Rere Blong Jenisim Fasin Blong Prij Mo Kam Gud Moa Oltaem Long Wok Ya

“Long fes blong ol man we oli gat ol defdefren kaen fasin, be mi mekem olsem we mi tu mi gat sem fasin we olgeta oli gat, blong yusum olgeta rod blong sevem sam long olgeta.”​—1 KORIN 9:22.

1, 2. (a) ?Wanem i soem se aposol Pol i wan man blong prij we i karem frut long wok blong hem? (b) ?Pol i talemaot wanem tingting blong hem long saed blong wok we Jisas i givim long hem?

APOSOL POL i save olsem wanem blong toktok long ol man we oli skul gud, be hem i save tu olsem wanem blong toktok long ol man we oli wokem haos tapolen nomo. Hem i winim tingting blong ol haeman blong Rom, be hem i save winim tingting blong ol man Frijia tu we oli man blong wok long garen nomo. Long ol leta blong hem, hem i pulum tingting blong ol man Gris we oli agri long enikaen niufala save, be hem i pulum tingting tu blong ol man Jiu we oli fas strong long kastom. Ol tok we hem i talem oli klia tumas mekem se oli kasem hat blong man, mo man i no save faenem poen agens long hem. Hem i traem oltaem blong faenem wan poen we hem mo narafala i save agri long hem, from we hem i wantem winim sam long olgeta oli kam long Kraes.​—Ol Wok 20:21.

² Yes, i klia nomo se Pol i wan man blong talemaot gud nius we i karem frut long wok blong hem mo we i traehad oltaem blong kamgud moa long wok ya. (1 Timoti 1:12) Jisas i givim wok long hem, hemia blong “talemaot nem blong [Kraes] long ol man we oli no laen blong Isrel, mo long ol king, mo long ol laen blong Isrel tu.” (Ol Wok 9:15) ?Wanem tingting blong hem long saed blong wok ya we hem i kasem? Hem i talem se: “Long fes blong ol man we oli gat ol defdefren kaen fasin, be mi mekem olsem we mi tu mi gat sem fasin we olgeta oli gat, blong yusum olgeta rod blong sevem sam long olgeta. Mi mekem ol samting ya from gud nius blong Jisas Kraes, blong bambae mi tu mi save kasem ol gudgudfala samting we i blong olgeta we oli bilif long gud nius ya.” (1 Korin 9:​19-23) ?Olsem wanem eksampol blong Pol i save halpem yumi blong karem frut long wok we yumi mekem blong prij mo tijim man?

Man Ya We Laef Blong Hem i Jenis, i Mekemgud Wok Ya

 3. ?Wanem tingting we Pol i gat long ol Kristin, bifo we hem i kam wan disaepol blong Kraes?

³ Pol i wan man we i gat longfala tingting, i tingbaot narafala, mo i holemgud wok we oli givim long hem. ?Be olsem wanem? ?Hemia fasin we Pol i bin gat longtaem finis i kam? !Nogat! Bifo, Pol hem i man ya Sol we i wan strong man long skul blong hem. Hem i agensem mo i ronem ol disaepol blong Kraes. Taem hem i wan yang man, hem i agri long jajmen we kot i givim blong stonem Steven i ded. Afta long samting ya, Pol i traem faenem ol Kristin blong putum olgeta long kalabus. (Ol Wok 7:58; 8:​1, 3; 1 Timoti 1:13) Hem i ‘tok strong, i mekem promes blong kilim ol man blong Masta oli ded.’ Hem i ronem ol Kristin long Jerusalem, be hemia i no naf yet long hem, nao hem i go lukaot ol Kristin long ol narafala ples tu, i go kasem Damaskes we i stap long not olgeta.​—Ol Wok 9:​1, 2.

 4. ?Wanem jenis we Pol i mas mekem blong hem i save mekem wok ya we God i givim long hem?

⁴ Ating Pol i kros bigwan long Kristin skul from we hem i ting se niufala skul ya i karem ol tingting blong hiten man i kam, mo samting ya bambae i spolem skul blong ol man Jiu. Tru ya, Pol i “wan Farisi,” mo nem ya i minim “man we i seraot long ol narafala.” (Ol Wok 23:6) !Ating Pol i sapraes bigwan taem hem i kasem save se God i bin jusum hem blong talemaot gud nius blong Kraes long ol hiten man! (Ol Wok 22:​14, 15; 26:​16-18) !Ol Farisi oli no wantem kakae wetem ol man we long tingting blong olgeta oli sinman! (Luk 7:​36-39) Ating Pol i mas traehad bigwan blong jenisim tingting we hem i gat long ol hiten man, blong mekem i laenap wetem tingting blong God we i wantem sevem olkaen man.​—Galesia 1:​13-17.

 5. ?Olsem wanem yumi folem fasin blong Pol long wok blong prij blong yumi?

⁵ Maet yumi nidim blong mekem samting ya tu. Taem yumi stap prij long ol teritori blong yumi, maet yumi mitim plante moa man blong defren kantri, kala, mo lanwis. Yumi mas jekemap fasin mo tingting blong yumi mo sakemaot enikaen rong tingting we yumi gat agensem ol man ya. (Efesas 4:​22-24) Maet yumi luksave no yumi no luksave, be ol fasin mo tingting we yumi gat oli kamaot folem laef we yumi gruap long hem mo edukesen we yumi kasem. From samting ya, maet yumi gat sam rong tingting long saed blong narafala man, maet yumi jajem nogud olgeta mo i had long yumi blong jenisim tingting blong yumi. Yumi mas lego olkaen tingting ya sipos yumi wantem faenem mo halpem ol man we oli olsem sipsip. (Rom 15:7) Hemia samting we Pol i mekem. Hem i agri blong mekem moa long wok blong prij. Lav i pusum hem, nao hem i wokem sam fasin blong tij we i gud yumi folem. I gud yumi traem save ol fasin blong Pol we Baebol i kolem hem ‘aposol blong olgeta we oli no laen blong Isrel.’ Taem yumi mekem olsem, yumi faenemaot se aposol ya i tingbaot narafala, i rere oltaem blong jenisim tingting, toktok, mo fasin blong hem blong mekem i stret long olkaen man, mo hem i gat gudhan blong yusum ol defdefren kaen rod blong prij mo tijim man.a​—Rom 11:13.

Pol i Kam Gud Moa Oltaem Long Wok Blong Prij

 6. ?Taem Pol i prij, olsem wanem hem i tingbaot ol save we ol man ya oli kasem long laef blong olgeta, mo wanem i kamaot from?

⁶ Taem Pol i toktok long ol man, hem i tingbaot ol bilif mo save we ol man ya oli kasem long laef blong olgeta. Taswe, taem hem i toktok long King Agripa 2, hem i tingbaot se king ya i ‘savegud ol kastom mo fasin blong ol laen blong Isrel.’ Save we Pol i gat long saed blong ol bilif blong Agripa i givhan long hem blong tokbaot sam bisnes we King ya bambae i kasem savegud long hem. From we ol tok blong Pol oli klia mo oli soemaot strong bilif, Agripa i talem se: “I no longtaem bambae yu pulum mi mi kam Kristin man.”​—Ol Wok 26:​2, 3, 27, 28, NW.

 7. ?Olsem wanem Pol i soemaot se hem i rere blong jenisim fasin blong hem blong prij taem hem i stap wetem hip man ya long Listra?

⁷ Wan narafala fasin blong Pol se hem i rere oltaem blong jenisim tingting, toktok, mo fasin blong hem, blong mekem i stret long narafala. Tingbaot wanem we hem i talem taem hem i tok long wan hip blong ol man long taon blong Listra we oli wantem wosip long hem mo Banabas. I gat ol stori i stap se ol man long taon ya Listra we oli toktok lanwis Likaonia, oli no skulgud mo oli gat plante giaman tingting we i mekem olgeta oli fraet. Long Ol Wok 14:​14-18, Pol i tokbaot ol samting we God i wokem mo olgeta gudgudfala samting we hem i givim, blong pruvum se trufala God i hae moa long ol narafala god. I isi blong oli kasem save long tok ya from we i luk olsem se i “blokem ol man ya we oli wantem mekem sakrefaes” long Pol mo Banabas.

 8. ?Nating se samtaem fasin blong Pol i strong tumas, olsem wanem hem i soem se hem i save jenisim tingting blong hem?

⁸ I tru, Pol i no stretgud olgeta, taswe samtaem fasin blong hem i strong tumas. Tingbaot taem ya we wan man Jiu we nem blong Ananaeas i agensem Pol mo i wantem mekem hem i sem long fes blong olgeta man. Wantaem nomo, Pol i tok bak long man ya mo i sakem sam strong tok i go long hem. Be taem oli talem long Pol se man ya we hem i tok long hem, hem i wan hae pris, wantaem nomo Pol i talem sore. (Ol Wok 23:​1-5) Long wan narafala taem bakegen, hem i stap long Atens, nao hem i “harem nogud tumas from we hem i luk we ples ya i fulap gud long ol aedol.” Nating se i olsem, be taem Pol i toktok long ol man antap long hil ya we oli kolem Mas, hem i no soemaot nating se hem i harem nogud. Defren olgeta, taem hem i stap long maketples blong ol man Atens, hem i tokbaot samting we hem mo ol man ya oli save agri long hem. Hem i tokbaot wan olta we ol man ya oli talem se i blong ‘wan god we oli no save hem,’ mo hem i yusum toktok blong wan man blong ples blong olgeta we i stap wokem ol singsing.​—Ol Wok 17:​16-28.

 9. ?Olsem wanem Pol i soemaot se hem i save faenem olkaen rod blong kasem tingting blong olkaen man?

⁹ Pol i naf blong faenem olkaen rod blong kasem tingting blong olkaen man. Hem i tingbaot kalja blong ol man mo ples we oli gruap long hem we maet i mekem se ol man ya oli tingting olsem no olsem. Taem hem i raet i go long ol Kristin long Rom, hem i tingbaot se oli stap long bigfala taon we i kaptel blong wan gavman we i rul long plante kantri long taem ya. Wan bigfala poen we Pol i makem long leta blong hem long ol Kristin long Rom, hemia se paoa we Kraes i gat blong pemaot ol man i save winim sin blong Adam we i stap spolem ol man. Hem i toktok long ol Kristin blong Rom mo ol narafala man we oli stap, long wan fasin we i save tajem hat blong olgeta.​—Rom 1:​4, NW; 5:​14, 15.

10, 11. ?Olsem wanem Pol i jusum pijatok we i stret long ol man we oli lesin long hem? (Lukluk futnot.)

¹⁰ ?Pol i mekem wanem taem hem i mas eksplenem sam dip trutok blong Baebol long ol man? Aposol ya i gat gudhan blong yusum ol pijatok we oli isi nomo mo we oli laenap wetem samting we man i savegud, blong kliarem sam poen long saed blong spirit we oli fasfas tumas. Eksampol, Pol i save se ol man Rom oli savegud fasin blong wok slef, from we fasin ya i bigwan long olgeta kantri ya we Rom i rul long olgeta. Tru ya, ating plante long ol man ya we Pol i raet i go long olgeta oli ol slef. Taswe, Pol i yusum fasin blong wok slef olsem wan pijatok blong soemaot se man i save jus sipos hem i wantem slef blong sin no blong stretfasin.​—Rom 6:​16-20.

¹¹ Wan buk i talem se: “Sipos wan man Rom i masta blong sam slef, hem i save jus blong letem wan slef i gofri nomo olsem, no i save letem wan slef i gofri sipos slef ya i pemaot hem wan. Wan narafala rod tu we slef i save gofri, hemia sipos hem i kamaot long masta blong hem blong go mekem wok blong wan god.” Nating se wan slef i gofri finis, hem i save gohed yet blong mekem wok blong masta blong hem mo kasem pei from wok ya. Ating Pol i stap tokbaot samting ya nao taem hem i raetem se wanwan man i fri blong jusum masta blong hem, olsem se hem i wantem obei long sin no long stretfasin. Ol Kristin long Rom oli fri finis long sin mo naoia God i masta blong olgeta. Oli fri blong mekem wok blong God, be sipos oli wantem, oli save jus blong gobak long masta blong olgeta bifo, we hemia sin. Pijatok ya i laenap wetem wan samting we ol Kristin long Rom oli savegud, mo i save pulum olgeta blong askem se: ‘?Mi mi stap mekem wok blong wanem masta?’b

Eksampol Blong Pol i Tijim Yumi

12, 13. (a) ?Wanem traehad we yumi mas mekem tede blong pulum tingting blong enikaen man i go long Baebol? (b) ?Wanem rod we yu yu faenem se i wokgud taem yu prij long defdefren kaen man?

¹² I gud yumi mekem olsem Pol. Yumi save traehad blong tingbaot ol man, rere oltaem blong jenisim tingting, toktok, mo fasin blong yumi, blong mekem i stret long narafala, mo faenem enikaen rod blong kasem tingting blong enikaen man. Sipos yumi wantem halpem ol man blong oli kasem gud nius ya, i no naf blong sekhan, talemaot wan mesej, mo givim wan buk. Yumi mas go moa. I gud yumi traem luksave ol nid blong olgeta, ol wari blong olgeta, samting we oli laekem mo samting we oli no laekem, wanem we i mekem oli fraet mo ol rong tingting we i mekem we oli agensem sam kaen man. I tru se, blong mekem olsem, yumi mas yusum tingting blong yumi mo wokhad. Be raon long wol, plante pablisa blong Kingdom oli stap traehad olsem. Wan ripot we i kam long branj ofis blong ol Witnes blong Jeova long Hangari i talem se: “Ol brata oli soem respek long kastom mo fasin blong laef blong ol man we oli kam long nara kantri, mo oli no gat tingting se ol strenja ya oli mas lanem kastom blong [Hangari].” Ol Witnes long narafala kantri tu oli mekem sem mak.

¹³ Long wan kantri long Esia, bighaf blong ol man oli wari long saed blong helt, wok blong tijim pikinini, mo edukesen. Ale, ol pablisa blong Kingdom oli traem tokbaot ol problem ya wetem ol man i bitim we oli tokbaot ol narafala problem blong wol mo ol trabol bitwin ol man we i had blong stretem, from we ol samting ya oli no wan wari long tingting blong ol manples. Long sem fasin, ol pablisa long wan bigfala taon long Yunaeted Stet, oli luksave se ol man long wan eria blong taon ya oli wari plante long ol trabol olsem kruked fasin, ol rod we oli stap fasfas oltaem from we i gat plante tumas trak, mo fasin blong brekem loa. Ale, ol Witnes oli tokbaot ol problem ya blong pulum tingting blong man i go long Baebol, mo plante man oli lesin. Ol gudfala tija blong Baebol oli meksua se, nomata wanem samting we oli tokbaot, be oltaem oli givim hop long man mo oli leftemap tingting. Oli soemaot long man olsem wanem blong kasem blesing naoia taem oli folem ol rul blong Baebol, mo wanem nambawan blesing we God i save givim long olgeta long fiuja.​—Aesea 48:​17, 18; 52:7.

14. ?Olsem wanem yumi save mekem toktok blong yumi i laenap wetem ol man we nid blong olgeta mo laef blong olgeta i defren?

¹⁴ I gud tu blong jenjenisim ol toktok blong yumi taem yumi prij, from we yumi mitim olkaen man we oli blong defdefren kalja, maet oli skulgud no oli no skulgud, mo oli blong defdefren jos tu. Storian blong yumi wetem wan man we i bilif se God i stap be i no bilif long Baebol, bambae i defren long storian blong yumi wetem wan man we i no bilif nating se i gat God. Sipos wan man i no wantem ridim ol buk blong yumi from we hem i ting se olgeta buk blong skul oli blong fosem man blong bilif long wanem we wan jos i tijim, bambae yumi storian wetem hem long fasin we i defren long man we i agri long olgeta tijing blong Baebol. Fasin ya we yumi naf blong jenjenisim toktok blong yumi, hem i gud tu long taem ya we yumi storian wetem man we i skulgud mo man we i no skulgud. Wan tija we i gat gudhan i mas traehad blong pulum tingting blong man wetem sam toktok mo pijatok we oli stret long hem.​—1 Jon 5:20.

Halpem Ol Niufala Pablisa

15, 16. ?From wanem i nidim blong trenem ol niufala pablisa?

¹⁵ Pol i no tingbaot nomo olsem wanem blong kamgud moa long fasin blong hem blong tij. Hem i luksave tu se i impoten blong trenem mo rerem olgeta we oli kam biaen long hem, we oli yang moa, olsem Timoti mo Taetas. Nao olgeta ya tu oli save kamgud moa long wok blong tij. (2 Timoti 2:2; 3:​10, 14; Taetas 1:4) Long sem fasin, i nidim moa man we oli naf blong givim trening olsem, mo i gat plante plante niuwan tu we oli nidim trening.

¹⁶ Long 1914, i gat samwe long 5,000 pablisa blong Kingdom raon long wol. !Be, tede, 5,000 man oli baptaes evri wik! (Aesea 54:​2, 3; Ol Wok 11:21) Taem ol niuwan oli joen wetem Kristin kongregesen mo oli wantem joen long wok blong prij, oli nidim trening mo wan man blong givhan long olgeta. (Galesia 6:6) I impoten blong givim trening olsem Masta Jisas i mekem, taem hem i stap tijim mo trenem ol disaepol blong hem.c

17, 18. ?Olsem wanem yumi save halpem ol niuwan blong oli harem se oli naf blong prij?

¹⁷ Jisas i no jes lidim ol aposol blong hem i go long ol man nao i talem long olgeta blong toktok. Nogat. Fastaem hem i talem long olgeta, from wanem i impoten blong prij, mo hem i pulum olgeta blong prea long God blong i halpem olgeta long wok ya. Afta long hemia, hem i givim tri samting long olgeta we bambae i halpem olgeta long wok ya: wan patna, wan teritori, mo toktok we oli mas talemaot. (Matiu 9:​35-38; 10:​5-7; Mak 6:7; Luk 9:​2, 6) Yumi save mekem sem samting. Maet yumi halpem pikinini blong yumi, Baebol studen blong yumi, no wan pablisa we i bin slak smoltaem long wok blong prij. I stret we yumi traehad blong givim trening long olgeta folem sem fasin ya we Jisas i mekem.

¹⁸ Ol niuwan oli nidim we yumi halpem olgeta plante blong oli harem se oli naf blong talemaot gud nius blong Kingdom. ?Olsem wanem? ?Yu yu save halpem olgeta blong rerem mo lanem wan fastok we i isi mo i pulum tingting blong man? Taem yu prij wetem wan niuwan, i gud we yu nao yu mekem ol faswan haos, blong hem i save luk eksampol blong yu. Yu save folem fasin blong Gideon we i talem long ol man we oli joen wetem hem long faet, se: “Yufala i mas lukluk i kam long mi. Wanem samting we mi bambae mi mekem, yufala tu bambae i mas mekem olsem.” (Jajes 7:17) Nao yu save letem janis long niuwan ya blong hem tu i toktok. Talem gudfala toktok long hem from traehad we hem i mekem, mo taem i stret blong mekem olsem, yu save talem long hem wanem we hem i mas wok long hem yet blong hem i save kam gud moa.

19. ?Wanem strong tingting we yu yu gat blong yu save finisim gud wok blong prij?

¹⁹ Yumi wantem traehad moa blong kam we yumi naf blong jenjenisim ol toktok blong yumi blong mekem i laenap wetem olkaen man we yumi mitim. Mo yumi wantem trenem ol niuwan, blong olgeta tu oli mekem sem mak. Long rod ya, yumi “finisim olgeta wok ya we God i givim.” Mak blong yumi i blong givim save blong God long ol man blong bambae oli save gat laef. Taem yumi luksave se wok ya i impoten tumas, bambae yumi traehad fulwan blong ‘gat sem fasin we ol man oli gat, blong yusum olgeta rod blong sevem sam long olgeta.’​—2 Timoti 4:5; 1 Korin 9:22.

[Ol Futnot]

?Yu Yu Rimemba?

• ?Olsem wanem yumi save folem fasin blong Pol long wok blong prij?

• ?Wanem jenis we maet yumi mas mekem long tingting blong yumi?

• ?Olsem wanem yumi save mekem we toktok blong yumi i givim hop long man?

• ?Ol niufala pablisa oli nidim wanem blong harem se oli naf blong prij?

[Tok blong makem poen long pej 29]

Long wok blong prij mo tijim ol man, aposol Pol i tingbaot ol man, i rere oltaem blong jenisim tingting, toktok, mo fasin blong hem, blong mekem i stret long narafala, mo i faenem enikaen rod blong kasem tingting blong enikaen man

[Tok blong makem poen long pej 31]

Jisas i givim tri samting long ol disaepol blong hem: wan patna, wan teritori, mo toktok we oli mas talemaot

[Tok blong pija long pej 28]

Pol i mekem toktok blong hem i laenap wetem tingting blong man, ale plante man oli lesin long hem

[Tok blong pija long pej 30]

Ol pablisa we oli wantem karem frut long wok blong olgeta oli tingbaot kalja blong man we oli prij long hem

[Tok blong pija long pej 31]

Ol pablisa we oli traem kam gud moa oltaem long wok blong prij oli halpem ol niuwan long wok ya