Tok Blong Jeova i Wan Samting We i Laef

Ol Bigfala Poen Long Buk Tu Blong Ol Sam

FROM we yumi man blong Jeova, yumi save se bambae yumi kasem ol traem mo trabol. Aposol Pol i raetem se: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:12) ?Wanem i save halpem yumi blong stanap strong long taem blong traem mo trabol, blong yumi save stap tru long God?

Buk Tu long faefala buk blong Ol Sam i halpem yumi long saed ya. Sam 42 kasem 72 i soem long yumi se sipos yumi wantem winim ol traem, yumi mas trastem Jeova fulwan mo yumi mas lanem fasin blong wet long hem blong i sevem yumi. !Yumi lanem wan nambawan lesen long ples ya! Ol toktok we oli stap long Buk Tu blong Ol Sam i sem mak olsem ol narafala toktok blong Baebol. Olgeta toktok ya i “laef, mo i stap wok,” tede tu.​—Hibrus 4:12.

JEOVA I ‘SEFPLES MO PAOA BLONG YUMI’

(Ol Sam 42:​1–50:23)

Wan man Livae i stap longwe long kantri blong hem. Hem i harem nogud tumas from we hem i no save go long haos prea blong Jeova blong wosip. Ale hem i toktok long hem wan i se: “?From wanem mi mi sore tumas olsem? ?From wanem tingting blong mi i trabol tumas? Bambae mi mi putum tingting blong mi i stap long [God] nomo.” (Ol Sam 42:​5, 11; 43:5) Ol tok ya oli kamaot tri taem long Sam 42 mo 43, mo i joenem toktok blong tufala Sam ya wanples. Sam 44 i wan prea we man blong raetem Sam i mekem blong ol man Juda. Neson blong Juda i trabol bigwan, ating hem i stap long denja from we ol ami blong Asiria oli stap wantem tekova long hem, hemia long taem blong King Hesekia.

Sam 45 i wan sing blong mared blong wan king. Hemia i olsem wan profet tok blong Mesaea King. Ol trifala Sam we oli kam biaen, Sam 46, 47 mo 48, oli tokbaot Jeova se hem i ‘sefples mo paoa’ blong ol man, hem i ‘King we i stap rul long olgeta ples long wol,’ mo hem i “strong sefples.” (Ol Sam 46:1; 47:2; 48:3) !Ol gudfala toktok blong Sam 49 oli soemaot se i no gat man we i naf blong “pemaot laef blong hem blong bambae i no go long beregraon”! (Ol Sam 49:7) Ol pikinini blong Kora nao oli wokem Sam 42 kasem 48 long Buk Tu. Nao Sam 50, hem i wan sing we Asaf i wokem.

Ansa Blong Sam Kwestin Long Saed Blong Baebol:

44:19​—?Wanem ples ya we hem i “long medel blong ol wael anamol”? Ating man we i raetem Sam ya i stap tokbaot ples we ol ami oli kam wanples blong mekem faet. Taem faet i finis, ol wael anamol oli kam kakae ded bodi blong ol soldia we oli stap olbaot long graon.

45:​13, 14a (NW)​—?Hu ya “gel blong king” we “oli tekem hem i go long king”? Hemia dota blong Jeova God we i “King” blong olwe. (Revelesen 15:3) Hem i minim grup blong ol 144,000 Kristin we oli go stap long heven. Grup ya we Jeova i adoptem olgeta oli kam pikinini blong hem taem hem i makemaot olgeta wetem tabu spirit blong hem. (Rom 8:16) “Gel” no dota ya blong Jeova i “olsem woman we bambae i mared, we oli flasemgud hem blong i go mitim man blong hem.” Bambae oli tekem hem i go long man blong hem, hemia Mesaea King.​—Revelesen 21:2.

45:14b, 15​—?Hu ya “ol gel blong folem hem long mared”? Hemia “bigfala kampani” blong ol man blong God, we oli joen wetem ol Kristin we tabu spirit i makemaot olgeta mo oli givhan long olgeta. Ol man blong bigfala kampani ya oli “pastru long bigfala trabol,” nao bambae oli stap long wol ya taem Mesaea King i mared long woman blong hem long heven. (Revelesen 7:​9, 13, 14, NW) Long spesel taem ya, ol man blong bigfala kampani ya bambae “oli glad we oli glad.”

45:​16 (NW)​—?From wanem vas ya i talem se ol bubu blong king bambae oli kam ol pikinini blong king ya? Taem Jisas i bon long wol, hem i gat ol olfala bubu blong hem long wol ya. Long fiuja, taem Jisas i rul blong Wan Taosen Yia, bambae hem i mekem ol man ya blong bifo oli laef bakegen long ded. Long taem ya, olgeta ya bambae oli kam ol pikinini blong Jisas. Mo sam long olgeta ya bambae hem i putumap blong oli kam “prins long olgeta ples long wol.”

50:2​—?From wanem vas ya i talem se Jerusalem hem i “gudfala ples we i gud tumas”? Hemia i no minim se prapa taon ya Jerusalem hem i wan naesfala taon. Samting we i mekem se Jerusalem i naes tumas, hemia se Jeova i yusum taon ya mo i putum glori blong hem long taon ya taem hem i putum tempol blong hem long ples ya mo i mekem i kam bigfala taon blong ol king we hem i putumap.

Ol Lesen Blong Yumi:

42:​1-3. Man ya long laen blong Livae, i wantem tumas blong mekem wosip long Jeova, olsem wan anamol long draeples we i tosta tumas i wantem dring. Hem i harem nogud tumas se hem i no save wosipim Jeova long haos prea blong Hem, nao ‘wota blong ae blong hem nomo i kakae blong hem,’ long dei mo long naet. Yes, from we man ya i harem nogud tumas, hem i no wantem kakae. I gud sipos yumi tu, yumi wantem tumas oltaem blong wosipim Jeova wetem ol Kristin brata sista blong yumi.

42:​4, 5, 11; 43:​3-5. Sipos wan samting i hapen we i mekem se yumi no save joen wetem Kristin kongregesen blong smoltaem, i gud yumi tingtingbak long ol gudgudfala taem we yumi bin spenem wetem ol Kristin brata sista blong yumi long kongregesen, samting ya i save givim paoa long yumi. I tru, maet fastaem ol memori olsem oli save mekem yumi sore mo yumi harem nogud, be, ol memori ya oli sud mekem yumi tingting tu, se God hem i sefples blong yumi mo yumi mas wet oltaem long hem blong i sevem yumi.

46:​1-3. Nomata wanem bigbigfala trabol i save kasem yumi, yumi mas gat tras we i fulwan se ‘God hem i sefples blong yumi mo i paoa blong yumi.’

50:​16-19. Man we i stap giaman mo i stap mekem ol fasin we oli nogud, hem i no gat raet nating blong mekem wok long nem blong God.

50:20. I nogud blong hareap oltaem blong tokbaot mastik blong narafala. I moagud we yumi rere blong fogivim olgeta.​—Kolosi 3:13.

‘MI PUTUM TINGTING BLONG MI I STAP LONG GOD NOMO, NAO MI SAVE WET LONGTAEM LONG HEM’

(Ol Sam 51:​1–71:24)

Ol Sam ya oli stat wetem prea we Deved i mekem wetem fulhat blong hem afta we hem i mekem bigfala sin ya blong slip wetem Batseba. Sam 52 kasem 57 i soem se bambae Jeova i sevem olgeta we oli putum wari blong olgeta long hem mo we oli luk long hem blong i sevem olgeta. Ol Sam 58 kasem 64 oli soem se long olgeta taem ya we Deved i trabol bigwan, hem i lukluk i go long Jeova olsem sefples blong hem. Deved ya i singsing se: “Oltaem mi mi putum tingting blong mi i stap long God nomo, nao mi save mekem tingting blong mi i longfala, mi save wet longtaem long hem, blong kasem ol samting we tingting blong mi i stap long hem.”​—Ol Sam 62:5.

Taem yumi frengud wetem God ya we i naf blong Sevem yumi, ale bambae yumi wantem tumas blong “sing blong leftemap nem blong hem.” (Ol Sam 66:2) Long Sam 65, Deved i presem Jeova taem i talem se hem i wan God we i givim ol samting we ol man blong hem oli nidim. Long Sam 67 mo 68, hem i talem se God i mekem ol bigfala wok blong sevem man. Mo long Sam 70 mo 71, hem i tokbaot God se i stap Wokem Rod blong tekemaot man long trabol.

Ansa Blong Sam Kwestin Long Saed Blong Baebol:

51:​12 (NW)​—?Taem Deved i tokbaot “spirit we i mekem se mi wantem obei,” wanem spirit ya? Hemia i no minim fasin blong God we hem i glad blong halpem Deved mo i no minim tabu spirit blong Jeova tu, be i minim tingting blong Deved nomo. Deved i stap askem long God blong i mekem we hem i wantem blong mekem samting we i gud.

53:1​—?From wanem ol man we oli talem se i no gat God nating “oli no gat hed”? Taem vas ya i tokbaot man we i no gat hed i no minim man we i no skul mo i no gat save. Nogat. Hem i minim man we i no yusum tingting blong hem blong luksave mo mekem fasin we i gud. Hemia nao we Sam 53:​1-4 i soem taem i tokbaot ol man we oli stap mekem ol samting nogud.

58:​3-5​—?Weswe rabis man i sem mak long posen snek? Ol giaman stori we rabis man i stap talem long saed blong narafala, oli olsem posen blong snek. Ol giaman stori ya oli spolem gudnem blong ol man, olsem we posen i spolem man we snek i kakae. Ol rabis man ya oli no wantem lesin long advaes mo long ol tok we narafala i givim blong stretem nogud fasin blong olgeta. Oli “blokem sora blong olgeta olsem posen snek ya we sora blong hem i fas.”

58:7​—?Olsem wanem rabis man bambae i “lus olsem wota we i kafsaed i go long sanbij”? Ating Deved i stap tingbaot ol reva we oli stap ron long medel blong ol hil long Promes Lan. Samtaem, bigfala ren i mekem wan reva i solap nao wota blong hem i kavremap graon no sanbij raon long hem, be ol wota ya oli lus kwiktaem nomo. Taswe Deved i yusum pijatok ya taem hem i prea se God i mas finisim ol rabis man kwiktaem.

68:13​—?Wanem ya “ol pija blong sotleg we oli flasem long silva, mo we wing blong olgeta i saen from we oli flasem long gol”? Sam sotleg we kala blong olgeta i blu mo grei lelebet oli gat feta we i saen smosmol olsem kala blong renbo. Taem laet blong san, we i olsem kala gol, i saen long ol feta ya, ol feta ya oli luk olsem silva. Ating Deved i stap tokbaot ol soldia blong Isrel taem oli kambak long wan faet we oli winim, se oli luk olsem ol sotleg ya we wing blong olgeta i strong blong flae mo oli saengud. Sam man we oli stadi long saed blong mining blong ol tok blong Baebol oli talem se ating tok ya i save minim tu, wan naes samting we man i wokem blong flasem haos, we maet ol man Isrel oli bin tekem long narafala kantri taem oli winim faet. Be nating se i olsem wanem, i klia se taem Deved i talem tok ya hem i stap tingbaot olgeta faet we Jeova i mekem se ol man blong hem oli winim.

68:​18 (NW)​—?Hu ya ol man we ‘oli olsem presen’? Hemia sam long ol man we ol man Isrel oli winim olgeta long faet taem oli kam long Promes Lan, mo oli tekem ol man ya oli go kalabus. Biaen, ol man ya nao oli halpem ol Livaet long wok blong olgeta long tempol.​—Esra 8:20.

68:30​—?Wanem mining blong tok ya se ‘yu tok strong long algita we i stap haed long ol longlongfala gras ya long wota’? Deved i yusum tok ya algita olsem pijatok blong tokbaot ol enemi blong ol man blong God. Hem i askem God blong i tok strong long olgeta, minim se God i mas blokem olgeta blong oli no gat paoa blong spolem ol man blong hem.

69:​23 (NW)​—?I minim wanem se ‘yu mekem ol hip blong olgeta i seksek’? Ol masel long hip, hemia long ples we man i fasem strap blong hem, oli impoten from we oli halpem man blong mekem bigfala wok olsem pikimap mo karem ol hevi samting. Sipos ol hip i seksek, i minim se man i lusum paoa blong hem. Long vas ya Deved i stap prea se ol enemi blong hem oli lusum paoa.

Ol Lesen Blong Yumi:

51:​1-4, 17. Taem yumi mekem sin, maet yumi ting se yumi kam olsem strenja nomo long lukluk blong Jeova God, be yumi save blokem samting ya. Sipos yumi tanem tingting blong yumi, yumi save sua we bambae hem i sore long yumi.

51:5, 7-10. Sipos yumi mekem sin, yumi save prea long Jeova blong i fogivim yumi from we taem yumi bon yumi sinman finis. Mo tu, yumi mas prea long hem blong i mekem yumi klin bakegen, i mekem yumi kambak long stret rod, mo i halpem yumi blong sakemaot olkaen tingting we oli save pulum yumi blong mekem sin, nao yumi save gat wan tingting we i stap strong long rod we i stret.

51:18. Ol sin blong Deved oli spolem ful neson blong Isrel. Taswe hem i prea se God i kaen long Saeon. Taem yumi mekem wan bigfala sin, plante taem sin ya i sakem doti long nem blong Jeova mo long kongregesen tu. I gud yumi prea long God blong hem i klinimaot doti ya we sin blong yumi i mekem.

52:8. Sipos yumi obei long Jeova mo yumi rere blong letem hem i stretem yumi, yumi save stap olsem wan “olif we i stap gru long yad blong haos blong God.” Hemia i minim se yumi stap klosap long Jeova mo yumi karem gudfala frut long wok blong hem.​—Hibrus 12:​5, 6.

55:​4, 5, 12-14, 16-18. Stret pikinini blong Deved, hemia Absalom, i mekem plan agensem papa blong hem blong tekem ples blong hem olsem King. Afta, man blong givim advaes long Deved, hemia Ahitofel, we Deved i trastem gud hem, i tanraon agensem Deved. Ol samting ya oli mekem Deved i harem nogud bigwan. Be nating se i olsem, Deved i trastem Jeova yet. Taem yumi kasem wan trabol we i mekem yumi soa we i soa tumas long filing blong yumi, yumi no mas lego tras long God.

55:22. ?Olsem wanem blong putum ol trabol blong yumi long Jeova? Yumi save mekem olsem sipos (1) yumi tokbaot trabol ya long hem tru long prea, (2) sipos yumi lukaot help blong hem tru long Baebol mo ogenaesesen blong hem, mo (3) sipos yumi mekem samting we yumi naf blong mekem blong traem winim trabol ya.​—Ol Proveb 3:​5, 6; 11:14; 15:22; Filipae 4:​6, 7.

56:8. Jeova i savegud ol samting we oli stap hapen long laef blong yumi, be hem i savegud tu se kil we ol trabol ya i givim long filing blong yumi i bigwan olsem wanem.

62:11. God i no nidim blong kasem paoa blong hem long wan narafala ples. Hem nomo i stamba blong olgeta paoa. ‘Paoa i blong hem.’

63:3. God i “lavem” yumi, mo fasin ya blong hem i gud moa i ‘winim laef.’ Yes, sipos God i no lavem yumi, bambae yumi laef blong nating nomo, bambae i no gat risen blong laef. Taswe, i waes blong lukaot rod blong kam fren blong Jeova.

63:6. Naet i wan taem we i kwaet mo i no gat plante samting i stap hapen blong pulum tingting blong yumi, taswe hem i nambawan taem blong tingting dip.

64:​2-4. Fasin blong toktok nogud long saed blong wan man i save spolem gudnem blong man ya we i no mekem wan rong nating. Yumi no mas lesin long olkaen nogud stori olsem, mo yumi no mas go olbaot blong talemaot ol stori ya.

69:4. Samtaem maet i waes blong talem sore long man, nating se yumi no ting se samting we yumi mekem i rong. Olsem nao, yumi “givimbak” samting long hem from we yumi wantem holem pis.

70:​1-5. Jeova i harem, taem yumi krae long hem blong i halpem yumi. (1 Tesalonaeka 5:17; Jemes 1:13; 2 Pita 2:9) Maet hem i letem wan traem i stap, be bambae hem i givim waes we yumi nidim blong yumi naf blong gohed mo stanap strong longtaem. Neva bambae hem i letem wan traem i kasem yumi we yumi no naf blong winim.​—1 Korin 10:13; Hibrus 10:36; Jemes 1:​5-8.

71:​5, 17. Taem Deved i yangfala yet, hem i trastem Jeova. Samting ya i halpem hem blong wokem fasin no fraet mo i mekem tingting blong hem i strong bifo we hem i fesem bigfala man Filistia ya, Golaeat. (1 Samuel 17:​34-37) I gud sipos ol yangfala oli lanem fasin blong trastem Jeova oltaem long evri samting we oli mekem.

‘BIGFALA PAOA BLONG YU BAMBAE I KAVREMAP OLGETA PLES LONG WOL YA’

(Ol Sam 72:​1-20)

Laswan Sam long Buk Tu, Ol Sam 72, hem i sing long saed blong taem we Solomon i rul. Rul blong hem i olsem pija blong taem ya we Mesaea bambae i rulum wol. Sam ya i tokbaot sam nambawan blesing we bambae oli kamtru. !Bambae i gat pis, i no moa gat man i harem nogud aninit long han blong narafala man mo i no moa gat raf fasin, mo bambae i gat plante kakae olbaot long wol! ?Yu bambae yu stap long taem ya blong haremgud long olgeta blesing we Kingdom bambae i mekem? Yumi save stap long taem ya sipos yumi mekem olsem ol tok blong Sam ya i talem se, yumi putum tingting blong yumi i stap long Jeova, yumi mekem hem i olsem sefples mo paoa blong yumi.

Long “en blong ol prea blong King Deved” i gat ol tok ya se: “[Jeova], yu yu God blong mifala ol laen blong Isrel, mo mifala i presem yu. Yu nomo yu save mekem ol bigbigfala wok ya. Oltaem bambae mifala i stap presem hae nem blong yu, gogo i no save finis. Mifala i wantem we bigfala paoa blong yu we yu yu King, bambae i kavremap olgeta ples long wol ya. !Amen! !Amen!” (Ol Sam 72:​18-20) I gud yumi mekem sem mak. Yumi presem Jeova long fulhat blong yumi mo yumi leftemap hae nem blong hem.

[Tok blong pija long pej 29]

?Yu yu save hu ya “gel blong king”?

[Tok blong pija long pej 30]

Oli kolem Jerusalem se “gudfala ples we i gud tumas.” ?Yu save from wanem?