” Nao hem i ridim wan haf blong buk ya. (Lukluk japta 31.) Wan narafala program long radio i yusum ol defdefren haf blong buk ya, Spesel Rod Blong Mekem Famle i Hapi.b

[Ol Futnot]

[Tok blong pija long pej 9]

Faswan Haos Kingdom we oli bildim long São Tomé long 1994

[Tok blong pija long pej 10]

1. Haos Kingdom we oli wokem kwiktaem long Mé-Zochi

2. Long ples ya, oli mekem wan distrik asembli we oli no save fogetem

3. Ol hapi man mo woman ya oli tekem baptaes long asembli

[Foto Credit line blong pija long pej 8]

Globe: Mountain High Maps® Copyright © 1997 Digital Wisdom, Inc.